1Israel-dulemar, Bab-Jehová-ibmar-sogedi be nue itomar:“Be gwichigumar. Be boni-nikagudiid yarmar-asabin be sognamar.Yar-mullugana be-itogega be imakmar.”2Yalamar, Bab-Jehová-urwed be itomar,napa-e-saila-gandikmalad, nue be bogimakar itomar,Bab-Jehová, e-dulemarga igar itosokalid,Israel-dulemargi gwisgusokalid.3Bab-Jehová sogded: “An-dulamar, ¿igi an bemar-imaksa?Be anga-sogmala, ¿ibigi an begi nosa?4Ar ani an Egipto-yalagi bemar-onosadid,maigagudiid-yalagi an bemar-ollor-imaksadid.Ani an bemarga Moisés, Aarón, María, barmisgusadid,adi, amar bemar-idumalagar.5An-dulamar, be-ebinsamala,Moab-dulemar-e-rey-Balac bemar-wiogega bemar-idu igar amisgusanad.Beor-machi-Balaam, igi Balac-abin sogsagusa,a be nue-ebinsamala.Deginbali, Sitimʼye-neg-nugad-akale, Gilgal-neg-nugadse-be-nonigusmaladi, be ebinsabali.Magar be an-dakmala,ani an, Bab-Jehová bemar-onosadid.”6Emide be sogmalad:“Anmarde, ¿igi Bab-Jehová-walikaa gumalosunna?¿Igi anmar Bab-Dummad-Bur-Birigined-asabin sindigar sigmalosunna?¿Moli-bebe-nikad-birgagwenad-ogumakar-ukleged, an ega ukega sedoe?7An sibad-wawaad-machered miliba (1000) Bab-Jehováʼga uker, Bab-Jehová ¿yeer itogoe?Olivo-gwallu bute-miliambe (10,000) an ega uker, ¿yeer itogoe?An ibmar-isgana-imaksad-ular, ¿an-machi-sailagined an ukoe?An-machi-sunnad, ¿an-isgued-ular, an ukoe?”8Ar Bab-Jehová bato bega sogsad ibu ibmar-nuedi.Bab-Jehová be-daed-abemaidi, bato bega sogsad:Igar-napiragwad-imaked be-abemaid,dule-wiledaked be-abemaid,e-asabin gwage-eikwadaed be-abemaid.
Jerusalén-dulemar sabsur-odurdaklegoed
9Jerusalén-dulemar, Bab-Jehová-ibmar-soged nue be itomar:Dule Bab-Dummad-dobee-nanadiile,a-dule, dule-binsaed-ibedid.Sabsur-odurdaklenaid nue be itomala.Bega dule-odurdakleged-barmialidi, nue be itomala.10“¡Dule-isganamar! Ande be-ibmar-nuegan ibmar-isgana-imakedba-amisad, ¿baisurdakode?Degi, ande be ibmar-wilubsamalad-isgana, ¿baisurdakode? ¡Adi surbali!11Ar ande, dule ibmar-wilubsaed-nuegansulid-ebudiid ¿igi yeer dakosunna?Degi, ibmar-wilubdaked-ebudiid, ¿an igi yeer dakosunna? ¡Geg an yeer daked!12Dule-mani-ibegan, sabsur dule-imakedid.Bela neggweburginmalad, gakansilimalad.Na e-ibmar-sogedi bela gakansaedbiid.13Emisgine, ani an sabsur-be-imakmaloed,bemar-isgued-ular, an bemar-obelogoed.14Na be mas-gunmalo-inigwele, gwen be immelegosurmalad,amba ukudmaada be gudii gumaloed.Be ibmar-gwag weemaloe-inigwele, be-ibe berguoed.Ar be ibmar-soggwensaar-gaoedi, ani an bila-onolegedgi be-ibe obelogoed.15Be ibmar-digmaloedi, gwen be weosurmalad,degi, be olivo-gwallu-egurmaloedi, gwen be ebugosurmalad.Vino-onogega uva-nis-egurusadi, be gobosurmarbalid.16”Rey-Omri-igar-mesisadba be nanadimalad,bela Rey-Acab-e-wagan-ibmar-isgana-imaksadba be ibmar-imakdimalad.Amar-ibmar-imaksadyobi be nanadiid.A-ulale, an bemar-obeloged imakoed.Be-dulemar bingedar-itogega an saoed.Dulemar-begi-dodoedi, an imakoed.”