1Nâwe wâni Betelehemu Efrata, ciru okaba we munyi omu milala ya Yûda, emwâwe yo yantengera owarhambula Israheli. Ecisiki câge ciri ca kurhenga mîra, kurhenga ensiku n’amango.2Co carhuma Nyamuzinda âbaleka, kuhika amango g’okuburha kw’olya oli buburha; ago mango lyo omusigala gw’abalumuna gwâshubira kuli bene Israheli.3Ayimanga, âkerêrheza obusò bwâge omu kukolêsa obuhashe bwa Nyakasane, omu kukolêsa obukuze bw’izîno lya Nyakasane Nyamuzinda wâge. Bâgandâza bulya akolaga âbà mukulu kuhika oku buzinda bw’igulu.
Omuntu wâyishiyanka ecihugo ca Asûru
4Oyo muntu ye wâbà murhûla gwîrhu. Asûru akarhêra ecihugo cîrhu, akalabarha eno mwîrhu rhwanamunikakwo bangere nda, na barhambo munâni.5Bâyabula ecihugo ca Asûru n’engôrho; ecihugo ca Nimrodi n’akêre. Arhuyôkola kuli Asûru hano ajà omu cihugo cîrhu, hano analabarha olubibi lw’emwîrhu.Omukolo g’omusigala gwa Bene Yakôbo
6Ago mango, omusigalagwa bene Yakôbo gwâyôrha nka lumè lurhenzire kuli Nyakasane ekarhî k’embaga nyinji, nka kula enkuba eyôrha oku lubala, era erhalinda ndi erhanacîkubagira bantu.7Omusigala gwa Yakôbo gwabêra omu mbaga, omu karhî k’embaga nyinji, nka ntale eri omu nsimba z’emuzirhu, nka mwâna wa ntale omu busô bw’ebibuzi: ngasi ah’agera erhi na kulabarha n’okuvungunyula, na ntâye wamufulumuka.Nyamubâho aherêrekeza ngasi bagwêrhe emihigo mibî
8Mâshi okuboko kwâwe kulambûkire oku bashombanyi bâwe, lyo abakushomba boshi bahirigirha.9Alagi ebyâbà muli olwo lusiku, kwo Nyakasane adesire! Nârhenza ebiterusi byâwe omu mwâwe, nâshanda engâlè zâwe.10Nârhenza ebishagala by’omu cihugo câwe, n’ebyôgo byâwe bizibu byoshi nâbihongola.11Nâkukûla abafumu omu nfune, orhakaciba n’abashonga.12Nârhenza ensalamu zâwe z’okubinjwa, ntenze n’emitungo yâwe, lêro orhakacigashâniza omukolo gw’amaboko gâwe.13Ago mango lyo nâkûla emitungo-nyamwegemerwa omu cihugo câwe, nsherêze n’ebishagala byâwe.14Omu bukunizi bwâni, n’omu mutula gwâni, nacihôla oku mbaga zirhanyumvagya.