Read San Marcos 8

San Marcos8zat_wbt

Dxugagu Jesús chua gaxúa benne' biu

¹Ca lu zra ca' zaj nazraga benne' zan, na' quebe bi de̱ da xelawe̱'. Ca'an guca gunné̱ Jesús benne' ca' dxusé̱dene̱', na' guzre̱' le̱':²―Neda' dxexache lazra' benne' caní lawe' da bache guca chunna zra zaj zre̱'e̱ nigá nen neda', ne quebe bi de̱ da xelawe̱'.³Che ca' xesel-la' le̱' lizre̱' quebe xelawe̱', na' xelate ni'a ne̱'e̱ la neza lawe' da zá'aca bal-le̱' zitu'.⁴Na' belexeche̱be benne' ca' dxuse̱de Jesús, dxelé̱'e̱ Le̱': ―¿Ájazra gundxu gunézrujdxu da xelawe̱' nigá, ga quebe nu chilá' benne'?⁵Jesús bche̱be̱' le̱': ―¿Bal-la xeta xtila nápale le'e? Benne' ca' gulenné̱': ―Gazre na.⁶Nadxa gunná be'e Jesús xelebé' xúgute̱ bénneache ca' lu xu. Nadxa guqué̱'e̱ xeta xtila, ne guzre̱' Dios: ―Xcalenu'. Nadxa bzúzruje̱' na, ne bnézruje̱' na benne' ca' dxusé̱dene̱', na' benne' caní gulísie̱' na láwela xúgute̱ bénneache ca'.⁷Zaj nápaqueze̱' tu chupa béladau'. Na' Jesús gunabe̱' Dios gune̱' na chawe'. Nadxa gunná bé'ene̱' gulise benne' ca' le̱ na.⁸Gulagu xúgute̱ bénneache ca', ne belezúale̱'e̱ chawe'. Ca gudé na' bulusuzré̱'e̱ gazre xcuite xca'a nen xeta bizruj da belegá'ana.⁹Benne' ca' gulawe̱' zaj naque̱' ca chua gaxúa benne' biu. Nadxa Jesús bze̱' benne' ca' dizra'.¹⁰Nadxa guxú'e̱ lu da dxedá lawe' nísadau' nen benne' ca' dxusé̱dene̱'. Xjaque̱' lu xe̱zr la xu chee̱ benne' xe̱zre Dalmanuta.

Dxelenabe̱' Jesús gune̱' tu xel-la waca

¹¹Nadxa belezrín benne' xudau' fariseo ca' ga na', ne gulezú lawe̱' dxulutil-le̱' dizra' nen Jesús. Gulenabe̱' Jesús gune̱' tu xel-la waca da za xabáa, chee̱ xelenézene̱' bi xel-la waca nape̱'.¹²Nadxa Jesús gucá'a dxgua lazre̱', gunné̱': ―¿Bizr chee̱ na' dxelenaba benne' caní guna' tu xel-la' waca da za xabáa? Da li dxapa' le'e, québequeze bi xel-la waca guna' lau le'e.¹³Nadxa Jesús bca'ane̱' benne' ca', na' bexu'e̱ lu da dxedá lawe' nísadau', dxexíaje̱' xechelá'a chee̱ nísadau'.

Da naca ca cua zichaj chee̱ xeta xtila

¹⁴Gulal-la lazre' benne' ca' dxuse̱de Jesús xelu'e̱ da xelawe̱', na' zaj nu'e̱ tuze xeta xtila lu da dxedá lawe' nísadau'.¹⁵Nadxa Jesús gunná bé'ene̱', dxe̱'e̱ benne' ca': ―¡Le nna'xque nigá! Le guxúe cuínale da naca cua zichaj chee̱ xeta xtila chee̱ benne' xudau' fariseo ca', ne ca naca cua zichaj chee̱ xeta xtila chee̱ Herodes.¹⁶Nadxa benne' ca' dxuse̱de Jesús gulé̱ ljwezre̱': ―Le̱' dxenné̱' caní lawe' da quebe de̱ xeta xtila gágudxu.¹⁷Dxeque be'e Jesús da dxelenné̱', na' guzre̱' le̱': ―¿Bizr chee̱ na' dxennale quebe de̱ xeta xtila gágudxu? ¿Quebe ne chéajni'ile ne quebe dxeque be'ele? ¿Nácale̱'e̱ zide' lázrdaule?¹⁸¿Quebe dxelé'ele nen xiaj laule, ne quebe dxenle nen nágale? ¿Quebe dxeajsá lázrele?¹⁹Gate na' bgawa' chi xun gaxúa benne' biu nen gazxu' xeta xtila, ¿bal-la xcuite xca'a xeta bizruj da becá'ale? Benne' ca' gulenné̱': ―Chazrinnu na.²⁰Na' gunná Jesús: ―Na' gate na' bgawa' chua gaxúa benne' biu nen gazre xeta xtila, ¿bal-la xcuite xca'a da zaj zrate̱ becá'ale? Le̱' gulenné̱': ―Gazre na.²¹Nadxa Jesús guzre̱' benne' ca': ―¿Ne la gázqueze quebe dxéajni'ile?

Jesús dxexune̱' tu benne' la chul-la

²²Ca gudé na' Jesús, ne benne' ca' dxusé̱dene̱' belexezrine̱' lu xe̱zre Betsaida, na' benne' Betsaida guleché̱'e̱ tu benne' la chul-la lau Jesús, na' gulata' xuene̱' Le̱' guté̱' le̱'.²³Jesús gudele̱' na' benne' la chul-la, ne bebéaje̱' le̱' dxu'a xe̱zre. Na' btupe̱' zrene̱' lu xiaj lawe̱', ne guxrúa ne̱'e̱ le̱'. Na' bche̱be̱' le̱' chete dxelé'ene̱'.²⁴Benne' la chul-la gunné̱'e̱, na' gunné̱': ―Dxelé'eda' benne' ca', zaj naque̱' ca weaj xaga, na' dxesí'aque̱'.²⁵Nadxa Jesús guxrúa ne̱'e̱ xiaj lawe̱' da xula, na' benne' na' gunná' dxgüe̱'. Na' bexaque̱', ne xúgute̱ bache dxelé'ene̱' cháwedau'.²⁶Nadxa Jesús besel-le̱' le̱' lizre̱', dxe̱'e̱ le̱': ―Quebe chu'u lu xe̱zre nigá, ne quebe nu xu'u caní.

Pedro dxenné̱' naca Jesús benne' nasel-la Dios

²⁷Ca gudé na' Jesús, ne benne' ca' dxusé̱dene̱' xjaque̱' lu xé̱zredu ca' zaj nababa xe̱zre Cesarea naga dxenná bea Filipo. Dxácate̱ zaj xu'e̱ neza bche̱be Jesús benne' ca': ―¿Nuzra na' dxelenná benne' naca' neda'?²⁸Belexeche̱be̱': ―Bal-la benne' dxelenné̱' nacu' Juan, bénnea' bchue̱' bénneache nisa. Benne' xula dxelenné̱' nacu' Elías, bénnea' bchálaje̱' waláz chee̱ Dios. Benne' xula dxelenné̱' nacu' tu benne' xula bchálaje̱' waláz chee̱ Dios.²⁹Nadxa Jesús bche̱be̱' le̱': ―¿Gazra le'e? ¿Nuzra dxennale le'e naca' neda'? Pedro gunné̱': ―Lue' nacu' Cristo, benne' nasel-la Dios.³⁰Nadxa gunná be'e Jesús benne' ca'. Gunné̱': ―Quebe nu xe̱le ca'.

Dxuchalaj Jesús ca dxal-la' gatie̱'

³¹Nadxa guzú lau Jesús dxulé'ene̱' benne' ca' ca dxal-la' sáca'le̱'e̱ Le̱', Benne' Gulje̱' Bénneache, ne ca xelún benne' gula chee̱ judío ca', ne benne' xíchaje̱ ca' chee̱ bxruze ca', ne benne' dxuluxuzájle̱'e̱ da nadxixruj bea Dios, xuluzúe̱' Le̱' chalá'ala. Nadxa guzre̱' le̱' welútie̱' Le̱', san xebane̱' zra guxunne zra.³²Da nigá guzre̱' le̱' caníqueze. Nadxa Pedro guché̱'e̱ Jesús chalá'ala, ne guzú lawe̱' dxedil-le̱' Le̱'.³³Jesús bexéchaje̱', ne gunné̱'e̱ benne' ca' dxusé̱dene̱', na' gudil-le̱' Pedro, dxe̱'e̱ le̱': ―Gucuasa cuita' nigá, lue', da xriwe̱'. Quebe dxéquenu' da nigá ca dxun Dios. Ca dxun bénneache dxunu'.³⁴Nadxa Jesús gunné̱' benne' ca' dxusé̱dene̱', ne xúgute̱ bénneache ca', na' guzre̱' le̱': ―Che núlale dxaca lázrele gunle neda' tuze, dxal-la' guzúale chalá'ala xúgute̱ da dxezá lázrele le'e, ne gácale ca tu benne' zéaje̱' chee̱ te̱'e̱ xaga béguaj, na' gunle neda' tu zren.³⁵Che tu benne' dxaca lazre̱' guselé̱' xel-la nabán chee̱', benne' nigá gunitie̱' xel-la nabán chee̱'. Bénnea' gunitie̱' xel-la nabán chee̱' ne̱ chia' neda', ne ne̱ chee̱ dizra' chawe' chia', benne' nigá guselé̱' xel-la nabán chee̱'.³⁶Che tu benne' gape̱' xúgute̱ da naca chee̱ xe̱zr la xu nigá, na' gunitie̱' bénne'du xu'e̱, ¿bízraqueze da ba neza gaca na chee̱ bénnea'?³⁷Quebe bi gaca gunezruj tu benne' chee̱ guselé̱' bénne'du xu'e̱.³⁸Che tu benne' gapa stu'e̱ chia' neda', ne chee̱ dizra' chawe' chia' lau bénne' caní, benne' dxulucá'ana Dios, ne dxelún dul-la, la gaze neda', Benne' Gulje̱' Bénneache, gapa stú'queza' chee̱ bénnea' gate xida' nen xel-la szren chee̱ Xra', ne nen gubáz chee̱ xabáa lá'azxa ca'.