1Jò Chuaq Jesus loh enh bui wang, i ƀài mangai pi cajaq tiaq Haq.2I moeq ngai bacùn thia haten rai kùh haq, rai doe: Waiq Chuaq, tàng joq Ìh ma waq, Ìh broq au brêh.3Jesus hnhu tì bèq haq, rai doe: “Au waq, brêh beq.” Tajòe qmòe jò aih raq mangai bacùn jah brêh.4Chuaq Jesus tanap ka haq: “Ngan oq, ùh dùh anoe ka cabô, mahaq ìh lam patô rađeh ka ƀài pajàu kàn, rai dèch ramènh qmang ka Môise khoe hnài, hu panhìn ka wì aih.
Hapŏng cwan loh ka yinìq
5Jò Chuaq Jesus mùt ta plài Cabênaum, i moeq ngai cwan wèq lình trùh ti Haq,6rai creo dang: Waiq Chuaq, mangai hapŏng au loh ka pen, kùi mòeq nòe ta hnim au, haq jìq pi cajaq.7Chuaq Jesus doe: “Au lam ta aih hu broq ka haq jah brêh.”8Cwan aih padreo bàu: Waiq Chuaq, au kô ùh tajì ka jah đìh Ìh mùt dèh ta hnim, mòeq nà bàu Ìh tapoch raq, hapŏng au hi jah brêh.9Majah qmang aih, au oe đeh enh qneq ka cwìang wì qnoeq, au hanoh i ƀài lình oe enh qneq ka au, au thê mangai kô: lam beq! haq aih hi lam. Thê mangai qnoeq: Drah trùh jang kô! mangai aih hi trùh, au thê dèh hapŏng: Drah broq yiniq kô, haq aih hi broq.10Tàng bàu aih, Chuaq Jesus loh ka hamàih, haq doe ka ƀài mangai ma tiaq rađeh rameh: “Joq qnàng au doe ka pì, au qnhòq lah hnoq ta Isorali, i mangai leq i manoh lùi kàn qmang qmat.11Au anoe hloe ka pì, i bàc ngai enh gùng mat mahì loh, enh gùng mat ma hì clìh, trùh hangui acaq pajùm moeq aniang ti Apraham, Isac, Jacôp, tanòe diac plình.12Yàng ƀài kon cla diac aih, wì khwênh qnoh đac enh gùng tanòe clam cluiq, ta aih èh i toq kan crò hmoe, ta- oeh, cadrit hanenh.13Chuaq Jesus doe ka cwan aih: “Hlài beq, ìh jah tìah dèh ka manoh ìh ma khoe lùi aih.” Wop jò aih raq, mangai hapŏng haq jah brêh.
Jesus broq brêh am ka bàc ngai
14Khoe aih, Chuaq Jesus mùt ta hnim Phiero, hnoq miq mai Phiero qnang kùi ta aniang, rai tôq tanget.15Chuaq Jesus yŏc tì bèq mangai yinìq aih, kan tôq taqnget hi dìq, khoe èh haq aih hi yòng patìh ka Chuaq Jesus16Trùh xèq, wì aràng ka Chuaq Jesus bàc ngai kiac chŏc pawè, Chuaq Jesus yŏc bàu capoch drùh qnoh ƀài kiac aih, rai broq brêh dìq dŏng mangai ùh hrŏc.17qmang aih dôq xìt troeq bàu Pajàu Êsai ma khoe anoe:Haq khoe doeh dŏng kan yinìq bèn,Pòq wê kan ùh hrŏc bèn.
Broq qmang leq men jah lam tiaq Jesus
18Jò Chuaq Jesus hnoq bàc ngai oe dudan ka dađeh, haq thê tŏc apah tau diac.19I moeq ngai hnài ranenh trùh ti Haq rai anoe: Ìh lam taleq, au tiaq ta aih.20Jesus padreo bàu: “Ƀài chia i trom, chìm i pù, mahaq Kon Mangai ùh i qmòe ka nòe hu angèn gàu.21Mangai qnoeq hòm doe: Waiq Chuaq, Ìh dôq au hlài catùh hanang dèh baq òeq.22Mahaq Chuaq Jesus doe ka haq: “Lam tiaq au, dôq da mangai cachìt catùh mangai cachìt.”
Bahùt taqne diac rasìq
23Khoe aih, Chuaq Jesus loh ta boang, ƀài mangai tiaq hŏc hi tiaq haq.24Cadoe, ta diac raxìq loh bahùt kàn, diac lai laq yòng haqnhèq enh gùp qmòe boang. Mahaq Chuaq Jesus oe raq kùi.25Ƀài mangai tiaq hŏc, thia haten padrìu haq, wì doe: Waiq Chuaq! Ìh dang nhèn diq, nhèn cachìt manòeq kô raq!26Jesus doe: “Ƀài mangai ƀiaq manoh lùi, hagleq pì ma yùq? Chuaq Jesus yòng tagàih ka cayeo xam diac raxìq, dìq baiq hi hatinh rangep hloe.27Dìq dŏng ka wì aih hamàih bòch dabau: Mangai kô ìq cabô? Jaq wa cayeo wa diac dua iu bàu Haq?
Baiq ngai oe ta Gadara i kiac oe ta chac
28Jò Chuaq Jesus khoe trùh pah tau ka diac, haq hnoq baiq ngai i kan kiac oe ta chac, wa aih loh enh cadràng hanang tùh glàm Haq. Wa aih dù haraya, pi i cabô oe hùa lam pagat trong aih.29Wa cachech qmòe cadêh: Waiq Kon Boc Plình, bèn kô ìq ep cleq ka dabau, ajoq Ìh trùh tacô, đòeq hu baxa nhèn adroe ka jò ùh xài?30Wop jò aih diq, i moeq calùh chùa qnang acaq.31Ƀài kiac bòch Chuaq Jesus rameh: Tàng joq Ìh hnan nhèn loh, Ìh am nhèn jah mùt đeh ta ƀài chùa tau.32Haq thê ƀài kiac: “Drah lam beq! Ƀài kiac loh enh wa aih, hi mùt hloe ta calùh chùa, tajòe qmòe jò aih dìq dŏng ka calùh chùa oe enh criang tawang clàm loh ta diac raxìq, cachìt dŏng ta diac.33Ƀài mangai ban chùa hi cadàu lam amot, mùt taplài taqmon hlài ƀài yiniq wì haq hnoq, anoe hloe xam bìac wa baiq ngai kiac ma pawè ka wì tàng.34Dìq dŏng ka wì gùng aih loh tàt Chuaq Jesus, jò wì bu hnoq haq, wì drah thê haq lam taqnoeq.