1Iesu ma xan no tsi asasing di tabaxi daan ulis laa lalon xolot ina Gerasin.2Biaa Iesu ta tsuul papan mono, sauna mu iexa taamat taman tanua tsaxa a tsuul xaal lalon io ngali le sabasue ia.3Ilawaa taamat a manman lalon abia no io ma asuk xap xa na pupua ngali rotsi taman xa tsen.4No daan leng no inaman di rotsi no liman ma no xaden taman tsen oro, a xaa tigiri amutmuti no tsen sin no xaden. A xap xa na watwat pupua ngali epuske ma abonga ia.5Sin no siaat ma sin no bing, a xaa es labatina no io ma ga xaa laa papan no buk ma ga xaa xuupkup ma tae no isuaan sin no xaat ta irom.6Biaa ta lasi Iesu palpalaa tsaa iwaa taamat asuk sol laa sangan ia ma ga sage putput laamuaan ma ga xuup lot,7â U wena xosaraa sa sin iaa, Iesu, xan Tsi Moroaa lapalaa suk se? U na puris sin Moroaa we u ba xap asosongi iaa!â8Amuina Iesu ga paare ngali, â Iu tanua tsaxa, u na tsuul alen aila taamat.â9O Iesu ga atsuraa ia, â Saa iesaam?â Taamat a xisi, â Iesaaga ilaa Legion, amuina giem suk xudu.â10Ma iwaa taamat a sebula ma a sebula ningi Iesu ngali naba xap tulen atsuulngi di xaal, sin abia xolot.11Biexa xariin xobel bol, di tabali di papan buk atataaen abia xolot.12Biaa no salawa tsaxa di ningi Iesu, â Tulen giem laa labatina no bol ngalibi giem ba pupua ngali tsigaii di.â13Iesu ga sirawaa di ma no salawa tsaxa di tsuul alen aia taamat ma di ga tsigaii no bol. Biaa xobel bol araraa a malen 2,000 di tii ga esole laa lapula sin soriri ina buk laa lalon daan ulis ma di tii ga suk liaan.14Biaa no untilaamamil sin xobel bol, di lasi abia ma di ga suk sol ma di ga atolomi abala sin inaman laba ma no xolot atataaen xobel laba, no inaman di tii xaalame ngali le lasi semaarang tii tsap.15Biaa di tii xaalame sangan Iesu, di lasi aia taamat no salawa tsaxa di tii ben tsigaii, a se xalkale tia ma ga se alen axaautsi xan laplap ma xan adodo a se tutiik ma di tii ga suk mataa.16Biaa no inaman di tii lasi sen maarang Iesu tii xosaraa, di asaaiti biexaa inaman taman abia maarang tii tsap sin iwaa taamat biaa no salawa tsaxa di tii ben tsigaii ma biaa xobel bol bula.17Ma no inaman di ga ningi Iesu ngali na papaalii xadi xolot.18Biaa Iesu tii es en laa papan mono, iwaa taamat, Iesu tii ben saali no salawa tsaxa sin, a ningi Iesu ngali naba laa mii ia.19Iesu tii xap papaalii ia, oro ga asaaiti ia, â Laa tataam sangan num matenaanua ma iu naa asaaiti di taman xan watwat Orong biaa ta se xosaraa ngali iu ma tii sen tali we xan biirbirum sin iu.â20Ma taamat ga laa ma paare leng Dekapolis,aisa no maarang Iesu tii se xosaraa sin ia. Ma no inaman araraa di tii ga suk olol buxa.
Tsaana ta se met ma aina ta maramase
21Biaa Iesu ta se tabaxi daan ulis sebula papan mono ngali mula laa sin biexa papel ina daan ulis. Lan abia xolot, xariin malep di exumule ulti ia, sin tii manman sangan daan ulis.22O iexa lalaamua ina anua sausawit iesan Jairus, a xaalame lalon abia xolot, ga lasi Iesu ma ga sage putput laamuaan.23Ma ga ningi Iesu we, â Nugu tsaana dokdok a se atat ngali met. Timaa xaalame ma u na aturungi no limaam papan ia ngalibi naba tuo ma naba tino.â24Ma Iesu ga laa mii aia lalaamua ina anua sausawit. Xaraxin malep di amusili Iesu ma di ga esurut ulti ia.25Iexa aina tia, tii manman taman minet ina nanxaskas sin no miet ta sangaul axuuk ma ga laa lua.26Tii taana xaraxin sosong xaal sin no daan untubatuba di tii xonon ngali tiltsomi ia ma ga se araraai xan no xuxute sin di, oro tii suk tsap tsaxa buxa.27Ma biaa tii lolong xaa sin Iesu, asuk xaalame mulina ia, ma ga taana xan laplap.28Aina tii adodo, â Nawe iaa taana mu xan laplap, iaa ba tuo.â29Tiwaa tsaa, biaa dal asuk xap. Asuk saaen sin no isuaan we, a se leiwaa sin xan sosong.30Tiwaa tsaa, Iesu a xilalaa we, biaa xoror atsuul alen ia. Ma ga putsi ma atsura, â Saa taxaane nugu laplap?â31Xan no tsi asasing di xisi, â Xuduxudu ina inaman di lo asuruti iu, ma u ga atsura tsaa, â Saa taxaane iaa?â â â32Oro Iesu a lo nanen iʼis tsaa ngali atixi saa taxaane ia.33Mil iwaa aina tii ga suk atixi we, a se tuo. A xaalame ma ga xol laamuaan no xaden Iesu. No isuaan tii didiir taman minataa, o ga asaaiti ia taman inesaait so ina xan minet.34Iesu ga paare ngali ia, â Tsaana, num tinaalnge a se atoaa iu. Laa lalon malina ma iaa se aleiwaai iu sin num sosong.â35Biaa Iesu ta lo papaare tsaa sin aia aina biexaa taamat di xaalame xaal lalon xan anua Jairus, lalaamua ina anua sausawit, di ga asaaiti, â Nangaam le atarangaai unaasasing. Num tsaana a se met.â36Nanlii mu sen maarang di ta paatina. Iesu ga paare ngali Jairus, â Nangaam mataa, u na taltaalnge mu.â37Tii xap papaalii xa bula ngali amusili ia, oro tii giwaa mu Pita, Jeims ma Jon iwaa turamasen Jeims.38Biaa di le tsap tatan Jairus, o Iesu tii ga lasi no inaman di ta lo teng lolbiir.39Iesu atsiga ma ga paare ngali di, â Ngalisa abala no tengteng lolbiir? Ilawaa tsaana a xap met, oro a urarange mu.â40Oro di ga nongngen ia. Mulina ta se atsuulngi di, a giwaa xan mom, nagaa ma xan no tsi asasing ta tuul ma di ga tsiga tiwaa, itaa iwaa tsaana ta manman.41A taxaane liman ma ga paare ngali ia, â Talita Koum!â (Muina a weaatalaa, â Tsaana dokdok, iaa paare ngali iu, tapaas!â ).42Tiwaa tsaa iwaa tsaana asuk til laa lapalaa ma ga suk atiltsoli eses. (Tii sangaul axuuk ma ga laa lua ina xan no miet.) Sin abala, di suk olol buxa.43Ga tali totore watwat sin xan mom ma nagaa ngali delu na xap asaaiti no inaman taman abala. Ma ga asaaiti delu ngali tali xaka pu luxaal ngali angen.