Markus4rif_lti
Amedya n zzariɛet
1Ibda isseřmad ɛawed ɣar řebḥar u imun-dd xas řɣaci aṭṭas ařami yenya di tɣarrabut uca iqqim dayes x řebḥar, am řɣaci marra tuɣa-t x tma n řebḥar x řbarr.2Tuɣa isseřmad i-ten s imedya aṭṭas. Inna di tɣuri nnes:3“Sřem! Xzar, ijj n ufeǧaḥ iffeɣ ḥima ad izarɛ.4Am tuɣa izarreɛ, tewḍa ca n zzariɛet x tma n webrid, ixecc-dd ijj n ujḍiḍ, ineqb i-tt.5Tewḍa ca n zzariɛet nneɣni x weẓru mani war dayes tuɣi bu ucař aṭṭas. Deɣya teɣmi s minzi tammurt war tuǧiɣ.6Maca umi dd-tenqar tfuct, tecmeḍ, minzi war ɣares tuɣi bu weẓwar, xenni tisřaw.7Tewḍa ca n zzariɛet nneɣni jar isennanen uca mɣaren xas isennanen uca jeyyḥen tt, war tewci ca řɣiǧet.8Tewḍa ca n zzariɛet nneɣni x temmurt teṣbeḥ uca teɣmi, tegma, tewca řɣiǧet. Ca n zzariɛet tusa-dd s třatin, ca s settin u ca s mya n tseqqar.”9Xenni inna: “Wenni ɣar iǧa imezzuɣen i useǧi, ejj i-t ad iseř.”10Umi tuɣa aten weḥḥedsen, sseqsan t inni d as dd-innḍen jmiɛ ak-d tenɛac x umedya nni.11Inna asen: “Aqa immewc awem maḥend ad tessnem ssirr n Tgeldit n AREBBI, maca inni di barra ad asen yiři kuřci s imedya,12ḥima am ttwařan, ttwařan, maca war ttwiřin, am ttesřan, ttesřan, maca war fehhmen, ḥima war ttᵉtuben uca ad asen ittwaɣfar ddnub nsen.’”13Inna asen: “Ma war tefhimem ca i umedya-ya? Mammec i ɣa tessnem marra imettiřen-a?14Afeǧaḥ nni izarɛen, izarreɛ Awař.15Ina aqa d inni x webrid, aqa yina d yinni daysen ittwazarɛ Wawař, maca awarni řami d as sřin, řexdenni yusa-dd cciṭan uca ikkes Awař i ittwazarɛen deg wuřawen nsen.16Uca yina d inni ittwazarɛen x temmurt uḥejri, aqa yina d inni xmi ɣa sřen Awař, ad t qebřen deɣya s řefraḥet,17maca war ɣarsen bu jjadira deg ixef nsen, ad qqimen ɣar ijj n řmijař waha. Mařa temsar řmeḥnet niɣ umarret di ssibbet n Wawař, ad nqarḍen deɣya.18Uca yina d inni ittwazarɛen jar isennanen, aqa yina d inni xmi ɣa sřen Awař,19ad ɣarsen dd-adfent tḥissaf n ddunect-a d uɣekkʷi n wagřa d marra nnecwat inneɣni, ad jeyyfent Awař, xenni idakkʷař Wawař břa řɣiǧet.20Uca yina d inni ittwazarɛen x temmurt iṣebḥen, aqa yina d inni, xmi ɣa sřen Awař, ad t qebřen, ad wcen řɣiǧet, ca zzaysen třatin, inneɣni settin u inneɣni mya n tseqqar.”Amedya n řqendiř d řmerfeɛ nnes21Inna asen: “Ma ad dd-asen s řqendiř, ḥima ad immars sadu řmud n imendi niɣ sadu qama? Ma war ittmarsi ca x řmerfeɛ?22Minzi war din min inuffaren war dd-ittwassargeb, uca war din uřa d ict n řḥajjet di tnuffra war tᵉtwasseḍhari.23Mařa din ḥed i ɣar iǧa imezzuɣen i useǧi, ejj i-t ad iseř.”24Inna asen: “Ḥḍam min ɣa tesřem. S řeqyas nni zzayes i ɣa teɛbarem, zzayes i d awem ɣa ɛbaren ɛawed, uca i kenniw inni ittesřan ad asen immarni ɛad.25Minzi wenni ɣar iǧa ad as immarni, u wenni war ɣar iǧi, uřa d min ɣares ad as ittwakkes.”
Amedya n zzariɛet d Tgeldit n Arebbi26Inna: “S uyenni ad tiři Tageldit n AREBBI am yijj n weryaz ineṭṭar zzariɛet di temmurt,27xenni ad iṭṭeṣ, ad dd-ikkar, ǧiřet d wass. Uca zzariɛet ad tgeɛɛed, ad tegma, maca netta war issin mammec.28Minzi tammurt tᵉttawi-dd řɣiǧet s yixef nnes: amezwar aɣemmuy, xenni tidart, awarni as irden ikemmřen di tidart.29Řami dd-tiweḍ řɣiǧet, řexdenni issekk amjar, minzi tameyra tiweḍ-dd.”
Amedya n tḥebbuct n zzariɛet n uxerdel30Inna: “Min di i ɣa narwes Tageldit n AREBBI niɣ s man amedya i zi tt i ɣa narcem?31Aqa-tt am tḥebbuct n zzariɛet n uxerdel, tenni, řami tᵉttwazarɛ di temmurt, aqa nettat d tameẓyant x marra tiḥebba n zzariɛet i iǧan di temmurt.32Awarni řami tᵉttwazarɛ, teɣmi-dd, temɣar x marra tibbi, ad tegg řefruɛ imɣaren ařami ijḍaḍ n ujenna zemmaren ad ggen řeɛwacc di tiři nnes.”33Tuɣa Yasuɛ issawař awař akidsen s imedya aṭṭas am yina, s imedya ittřiqen maḥend ad ten sřen iwdan.34Břa imedya war kisen issiweř ca, maca tuɣa issefham kuřci i imeḥḍaren nnes weḥḥedsen.
Yasuɛ d tḥaryaḍt35Deg wass nni, řami d tewḍa tmeddit, inna asen: “Ejj aneɣ ad neẓwa ɣar ujemmaḍin.”36Semḥen di řɣaci, iwyen t umi t tuɣa ɛad di tɣarrabut, uca tuɣa din akidsen ɛawed tiɣarruba nneɣni.37Uca tekkar-dd ict n tḥaryaḍt temɣar, řemwaj ccaten di tɣarrabut ařami tebda tᵉttcura.38Maca Yasuɛ tuɣa iṭṭeṣ x ict n tsunta ɣar ḍeffar n tɣarrabut. Nitni ssfaqen t, nnan as: “A Amseřmad nneɣ, ma war d ac necqi ca neccin mařa nettwahellek?”39Xenni ikkar, iwebbex asemmiḍ, inna i řebḥar: “Ars! Sqar!” Yarsa usemmiḍ uca idweř kuřci yarsa.40Xenni inna asen: “Mayemmi teggʷedem ammu? Min kenniw yuɣin war daywem bu l’iman?”41Tudef i-ten tiggʷudi temɣar, nnan i wayawya: “Min iɛna Wa, aqa uřa d asemmiḍ d řebḥar ttᵉṭṭaɛen as?”