Read MAKA 15

MAKA15kij_png

Isakaisi Yesu baisa Pailato

¹Obulubuvisiga tolula kasi tokugwa deli kaidadala valu deli toninitalapula paila Karaiwaga, e deli togugula komwaidosiisigugulasi ikikeiwalasi; iyuwolaisi Yesu ivakoulisi matauna iuyokaisi Pailato.²Pailato ikatupoi matauna, kawala, “Ki yoku si giyouveka mina Yudia?” Yesu ivitakauloki matauna, kawala, “Yokula lokukwaibiga.”³E tolula kasi tokugwa itabinakaisi matauna bidubadu vavagi.⁴Pailato ikatupoi matauna tuvaila, kawala, “Ki, gala sitana kuvivitakaula? Kugisi kwaivila vavagi ikamitulaimsi.”⁵Mitaga Yesu gala sitana tuvaila ivitakauloki, mapaila Pailato itutu wowola.

Ikaraiwagasi kidamwa Yesu bikaliga

⁶E Pailato la bubunela otutala Luvapelapakala bitaneku baisa matausina avai tomipuki inigadaisi baisa matauna.⁷Tutala mimilisi tokowolova itokaiasi ipakaisivalu kala karaiwaga, tokwabilia eiyosisi tokwatumata eisailisi wa bwala katupipi. E taitala matausina yagala Baraba.⁸E tobobawa imaisi ivitouulasi inigadasi baisa Pailato kidamwa bivagi paila matausina makawala la bubunela ivigibogwi.⁹Pailato ivitakauloki matausina, kawala, “Ki, bataneku si giyouveka mina Yudia baisa yokomi?”¹⁰Paila bogwa igisi tolula kasi tokugwa ikasalaisi matauna uula si pogi.¹¹Mitaga tolula kasi tokugwa itainonaisi tobobawa kidamwa binigadasi bitaneku Baraba kaimapula Yesu baisa matausina.¹²Pailato tuvaila iluki matausina, kawala, “Avaka bavigaki matauna kudokaisisi giyouveka mina Yudia?”¹³Idouvausi, kawasi, “Kukwatukorosi matauna.”¹⁴E Pailato iluki matausina, kawala, “Avaka dimlela? Avai mitugaga leivagi?” Mitaga saina minimani idoudousi, kawasi, “Kukwatukorosi matauna.”¹⁵Pailato magila biyomwasali ninasi tobobawa, e itaneku Baraba baisa matausina; ikaraiwaga iwawaiyasi Yesu, oluvi ikasali kidamwa bikatukorosaisi matauna.

Tokwabilia ikatudeuwaisi Yesu

¹⁶Tokwabiliaivakoulisi Yesu olumoulela bwala kwaiveka, makwaina la bwala tokwaraiwaga, idouwaisi tokwabilia kasi boda yuwomwaidona bisigugulasi.¹⁷Ivisikomaisi matauna deli kakapula yabweyani,ivilaisi doula kala butia isailisi okulula.¹⁸Ivitouulasi ikavaginasi omatala, ikaibigasi, kawasi, “Wo! si giyouveka mina Yudia.”¹⁹Ilopetaisi pwanetala deli pitapatila, igiusailisi matauna, itapopula kwetutusi ikavaginasi omatala.²⁰E bogwa ikatudeuwaisi matauna, ivililaisi miyana kakapula yabweyani e ivisikomaisi kala kwama titoulela. E ivakoulisi ivisunupuloiyaisi kidamwa bikatukorosaisi matauna.

Ikatukorosaisi matauna

²¹Taitala tau yagala Saimoni guma Sairiniimaima metoya wa bagula, e litula Alekisana sola Rupusa; e tokwabilia iyosisi ikaraiwagasi bikeula Yesu la korosi.²²Imaiyaisi Yesu mapilana baleku idokaisi Goligota (e kidamwa takatumikaisi baisa “Viluwela Pwaneta”).²³Itagulikaisi waini deli mro mwada bivimomwaisi matauna, mitaga ipaiki.²⁴Ikatukorosaisi matauna; ivilaisi kala kwama ikowobobutasi availa bikau avaka.²⁵Yam kala kalu osi keda valulu eikatukorosaisi matauna.²⁶Kala kamatula iginisi, “Si Giyouveka mina Yudia.”²⁷Deli matauna ikatukorosaisi taiyu tolibulebu, taitala ola kakata, taitala ola kikiwama.²⁹Matausina ililoulasi ititageunasi, ibigigagaisi matauna, kawasi, “Aa yokula! Ki bukukodidaimi Bwala Kwebumaboma e yam kwaitolu bukukwaliivau?³⁰Kukwatumovaim titoulem, kubusi metoya wa korosi.”³¹Makawala tolula kasi tokugwa deli toninitalapula paila Karaiwaga ikatudeuwaisi matauna taitala baisa taitala. Ikaibigasi, kawasi, “Eikatumovi tomota ituwoli, mitaga gala gagabila bikatumovi titoulela.³²Kidamwa matauna Mesaia deli ma giyouvekasi yakamaisi mina Isireli bibusi titoulela metoya wa korosi wa tuta matutona, e bitagisaisi bitadubumaisi.” Tuvaila matausina ikatukorosaisi deli matauna ilulukwaisi matauna makawala.

Yesu ikaliga

³³Bogwa itowota kalasia, e valu komwaidona idudubila, igau ila itobala kalasia.³⁴E bogwa itobala kalasia, Yesu kaigala kaigaveka idou obonasi mina Iberu, kawala, “Eloi, Eloi, lema sabakitani?”E kidamwa takatumikaisi, “Ulo Yaubada, ulo Yaubada, avaka dimlela lokusilavaigu?”³⁵Mimilisi matausina itotusi baisa ilagaisi e ikaibigasi, kawasi, “Ka, idoudou baisa Ilaitia.”³⁶E taitala isakaula ividagu toutou wa waini pwayuyu, e ibabi wa kai mwada bivimom, ikaibiga, kawala, “Desi iga bitagisaisi kaina Ilaitia bima bivabu.”³⁷E Yesu iwaiweya ikaliga.³⁸Bwala Kwebumaboma kala taboda karekwaitavisiki yayu metoya walakaiwa e watanawa.³⁹Tutala kumatoula matauna itotu omatala korosi igisi ammakawala Yesu eikaliga, ikaibiga, kawala, “Mokwitala matauna Yaubada Latula.”⁴⁰Tuvaila mimilisi vivila itotusi kaduwonaku igigisaisi; e minasina igasi Meri Magidalinisola Meri inasi Yemesa tokekita deli Yosesi, toyo Salomi.⁴¹Paila tutala Yesu isisu Galili, minasina ibokulaisi iwotitalaisi matauna. E bidubadu vivila tuvaila itotusi baisa deli minasina, leimakaiasi Yerusalem deli Yesu.

Yosepa ibaku Yesu

⁴²Eikoyavi,e yam makwaina idokaisi Yamla Katubaiasa,paila yam sabate makateki bikaloubusi.⁴³Isisu taitala togugula,e tomota saina itemmalaisi matauna. Yagala Yosepa guma Alimatia,e matauna iuwayausa paila Yaubada la Karaiwaga. Matauwena ituvaluwa ilokaia Pailato, e inigadi wowola Yesu.⁴⁴Pailato itutu wowola paila ilagi Yesu bogwa leikaliga, e idou kumatoula ikatupoi, kawala, “Ki, bogwa ikaligimolila?”⁴⁵E tutala kumatoula iluki Pailato kidamwa leikaligimolila itugwali tomata baisa Yosepa.⁴⁶Matauna igimoli mwaikapula yapupwakau yaminabwaita, e ivabu minana tomata ikapoliki miyana. E ibaku wa laka makwaina leikeli metoya odakuna; e ilopipili kwaitala dakuna owodola laka.⁴⁷Meri Magidalini sola Meri Yosesi inala igisaisi ambaisa leibaku matauna Yesu.