San Marcos4cof_wbt

Ni aralenun cuenta

1Junni mannaman Jesús wa pipilu fiquile micarinaminue. Junni duque tsachila Jesúchica janan, Jesús jun pipilubi canoa tsominbi wito chudinue. Junni jerale tsachila jun pipilu fiquile jera wirurato meranaminlanue.2Junni yalabe duque micarinun cuenta polarinato, itsantinue:3—Inca meralaquede! tinue. Tsachi manca ni aralebi jichunae tinue.4Junni ni aralenasa, weyan niri minubi queereichunae. Junca pichu jato finiquichunae.5Junsi weyan niri nasiri to tson subi arajichunae tinue. Junto ya niri moora suchunae nasiri to tsonan.6Juntonan pata chibachi jera luban lato jequeichunae tinue tenpe telenle quino podeituto.7Junsi weyan niri tsala minu arajichunae. Junca tape fe uwaito, sunamin nacaca jera doquicaniquichunae tinue. Jun tenchi ni chudituchunae tinue.8Manan weyan niri sen tobi arajito uwaito, duque ni mancuwachunae. Weyan niri ni curanan peman chunca ni mancuwachunae tinue, manan weyan ni sota chunca ni, weyan ni patsa ni mancuwachunae tinue.9Junni Jesús ya cuenta quesi itsantinue: —Nula punqui chunla jotori, seque meralaquede! tinue.

Jesús cuenta quicachisiri micarimin jonunca

10Nasi wanbile weyan tsachila jera manjinunsi, chunca paluca Jesube penenaminlanan, weyan Jesuca meráminlanan, Jesube cachuminlanue. Junni yalari Jesús cuenta quicaca panhato manmeralaquinue.11Junni Jesuri yalabe itsanque manpanue: —Diosi ya mantananun tsachi bolonca niyaque serawono jonunca nula miinola joe tinue. Casaleri miituntsan jominue; amanale nechi nulari miralarachunae tinue. Merátuchi timinlaca mantimini cuentabesiri micarimin joyoe tinue12yape meránatonan entendeilaitusa, yape quiranatonan seque quiralaquitusa. Entendeilaimanpari, Diosibe cayainan, Diosi yalaca perdonaino jomin jonhoe tinue.

Ni aralenun cuentaca tuca manmicarinunca

13Junni Jesús itsantinue: —Nulari in micarinun cuentaca entendeitutori, ¿niyaito weyan micarinun cuentacanan entendeilaichun? tinue.14Ni aralemin tsachiri Diosichi fiquica tencabi waquemin cuwenta jochunae.15Weyan tsachilachi tencari minubi polo ton cuwenta jolajochunae tinue. Yalari Diosichi fiquica meránasanan, yucan janiichunae. Yucan jato, fiqui tencabi meraca jominca jera manlarichunae.16Junsi weyan tsachilachi tencari su jamote nasi to tson cuwenta jolajochunae tinue. Yalari jun órari Diosichi fiquica son tito meralaquichunae.17Junni telenle potuca jun cuwenta moora fecári tennaminla joto, peleilaichunae tinue. Diosichi fiquica meráto nenamin jonun tenchi padeseinato, peleilaichunae tsachila pasuwalaquinae tito.18Junsi weyanlachi tencari tsala to cuwenta jolajochunae. Yalari Diosichi fiquica meránato,19junto niyaque sonnanoca, cala canoca, wepanato nenalarachunae tinue. Jun tenchi Diosichi sen fiquica tennatuminla joto, natiya sen itulajochunae tinue. Tsanque titiya munaranunca tenca canato, Diosichi fiquicari jera piyariminla jochunae tinue.20Juntonan weyanlachi tencari sen to cuwenta jolajochunae tinue. Yalari Diosichi fiquica seque meráto tennalarachunae. Junto duque sen ilaichunae tinue peman chunca ni chudinun cuwenta, weyanla sota chunca ni chudinun cuwenta, weyanla patsa ni chudinun cuwenta. Jesús tsanque micarinue.

Jesuchi fiquica seque miintsan jonunca

21Junni Jesuri itsannan tinue: —Lanparin tulitori, perolichi dilancaritunoe. O lowa tenpenan chutetunoe. Lanparinca tulitori, jamobi chutenomanhe yape tsesa.22Junni la micarica jun fiquiri jun tsanquenan jochunae. Amana miituntsan jonunca inari jera miintsan jochunae. Amana tuca micaritununca man mate jeralelaca tuca micarintsan jochunae tinue.23Junni nulari punqui chunla jotori, seque meralaquede! tinue.24Junni Jesús tsantisi yalabe man fiquiman panue: —Seque tenca cato meralaquede! tinue. Ti medidatetiya cuwalaquinari, jun medidatenan mancuwalaquichunae. Junni tsanquenan nulari nasi meralaquinari, Diosi nulaca nasiri miisa carichunae tinue. Duque meralaquinari, duque miisa carichunae tinue. Junsi nantanan fécari miisa carichunae tinue.25Junsi fe miraminlacari Apa Diosi fe miisa carichunae; miituchi timinlachicari nasiri miranuncatiya manjosolechunae tinue.

Ni uwainun cuentaca

26Junni Jesuri itsantinue: —Diosi mantananun tsachi bolonni witabi sumin ni cuwenta jochunae tinue. Nica tobi araleca jochunae tinue.27Junni nica araletobi, waquemin tsachiri mérachunae. Quepen catson, malon mansonhin, tin nenato mérachunae. Junni tobi araleca jun niri suto jera uwaichunae tinue. Junni junca ya tsachiri niyaito sunanunca natiya miitochunae tinue.28Junni tori tenca mántanan nica uwaisa carimin joe. Casale japisu larin, junsi aman taran in, junsi taran ayancaitobi aman ni chudiniimin joe tinue.29Junca aman balentsan inunsiri balelaquichunae. Junbiri numa baleno ma faca joe.

Mostasa nica cuenta quinunca

30Aman junni Jesús itsantinue: —¿Diosi mantananun tsachi bolonca niyaque pantsan jun? tinue.31Mostasa ni cuwenta jochunae tinue. Mostasa niri waquenasari, piyanle nica fe tsanini nacá joe.32Juntonan waquenari, uwaitobiri, piyanle uyan tapelaca fe jelelen wa chide pele imanhe. Alinan wa ali imanhe. Pichula titiya jun alibi tasen quino podeintsancari wa chide pele imanhe tinue. Junni Diosi mantananun tsachi bolonca serawonato, jun cuwentanan quichunae tinue.

Jesús micarinun cuentaca quimin jonunca

33Junni Jesuri tsanque Diosichi fiquica micarinaminue. Micarinun cuentaca polarinato micarinaminue nisi entendeino podeino fecári.34Micarinun cuentaca polarituminnan, micaritumin jominue. Juntonan jun micarinun cuentacari yabe penenamin tsachilaberi jera tuca manmicarimin jominue.

Pibe wube Jesuca merámin jonunca

35Aman Jesús tsanque micaritobi, jun matenan neme ino inasa, yabe penenaminlabe itsantinue: —Wa pi pilu becochi jilaisa! tinue.36Junni tsachilaca junte jera purato, Jesúcari yala ponun canoabi wa pi pilu becochi tanjilainue. Weyan canoanan pejilainue.37Junnasa duque sonban wu jato, wa pipilu latsaca jera wecacarinue. Junsi pi busuca canoabi jera tuwale winaminue.38Junnasa Jesús mantimini canoabi bene nanchi oton lowabi catson tsominue. Junni yaca mansoncarito itsantilatinue: —Miya, ¿pibi daipatilaichinanunca niyaito tennatiyun? latinue.39Junni Jesuri mancupato, wucanan, picanan mantato itsantinue: —Nosaide! Deide! Junni Jesús tsantinunsi, wuri jera mandeito jera owowo inue.40Junsi Jesuri yabe penenaminlabe itsantinue: —¿Niyaito nulari tsancari jele tinaminlayun? ¿Niyaito Diosica tennalaratiyun? tinue.41Junni yalari duque wepananato, Jesuca itsanticaalaquinue: —¿Inni ti tsachi junhun? tilatinue. Yacari wunan, wa pipilunan meráminla joe tilatinue.
expand_more
Search