1Hiba abar sinagogot góille, ar heṛe ekzon hat mozigiyegoide manuš aššil.2Dórmor din Isaye hitare aram gore ne naki no gore hiyan saibolla hodune hibar uwore bala gori nozor raikke, toi zene hitara hibar berudde hosuri di fare.3He hat mozigiyegoide manušware Isaye hodde, "Uṛi beggunor munttu ai tiya!"Henot hite uṛi tiyaiye.4Toi hibaye hitarare fusar goredde: "Dórmor din ki gora ezajot ase? Bala ham gora ne naki horaf ham gora? Foran basa ne naki foran dongšo gora?"Kintu hitara nizam mari taikke.5Isaye hitarar sairo mikka gušša gori saiye edde hitarar dil dorode dekiyore hibar dilor beši murot ferešan oiye, edde manušware hodde, "Tor hattan mum mikka ṭan."Hite hen goijjebar hitar hattan ekkubare bala oi giyegoi.6Hetunot Foroši okkol baire giye edde Isare kene marifela za he babute Herudor dolor loi felain goijje.
Mainšor dol okkole Isar fisa loiye
7Isaye sahabi okkolore fũwati loi lamat doriyar hãsat giye edde Galilottu ek ḍõr mainšor dole hibar fisa loiye.8Ar Ehudiyattu, Zeruzalemottu edde Idumiyattu, Zordanor dusora farottu edde Tiros edde Sidon elehar sairo mikkar zaga okkolottu beši manuš okkol, hibaye ze hár ham okkol goijje hin funiyore hibar hãse aišše.9Toi hibaye sahabi okkolore hiballa ekkan no ṭik gori rakito hoiye, zene mainše hibare suibolla ṭelaṭeli gori hibar uwore no foregai.10Kiyollahoile hibaye bout manuš okkolore aram goijjil, hetolla biyaraimma okkole hibare suibolla mummikka ṭelaṭeli goijje.11Napak ruh okkole zẽtte hibare dekito, hibar sarme meṛi uite fori guzori hoito, "Õne Allar Fut."12Kintu hibaye hitarare kub hora gori hokum dito, zene hiba honnuwa hiyan hitara honokiyore no ho.
Isaye he barozonore asab oibolla basona goijje
13Tarfore hiba faharot uiṭṭegoi edde nizor issaye kissu manušore ḍaikke. Ar hitara hibar hãse giye.14Hibaye barozonore asab basona goijje zene hitara hibar fũwati fũwati take edde hibaye hitarare toboligot defeṛai fare,15edde bod ruh dafaibolla šokti fa.16Ze barozonore basi loiye hitara oilde: Simon (Zare hibaye Fitor nam diye.)17Sebudiyusor dui fuwa Yakub edde Yuhanna, (ar ei duizonore hibaye nam diye Buwanerges, zar mani ṭaṛalor futain)18Anderiyaz, Filip, Bartolomeus, Moti, Tomas, Alfeyusor fuwa Yakub, Táddeyus, Simon Zelot,19Edde Ehudah Iskariyot, ze Isa loi beimani goijje.
Isa Mosi edde butor raza
20Tarfore zehon hiba górot aišše, abar manuš okkol dola oiye, hetolla hiba edde hibar sahabi okkole kissu hái no fare.21Isar nizor manuš okkole ei hóbor faiyore hibare henttu niyolai loi aišše. Hitara hodde, "Iba fool oigiyegoi."22Zeruzalemottu aiššede alem okkole hodde, "Hitar butore Belsebul ase! Butor raza Belsebulor modote ite but bair gore."23Toi Isaye hitarare hibar hãse ḍaikke edde hitarare mesal kahani okkol loi hota hoiye: "Šoitane kengori Šoitanore dafai faribo?24Zodi raijjo ekkan nizor butore bag o, hiyan ṭiki tai no fare.25Abar, zodi ekkan gór nizor butore bag o, toile he górgan o ṭiki tai no fare.26Ar ehon, zodi šoitane hitar nizor berudde tiya edde hitar nizor butore bag o, toile hite ṭiki tai no faribo. Hite heddurot šeš.27Kintu honokiye bolwala mainšor górot goli hitar dón šombotti luṭ gori no faribo, age zodi hite he bolwala manušware bandi no fele. Zodi bande, toi hitar górgan luṭ gori faribo.28Ãi tũwarare soiyi hoir, mainšor hár ḍoilla guna edde kuferi maf gora oibo,29kintu ze honokiye Pak Ruhor berudde kuferi gore, hitarare hono din maf gora no oibo, bolke hite azibon gunar dai tai zaiboi."30"Hibar butore ek napak ruh ase" hitara hen hoilde hetolla hibaye ei hota hoiyede.
Isar ma báiboinain hontara?
31Tarfore hibar ma edde báiboinain okkol aišše. Hitara baire tiyai taki Isare aibolla hóbor defeṛaiye.32Isar sairo ḍakottu hẽtte ek ḍõr mainšor dol boiṛa aššil. Hitara hodde, "Õnor ma báiboinain okkol baire, edde õnor talaš gorer."33Isaye hodde, "Ãr ma, báiboinain hontara?"34Zara hibar sairo ḍakottu boišše, hitarar uzu saiyore hodde, "So, itara oilde ãr ma, báiboinain okkol!35Kiyollahoile ze honokiye Allar issa falon gore, hitara oilde ãr bái, boin edde ma."