Matthew Iesu da bino dave Matthew mi gagurisina.4 / bhg_wbt
Satan mi Iesu bavisina.
1Ango edo Asisi Kotopu mi Iesu gisijido visido abu damodamo ainda totorisina, Bineimi imo bawarate.2Edo Iesu indari indae iji 40 muyae 40 kakara eite sima esisina. Edo ainda amboda imo beji mina burisina.3Ango edo bawari embomi gundo embo ainde sisina, “Imo awa God da Mai gido, ge okain teyo ganuma itera eiwa bread are.”4Ata Iesu mi mina sisina, “God da geda gaiari isira awa, ‘Embo enembomi bread akuta injido wasiribé bari tao ae. Ata ge berari God da beda edo gundo eira awa kera edo, wasiribé budo ara.’”5Ango edo Binei mi Iesu kundo maundo nasi kotopu Jerusalem da esisina, edo Jew embomaida oro kotopu bajinaainda eno ikanebé ikaneda esiri peposisina.6Edo Binei mi ainde sisina, “Imo awa God da Mai gido, imo akuta kekapunya edo wote. God da geda gaiari isira awa:‘God mi ge okain tari ainda anelamanemiimo dedegara,edo awamanemi imo ipada jiaro eratoito tai ganumada dainyae.’”7Edo Iesu mi embo ainde sisina, “God da geda gaiari daedo isira awa, ‘Imo Badari ito God bawote.’”8Edo tekago Binei mi embo awa kundo peji ikanebé ainda vivisisina. Edo yai berari embomaimi gisijido era awa ae awamaneda taogari de awa Iesu da yai piesiri gosisina.9Edo ami ainde sisina, “Nane roviravi berari eiwa imonde piana, imo nato yai baongo dadari edo na tumondebain ata gido awa.”10Edo Iesu mi ainde sisina, “God da geda gaiari isira awa, ‘Imo Badari ito God awa tumondebain edo eyo, edo embo awa akuta kera edo eyo.’ Imo dodo nato gunda mambu, Satan!”11Edo Binei embo awa dodo mambiri, edo giwo, anelamane gundo Iesu kondade esitera.
Iesu ainda buro yai Galili da tuturo esisina.
12Edo John Bapataito Ari Embo da gitopo embomi embo awa kundo bundari oroda pipisitera. Edo iji ainde Iesu mi bino awa ingido imo tekago yai Galili ainda egenembesisina.13Ango edo Iesu mi Nasaret nasida gisi maunsisina, edo ainda amboda Kapenium nasida gundo isima edo esisina. Edo Kapenium nasi awa Galili ubutu demonda. Edo yai ainda awa Jew ewowo Zebulun ae Naphtali deda topo.14Edo Iesu mi yai ainda maundo isima esisina, ge peroveta Isaiah mi matu sisina awa ari bé arate tedo:15“Yai Zebulun ae Naphtali de awaubutu demonda ae un Jodani da kupo neideda.Yai awa yai Galili doda isira,edo yai ainda Gentile embomai jiwaemi isima edo era.16Edo embomaida yai ainda muyae doda isima edo era awa,parara bajina gumbiri gera.Edo ainkain betari yai ae ainda duga deda isima edo era,awamaneda yai parara atesira.”17Edo iji ainde Iesu tuturo edo embomaida yai ge karigeteite tevina, “Utuda gisijiari itomane yai aikae gumbira.Awatedo itomane jimbo bebegae dodo God da yai wareregewo.”
Iesu wo iro ari embo ipa ao pasido (4) dao sisina.
18Ango edo Iesu ainto edo Galili ubutu bengida maunteite ami nanonameji tote (2), Simon (Ainda dao nei awa Peter.) ae ainda nameji Andrew de gosisina. Awamane awa wo iro ari embobo, awatedo iji angode awamanemi wo bain monga ubutuda augetero gosisina.19Edo ami awamanede sisina, “Nato amboda puwo! Nane imomane atopatano gido embomai bave.”20Edo burigibé awamaneda monga dodo embo awa ambo ambo esitera.21Ango edo Iesu yai awa dodo ainto edo maunteite ami nanonameji nei tote (2) gosisina. Awamane awa Zebedee da mamai, James ae John de. Edo awamaneda mamo Zebedee de un ma doda isite awamaneda monga kakapegari awa sirigetero Iesu mi awamane dao sisina.22Edo boraebé un ma ae awamaneda mamo de dodo embo awa ambo ambo esitera.
Iesu mi God da bino dave karigedo embomai jiwae gao euri kaviegotora.
23Ango edo Iesu yai Galili da umbugo berarida maundo gundo eite Jew embomaida benunu orojiwaeda torido embomai atopaposite gisijiarida bino daveawa karigedo esisina. Edo embo ami embomaida burau ari berari ae karu amburo neide kainde berari de awa gao euri kaviegotora.24Edo ainda buro babainda bino awa yai Siria berarida arapu esiri, embomaimi awamaneda embo karu ari berari, karu evekara ae memesi de, edo bineimanedabubundegari ae tamo jipari de, ipatai ambari de, awamane ainda yai kundo gumbero Iesu mi awamane gao esiri kaviegesitera.25Awatedo embomai jisi babain yai Galili da edo, Nasi Babain Ajigari 10 da,Jerusalem da, yai Judea da edo un Jodani kupo neida, awamanemi Iesu ambo ambo esitera.