1Mil Nantanua ga laamuangen Iesu laa lalon xobel biil ngali Saatan naba xonon.2Iesu a el no sangaul aet ina no leng ma bing, o mil ga suk itol.3Iwaa unxonkonon xa a xaalame sangan ga paare, â Nawe iu xan Tsi Moroaa, u na asaaiti abala no xaat ngali di ba tsap tsoki.â4Iesu ga xisi, â Di se atalaa, â Taamat a xap tino sin tsoki mu, oro a tino sin no totore araraa ta xaal sin ngutsina Moroaa.â â â5Mil iwaa Saatan ga giwaa Iesu laa lalon inaman laba pat, ma ga atilngi lapalaa suk se ina Xan Anua Moroaa.6A paare, â Nawe iu xan Tsi Moroaa, u na rik laa lapula amuina di atalaa:â â â Naba paare watwat sin xan no angelo ngali tilaamamil sin iu,ma di ba tsiil tsaali iu taman no liman di.Ngalibi u ba xap tigen no xaiim sin xa xaat.â â â7Iesu ga xisi ia, â Di atalaa weaatalaa bula: â Nangaam tali Orong num Moroaa sin xonkonon.â â â8Iwaa Saatan a sebula giwaa Iesu laa lapalaa suk se papan buk, ma ga asen no maradaan araraa ina xolkolmoxo ma xadi no matmirmir.9â Balawaa no maarang araraa, iaa ba tali no susum, nawe u ba sage putput ma langaari sin iaa.â10Iesu ga paare sin ia, â Soltia sin iaa Saatan! Di atalaa, â U na langaari laa sin Orong iwaa num Moroaa, ma u na lolong amusili ia xasinge mu.â â â11Mil Saatan ga papaalii ia, o no angelo di ga le tilaamamil sin.
Iesu atiltsoli ngali baais
12Biaa Iesu ta alongen we di se tali Jon lalon anua lodo, asuk mula laa Galili.13Ga poroklii Nasaret; ga laa manman Kaperanaam sin gelgel ina daan ulis lalon xan xolot Sebulon ma Neptali,14ngali taxaa puaa biaa totore propet Aisaia tii paatina,15â Pula ina Sebulon ma pula ina Neptali,biaa sal laa laman amusili gelgel ina Jodan,Galili xadi no Gentail,16biaa inaman di ta manman lalon lododi se lasi xaraxin rarar;papan abia di, di ta manman lalon maliip ina minet,rarar bia ta se tampanek.â17Sin abia xolot ina leng laa, Iesu atiltsoli ngali baais we, â Gim puxisbal, amuina Maradaan in Balalangit a se atat.â
Iesu a ilei tsoli nanaaxuuk ina no tsi asasing
18Biaa Iesu ta lo eses sin gelgel ina daan ulis Galili, a lasi lo masen turamasen ilaa Saimon ta putsangi Pita, mii xan taamat Endru. Delu no untsunolau, ma delu lo liilii uben lalon daan ulis.19Iesu ga we, â Gulu xaalame amusili iaa ngali iaa ba asingan gululu taman tsunolau ngali giwaa no inaman.â20Tiwaa tsaa, delu papaalii xadelu no uben ma delu ga amusili ia.21A es laa tsaa, ga lasi biexaa lo masen turamasen sebula, ilaa Jeims ma Jon, xan no tsi Sebedi. Delu lo taxaaturungi xadetu no uben mii xadelu mom, ilaa Sebedi, papan mono o Iesu ga ilei delulu.22Tiwaa tsaa delu ga papaalii mono ma xadelu mom ma delu ga amusili ia.
Iesu a atoaa no minet
23Iesu ga laa lalon no xolot araraa Galili ma ga asingan di lalon xadi no anua sausawit ma ga babaais taman inesaait mamainaang ina maradaan ma ga atoaa no maramase ma biaa di ta isua met.24Inesaait ina Iesu asuk puaa araraai Siria, ma no inaman di ga le tali biaa di, di ta maramase taman no mat laxen minet. Biexaal taman no xaraxin sosong, biexaal no salawa tsaxa di tsigaii di. Biexaal di gogo ma no isua met ma ga atoaa di.25Xaraxin malep in Galili, Dekapolis, Jerusalem, Judaia ma biaa no xolot tabaxi daansel Jodan di ga amusili ia.