Read Matewuzhu 8

Matewuzhu8eko_wbt

Ovonisiwa wa namaaharaja

¹Wakathi eeshukhiyeevo va mwaako, khuntti khuluyeene yeetta onlotta.²Nasaapiru khuta namaaharaja mmote khumwaattama, khumwaaputu akokhoriye khulupa yoori: “Mbwana, onwahi okitwaharesha!”³Yinsa khookola nkhono awe, khunsapa khuri: “Katakha, ti otwaharesheye!” Nasaapiru ye khwiiya wootwaharesheya khwa maaharaja.⁴Aphano Yinsa khumuuza yoori: “Vitthu epi ohinthatelele hatha ntthu. Ila olawe, wajithoonyeze wa namalokozela a tiini na olaze zaakha etile Munsa alupiyeeyo yoori yiiye oshaahiti.”

Najanka wa Rooma onthonyeza amini yawe

⁵Wakathi Yinsa afiiyeevo sitati ya Kafwaranaawu, eetta oteeliwa ti nttunkhulu wa anajanka, anvekelaka yoori amwaawuni.⁶Khumuuza yoori: “Mbwana, karumeya aka ori onti, onaaye supiyaani, ontta ohoocheya venkivene.”⁷Yinsa khumuuza yoori: “Miiyo kinlawa kanvonise.”⁸Nttunkhulu wa anajanka otule khunjipu yoori: “Mbwana, miiyo akinsuhi wuupokherela vaje vaka. Ila olupe nttakhuzi limote paasi, karumeya aka ontta ovona.⁹Maana na-miyo ki ntthu kiriiye vathi wa ofwalume na ki nlokozi wa anajanka. Kinimuuza mmote yoori: ‘Olawe,’ khulawa; khumuuza nkina yoori: ‘Ote,’ ye khuta. Kinimuuza karumeya aka yoori: ‘Orette khata,’ ye khuretta.”¹⁰Yinsa noosiila epo zaya, khushanka, khuwooza apale aari onlottaaye yoori: “Kiniwuuzani khweele: Akinsikaneeni Ezirayiilu ntthu ariina amini nkhama eti.¹¹Miiyo kiniwuuzani, atthu enkeene a khipula na malawa-juwa, anttela wiikhala va meeza na Eburahiima, Esiyaakha, Yaakhumpa muufwalume wa pinkuuni.¹²Ila apale aari weettelaaye orithi ofwalume wa Nluku anttela weeseleliwa oje, n'yiiza nhali onttelaaye wiiyamo olila na oluma meeno.”¹³Yinsa khumuuza nttunkhulu wa anajanka otule yoori: “Olawe owawo, entta orettikhana nkhama etthiipo okhupaliyeezo.” Wakathi otthuupule karumeya awe khwiiya woovona.

Owahi wa Yinsa monkoni wa masheethwani na marati

¹⁴Yinsa khweetta owawe Pheeturu ottuukho khumoona nkhwewe Pheeturu arapaleliye ari nlwele hooma.¹⁵Yinsa khunsapa nkhono awe, hooma etile khumwiisha. Khulankha khusala anrumeyela.¹⁶Paata ya otupweela njuwa, khutiiseliwa anamasheethwani awaatta, ye khusala eekara masheethwani khwa nttakhuzi lawe khuwaavonisa alwele ooshi.¹⁷Khwa etthiipo khurettikhana epile zaalupiweeyo ti napiyu Ezaaya yoori:
“Ye athuula marati etthuna apwechera moolwele etthu.”

Onlotta Yinsa, etthu yoolipa!

¹⁸Yinsa noowoona atthu awaatta anzukuleliye, khuwaaruma anakhiyoni awe olokhela kaapu ya ntthatta.¹⁹Aphano namanozela wa kano mmote khumwaattama khumuuza yoori: “Mwaaliimu, kintta wuulotta wakhula vahali oneettaavo.”²⁰Yinsa khunjipu araka: “Ananthala anaaye maphotto aya anyannyi anaaye vijaaro zaya, ila Mwaana wa Pinaatamu khana vahali woovumulisavo eeshwa yawe.”²¹Nakhiyoni awe mmote khuri: “Mbwana, waaze okilikha kilawe kanzikhe paapa.”²²Yinsa khujipu araka: “Okilotte, owaalikhe ananfwa awaazikhe ananfwa aya eenyewe.”

Yinsa onnyamaza pheevo yawaatta.

²³Yinsa apakhiriyeevo mmwaatiya anakhiyoni awe khunlotta.²⁴Nasaapiru, pheevo yawoopisa khusala evuma mpahari, mwaatiya khusala ozamisiwa ti mawipi, Yinsa ettaka olala.²⁵Anakhiyoni awe khunsusela khusala anlansa, ankhuwelaka araka: “Mbwana, onuusuru nasaleela ofwa!”²⁶Ye khuwoozela yoori: “Mwinoovani? Atthu oopushuwa amini!” Ye khulankha khushowera pheevo etile na pahari, zooshi khunyamala.²⁷Ooshi khusala ashankiye na khulupa yoori: “Otu aya paani hatha anrumaaye pheevo na pahari khunshututela?”

Yinsa oniwaavonisa atthu awiri aashinttiweeyo ti masheethwani

²⁸Wakathi afiiyeevo phantte kiina, ya Jerazeenu, khunteela anamasheethwani awiri, alankhiyeeyo ovilalo. Yo aari oowali, khina aari oviraaye tarikhi ya etile.²⁹Aphano, yo khusala anyakula araka: “Onnitakhelani fweeyo, Mwaana wa Nluku? Wata okhuno oteela onoopopisa, ohinafiye wakathi aya?”³⁰Kharipu ya aphale vaya laarivo liphanko la kuluwe.³¹Aphano masheethwani apale khunvekela Yinsa yoori: “Nkhama onniikara, oniikarile nliphanko la kuluwe.”³²Yinsa khulupa yoori: “Apho mwilawe!” Masheethwani apale khulawa khweetta nkuluwe, liphanko looshi khwiishukela va ntthatta khuttuluwa khufwa.³³Atthu apale aari oshukaaye kuluwe epile khutthira khulawa mmuti, khulupa zooshi mpakha epile zaarettikhaniyeeyo khwa anamasheethwani apale awiri.³⁴Atthu ooshi a mmuti mphule khusala alawa okutthanana Yinsa, nonsikana, khunvekela amuuzaka yoori aleemo mmuti mwaya.