Maaruku14eko_wbt

Shawuri za omuula Yinsa

1Zaari osaleela siikhu piiri paasi yoori efiye siikhu ya Paashikowa na siikhu ya Njampo la Phaawu Zoohiina Fwaramento. Mahaakhimu a tiini na anamanozela a kano aari weekesa nanna ya onkhola Yinsa sirini yoori amuule.2Yo aari olupa yoori: “Khanininkhola vanjampo yoori nihipuwise nzuuzu vakatthi wa atthu.”

Yinsa onvaaziwa mafuttha Betaaniya

3Yinsa ari Betaaniya, eekhaliye vameeza owawe mwinyi mmote anitthiwaaye Simawu namaharaja, khutawo muukha aataniyeeyo suupha ya mafuttha oonukhela awaatta nzurukhu. Khupwecha suupha etile khumwiitthela Yinsa veeswa vawe.4Apale aari attaaphale khwiiya ookatipukha khusala oozana atthaaporu yoori: “Aharipwela-ni mafuttha apale.5Maana aari owahi wuuzanyisa miiya ttatthu za nzurukhu wa paratha, aari weettelaaye winkhiwa asikhini.” Yo khunshowera muukha otule.6Ila Yinsa khuwaalikhisa araka: “Mwinlikhe muukha otu khwa heeri, Mwanvelaveliselani? Ye akirettela miiyo etthu yooshapweya.7Maana asikhini mwina mweeyo mileele, na mwinwahi owaawuni mwitakharu. Ila miiyo akinteela wiiya vamote na mweeyo mileele.8Ye aretta etile awahiyeeyo. Avaaza mafuttha oonukhela mwiili aka raku zeene, atthenkezaka ozikhiwa waka.9Kiniwuuzani khweele yoori: wakhula vahali lintafusiriwaavo nttakhuzi la Nluku khwa olumwenku wooshi, epi arettiyeeyo muukha otu, zeettaka olupiwa noofikhiriwa ye.”

Yuuda oninzinkula Yinsa

10Aphano Yuuda Eshikariyoote, mmote wa apale khumi na awiri, khulawa wa mahaakhimu a tiini khwa shawuri za onzinkula Yinsa.11Yo wakathi ansiliyeevo khwiiya oofurahi na khumwaahiti Yuuda omwinkha nzurukhu. Khwa wakathi aya opo Yuuda aari weekesa kiphenyo saana yoori anzinkule.

Yinsa onja njampo la paashikowa

12Siikhu ya mwanzo ya Njampo la Phaawu Yoohiina Fwaramento, wakathi waazoweriweeyo orettiwa twaha pwittipwitthi yoojeliwa paashikowa, anakhiyoni a Yinsa khumuuzela yoori: “Ontakha yoori neette vayi nootthenkesele etthu yoojiwa ya paashikowa?”13Yinsa khuwaaruma anakhiyoni awe awiri khuwooza yoori: “Mwilawe mpakha ositati, ottuukho mwinlawa mwansikane mwinyi athuuliye yuuku ya maati. Mwinlotte othuuto,14mwimuuze mweenyewe nyuupa ethiito anttelaaye oviramo yoori ‘Mwaaliimu ontta wuuzela: Orivayi nsana aka wa omaka-vo, kinttelaaye onja-vo paashikowa na anakhiyoni aka?’15Aphano ye ontta wuunozani mweeyo khwa nyuupa ya vatulu nsana nwulweene na zooshi mwinihithajiyaaye. Mwitthenkeze attaapho njampo letthu.”16Anakhiyoni apale awiri khulawa mpakha ositati, khusikana zooshi nkhama etthiipile Yinsa aalupiyeezo na khuntthekeza paashikowa.17Wakathi oripiyeevo, Yinsa khuta na anakhiyoni awe apale khumi na awiri.18Ari vameeza eettaka oja Yinsa khuri: “Weekhweele kiniwuuzani yoori mmote wa mweeyo anjaaye na miiyo onkizinkula.”19Ooshi khwiiya oohuzunikha na khwaaza wuuzela wakhula mmote khwa zwaamu yawe yoori: “Talili khahiyo miiyo?”20Yinsa khujipu yoori: “Mmote wa khumi na awiri anjanaaye miiyo parathu moote.21Mwaana wa Pinaatamu onlawa afwe, nkhama etthiipo yaatikhiweeyo monkoni wa ye. Ila wootakhaliwa ti otule anttelaaye onzinkula Mwaana wa Pinaatamu! Afwataali ahivokoliweeni!”

Njampo la mwiili na taamu ya Mbwana

22Eettaka oja, Yinsa khuthuula phaawu, khuparikhiya, khumeya, khuwenkha anakhiyoni awe na khuwooza yoori: “Mwithuule; opu mwiili aka.”23Elottelanaka, khuthuula jiikira, khushukhurwela, khuwenkha anakhiyoni awe na ooshi khunywa.24Khuwooza yoori: “Eti ti taamu yaka ya wahati yiitthiweeyo khwa zwaamu ya atthu ooshi.25Miiyo kiniwuuzani khweele yoori akinteela onywa theenya nshumo wa nrayi wa wuuva, mpakha siikhu kinttelaaye onywa theenya na mweeyo muufwalume wa Nluku.”26Paata ya yo wiipa liipo, khulankha khusala alawa omwaako Oluveera.

Yinsa oninchimulela Pheeturu

27Aphano Yinsa khuwooza yoori: “Mooshi mweeyo mwinlawa mwakanswi. Maana yaatikhiwa yoori: ‘Kininvulalisa nshuki aya, na pwittipwitthi zaya zinttela omwazeya.’28Ila paata ya osisimuwa waka, kinttela olokoza Kalileya.”29Aphano Pheeturu khutukhuru araka: “Hatha nkhama ooshi eetta wuutthira, miiyo akinuutthira.30Yinsa khunjipu yoori: “Weekhweele kiniwuuza yoori leelo osikhu otthuupu, likukhuwi lihineekhe swaafu piiri, onteela okikhana swaafu ttatthu.”31Ila Pheeturu khusala akhanyarela channu araka: “Hatha nkhama kintakha wuuliwa vamote na weeyo, akinteela wuukhana.” Ooshi khulupa etthiipo.

Yinsa nwoorotha wa Yetemaani

32Aphano khulankha khulawa puuro eniitthiwaaye Yetemaani, khuwooza anakhiyoni awe yoori: “Mwiikhale apha, miiyo kinttela olompa.”33Khunthuula Pheeturu, Tiyaaku na Yaahaya khwaaza oshukulikha, othunkuwikha na ohuzunikha.34Yinsa khuwooza yoori: “Nafusi yaka ti ya ohuzunikha venkivene woosaleela ofwa; mwisale apha na mwijeekesele.”35Yinsa khuwaasusa vattitthiiru khukokhora na khusala alompa yoori nkhama enwaheya aattuwananisiwe wakathi opu wa ohoowa.36Aari olupa toono: Oo Paapa zooshi khwa weeyo zinwaheya. Okaattuwananise miiyo jiikira eti ya ohoowa. Ila ehirettikhane khwa matakhelo aka, ila khwa matakhelo awo.37Apho khurutela aphale aariivo anakhiyoni awe, khuwaasikana eettaka olala. Khumuuza Pheeturu yoori: “Simawu, ontta olala? Khuwaheeni ojeekesela nenkawu wakathi mmote?38Mwijeekesele na mwilompe, yoori mwihikwele muuzayiniwa; rooho ti yookhomaala, ila mwiili pi woottettheya.”39Yinsa khuwaasusa opheya khusala alompa, arutelaka mattakhuzi mamoteru.40Wakathi arutiyeevo khuwaasikana eettaka olala theenya, mwaasa maasho aya eetta owaalemela; khaari ojuwa etthu yoojipu.41Khuta swaafu ya ttaatthu khuwooza yoori: “Nalelo mwintta olala na ovumula? Zafiyela! Wafiya wakathi wa Mwaana wa Pinaatamu winkheleliwa mmakhono wa anatwampi.42Mwilankhe, nilawe! Mwimoone namazinkula ori kharipu.

Ofukeliwa wa Yinsa

43Yinsa nalelo eettaka ottakhula, khusala ata Yuuda mmote wa anakhiyoni apale khumi na awiri. Aari ota na atthu awaatta athuuliye phanka na kolomontto, aarumiweeyo ti mahaakhimu a tiini, anamanozela a kano na attunkhulu a tiini.44Namazinkula aawooziye alama araka: “Otule kinttelaaye ompatikha, ti othuuto; mwinkhole mwinthuule saana.”45Wakathi afiyeevo, ye khumwaattama khumuuza yoori: “Mwaaliimu!” na khumpatikha.46Atthu apale khunkhola Yinsa na khunkholelela.47Aphano mmote wa anakhiyoni awe aariina kharipu, khufuttha phanka khunvavela khushija nshiilo la karumeya wa haakhimu nwulu wa tiini.48Yinsa khuwooza yoori: “Mwakiteela na phanka na mikokontto yoori mwikikhole nkhama nantarawu?49Siikhu zooshi kaari vamote na mweeyo kisomisaka Nnyupa Woosifwiwamo, khuhikikholi; ila zooshi epi zaariye yoori emarisele zawaatikhiwa ti manapiyu.50Anakhiyoni awe ooshi khumwanswi na khutthira.51Ila shapu mmote, aajifinikhiyeeyo nkhumi woolakala paasi aari onlottaaye Yinsa. Yo khunkhola,52ila khuvula nkhumi opule, khutthira waazu.

Yinsa vakatthi wa Mashawuriiya

53Khunthuula Yinsa khunlawana wa haakhimu nwulu wa tiini na khuthukumana mahaakhimu a tiini ooshi, attunkhulu a tiini na anamanozela a kano.54Pheeturu khusala awaalotta ari peetiwene mpakha nlikokoro wa haakhimu nwulu wa tiini, na khulawa khwiikhala na anamarumeyela, ootthaka moottho.55Mahaakhimu a tiini na Mashawuriiya ooshi aari weekesa onsikanana Yinsa paathuli moote yoori anhukhumwele ofwa, ila khuhinsikanani hatha moote.56Maana awaatta aari olawela oshaahiti woovonyeya khwa Yinsa, ila tukhuru zaya khazaari sawasawa.57Aphano khulankha atthu akina na onlupeza vitthu zoovonyeya.58“Fweeyo nansiila alupaka yoori: ‘Kimpwecha Nyuupa eti Yoosifwiwamo yoojekiwa pi makhono a anaatamu, na siikhu ttatthu kijeke kiina, yoohijekiwi pi makhono eenaatamu.’”59Ila hatha nkhama piitthiipo, mattakhuzi aya khaari wiiya sawasawa.60Khulankha haakhimu nwulu wa tiini khumuuzela Yinsa yoori: “Khunjipu mattakhuzi apa onlokoveziwaaye?”61Ila Yinsa khwiiya woonyamala, khuhijipu hatha etthu. Haakhimu nwulu wa tiini khurutela omuuzela theenya yoori: “Weeyo o Al-Masiihu, mwaana wa Nluku Wooparikhiyiwa?”62Yinsa khujipu yoori: “Miiyo ki othuuto, na mwinlawa mwamoone Mwaana wa Pinaatamu eekhaliye nkhono nlume wa Nluku wa owahi zooshi, na ataaka mmawiku a pinkuuni.”63Aphano haakhimu nwulu wa tiini khuvarula kuwo zawe na khuri: “Khi ninrettanna oshaahiti nkina!64Mweeyo mwasiila okufuru wawe. Mwinuupuwela niini?” Atthu ooshi anri onsuhi wuuliwa.65Aphano akina khwaaza ontthemela khunfinikha omaasho wawe khusala ampwakula na amuuzela yoori: “Ti paani oopiyeeyo? Onlupe!” Anamweekesela khunkhola na khumpwakula.

Pheeturu oninkhana Yinsa

66Pheeturu aarettiye ari vathi nlikokoro wa nyuupa etile wakathi atiyeeyo njaazi wa haakhimu nwulu wa tiini.67Amooniyeevo Pheeturu eettaka woottha moottho khuri: “Weeyo waari na Yinsa wa Nazareeti.”68Ila Pheeturu khukhana araka: “Akininjuwa, na wala akinsiila etthu onlupaaye.” Khusaruwela nlako wa nlikokoro.69Wakathi njaazi otule amooniyeevo theenya, khuwooza apale aariina attaaphale yoori: “Otu mmote wa atthaapo.”70Ila khukhana theenya. Oviriyeevo wakathi vattitthiiru, apale aariina atthaapale theenya khumuuza Pheeturu yoori: “Weekhweele, weeyo o mmoteru na atthaapo, maana onkalileya.71Ye khwaaza onlaani na olapha yoori: “Akininjuwa pinaatamu aya oto oninlupaaye.”72Nasaapiru likukhuwi khwiikha swaafu ya phiiri. Pheeturu khuupuwela mattakhuzi Yinsa amuuziyeeyo yoori: “Likukhuwi lihineekhe swaafu piiri, onikikhana swaafu ttatthu.” Khulaavo aphale vaya khusala alila.
expand_more
Search