1Iesu apapaali biaa xolot ma ga mula laa lalon xan inaman laba tsaa mii xan no tsi asasing.2Sin Saabat, asingan no inaman lalon anua sausawit. No daan inaman di alongmen, di suk tunga. Di we, â Itaa adi balawaa no asasing ta asingan no inaman taman? Saa tali balawaa sinaae sin ia, ngali xosaraa abala no mat axixila?3Ia mu iwaa untunumar. Iwaa mu xan tsi Maria ma ia xan no taamat ilaa Jeims, Josis, Judas ma Saimon. Ma no moton bala di mii gita.â No inaman di ga bal tsaxa ngali ia.4Iesu ga paare ngali di, â No inaman xaal sin xan inaman laba xa propet, di ba xap manglen ia.â5A xap pupua ngali xosaraa xaa axixila na xudu atia. Biaa mu ga aturungi liman papan nen inaman minet mu, ma ga atoaa di.6Ma Iesu ga suk tunga sin ta xap xadi xa tinaalnge. Mil ga baais laa sin no xobel xuxuuk.
Iesu a tulen xan no tsi asasing
7Iesu a ilei axumuli sangaul ma ga laa lua ina xan no tsi asasing ma ga tulen di laa alualua. Ma ga tali banam sin di, ngali saali no salawa tsaxa.8Asaaiti di weaatalaa: â Sin abala nagim ines gim nangaam adi xawas, gim adi mu xudak ina eses. Nangaam adi xa tsoki ma xa tutuel, ma xa xuxute lalon num biaal.9Tamtuel lalon no bubut ma na xap xa laplap bula.10Nawe gim tsiga lalon xa anua, manman atia, a pupua gim ta papaalii abia inaman laba.11Nawe xa xobel a xap suei atatoni gim o di xap lolong sin gim, gim na panlii kuku sin no xaden gim nawe gim tapaas papaalii di. Balawaa papaare leng ngali epuske mii di.â12Ma xan no tsi asasing di ga laa baais sin no inaman ngali di na puxisbal.13Di saali no daan salawa tsaxa, ma di ga patsaa daanwe papan no daan minet ma di ga atoaa di.
Jon Unaaxaxadaan amet
14King Erot tii alongmen abala we, no inaman araraa di se atik axaautsi iesan Iesu. Biexaal di we, â Jon unaaxaxadaan, a se tapaas mula sin minet ma biaabi no axixila xoror watwat ga taxaa lalon ia.â15Biexaal di we, â Ia Elaija.â Biexaal di we, â Ia propet a malen xa ina no propet in ti laamua.â16Oro biaa Erot ta longmien abala, asuk we, â Iwaa Jon, iaa ta iritlii xuan, a sebula tapaas mula sin minet!â17Erot tsaa tii tali papaare watwat ngali laa pitsi Jon ma di ga laa aturungi lalon anua lodo. Ga xosaraa abala namaang ngali atatoni Erodias. Pilip iwaa xan taamat tii maxis sin ia, oro talaawaa Erot a sebula maxis sin.18Jon tii asaaiti Erot ga we, â Asuk xap tutiik ngali u ba maxis sin xan tubu turumasen iu.â19Balawaa totore a xosaraa Erodias ga ngutsulen buxaai Jon ma ga saan ngali sas amantei ia. Oro tii xap pupua20amuina Erot amatinai Jon ma ga saan ngali tilkaali ia, amuina atii Jon ia taamat tutiik ma taamat pat. Biaa Erot ta alongmen Jon, tii suk adodo xuduxudu, oro tii saan tsaa ngali alongmen ia.21Leng so a se tsap, sin leng so nagaa ta taxaana ia, Erot ga xosaraa xariin luxaal, ngali no lalaamua ina gawaman, no lalaamua ina unmakmaxil, ma no taamat laba in Galili.22Biaa xan tsaana Erodias tii xaalame ma ga le tiili, tii suk atatoni Erot ma biaa no xibong ina abia luxaal. Ma King Erot ga paare sin iwaa tsaana, â U na ningi iaa ngali sawe u ta saan ngali, ma iaa ba tali susum.â23Ma ga xubatsi sin ia, â Samaarang u ta atsuraa iaa ngali, iaa ba tali xolot axuuk ina aluaina nugu Maradaan sin iu.â24Tsaana a laa sangan xan nagaa ma ga laa atsuraa ia, â Sen maarang iaa ba ningi sin King?â O xan nagaa ga xisi, â Atsuraa ngali xuan Jon unaaxaxadaan.â25Tiwaa tsaa, tsaana a isagaa laa sangan king taman xan atsutsura; â Iaa saan ngali u na tali xuan Jon unaaxaxadaan papan xa palet talaawaa tsaa.â26King asuk lolbiir buxa, oro amuina tii se xubatsi mii iwaa tsaana ma xan no xibong ina abia luxaal di alongmen bula, King Erot ga xap pupua ngali puxislii sa ta atsuraa ngali.27Tiwaa tsaa King a tulen iexa asilalxadek ngali laa adi xuan Jon xaalame. Asilalxadek a laa ma iritlii xuan Jon lalon anua lodo,28ma ga alet mulangenai xuan Jon lalon palet. King a tali sin tsaana, ma ga tali laangen sin xan nagaa.29Xan no tsi asasing ilaa Jon, di alongmen abala maarang ta tsap, o di ga xaalame ma le adi xan pakpak ma di ga laa aturungi lalon io.
Iesu atabali 5,000 ina taamat
30No aposal, di til ulti Iesu ma di ga atolomi sin ia taman no maarang araraa di tii se xosaraa ma asingan no inaman taman.31Amuina sin no daan inaman di ta xaxaalame ma mulamula, Iesu mii xan no tsi asasing, di ga xap pupua ngali angen. Ga paare sin di, â Gim xaalame xasinge mii iaa sin xa xolot ta man adamis ma gita na iaawis.â32Ma di ga xaa laa papan mono di xasinge laa sin xobel biil.33Oro no daan inaman di tii lasi we di se laa ma di ga nanxilalaa di ma di ga sol xaal lalon abia no inaman laba araraa ma di laa tsap laamuangen di.34Biaa Iesu ta tsal ma ga lasi malep, asuk ie biirbirum ngali di amuina di malen no sipsip ta xap xadi xa untilaamamil. Ma ga atiltsoli ngali asingan di taman no daan maarang.35A se nale sin abia leng, o xan no tsi asasing di ga xaalame sangan ia, di ga we, â Balawaa xobel biil, ma a se nale buxa.36Se tulen no inaman laa, ngali di ba laa lalon no xobel xaatsap ulti gita ngali uuli xadi xaa was ngali ngani.â37Iesu ga xisi di ga we, â Gim na tali xaa was ngali di ba ngani.â Di ga asaaiti ia, â Giem xap pupua ngali uuli xaa tsoki pupua ngali tabali abala no inaman! Balawaa xuxute a malen iliil ina xa taamat ta taxaa watwat no uleng apaasaatuul. U saan ngali giem ba lii xariin xuxute ngali uuli xaa tsoki biaa ta pupua ngali di araraa?â38O Iesu ga atsuraa di, â Aisa no tsoki biaa? Gim laa nanen.â Biaa di ta laa atik tatanginai, di xaalame sin, di ga we, â Alima no tsoki ma alua no xoo.â39Mil Iesu ga paare ngali xan no tsi asasing, ngali asaaiti no inaman di na tsotso lalon no xumkumul papan no palis xarawaak.40O no inaman di ga tsotso lalon no xumkumul ina no sangaul alima, ma no sangsangaul.41A adi abia no tsoki ta lima ma no xoo ta lua ma ga nanen xale lapalaa balalangit ma ga putsangi axaau, ma ga tsabaxi no tsoki ma ga tali no sin xan no tsi asasing ngali di ba tabali no inaman. Mil ga exasen bula no xoo ta lua labatina di araraa.42No inaman se araraa di angen ma di ga se maas.43No tsi asasing di tuali sangaul ma ga laa lua ina xiis taman no ngaalngaal ina tsoki ma xoo.44Xoxot ina no taamat di tii se angen tii 5,000.
Iesu a eses lapalaa papan daan
45Tiwaa tsaa Iesu asaaiti xan no tsi asasing ngali di na pis xaa papan mono ma di na laamuangen ia laa Betasaida o ia na axatsapen abia xumkumul.46Mulina ta papaalii di, asuk laa lapalaa sin gelgel ina buk ngali sawit.47Biaa ta se nale bingbing, mono a se bebe labatina daan ulis o ia xasinge tsaa, tia xuen.48Tii lasi no tsi asasing di ta se xaao sin alulusa, amuina maal a epuske mii di. Sin nanaaet ina xoxo nabing, atsuul ma ga eses lapalaa papan abia daan ulis laa sangan di. Nap dokdok mu naba se es liwaa di,49o no tsi asasing di ga lasi ia ta eses papan daan ulis, di ga sorowe xa gaas ma di ga suk xuup,50amuina di araraa di se lasi ia, ma di ga suk mataa. Tiwaa tsaa Iesu ga paare ngali di, â Gim na watwat! Iaa mu! Gim na xap mataa.â51Mil ga en papan mono mii di o maal ga met. No tsi asasing di suk tunga buxa.52Di tii se lasi ia ta xosaraa axixila ina no tsoki ta lima, ma di xap leng sin abia, amuina xadi no butsa tii taban.53Biaa di ta se tabaxi daan ulis laa xaatalaa, di suk laa tsal Genasaret ma di ga pitsi mono atia.54Biaa di ta tsuul papan mono a xap sauna mu no inaman di suk nen xilalaa Iesu.55Di sol laa lalon no xolot araraa ma di ga atsaxei no minet papan no xapat biaa di ta se longmien no sen xolot ta manman tia.56Sin no sen mat xolot Iesu a laa sin, lalon no xobel ma no inaman laba, di xaa le aturungi no minet lalon no xolot susune. Ma di ga ningi awatwati ia ngali di na taana mu barangutsina ina xan uga disdis. Ma biaa di, di ta taana ia, di tii suk tuo.