15बाक यीशु यरूशलेम दा बंदुन अदिक आव मंदिर दा होगकु अल लेन-देन माळावाळेरी तेगुली कुरतुन, अदिक सावकारगोळ्द पांळ्सी अदिक कबूतर मारावाळेर्द चौकीगोळी ऊलटुसदुन;16अदिक आव यारीकु भी मंदिर दा टु आगकु सामान वयोद आग्या कोटीदील.17अदिक आव आंदरी उपदेश कोळली कुरतुन, “येन ईद शास्त्र दा लिख्सकु हैलेच, ‘कि नांद मान्ना सप्पा राष्ट्र अन साटी प्रार्थना अन्द मान्ना कहलुसीत?’ पर नीव अदरी डाकूगोळ्द हड्डा माळकु ईटीर.”18प्रधान याजकगोळ अदिक नियम इन गुरुगोळ ईद केळदुर, रा आंदुर यीशु उक कोन्नोर साटी मवका ढुंढ्सली कुरतुर, यतिकी आंदुर आऊन से अंजतोगोर, इदुरसाटी कि सप्पा लॉकुर आऊन उपदेश देल चकित ईरोर.19अदिक द्यावगा आगतेला अच, यीशु अदिक आऊन चेला नगर टु व्हार्या होटोदुर.
वंळगींद अंजीर इन मार्र टु शिक्षा
20बाक दुसरा दिशी व्हातर्या का याग आंदुर हादी मा टु होगोर रा आ अंजीर इन मार्र इक म्याकुच टु जळ ताका वंळगींद नोळदुर.21पतरस उक अद मात याद बत्त, अदिक आव यीशु से अंदुन, “हे गुरु, नोळ! ईद अंजीर इन मार्र यदरी नी श्राप कोटीद, वंळ्गेग्याद.”22यीशु आंदरी उत्तर कोट्टुन, “परमेश्वर मा विश्वास ईटी.23ना नीम से खरा अनतीन कि जो यावारा ई पहाळी से अंदान, ‘नी अल टु कित्तेग, अदिक समुद्र दा होगकु बिळ,’ अदिक तान मन दा संक्या ईट बाळुल, लेकीन विश्वास माळुल कि जो अनतीन अद आगेदीत, रा आऊन साठी हांग अच आदीन.24इदुरसाटी ना नीम से अनतीन, कि जो येनारा नीव प्रार्थना माळकु बेळीर, रा विश्वास माळकोमी कि अद नीमी सिक्केत, अदिक अद नीम्द आगेत.25अदिक याग यागलु नीव नीदुरकु प्रार्थना माळतीर रा अगर नीम मन दा यारदारा प्रती येनारा विरोध आद, रा माफ माळी, इदुरसाटी कि नीम स्वर्गीय आप्प परमेश्वर भी निमोव अपराध माफ माळुल.26अदिक अगर नीव माफ माळतीदील रा नीम आप्प भी जो स्वर्ग दा आन नीम अपराध माफ ईला माळ्यान.”
यीशु उन अधिकार मा प्रश्न
27आंदुर मात्त ऊंद घन यरूशलेम दा बंदुर, अदिक याग यीशु मंदिर दा वयाळोन रा प्रधान याजक अदिक नियम इन गुरु अदिक स्याणागोळ आऊन हात्ती बंदकु केळली कुरतुर,28“नी ईद क्याल्सा याता अधिकार देल माळत्या? अदिक ईद अधिकार नीनी याव कोटान कि नी ईद क्याल्सा माळत्या?”29यीशु आंदुर से अंदुन, “ना भी नीम से ऊंद प्रश्न केळतीन; नानी उत्तर कोळी रा ना नीमी हेळाईन कि ना ईद क्याल्सा यातोद अधिकार देल माळतीन.30यूहन्ना अक बपतिस्मा कोळोद अधिकार स्वर्ग इन दी टु ईरोद या मंळसागोळ दी टु ईरोद. नानी उत्तर कोळी.”31आग आंदुर आपस दा मातगोळ माळली कुरतुर कि अगर नाव अंदेव स्वर्ग इन दी टु, रा आव अंदान, बाक नीव यूहन्ना मा विश्वास येती माळीदील?32अदिक अगर नाव अंदेव, मंळसागोळ दी टु, रा लॉकुर नाम मा अच सिट्ट माळ्यार आंदुर नियम इन गुरु लॉकुर से हापाळ अंजतोगोर यतिकी सप्पा लॉक ईद मानसोर कि यूहन्ना वास्तव दा ऊंद भविष्यवक्ता आन.33इदुरसाटी आंदुर यीशु उक उत्तर कोट्टुर, “नाव जानसालेव.” यीशु आंदुर से अंदुन, “ना भी नीमी हेळालीन कि ईद क्याल्सा ना याता अधिकार देल माळतीन.”