Matiu7kmu_tbl

“NaꞋa maꞋa kava nehae.” hutama nelama-fugamina fako hu-oꞋamateho.

1Nelamafufena “NaꞋa maꞋa hana kano mainane.” hu-oꞋateho. AniꞋama ohisagenoꞋa Anumaya KotiꞋa tamakaifena “Havi kava haya veaꞋne mainae.” huno hu-otama-tegahie.2Tamakaya ani veafema “NaꞋa maꞋa hana kano mainane.” hutama hisayana ani augafa keleti Anumaya KotiꞋa tamakaila aniꞋa hu-lama-tegahie. Ma mopaleꞋma nelama-fugamima hu-ma-tesaya kavala Anumaya KotiꞋa tamakaila ani kava hu-lama-tegahie.3Tagaya tagaiti taguꞋafima hanea yana oꞋageneta alu veaꞋnehena “Havi veaꞋne mainae.” huta hisuna yafena YisasiꞋa mage huno hu-maine “Negafu aulagafina osiꞋa havi yana hanegeka neꞋagananagi naꞋa higeka kagaikaꞋa kaulagafina nagola muki yosa-lapagefa haneanagi ‘Omalene.’ huka nehane?4NaꞋa higeka nega-fufena ‘Kaulagafitila havi yana ali-talegahue.’ huka nehananagi kagaikaꞋa kaulagafina nagola muki yosa-lapagefa hane.5KaguꞋafinaga hanea yana agelama ohuneka kavayaleti havige huka vagala kano maineka kagaikaꞋa kaulagafitila muki yosa-lapagefa ali-taleteka kanaleꞋya huka ageteka negafu aulagafina osiꞋa havi yana ali-talegane huno hie.6Tamakaya Anumaya Kotina alu aotage yana alitama kalamogamina oꞋamamiho. Amamisayana mahaiye huꞋya tamakaila akafu tamanigahae. Afumogamina kanale sesua hagaꞋyu hutama oꞋamamiho. Amamisayana amaiyaleti ayeꞋya hapa kaligahae.”

Nunamu hisageno AnumayamoꞋa kanale ya tamamigahie.

7Anumayamotega nago yafema havigesagenoꞋa afaꞋa tamamigahie. Nago yafema atiyesagenoꞋa ali falote hugahie. FitaleꞋma akalu kaluma hisagenoꞋa Anumaya KotiꞋa yaki-lama-tegahie.8MukiꞋa havigesaya veaꞋmoꞋya aligahae. Ati ayesaya veaꞋmoꞋya ali falote hugahae. FitaleꞋma akalu kaluma hisagenoꞋa Anumaya KotiꞋa yaki-lama-tegahie.9Hana kanomoga nafaꞋnekamoꞋma mayahema kahavi-gesigeka nefaga yafana alika amigane? AꞋao ani yana oꞋamigane.10Noyamehema kahavi-gesigeka nefaga osifaꞋvea alika amigano? AꞋao ani yana alika oꞋamigane.11OꞋamiganagi tamakaya havi veaꞋne mainayanagitama nafaꞋnetamimona kanale yana neꞋamamiyanagi ikapinaga mainea nelamafaꞋa tusiya huno tamakase-maineanagitama havigesagenoꞋa kanale yana tamamigahie.12Veafe “MaꞋa kava hu-latesae.” hutama hisaya kavala ani kavakeꞋya alu veaꞋnea hu-mateho. Ani yafena MoseseꞋene Anumaya Koti amaune vayaꞋmoꞋyaene hu-mainaya kahegi kemona aepaꞋa hane.

Tamakaya osi fia kanoꞋafi hai faleho.

13Anumaya Koti kumateꞋma visayana osi fia kanoꞋafi ugahae. Hani-ki-mainea kumapi tegelege nehia atafi visaya kaana ala hiꞋyenagefa haneno ala kakefa hanegeꞋya kasagoꞋya veaꞋmoꞋya yoꞋyo huꞋya ani katela neꞋvagi tamakaya osi fia kanoꞋafi hai-faleho.14Agola maige maige hisuna kumateꞋma visaya kaana osi fia kanoꞋa haneanagiꞋya kasageke huꞋya ani katela kasagoꞋya veala noꞋvae.

Havige amaune laga nehaya vayafena kaꞋye ho.

15NagoꞋa vayaꞋmoꞋya “Anumaya Koti ke hu-haleta nehuna vaya mainone” huꞋya havigegeꞋyama hisaya vayafena kaꞋyeho. Yuna afu kana vaya mainagetama neꞋagayanagi amakusafinaga kaveꞋage afu kana vaya mainae.16Tamakaya amakaipima falote nehia kavala agetetama aepaꞋa hana augafa vaya mainae hutama havigahae. Ave nofite timaꞋa hanea alaga tagisifi? AꞋao otagigahie. Avetanafa hanea uveꞋuve inomote hagaꞋage yosalaga motaga molagisio? Otagigahie.17Otagigahigi kanale yosamoꞋa kanale yosalaga neꞋayegi havi yosamoꞋa havi yosalaga neꞋaye.18Kanale yosamoꞋa havi yosalaga noꞋayeanagino havi yosamoꞋa kanale yosalaga oꞋayegahie.19MukiꞋa yosamoꞋya kanale yosalaga oꞋayesayana atagiꞋya atafi kae-talegahae.20NaꞋa hinagetama havigegeꞋyama huꞋya falote nehisaya vayapiti falote hisia kavala agetetama aepaꞋa “Hana augafa vaya mainae.” hutama havigahae.21MukiꞋa veaꞋmoꞋya nagaifena “Anumayatimogae Anumayatimogae.” huꞋya hisaya veala Anumaya KotiꞋma kava yagai-mainea kumatela ohaigahagi ikapinaga mainea Nenafana hau-mainesia kavaꞋma nehisaya veaꞋmoꞋya ani kumatela umaigahae.22Anumaya KotiꞋa kaiyekema hu-matesea yupa kasagoꞋya veaꞋmoꞋya nagaifena mage huꞋya hugahae “Anumayatimogae Anumayatimogae tagaya kagai kagile Anumaya Koti kea hu-haleta nehunane. Kagai kagile Kefo Avamula neꞋanatita tokiya avame yana amave-nelunane.” huꞋya hugahae.23Hugahayanagi nagaya ani yupa mage huꞋna hugahue “Tamakaila otamaketafa hu-mainoane. Kefo yakeꞋya hugetama omai veaꞋnegi nagaitegatila mai-haletama viho huꞋna hugahue.” huno hu-maine.

Noma kisaya auꞋavala tole yatala hane.

24NagoꞋa veaꞋmoꞋya anima hu-mainoa kea haviꞋya ali hipoꞋya huge huge huꞋya nago kanale agu agesaene kanomo avamete nehae. Ani kanomoꞋa noma kiana yafa agotofule ki-malene.25Ki-malenegenoꞋa koꞋma aino tima hogino tokiyaꞋage yasimoꞋa tusiya huno nona ali-lagape aigahe hianagi yafa agotofule ki-malenea yafe alino lagapea ai-oꞋatalene.26Alino lagapea ai-oꞋatalenegi nagoꞋa veaꞋmoꞋya nagai kema haviteꞋya ali hipoꞋya ohayana agesama omalea kanomo avamete nehae. Ani kanomoꞋa ti kahaepapi nomaꞋa ki-malene.27Ki-malenegeno koꞋma aino tima hogino tokiyaꞋage yasimoꞋa alino ani nona ali lagape aino mopafi atalegeno tusiya huno haviya hu-lavi-maine huno hu-maine.28YisasiꞋa mani kea hu-haꞋno hutegeꞋya kahegi kema havilinaya anagaꞋmoꞋya nehaya augafa ke kana huno ohunegi tokiya yamaꞋa hanea kanomo ke kana hia yafe mukiꞋa veaꞋmoꞋya tusiꞋa amamaꞋyo ai-mainae.
expand_more
Search