1Rehn riauwoar luhwoa mwohn Joarwihn Passover apel Pilahwa Joah Doal Ihs. Jamwrou laplap apel jounpadahk in Kojonneddok raprapahki doahr irai en widingehdi apel joalihdi Jesus pwa irai en kojukdi.2Irai ken pwahpene nehn pwungarai, “Kisai joah wia anjoau in kamdipw oauwe, pwadoar armaj kan loakloakoahkihda.”
Jesus Salipekla nehn Bethany
3Jesus minmine nehn Bethany nehn umwen Simon, woal lepahu. Nehn irai mwingmwinge, lihmen dilda ipoa, wa rume siksik oau ma dirin le ma inenin karahdin apel koalik dupkoa, ma wiawi jang in pwilin suhkoa ma adanki nard. Liho ken koauwehla rume siksikko widekihdihoang pohn moangoan Jesus.4Epwi ma pwili mine wijahu ken lioasla pwahpene nehn pwungarai, “Amwda le karahdin oauwe ken ohla mwahl?5Nehn ah kakkoar noasla in mwani silper jilipwiki mihn jeuweje irai ma paijuwed.” Irai ken liplipahnedi liho.6Jesus pwa, “Kamwai pijekjang! Kamwai joah diroapwki lihe! Siahk mwehu, oau me ih wiahng Ngoahi.7Irai ma paijuwed kan kin minminehr ipamwai rehn ohroj; doari anjoau ohroj ma kamwai mwehuki, kamwai kak jeuweje irai; a Ngoahi, Ngoahi jehpirin pwilpwili kamwai anjoau ohroj.8Ih ne wiahda uhwen ma ih kak: Ih wiahda soal oauwe oang palwoaroaioa pwa en koaunopda dahkij ma pirin wiawihoang Ngoahi mwohn oai pirin joajjoardi.9Doari, kamwai en kidal pwa wija ohroj nehn jampah ma Rongmwehu pirin lel dahkij ma ih ne wiahda pirin pel pwili lohkjili pwa en kin wia mihn kasman Ngoahi.”
Judas Pwungkihla en Pangla Jesus
10Judas Iscariot, emen irai eijek roahmenno, ken inla ipen jamwrou laplappok pwa en panngoang irai Jesus.11Irai ken perenkihda dahkij Judas pwehng irai. Irai ken inoaukihoang ih pwa irai pirin dupukki mwani. Doari, jang nehn anjoauwo johpwa me Judas nimen wia, ioarroar en kidalda anjoau mwehu ih en kak pangla Jesus.
Jesus apel Nah Sohnpadahkkok Mwingehpene nehn Kamdipw in Passover
12Nehn keiouin rehnin Joarwihn Pilahwa Joah Doal Ihs, rehnno ma irai kin kalap kojukdi jihpw pwulopwul in Passover, nihn Jesus sohnpadahkkok ken pwehng, “Ia wija Koawoa nimen kamai en koaunopda Oamw kamdipw in Passover‑o?”13Jesus ken kadarla ara roahmen, pwehng, “Kamwa alwe nehn kahnihmmwen; kamwa pirin suhwoang woal men ma wahwahwa dohn pil oau. Kamwa ken kaujwe.14Wija ma ih pirin dilda, kamwa pel dilda kamwa pwehng koaun in ummwo pwa Jounpadahkko iloakihdo pwa kama en idoak ipoamw, ‘Ia pere ma Ngoahi apel Noai sohnpadahkkok pirin wia amai kamdipw in Passover?’15A ih pirin kajalehioang kamwa pere koalik oau puwoa, ma ne koajoanjoandi apel koaunopda. Doari, kamwa koaunopda joang ohroj wijahu.”16Sohnpadahkkok lella nehn kahnihmmwo; ira kidalda me ohroj doahr ma Ih pwehng ira. Ara ken koaunopda me ohroj.17Injoausikpene, Jesus apel Nah sohnpadahk eijek roahmenno inla Jerusalem.18Nehn irai mwingmwinge in sehpillo, Jesus pwehng irai, “Ngoahi pwehng kamwai in mehlel, pwa emen kamwai pirin pangla Ngoahi emen ma pwili Ngoahi mwingmwinge me.”19Sohnpadahkkok ken pwunodkihda lalloauwe, irai ken sapda wademen idoak ipoa, “Maing, ngoahi ma koawoa pwahki lalloauwe?”20Jesus japoang, “Eh, emen jang kamwai eijek roahmen pwiai, emen ma pwili kadkadu kanah pilahwahu nehn Oai mwoakke.21Mehlel pwa Nihn-Armaj uhdahn pirin mehdi doahroar Puk Joarwi ne pwa, nen naunahng armajjo ma pirin pangla Nihn-Armaj! Mwehuwoanngoar armaj mene en johpwa noaisikdi!”
En Koaunno Kamdipw Joarwi
22Nehn anjoauwo ma irai mwingmwinge Jesus kihda pilahwahioau kapingkalahnganki oang Koahs, sipwangpijoang kioang Nah sohnpadahkkok, pwehng, “Kamwai oaloa, pwa ioar palwoaroaioahwa me.”23Ih pel oaloa mwoak oau kapingkalahnganki oang Koahs, kioang irai. Irai ohroj ken pwili nimjang.24Ih pel pwa, “Ioar insahihoawa me ma pirin widekdihoang armaj ohroj, insahihoa ma pirin kadehde en Koahs Inoau Kapw.25Ngoahi pwehng kamwai in mehlel, pwa jang mwerin rehnnoauwe, Ngoahi johla pirin pwuroahng nim wain oaroh lel rehnno ma Ngoahi pirin pwuroahng nim wain kapw nehn wein Koahs.”26Mwerin irai koaulki koaul pas, irai ken allaluhlahng in Dolin Olip.
Jesus Kohpda en Peter ah pirin kahmahmkihla Ih
27Jesus ken pwehng irai, “Kamwai ohroj pirin kaupijoang apel kerpwihla Ngoahi, pwa Puk Joarwi ne pwa, ‘Koahs pirin kojukdi jiloapoahu, a jihpw kan pirin kaupijoang.’28A mwerin Oai pirin iejda, Ngoahi pirin inla mwohmwai Galilee.”29Peter japoang Jesus, “Maing, mihnda ma ohroj pirin kerpwihla koawoa, a ngoahioahr joah!”30Jesus pwehng Peter, “Ngoahi pwehng koawoa in mehlel, pwa pwongoauwe, mwohn joang jummwa kariau, koawoa pirin kahmahmkihla Ngoahi pehn jiluh, pwa koawoa jehjoa Ngoahi.”31A Peter japoang Jesus, in ngil sihkei, “Ngoahi johpwa pirin kahmahmki pwa ngoahi jehjoa koawoa, Maing, mihnda ma ngoahi pel pwili koawoa mehdi.” Doari, sohnpadahkkok ohroj pel pwili wia joangoan sikesikkoauwe.
Jesus Kapkap nehn Mwoaswel Gethsemane
32Irai lel nehn mwoaswel ma adanki Gethsemane. Jesus ken pwehng Nah sohnpadahkkok, “Kamwai mwindi, pwa Ngoahi pirin kapkap.”33Ih ken ukda Peter, James apel John. Ih injinjuwedla apel pahsoaula,34Ih ken pwehng irai, “Nehn kapehdihoa inenin pwunodda doahrma Ngoahi pirin mehdi. Kamwai jowi Ngoahi me johpwa moairla.”35Ih ken inla ekij dohlahjang irai, poadpwomwla pohn pwirej kapkapki ma awahn loklokko johkak dauluhl jang Ih.36Ih ken pwa, “Pahpa, Pahpa, me ohroj kak ipoamw. Koawoa kihwehjang Ngoahi dal oauwe. A joah, jaudi injenoai en pwoaida, pwa dahkij Koawoa kupwurki ioar en pwoaida.”37Ih ken japahldo ipen irai jilmenno kidalda pwa irai moair. Ih ken pwehng Peter, “Simon, koawoa moair? Koawoa joh kak pwili poahpoahpoahdki awa oauwoar?”38Ih ken pwehng irai, “Kamwai pwili poahd apel kapkap pwa doar kamwai lohdihoang nehn jongjong. Pwa ngen ma peik a palwar ma jasihkei.”39Ih pel japahlla kapkap, in joangoan mwommwohr.40Ih ken pel japahldohng ipen Nah sohnpadahkkok kidalda pwa irai moahmoahmoair, pwa mijaraihok inenin soausoaukihla arai nimen moair. Irai ken jehjoahla pwa da irai en pwehng Jesus.41Mwerin, kajiluh in Ah pwurla iparai, Ih pwehng irai, “Kamwai ken moair koamkoammoal? Ne isar! Awahu ne leldo, ma ioar Nihn-Armaj pirin pangpangla ipen irai dipan kan.42Kamwai pwohrda! Kisai! Kapang, ioar armaj wa ma pirin pangla Ngoahi ne leldo.”
Jesus ne Joaldi
43Jesus kahjik kadoarihla Ah sikesik, a Judas, emen arai eijek roahmenno, lel Ipoa. Pokon koalikkoau ma pwili; irai wijik kodlaij apel koapwoahn pei, indoahjang ipen jamwrou laplappok, jounpadahk in kojonneddok apel koaunnok.44Judas kioang pokonno kilel oau, pwa, “Armajjo ma Ngoahi pirin misik, ioar Ih, kamwai joalihdi. Kamwai ukwe jiloa Ih.”45Nehn en Judas lel wijahu, ih ken inlahng ipen Jesus, pwehng, “Rabbi!”ih ken misik Jesus.46Pokonno ken koldi Jesus joalihdi Ih soang.47A emen iraihok ma mine wijahu, wijda nah kodlaijjo ngap pijoang poaloahjang sien nihn emen Jamwrou Laplappo lidu.48Jesus ken pwehng irai, “Imdoahr, kamwai indoahng koldi Ngoahi wijik jahr apel koapwoahn pei, doahr ma Ngoahi pwen lollap nauna men?49Rehn ohroj Ngoahi kin minminehr ipamwai, padpadahk nehn Umw Joarwiho, kamwai johpwa joalihdi Ngoahi. Doari, me pirin wiawi pwa lalin Puk Joarwi en pwoaida.”50Nah sohnpadahkkok ohroj ken kerpwihla Ih kaula.51Mwahnkapw men pwili kauj Jesus; pidkihpene palwoaroa upuhp oau. Irai jong in koldi ih.52Ih kaula kiljoau, kaujang ah likkoauwo.
Jesus Uhda Mwohn Mwoalen Koapwunngo
53Irai ken uklahng Jesus in umwen Jamwrou Laplappo, wija ma ohroj jamwrou laplappok, koaunnok apel jounpadahk in Kojonneddok pokonpene.54Peter pwen kahkahkaujjoar Jesus a ekij dohlahjang, oaroh lel nehn kelin umwen Jamwrou Laplappo. Ih ken mwindihoang wija ipen jounpei pwi pwa ih en pwili irai koaroangroang ipen oaiho.55Jamwrou laplappok apel Sohn Mwoalen Koapwung ohroj ken engdehnkihla rapahkihda kadehdehpwi ma pirin kahrehioang Jesus en kojkojdi, irai ken johpwa diar.56Dirin jounkadehde pwi kinehioang Jesus likamw pwi, a arai kadehde kan johpwa pwungpene.57Armaj pwi uhda ken kinehioang Jesus likamw oauwe,58“Kamai pein rongjang woalmene, pwa, Ngoahi pirin koauwehla Umw Joarwihe, ma armaj kouda, a mwerin rehn jiluh Ngoahi pirin kouda oau ma johpwa wiawihkihda poahn armaj.”59A pel arai sikesik kan johpwa pwungpene.60Jamwrou Laplappo ken uhda jang nehn dohiahu mwohrai ohroj, ih ken idoak ipen Jesus, “Johpwa mehkij koawoa pirin japoangki kadip pwiai ma wiawihoang koawoa?”61Jesus nennenla, johpwa japoang, Jamwrou Laplappo ken pel pwuroahng idoak ipoa, “Koawoa ma Messiah,Nihn Koahs Kapaiho?”62Jesus ken japoang, “Ioar Ngoahi ma Ih; kamwai ohroj pirin kapang Nihn-Armaj Ah pirin mine in loap moaunin Wija Laplap apel ma allaluhdo pohn koasoau kan in pehnloannge.”63Jamwrou Laplappo ken uhdahr soahrpijoang ah likkoauwo, ken pwahla, “Kisai johpwa anahne pel epwi jounkadehde!64Kamwai ne pein rong Ah lahlahwe. Dahkij kamwai lemleme?” Irai ohroj ken pwa Ih ne dipda doari Ih koanoahng kojkojdi.65Epwi irai ken sapda andipoa, poaroahla mijoa, poki, apel idoak, “Kohpda pwa inje ma poki koawoa?” Jounpeihok ukla Ih poki.
En Peter Kahmahmki Jesus
66Nehn en Peter minmine ijoan nehn kelin umwen Jamwrou Laplappo, lidu jerpein in Jamwrou Laplap men lel wijahu.67Nehn ah kapangda Peter pwili koaroangroang wijahu, ih ken kapkapang Peter, pwehnglahng, “Koawoa pel emen ioangoan Jesus mihn Nazareth.”68Peter ken kahmahmkihla, pwa, “Ngoahi jehjoa… Ngoahi jehjoa dahkij koawoa pwahpwahpwa.” Ih ken dilla nehn palanngo; nehn anjoauwohr joang jummwa keiou wiawi.69Lidu jerpeinno pel pwuroahng kapangda ih wijahu pwehnglahng iraihok ma minmine wijahu, “Uhdahn emen irai me.”70Peter pel pwuroahng kahmahmkihla. Mwerin anjoaukij, irai ma minmine wijahk pel pwehng, “Koawoa johkak kahmahmki pwa koawoa emen kijehrai, pwa koawoa mihn Galilee.”71Peter ken pwahla, “Ngoahi kahukihla pwa ngoahi lallal mehlel! Koahs en koalkoa ngoahi ma ngoahi likamw. Ngoahi jehjoa armaj menen ma kamwai pwahpwahpwa.”72Nehn anjoauwohr joang jummwa kariau wiawi. Peter ken samanda en Jesus pwehng ih, “Mwohn joang jummwa kariau pirin wiawi, koawoa pirin kahmahmki Ngoahi pehn jiluh pwa koawoa jehjoa Ngoahi.”Ih ken sapda joang.