1Jesus pwuroahng dilda nehn jinakokehu, wijahu ma woal mwoasor poah men pwili minmine.2Armaj pwi ma pwili mine wijahu nimen kadpoahki Jesus mehkij japwung, irai kin mwajmwajahnnoar Jesus ma Ih pirin kemwehuwihla min mwoasor poahu rehnin Sabbath.3Jesus ken pwehng woal mwoasor poahu. “Sohdahdo uhda mijen pokonne.”4Ih ken idoak iparai pwa, “Da kojonneddo mweidoahng kisai en wia Sabbath? Kisai en wia mehkij ma mwehu ke nauna? Kisai en jeuweje mourin armaj ke koauwehla?”Irai nennenla johpwa wia mehkij.5Jesus ken lioasla kapkapang irai, ih ken injinjuwedkihla irai koapsakai apel lamlam japwung. Ih ken lallahng woal mwoasor poahu, “Kailwe poahmmwen.”Min mwoasorro kaillahr poahu, poahu ken mwehula dauluhl.6Pharisee‑ok ken diljang nehn jinakokehu pokonpene ipen epwi ma kin nihn Herod pwihnno; irai ken pilahnehda pwa irai en kojukdi Jesus.
Pokon Laplap oau in Poahrinjed in Lehu
7Jesus apel Nah sohnpadahkkok inla in poahrinjed in Lehn Galilee, a pokon laplap oau kaujla Ih. Armajjok indoa jang Galilee, jang Judea,8jang Jerusalem, jang Idumea, jang oaloap Jordan, apel jang kahnihmw in Tyre apel Sidon. Armaj pwiai pokonpene ipen Jesus pwa ihr rongda joang kapwuriamwei kan ma Ih kin wihwia.9Ih pwehng Nah sohnpadahkkok irai en koaunopda oau pohs siksikko, ma Ih en doauda puwoa, pwa pokonno en joah jakahpajihla Ih.10Pwa Ih kin kemwehuwihla armaj johmwehu dir, ioar mehwa irai kin jakahpajihla Ih nehn irai kin nimen pukkoang Ih.11Pel armaj ma ngen jaus dilingla irai, nehn irai kin kapangda Ih irai kin kipdi mwohn Ih, rahrahu, pwahpwahpwa, “Koawoa ioar Nihn Koahs wa!”12A Jesus ken iroahdi ngen jaussok en johpwa pwa inje Ih.
Jesus Pilda Wahnpoaroan Eijek Roahmen
13Jesus indahla pohn dol oau; Ih ken pangin araihok ma Ih kin ipwilki en indoa Ipoa.14Ih ken pilda min eijek roahmen ma Ih panginki wahnpoaroan, Ih pwa, “Ngoahi pilda kamwai pwa kamwai en kin pwilpwili Ngoahi. Ngoahi pirin pel kadarwe kamwai pwa kamwai en lohkihjili Rongmwehu;15kamwai pirin pel anki manman in kaujjang ngen jaus kan ipen armaj.”16Doari, ioar oadoan min eijek roahmennok ma pilpilda: Simon (Jesus kioang oadoa Peter);17James apel John, nihn Zebedee (Jesus kioang oadoara, Boanerges, woahwoahn mour in addoauwe nihn palar);18Andrew, Philip, Bartholomew, Matthew, Thomas, James nihn Alphaeus, Thaddaeus, apel Simon sohn pwihnin Zealot,19apel Judas Iscariot, woallo ma pangla Jesus.
Jesus apel Beelzebul
20Jesus injang wijahu inlahng in umwahu. A pokon laplap oau pel pokonpene wijahu, ma kahrehda Ih apel Nah sohnpadahkkok johla kak mwinge ki johla anjoau.21Nehn epwi Ah peneineihok rongda me, irai inla ipoa pwa irai en oaloa apwali Ih; pwa armaj kan pwahpwahpwa, “Ih ne japwungla nehn moange.”22Epwi jounpadahk in Kojonneddok ma indihdo jang Jerusalem siksikoa pwa, “Beelzebul ne dilingla Ih.” Epwi pwa, “Koaun in ngen jaus kan ma kioang Jesus manman in kajroahjang ngen jaus.”23Ih panginpene armajjok pwehng irai karajraj pwi: “Imdoahr Jehsen ah kak kajroahla Jehsen?24Ma wei oau pirin pwalpijoang wiahda pwihn pwi ma pirin uhpene nehn pwungarai, weiho johkak pwoaida, pwa ih pirin mwoarpijoang.25Ma peneinei oau pirin pwalpijoang wiahda pwihn pwi ma pirin uhpene nehn pwungarai, peneineiho johkak pwoaida pwa ih pirin mwoarpijoang.26Doari ma wein Jehsen pirin pwalpijoang wiahda pwihn pwi ma pirin uhpene nehn pwungarai, ih johkak woaroai, pwa ih pirin mwoarpijoang apel johla.27“Joh emen kak koauwehla umwen woal sihkei men pwa en pirapoa ah koapwoa kan ma ih johpwa koldi piroahpene woal sihkeiho. Ioar wioapoawahr doari ih kak pirapoa ah koapwoa kan.28“Ngoahi pwehng kamwai in mehlel pwa armaj kan kak oaloa mahkpen diparai kan ohroj, pel dipen lahlahwe.29A emen ma pirin lahlahwe Ngen Joarwi, johpwa kak oaloa mahk in dihp oauwe, pwa ih ne wiahda dihp oau ma johpwa kak lapwda.”30(Jesus pwa me pwa epwi ihr pwahpwahpwa pwa, “Ngen jaus ne dilingla Ih.”)
Inen Jesus apel Riah kan
31Inen Jesus apel riahk leldo. Irai mine likin ummwo nimen lalloang Ih.32Pokonno ma mwindi pidekihpene Ih pwehng, “Koawoa kidal pwa inoammwo apel rioammwok minmine likinno, irai nimen suhwoang Koawoa.”33A Jesus japoang irai, “Inje inoai, apel inje rioai kan?”34Ih pel kapkapangjili pohn irai ma minmine ipoa, doar Ih ken pwa, “Ioar inoai apel rioaikoa me.35Emen ma kin kapwaihahda kupwuren Koahs, ioar arai rioai apel inoai.”