Read MAAKU 15

MAAKU15bqp_sim

Pilati yãkpatɛkɛna kũ Yesuo

¹Kũ gu dↄ̀ gↄ̃̀nↄ sa'orikinↄ kũ gbɛ̃ zↄ̃kↄ̃nↄ kũ ludayãdannɛrinↄ kũ gbãnadenↄ ń pínki yã gↄ̃̀gↄ̃, akũ ò Yesu yĩ̀ ò gɛ̀ɛ ò a nà Pilatinɛ a ↄĩ.²Akũ Pilati a là à pì: Mↄkↄ̃mmɛ Yudanↄ kína ũ yá? Yesu wèa à pì: Lɛn n ò lɛ.³Sa'orikinↄ tɛn yã didia,⁴akũ Pilati a là dↄ: Ĩni yãke oroo? Yã kũ òtɛn didimma ma fá!⁵Ama Yesu dí yãke weḿmaro, akũ yã pìi bò Pilati sarɛ.

Yãdana Yesula

⁶Vĩnla dikpɛ zĩ òdi purusunanↄ doke kũ gbɛ̃nↄ a wɛ́ kɛ̀ gbarɛńnɛ.⁷Gↄrↄ kũ̀a sↄ̃ gbɛ̃ke kú kpɛ́siran òdi pi Baraba. À kú kũ gbɛ̃ gaavude kũ ò gbɛ̃ dɛ̀nↄo.⁸Akũ pari nà Pilatii ò wɛ́ kɛ̀a à kɛ lákũ àdi kɛńnɛ nà.⁹Akũ Pilati ń lá à pì: Á ye mà Yudanↄ kína gbarɛárɛn yá?¹⁰Zaakũ à dↄ̃ kũ nɛ̀sɛgↄ̃ba kũ sa'orikinↄn vĩ kũ Yesuo yãin ò a kpàawa.¹¹Akũ sa'orikinↄ gbɛ̃nↄ laakarii fùtɛ, de ò o Pilatinɛ à Baraba gbarɛńnɛ.¹²Akũ Pilati ń lá à pì: Bↄ́n á ye mà kɛ kũ gbɛ̃ kũ adì pi Yudanↄ kínao teraa?¹³Akũ ò wiki lɛ̀ ò pì: Ǹ a pá lía!¹⁴Akũ Pilati pìńnɛ: À kɛ̀ deraa? Bↄ́ dàan à kɛ̀ɛ? Akũ ò wiki lɛ̀ ò kàra ò pì: Ǹ a pá lía!¹⁵Pilati ye à gbɛ̃nↄ pↄnna wɛtɛ, akũ à Baraba gbàrɛńnɛ. À Yesu kpà sozanↄa ò a gbɛ̃ flã̀ao ò a pá lía.

Yesu fobona

¹⁶Akũ sozaa pìnↄ gɛ̀ɛ kãao bùsu gbɛ̃ zↄ̃kↄ̃ↄ pì bɛ ↄnn, akũ ò ń gã̀ kàkara pínki.¹⁷Ò arukĩmba tɛ̃ra dànɛ, akũ ò lɛ̀ fùraa tã̀ ò kùnɛ.¹⁸Akũ òtɛn fↄ kpáa ò pì: Fↄↄ Yudanↄ kína!¹⁹Òtɛni a lɛ́ kũ gòoo a mìia òtɛn lɛ́'i káa òtɛn kútɛ ń kosoa òtɛn mì natɛnɛ.²⁰Kũ ò a fobò ò làka, akũ ò arukĩmba tɛ̃ra pìi gòala ò a zĩda pↄ́kasa dànɛ. Akũ ò bò kãao òtɛn gɛ́ a pá lía.

Yesu pana lía

²¹Kũ òtɛn gɛ́, Sirɛni gbɛ̃ kũ ò pinɛ Simↄ bò lakutu kea àtɛn su wɛ̃tɛ gũn, akũ ò gã nàa à Yesu lígbãndurukpana sɛ́. Àkũmɛ Alɛsanda kũ Rufuo de ũ.²²Akũ ò gɛ̀ɛ kũ Yesuo gu kũ òdi pi Gↄgↄta kũ à pì mìtokoki.²³Akũ ò sèwɛ̃ kũ ò yã̀katɛ kũ ɛzɛo dↄ̀nɛ, ama adi miro.²⁴Kũ ò a pà lía, akũ ò a pↄ́kasanↄ kpàatɛ ò kàtɛ, akũ ò kàpaa kpà lákũ ń baadi ni sɛ́ nà.²⁵Ò a pà lía mↄ̀ kɛ̃ndomɛ.²⁶Ò yã kũ ò dìaa kɛ̃̀ ò nà lía a mìla ò pì: Yudanↄ kína.²⁷Ò kpãni wɛ́dewɛnↄ pà lía a sarɛ gwe dↄ gbɛ̃nↄn pla, gbɛ̃ do a ↄplai gbɛ̃ do a ↄzɛi.²⁸Lɛn yã kũ ò kɛ̃̀ Luda yãn pàpa lɛ kũ ò pì: Ò a kàkara kũ dàkɛrinↄ.²⁹Gbɛ̃ kũ òtɛn gɛ̃ zɛ́la gwenↄ tɛni ń mì kɛ dékũdekũ, òtɛni a sↄ̃sↄ̃ ò pì: Ɛ̃hɛ̃! Mↄkↄ̃n kũ n pì ĩni Luda kpɛ́ wí ń ɛra ǹ bo gↄrↄ aakↄ̃ daguran gweroo?³⁰Ǹ n zĩda mì sí ǹ kipa lía!³¹Lɛmɛ dↄ sa'orikinↄ kũ ludayãdannɛrinↄ tɛni a fobo lɛ ò pì: À gbɛ̃ pãndenↄ mìi sì, ama ani fↄ̃ à a zĩda mì síro.³²Tó Arumasihu, Isarailanↄ kína kìpa lía tera ò e, óni a náani kɛ. Akũ gbɛ̃ kũ ò ń pá lía lɛɛlɛnↄ tɛni a sↄ̃sↄ̃ dↄ.

Yesu ganaa

³³Kũ ifãntɛ̃ kà mìdangura, akũ gusira dà bùsuu pìla pínki ari fãnantɛ̃ mↄ̀ aakↄ̃.³⁴Fãnantɛ̃ mↄ̀ aakↄ̃n Yesu wiki lɛ̀ gbãnagbãna à pì: Ɛloi, Ɛloi, lɛma sabatani! Abirekũ pì: Ma Luda, ma Luda, à kɛ̀ dera n ma tonn?³⁵Kũ gbɛ̃ kũ ò zɛna gwe kenↄ yã pìi mà, akũ ò pì: À ma, àtɛn Iliasu sísi.³⁶Akũ gbɛ̃ke bàa lɛ̀ à gɛ̀ɛ à sako sɛ̀ à dà sèwɛ̃ kpã̀kpãa gũn, à fĩ̀fĩ lebaa, akũ à dↄ̀ Yesunɛ à mi. Akũ à pì: À zɛ gĩa ò gwa, tó Iliasu ni su à a kipa.³⁷Yesu wiki gbãna lɛ̀ à wɛ̃̀ndii tà.³⁸Akũ Luda kpɛ́ lábure kɛ̃̀kↄ̃a pla bona musu suna zĩtɛ.³⁹Kũ sozanↄ gbɛ̃ zↄ̃kↄ̃ kũ à zɛ Yesu arɛ gwe è lákũ à gà nà, akũ à pì: Yãpuramɛ Luda Nɛ́n gbɛ̃ dí ũ.⁴⁰Nↄgbɛ̃ kenↄ kú gwe dↄ òtɛn gu gwa zã̀ dire. Ń tɛ́n Mariama Magadalɛni kun kũ Mariamao Yamisi Fíti kũ Yusufuo da kũ Salomɛo.⁴¹Gↄrↄ kũ Yesu kú Galili, mↄ́kↄ̃nↄ mɛ́ òdigↄ̃ tɛ́i ògↄ̃ kpái. Nↄgbɛ̃ pãndenↄn kú gwe dↄ dasi kũ ò gɛ̀ɛ kãao Yurusalɛmu lɛɛlɛ.

Yesu vĩnaa

⁴²Azuma zĩ ↄkↄsi. Kũ òtɛn kámmabogↄrↄ soru kɛ,⁴³Yusufu Arimatea gbɛ̃ sù. Gbɛ̃ tↄ́demɛ Yuda gbãnadenↄ tɛ́. Àkũ sↄ̃ àtɛn kpata kũ à bò Luda kĩnaa dã. À kùgbãna kɛ̀ à gɛ̀ɛ Pilati kĩnaa à Yesu gɛ̀ɛ gbɛ̀kaa.⁴⁴Kũ Pilati mà Yesu gĩnakɛ à gà kↄ̀, à bò a sarɛ. Akũ à sozanↄ gbɛ̃ zↄ̃kↄ̃ↄ sìsi à a là tó Yesu gà kↄ̀.⁴⁵Kũ Pilati gbɛ̃ zↄ̃kↄ̃ↄ yã pìi mà, akũ à Yusufu gbà zɛ́ à gɛ̀ɛ pì sɛ́.⁴⁶Akũ Yusufu gɛ̀ɛ à táaru biza lù, akũ à gɛ̀ɛ à a gɛ̀ɛ kìpa lía à biza pìi fĩ̀fĩa. À a dà gbɛ̀wɛɛ kũ ò sↄ̀ mira ũ gũn, akũ à gbɛ̀ gbɛ̃̀ntɛ̃ gbigiri kɛ̀ à tàta wɛ̀ɛ pìlɛ.⁴⁷Mariama Magadalɛni kũ Mariama Yusufu dao è gu kũ ò Yesu gɛ̀ɛ pìi wùtɛn.