1Pathian Tapa Jesus Christ lungdamna thu a kipatna in;2Kamsang te in a sonkholsa bangma in, en vun, na pai natu lampi a pua tu in, ka kamtaipa na mai ah sawl khi hi.3Senneal ngam sungah a au aw khat in, Topa lampi puakhol vun a, tangsak vun, ci hi.4John in senneal ngam ah tuiphumna pia a, mawmaisakna tu in ki sikkik na tuiphumna thu tangko hi.5Jerusalem le Judah ngam theampo pan in mi tampi te John kungah hongpai uh a, amate mawna te pualak in Jordan ngun ah tui ki phum tek uh hi.6John sia kala-uk mul taw a ki tak puan sil a, a kawng sia savun kawngkhau taw kil hi; khaumaw le khuaitui te ne hi;7Ka nung pan hongpai pa sia kei sang in thahat zaw a, kei ka hile kun in a peangdap khau sutsak tu in zong ka kiphu bua hi:8Keima in tui taw tuiphumna kong pia hi: ahizong Ama in Tha Thiangtho taw tuiphumna hong pia tu hi, ci in pualak hi.
John in Jesus Tuiphum
9Tuazawkciang in, Jesus sia Galilee ngam Nazareth pan hongpai in, John in Jordan ngun ah tuiphumna pia hi.10Jesus tuisung pan a thawto pociang, van hong ki hong in, Thaa sia vakhu bang in a tungah hong tuaksuk John in mu hi:11Van pan in aw khat hong nging a, Nangma sia ka it ka Tapa na hihi, Na tungah ka lungkim mama hi, ci hi.
Jesus Ze-et na
12Tuazawk pociang in, Thaa in Jesus sia senneal ngam ah paisak hi.13Tua senneal ngam ah ni sawm li om a, Satan in ze-et hi; senneal ngam sung ngamsa te taw omkhawm a; vantung mite in khoi hi.
Jesus Nasep Kipan
14John thong a tak zawkciang in Jesus Galilee ah pai a, Pathian kumpingam lungdamna thuhil hi.15A hun hong cing zo a, Pathian kumpingam hong nai zo hi, na mawna uh kisik vun a, lungdamna thu um vun,ci hi.
Nungzui Masa Te A Sapna
16Jesus Galilee tuili hui ah a pai laitak in Simon le a suapuipa Andrew sia tuili sungah ngenpai in a om laitak mu hi:17Jesus in amate tung ah, Ka nung hong zui tavun, mihing man te kong suaksak tu hi,ci hi.18Taciang amate in thakhatthu in a ngen te nusia in, a nungzui uh hi.19A khuala hiat na mun a thet uh ciang in Zebedee tapa James le John te u nau ngunkuang sungah ngen a phaw uh laitak mu hi.20Jesus in a mu pociang in sam a; amate zong ngunkuang sungah a pa Zebedee le a naseam te nusia in a nung zui uh hi.
Jesus in Doai Ngilo Hawlkhia
21Amate Capernaum khua ah pai uh a; sabbath ni hong thet pociang synagogue sungah tum in, thuhil hi.22Amate in a hil na lamdangsa tek uh hi: banghangziam cile thukhamhil te bang in hil ngawl in, thunei te khat bang in hil hi.23Amate synagogue sungah doai ngilo vei pasal khat om a,24Nang Nazareth mi Jesus, hong om nginge sak po tan; nang taw bang sep tu nei khu ziam? hong susia tu in hongpai hi ngawl ni ziam? Nangma in Pathian mithiangtho ni hi, ci hong he khi hi, ci au hi.25Tasiaciang Jesus in ama tei a, Om nginge po in a, hisia pa sung pan pusuak in,ci hi.26Doai ngilo in tuapa huangsak vadil a, a nging tatak a au zawkciang, a sung pan pusuak hi.27Amate theampo in lamdangsa mama uh a, hisia in bangbang hithong ziam? hibang te koibang hil na thak ziam? banghangziam cile thuneina taw thupia in, doai ngilo te nangawn in a thuni hi, ci in amate sungah ki dong tek uh hi.28Taciang a min sia Galilee ngam kimkot teng theampo ah manlangtak in thang hi.
Jesus in Mi Tampi Damsak
29Amate synagogue sung pan a pusua zawk uh ciang in, James le John te taw Simon le Andrew te innsung ah tumsuak pai uh hi.30Ahihang Simon zi i a nu sia a cisa in lum hi, ci manlang tak in son uh hi.31Taciang Jesus hongpai a, a ban pan len in kaito hi; tasia pociang in a cisa thai a, amate leangna do hi.32Nitak sang ni tum ciang in, cina te le doai te a kungah puak uh hi.33Tua khuapi sung mihing theampo a kongbiang ah hong ki kaikhawm siat uh hi.34Jesus in natna namcin a thuak te damsak a, doai tam mama hawlkhia hi; Jesus in doai te pausak ngawl hi, banghangziam cile amate in Jesus he uh hi.
Jesus Zingtung Tho in Thungen
35A zingciang khuavak ma in Jesus tho a, khuapua sangah pusuak in kuama om ngawl na mun ah thungen hi.36Simon le a lawmte in ama zui tek uh hi.37Amate in a mu uh ciang in, a kungah, mi theampo in hong zong uh hi, ci uh hi.38Jesus in, Khuapi dang te ah zong pai tawng, tuak sungah thuhil tu khi hi: banghangziam cile thuhil tu in hongpai ka hihi,ci hi.39Galilee ngam mun tatuam synagogue te ah thuhil a, doai te zong hawlkhia hi.
Jesus in Miphak Khat Damsak
40Miphak khat ama kungah hongpai a, khupdin in, Topa uk hi po le te keima hong thiangsak thei ni hi, ci in thum hi.41Jesus in tuapa tungah hesuakna nei in, a khut tham a, Uk khi hi; thiang tan,ci hi.42Jesus in a ci zawkpociang in, a phak natna bo vingveng a, ama thiang hi.43Jesus in ama phatak in thu a vaithak zawkciang, paisak hi;44Ama kungah, Kuama son heak in: ahizong thiampi te kungah pai tan a, nangma le nangma ki lak in, amate tungah tetti na lak natu in Moses thupiak biakpiakna pia in,ci hi.45Ahihang tua pa pai in, mun theampo ah a pualak kakoai hu in, Jesus khuapi sungah a kilang in tum thei ngawl a, khua pua sang duisung ah om hi: taciang mun theampo pan in a kungah hongpai tek uh hi.