Xoossa Zuma
1Wursetha gallasan Godaa xoossa keethay keexetida zumay, zumata ubbaafe dhoqu gidi bentana. Dere ubbaafe dhoqu dhoqu gaana. Kawotethati ubbay iyako woddana.2Higgey Xiyoonepe, Godaa qaalay Yerusalaamepe keyiya gisho, daro kawotethati yidi, “Ane Haayite; Godaa zumako, Yayqooba Xoossaa keethaako keyoos. Nu iya sheniya oothana mela I nuna ba ogiya tamaarsana” yaagana.3I daro asata giddon pirdana; haahon de7iya mino kawotethata palama diggana. Enti banta mashshaa marasha, banta toora baaca kessanaw qoxana. Kawotethay kawotethaa bolla ola denthenna; hizape guye, enti ola timirte tamaarokona.4Shin asi ubbay ba woyne kuyaninne balase kuya garsan wopu gidi uttana; hirgisiyabay aybika baawa. Ubbaafe Wolqaama Goday hessa odis.5Asa ubbay ba xoossaa xoossaa goyinnana. Shin nuuni Godaa, nu Xoossaa sunthan merinaw hemetana.Xoossa Halchuwa
6Goday, “He gallas taani wobbetanne taani waayees aatha immin, di7etidi haaho bessi bidaysata shiishana.7Wobbeti attidi daana mela oothana; di7etidi haaho bessi bidaysata mino kawotethi kessana. He wodepe doomada merinaw taani Goday, Xiyoone deriyan enta bolla kawotana” yaagees.8Neno, Godaa asaa wochiya Yerusalaame dhoqa gimbiyaw, kase ne haariya maataynne Yerusalaame kawotethaa zaway ubbay new simmana.9Ha77i neeni ne qaala dhoqu oothada waasseynne iqethi oykida maccasada un7etey aybisee? New kawoy bayna gishoyee? Woyko nena zoriya dhayida gishosee?10Xiyoone asaw, iqethi oykida maccasada oolishe zooketite. Hinte katamaape keyidi qaa7en daana; yaape Babiloone baana. Gidoshin, yan hinte attana; Goday hintena hinte morketa kushepe wozana.11Shin ha77i daro kawotethati ne bolla shiiqidi, “Yerusalaamey tuno; nu ayfey Xiyoone be7o” yaagosona.12Shin enti Godaa qofaa erokona; iya halchuwa akeekibokona. Kathi yedhetanaw wudumman shiiqeysada, Goday enta seeranaw shiishis.13Goday, “Yerusalaame asaw, dendidi, hinte morketa yedhite. Taani hintew birata kace immana; taani hintew naase birata toho immana. Hinte daro kawotethata tincherethana; enti genen shiishida ubbaa hinte Godaas dummayana; enta shaluwa hinte sa7a ubbaa Godaas immana” yaagees.