1Usakaru, yahothukumana oolupale a mayasataka wamoca ni mahumu ni mayowantikha, ni mayonthukumano othene; ni untthuka waya Yesu, yahonkusa ni yahommelela waPilatu.2Pilatu ahonkoha: We uri Mwene a Ayutta? Yesu ahomwaakhula: We uhohimya.3Ni oolupale a mayasataka yahonriyelela citthu cinci.4Pilatu ahonkoha tho eeraka: Khunakhula itthu? Woone, citthu cinci cinriyeleliyaa na atthu ala.5Yesu nanso khaakhunle tho itthu, ni Pilatu ahotikhina.
Yesu ahohukhumwinya wiiviya
6Nihuku nosukuhuulu, Pilatu aholemalela untthukula nantthukiya mmoca yantthunaya atthu.7Ahaawo nlopwana mmoca, eehaninya Parapasi, atthukiye wamoca na anaporonka nlattu yamwiivile ntthu ukati wonkhitto.8Mphwinko wa atthu, wahonwa ni wahopacera ulepela itthu yalemalenlyawe wapankela.9Pilatu ahaakhula: Nnotthuna wiira kutthukuleleni Mwene a Ayutta?10Nlattu ahocuwela wiira oolupale a mayasataka yamwiihenre nlattu woonrama.11Nanso oolupale a mayasataka yanatheperya mphwinko wiira phatari Pilatu antthukule Parapasi.12Pilatu ahaakoha: Kinhala umwiiriha isiyani ula nnomwiihanenyu Mwene a Ayutta?13Na ale yankhuwaca tho: Unkhomele wansalapani!14Vano Pilatu aheera: Tthekileni? Nanso ale yanakhuwaca: Unkhomele wansalapani!15Pilatu, atthunaka wamaaliha atthu ale, ahaataphulela Parapasi. Ni aholamula wiira Yesu apsuliye ni akhomeliye wansalapani.
Yesu nawapsuliya
16Anakhotto yahonkusa upwaroni ya nsatoro, ni yaheehaninya anakhotto othene.17Yahomwariha ihancu yookhwiila, ni yahomweesa ikhilempa yo miiwa wamuru wawe.18Wahoolo yahopacera unkoha nretele yiiraka: Salaama, Mwene a Ayutta!19Yanamwaatta wamuru ni nthale ni yanansuwela ni ankhoromelaka yananlapela.20Wamanlyaya untarawaca yahonrula ihancu yokhwiila ni umwariha tho cawawe. Vano yahonkusa wiira akhomeliye wansalapani.
Yesu nakhomeliya wansalapani
21Yahommara athumwane Alisantere ni Rufu, eehaninya Simoni o Sirene aakhuma umawaani ni ahokanyererihiya ukusa nsalapa.22Yahonrweha nipuro neehaninya Kolokootha, manaaya, nipuro nokohi.23Yahommaha ivinyu yootakaniheriya ni miira, nanso ahokhotta uwurya.24Wahoolo yahonkhomela wansalapani. Ni akawelanaka cowara cawe, yahopanka mwaavi wiira yoone yahalaawe uphwanya khula ntthu.25Yaari iwora yoneeraru wakhomeliyawe wansalapani.26Waculu wawe yahantikhiya yariyeleliyawe: MWENE A AYUTTA.27Yahokhomeliya wamoca ni Ule, mayohukha eeli, mmoca, moono nlopwana, nkina moono nthiyana.28Ciicammo cootthariheleliya cowantikhiya cineera: Ahaalikeliya na atthu oonanara nrima.29Atthu yaavira ayo, yananruwana, apukunyaka muru, yiiraka: We! Watankulaca Inupa ya Nluku ni uteka tho mahuku mararu.30We wicoopole o mwaneene nuukhuruwe wansalapani!31Oolupale a mayasataka ni mayowantikha yanateehana, yiiraka: Hoopola akina ni khanoorya wicoopola mwaneene.32Akhuruwe naanano wansalapani uyo Kristu, Mwene o Israel, wiira nimoone ni ninkupali. Na atthu ale yakhomeliye ni Ule, yananruwana.
Ukhwa wa Yesu
33Waphilyaya ukati woothana ipiphi yahokhunela ilapo yothene mpaka yocoocilo.34Uphiya waya yocoocilo Yesu ahokhuwa ni ncu noorunya: Eloi, Eloi, lama sapaktani! Manaaya: Nluku aka! Nluku aka! Ukihiyenreni veekhaka?35Umwiiwa waya, akina yaari wonwo, yaheera: Moone, nomwiihana Eliya!36Mmoca mwaale ahothimakaca uwiha ntthoce nooheliya makari ahotthukelela muntathini ni ahommaha wiira awurye, ni ahohimya: Noone wiira Eliya nawa unkurusela vathi.37Akhuwaka ni ncu noorunya, Yesu ahokhwa.38Vano ikuwo yo Mpani mwaNluku yahaahuwa iriyariru ukhuma uculu mpaka vathi.39Muulupale a anakhotto eemenle cooco wariyawe Yesu, umoona wawe akhwaka ciicale, aheera: Khweeli ula ari Mwana a Nluku!40Yahaawo tho athiyana yemenle uttayi amwehaka; mwaale ahaawo Mariya Mantalena, Mariya anumwane Yakopu mwankani ni Yosefi, ni Saloome.41Wariyawe Yesu uKalileya yaayo yahontthara nunvarela nteko, ni athiyana akina enci yanvelenle wakenlyawe uYerusalemu.
Yesu navithiya mmahiyeni
42Wiila waya, hapo wari ukati wowiitthenkaciya nihuku nontivela,43ahowa Yosefi o Arimateya, humu oocuwanyaa ni oottitthima, akhuluvenle uwa waya omwene wa Nluku, alipile nrima wokela waPilatu ni aholepela nrutthu wa Yesu.44Ni Pilatu ahaakaaka wiiwa wawe wiira hokhwa, ni amwiihanaka muulupale anakhotto ni ahonkoha akhala wiira khwile mwakhalayi.45Ni nahimeriye ni muulupale uyo, nrutthu ahovahiya Yosefi.46Yosefi nathumile ikuwo, ahokurusa nrutthu wansalapani, ni ahokhuneela ni ikuwo eyo. Wahoolo ahommitha mmahiye yathipiye wamwalani ni ahopirikisela nluku nuulupale wankhora wo mahiye.47Mariya Mantalena, ni Mariya anumwane Yosefi yahoona nipuro navithiyawe.