Marku11mgh_wbt

Yesu nakela atthapeliyaka uYerusalemu.

1Naattamenrye uYerusalemu, vakhiviru ni Petifaki ni Petaniya, cooco ni mwako Olivera, Yesu ahaaruma owitthuca awe eeli,2ni ahaahimerya: Nrwee iwaani yowaattamana, mwakelaka nnamphwanya mwaapuru ootthukiya, hinaya uweliya ni ntthu. Mwantthukule ni nkiwiihere.3Akhalaka ntthu nookohani, nlattuni mpankaka ciicammo. Mwaakhule Apwiya anamphavela, ni ankowuturuselani wowakuvyaca.4Yahorwaa phumphwanyaka mwaapuru natthukeleliye wankhorani, mphante wovate woluwani, ni yahontthukula.5Ni atthu yaari wonwo yahokoha: Nnopankani muntthukulaka mwaapuru?6Yahaakhula toko Yesu cahimenrawe, ni yahaahiya urwaca.7Yahonrwehela Yesu mwaapuru uyo, yahonkhunela cowara caya, ni Yesu ahomwela.8Atthu enci yaanawatala cowara caya mphironi, akina yamwarusela miritha cikithi caathikinlyaya mmattani.9Atthu yahoonle na ale yantthara yanakhuwa: Hosaana, noreeriya nowa mwancina na Apwiya.10Uhoreeriya omwene umwa wa athumwanihu Taviti. Hosaana wonculu.11Ahophiya uYerusalemu, Yesu ahokela Inupa ya Nluku, ni namanle uweha citthu cothene canrukurenrye, wahokhala yocoocilo, ahokhuma, phurwaka uPetaniya ni owiitthuca awe khumi na eeli.

Mwiri wo nhokorokho oonalaphiya

12Wasilyaya wicisu wakhumaya uPetaniya, Yesu yahommola itala.13Oonaka uttayi mwiri wonhokorokho waari ni matakhuru aya makithi, ahorwaa uweha wakhala wiira uhaawo nhokorokho wowiima, nanso attameryaka, khaphwanyile, aphwanyile matakhuru paahi, kontha khawari ukati wowiima mihokorokho.14Aheerela vano: Hikhale tho nohala ulya cowiima caa. Ni owiitthuca awe yaheewa itthu ile.

Mayothumiha anawomoliya.

15Yahophiya uYerusalemu, ni akelaka Inupa ya Nluku ahopacera woomola mayothumiha, na ale yathuma wonwo, ahokakhela vathi meeca a atthu yaakakhaniha, ni ihice ca atthu yathuma ikhuntta.16Ni khaalevela wiira ikusiye itthu yakhuma Inupa ya Nluku.17Ni anaweetthuciha eeraka: Ihantikhiya:Inupa aka inowowihaninya inupa yoswali uneethi wothene.Nanso nyu nhotatusa nikhuku na namwiinya.18Oolupale a mayasataka ni mayowantikha yaheewa itthu ile, ni yaanaphavela mananna umwiiva, nanso yaanamoova, nlattu mphwinko wothene wanawuminya mwaano ni meetthuciho awe.19Wiila waya, yahorwaa utaa waya iparasa.

Mwiri wonhokorokho unawuma.

20Uvira waya, wicisu, yahoona mwiri wonhokorokho unoomile, ni mitithari caya cothene.21Ni Peturu oopuwelaka, ahomwiirela Yesu: Wooneke mwalimu, mwiri wonhokorokho ulaphilyaa, uhooma.22Yesu aheerela: Munkupali Nluku.23Khweeli kinawuhimeryani, ntthu eerelaka mwako ula: 'Wiiphele nipuro niryaa wivonyere upahari', ni ahaanyihereke munrimani mwawe nanso akupaliki wiira itthu ihimilyawe inaahala wiiranyaa; khweeli, inawiiranyaa.24Phimaana, kinawuhimeryani wiira citthu cothene cinhalenyu ulepela nswaliki, nkupaliki wiira nnawaakhela, ni nnapattha.25Mwemelaka vale wiira nswali, mwakhalanaka mwamweetthu ni nkhwiinyu, munleveleke wiira Athumwaninyu, ari wirimu, yuuleveleleni cookosa cinyu.26Nlattu, mwahaleveleleke akhwinyu, Athumwaninyu ari wirimu khanhala ulevelela cookosa cinyu.

Ikuru awe Yesu yoolamula

27Yahoturuwela uYerusalemu, ni Yesu eettaka Mpani mwaNluku, oolupale a mayasataka, mayowantikha ni mahumu, yahomwaattamerya28ni yahoonkoha: Umpanka citthu nnya ni nlamulo nawani? Ulamulenle tipani upanka citthu nnya?29Yesu ahaakhula: Hata ni mi, kinawukohani itthu. Nkaakhule vano kinaahala wuhimeryani cineeraka woopanka citthu nnya ni nlamulo nawani.30Upatisu wa Yohani waari wo wirimu, atthuna wa atthu? Nkaakhule.31Yahopacera ukohana ayayoru, yiiraka: Neeraka, wo wirimu, naahala wiira, 'Nhinkupalenleni mweeco?'32Neeraka, wa atthu, ninawoova mphwinko. Nlattu othene yanamoona Yohani toko nnapiyu.33Umwiisoni yahomwaakhula: Khanincuwela. Ni Yesu aheerela: Hata ni Mi akinohimeryani ni nlamulo nawani kimpankaka citthu nnya.
expand_more
Search