Mikeyaxi4hch_wb2

'Arike Tsiyuni kiekariyari ke'aixɨa mɨtitahɨawarieni

1'Imatɨrieka tukari 'umahutsie,yemuri Yawé tukieya manuwekaihɨrite 'amutɨtɨ heima kanakayeriemɨkɨmeta mɨkɨ matsi yunaime hɨrite wara'iwatɨ kanayeimɨkɨ.Hikɨ teɨteri hepana mekaniukɨnikuni,2meta nuiwarite yumɨiretɨ hetsɨana mekani'axɨakuni, mɨpaɨ mekanitiyuakuni:«Xekenakɨni, tepanutikɨne Yawé yemurieyatsie,Kakuwu Kakaɨyarieya tukita.Kakaɨyari yukɨmana yu'aitsikate kataneta'ɨkitɨamɨkɨ,'ana mɨpaɨ tepɨte'u'uwani».Karikɨ Tsiyunitsie kanayeneikani 'ɨkitɨarika,Kerutsareme hetsie, Yawé niukieya.3Kakaɨyari yɨkɨmana yumɨireme teɨteri wahetsiemieme 'aixɨa katinakayurimɨkɨ,meta tita mɨtiheitserie hepaɨtsita pɨtita'uximayatanuiwarite memɨtɨrɨkawi wahetsie meta 'ateewa kiekatari.Yu'ixiparate hatsarunite mepayeitɨaxɨani,meta yupitsikate 'ɨxa xikame mepayeitɨaxɨani.'Ari nuiwarite mepɨkayukwitɨweniri,meta tawariri 'imieri kuyaxa mieme mepɨkayuti'ɨkitɨani.4Yuxexuitɨ kaxie meta piní'iteɨriyari hetɨa xepɨtiyaxikeni,nixewitɨ 'axamatɨarietɨ pɨka'ayani—Yawé Naimekɨmɨtɨrɨkaɨye mɨpaɨ kaniutayɨni—.5Teɨteri yunaitɨ yukakaɨyarixiwahetsie metewiyatɨ mekaniuhuni,matsi tame Yawé hetsie tetewiyatɨ xeikɨa tekaniuhuni,takakaɨyari hetsie tetewiyatɨ,hikɨ 'ena mɨtiyehane meta yuheyemekɨ.

'Arike Tsiyuni kiekariyari kemɨtihekwatɨarieni

6«Yawé mɨpaɨ kanaineni: 'Iya tukaritsie,muxatsi memɨte'utikwinitɨarie nekaniwakuxeɨrimɨkɨ,memeutaxɨriexɨa meta memɨnanaimarie.7Muxatsi memɨwitekietɨka memuyuhayewaxɨ nekaniwarayeitɨamɨkɨ,meta 'ateewa memehapanie, xeinuiwariyari metɨrɨkaɨyeme nepɨwarayeitɨani.Yawé mɨkɨ wahetsie katini'aitakamɨkɨ Tsiyuni hɨriyaritsiehikɨ 'ena mɨtiyehane meta yuheyemekɨ.8'Ekɨta, Muxatsi Watuxiyu,yemuri kuraru 'amatitetewa Tsiyuni kiekariyari:'ahetsɨa kaninuamɨkɨ meripai tɨrɨkariya kepemɨrexeiyakai,mariwemekɨ kepemɨti'aitakai Kerutsareme kiekariyari».

Kemɨti'uximatɨarieni meta kemɨra'iwa Tsiyuni

9Hikɨta, ¿ketitayari kwinimieme petiuhiwa?¿Kamɨtsɨ ti'aitame pekarexeiya?¿Titayari 'ukaratsi niweyame kukuiniyaya meti'axiya?¿Kamɨtsɨ matsi'ɨxatsitɨwame tiumɨ?10Ketineukakukuineni meta keneu'atawawaɨriyani, neniwe 'uka Tsiyuni,'ukaratsi mɨtiniwerɨmeni hepaɨ,karikɨ hikɨri 'akiekaritsie pekanayeyeimɨkɨ,meta yeuta pe'ukaitɨ pekanayeimɨkɨ.Wawiruniya pekaniyemieni, matsi mana pe'uyeikatɨ pekanixɨnariemɨkɨ,Yawé kamenixɨnamɨkɨ memɨmatsi'aye'unie kememɨmete'aitɨatsie.
11Hikɨri nuiwarite yumɨiretɨ mepɨyukuxeɨri memetsi'aye'unietɨ.Mɨpaɨ meputiyuane: «Tsiyuni kapatsietɨ ke'ayeitɨarieni.Tenenieretɨ tepɨyutemamawieka».12Matsi mɨkɨ Yawé kemɨtiku'eriwa mepɨkatemate,meta mepɨkaheitimaitɨkɨka kemɨtiyurimɨkɨ 'arike,'atsimepɨkatemate mɨkɨ mɨwarukuxexeɨriwamɨwaka'itsanakɨ waxata hepaɨ.13Kenanukukexi, neniwe 'uka Tsiyuni.Kene'uneni.'A'awate tepɨa nekanayeitɨaxɨamɨkɨmeta 'akarutsate wurunitse nekanayeitɨaxɨamɨkɨ,yumɨireme teɨteri tumuanari pemɨwarayeitɨanikɨ,meta Yawé pekatiniyetuiriemɨkɨ tita memɨte'a'iwaxɨ 'axa'anemekɨ,tita waɨkawa memɨteheuxeiya pekatiniyetuamɨkɨ, Ti'aitame mɨhɨkɨ naitsarie kwiepa.
expand_more
Search