1Pwen makohuping o, hu pris masih mepo huhohin ta hu pris masih, pe hu yapane hu ndramat, ara humburi lohongai para katingundru Yesu kimat.2Pwen huwasi yiy pe huluwani yiy iya mawen, pe huyaiki yiy iya kili Pailat, yiy mepo pohon para kol namandran iya ara.3Pe iro mwonen Yutas, mepo kintatuni Yesu, ara inimei tehe hu kanmburi lohongai para kaiki koran kiya ndrita Yesu, pwen hingorowan iramari yiy iya namandran iya, pe iyaiki sombule silwa matingui ara, imui iya kili hu pris huhohin ta hu pris masih, pe hu yapane kol.4Pe ipa, â Yo kunmbusi pakut mwomwan, paratesah, yo kuntatuni ndramat mepo kinmbusi handra mwomwan pwi.â Pe hupwai iya kili yiy, hupa, â Ara handra lohonga yowu pwi; kinna konam ara.â5Pwen pe Yutas ihindrikirani singayai ara, ara iya nondriya yumwa totohun namandran, pe iyau. Pwen iyau iya mawen, pe iya ndrusuwan.6Pe hu pris huhohin ta hu pris masih, ara hulokihi hu sombule silwa ara, pe hupa, â Nongan para pwahanou ipwai tehe singayai aro, ara kenne ndreye ndramat mepo kanitingundrun ara. Pe nonombun para kaikiy kiya ndrohonoku singayai para yumwa totohun.â7Pwen humburi lohongai para kawiri singayai ara, pe karapaya pwan ta ndramat para peneya kohoi, para kirayah ndrohonoku tona hu ndramat para mawen.8Pwen tehen tora ko, pwan hape ara, hu ngara kapohowe ngalan ara Ndroho Ndrondroi, iro tandrohongan ara, ipoo isa matnen mahapo.9Pwen nongan mepo poropet Yeremayah kinpwai kinna, ara kintayah mannan, ipa toro: â Huwiri hu sombule silwa matingui, kennen mepo yihu ndramira Yisrayel kaniykiy para sowa ndramat ara,10pe huwiri singayai ara, pe hurapaya pwene ndramat para peneya kohoi, tehe Yapan kinpwandrandrahaniy kinsa kili yo.â
Yesu iro tine mbulmara Pailat
11Pe Yesu iro tine mbulmara Pailat, pe Pailat isok yiy, ipa, â Wou king tahu Yutah, ndre?â Pe Yesu isomwiy, ipa, â Tehe anpwai ara.â12Pwen hu pris huhohin ta hu pris masih, pe hu yapane kol, ara hu tasusut nongan iya kili Yesu, hapeko kinsomwi hu pwi.13Pwen Pailat isok yiy, ipa, â Wou anhilingi titiye soyon mepo hutora tasusut isa kili wou pwi, ndre?â14Hapeko Yesu kinsomwi handra nongan mepo huro tasusut iya kili yiy, ara pwi masihâ pe imbusi Pailat irapayan ndrit.15Kiro mwonen Yon Para Pasopa nondriya hayou sih tehe sih, Pailat ngara kitali ndramat hamou kiro nondriya kou kisa ngawan. Hu ndramat masih ngara hu karakinima sehe ndramat mepo hunamiliy para kisa ngawan, pwen Pailat andre kitali ndramat ara.16Iro lang ara, ndramat hamou iro kou, ngalan Parappas,kultuwayin ara mwomwan masih, pe hu ndramat hupahas iyatan.17Pwen pe iro mwonen hu ndramat soyon hu kansa rawurehu, Pailat isok hu, ipa, â Wawu namiliy para kutali hiyeh ta hilu malmou aro kisa kili wawu, Parappas ndre Yesu mepo hupohowe yiy Mesayah?â18Pailat ipahasaniy tehe huiki Yesu iya niman, paratesah, humaimai anan.19Pailat, ara irompwan manau ndrita pwapwai ndrohonoku tamwanye, pe nambuyun ipwanos nongan iya kili yiy, ipa toro: â Wou mbuna ambusi hapesah kiya kili ndramat mepo kinmbusi handra mwomwan pwi ara, paratesah, yo unihiyani yiy lang nepo ko, pe imbusi yo uhungorowe ngandran namandran iya.â20Hapeko hu pris huhohin ta hu pris masih, pe hu yapane kol, ara hurakekeyani hu ndramat soyon para hu kasok Pailat para kitali Parappas, pe kipwai para hu katingundru Yesu.21Pwen Pailat isok hu, ipa, â Hiyeh ata hilu malmou aro wawu namili para kutali yiy kisa kili wawu?â Pwen husomwiy, hupa, â Parappas.â22Pe Pailat isok, ipa, â Pwen, yo andre kumbusi tapeh kiya kili Yesu, mepo hupohowe yiy Mesayah?â Pe hu masih husomwiy, hupa, â Karapaingi yiy kiya kei tondrih!â23Pe Pailat isok, ipa, â Paratesah? Yiy imbusi sehe kultuw mwomwan?â Hapeko hupalngai namandran iya, hupa, â Karapaingi yiy kiya kei tondrih.â24Pe Pailat, ara ipahasaniy tehe andre yihu kanhilingi yiy pwi. Hapeko huro tambumbuwat pe hu pakarahatai. Pwen iwiri ndran pe isungani niman iro mbulmarahu, pe ipa, â Ndreyen andre kinto nimo pwi! Kinna kona wawu ara!â25Pe hu ndramat masih husomwiy, hupa, â Ndreyen, ara kinna kona yowu pe ndraye yowu hu.â26Pwen itali Parappas iya kili hu Yutah. Hapeko ipwai para hu ndram kamwiriyani Yesu, pe iyki yiy iya nimahu para hu karapaingi yiy kiya kei tondrih.
Hu ndram hupwasimiri Yesu
27Pwen hu ndram ata kapman, ara huwiri Yesu iya nondriya suwe kapman, pe hu ndram para pahun masih husa rahakowan.28Pe huhutasak iya koiwen, pe husuluye yiy iya koyau laman hamou.29Pe huwiri malkei hamou maporon, pe hurakayaniy tehe kasapai ta king, pwen huikiy iya payan. Pe huiki nes sih iya niman mot, pe hutukuruhu huro mbulmaran, pe hupwasimiri yiy, hupa, â O yapane yowu, wou king tahu Yutah!â30Pe husokombunuhi yiy pe huwiri nes ara, pwen huti payan ken iho ken.31Hupwasimiri yiy ihipwen, pwen hutali koyau laman ara isa mawen kili yiy, pe husuluye yiy iya koiwen mbukenan. Pwen huluwani yiy iyau iya mawen, para hu kaya rapaingi yiy kiya kei tondrih.
Hurapaingi Yesu iya kei tondrih
32Pwen huropo huya ngawan pe hupohonani ndramat hamou para kol namandran Sairini, ngalan Simon. Pe hurakekeyani yiy para kikuni kei tondrih ta Yesu.33Pe husa hape aleheh mepo hopohowei Kolkota, (mbulndroiyi nongan ara, ara ipa, Ndroho Ndruwi Paya Ndramat).34Pe huhang Yesu wain, mepo kansulyaniy kinnapolo ndran ngahan, para kiyin, hapeko ihingoruwe kanan, pe mbuwalin para kiyin.35Pe hu kantapaingi yiy kinna kei tondrih ihipwen, pwen hunonoyou satu para karahihiri koiwen.36Pe hurompwan ara, pe huro memerani yiy.37Pe huratuluwi nongan para koran, pe huikiy iho ndrita payan, ara ipa toro: â ARO, ARA YESU, KING TAHU YUTAH.â38Pe hilu ndramat malmou para pahana, ara hurapaingi hilu hilho polo yiy, hamou iyapwen te niman mot, pe hamou iyapwen te niman kamou.39Pe hu ndramat huropo husayau, ara hupwasimiri yiy, pe hupatumbuye payahu iyatan,40pe huro pa, â O, wou mepo apa andre aloiwani yumwa totohun namandran, pe kiho nondriya lang maroyoh o, andre apuliy paiwe, kiya, asopwat wou mbukenam! Kapa wou Noru Ngindrai Kamai, pwen asapwan kei tondrih!â41Pwen tehen aliy opu, hu pris huhohin ta hu pris masih, pe hu ndramat para hinuwani nongan para pwahanou, pe hu yapane kol, ara hupwasimiri yiy.42Pe hupa, â Yiy kinsopwat hu hayah, hapeko kinlahiy para kisopwat yiy mbukenan pwi! Yiy, ara King tahu Yisrayel! Mahapo ko, kisapwan kei tondrih, pwen andre tukapwotisingi lohonga rou kiya kili yiy.43Lohongan ipwotisingi Ngindrai, pwen mahapo Ngindrai kisopwat yiy, kapa kinamili yiy. Paratesah, kinpwai, kinpa, â Yo Noru Ngindrai Kamai.â â44Pwen tehen aliy opu, hilu ndramat para pahana mepo hurapaingi hilu iya kei tondrih hilho polo yiy, ara hiluro hindringndring anan.
Yesu imat
45Pe paramwandrai iho ndrokololang, pwen kol ilokuh ipoo iya piyahon, pe paramwandrai iya iho tehe maroyoh.46Pe paramwandrai iya iho tehe maroyoh, pe Yesu iwayeh pwokeyan iya, pe ipa, â Eli, Eli, lama sapaktani?â â Nongan aro, iya nongna kolon, ara ipa toro: â Ngindrai to, Ngindrai to, paratesah antali yo?â47Pe iro mwonen yihu hayah huro tine pakeh ara huhilingiy, pwen hupa, â Yiy ita yoh Eliyah.â48Hape pwi ko, hamou tahu ingap iya, pe iwiri nanmam. Pe itaimaniy iya wain susuwen, pe iwasiy iya kou sih, pe ihiriy iya kili Yesu para kiyin.49Pe hu masih tahu, ara hupa, â Kiro tahandren tora. Tukoro pe kanimei na, matisan Eliyah kisa pe kisopwat yiy.â50Pwen Yesu iwayeh pwokeyan paiwe, pe itali mwoiwan iyau pe imat.51Iro mwonen paramwandrai ara ko, ndrihiyap namandran iho ndrungak nondriya yumwa totohun namandran, ara ilen iya maltoh. Ilen iho paingan, pe isandrek isa pwan. Pe kol pwan inunuw, pe hu pat ara humbuterenging.52Pe hu ngat sou para tona ndramat, ara hute, pe nombuwe hu ndramat haiyan soyon mepo hu kanmat, ara husa tine paiwe.53Pe husa ngawan ngarehu, pe iyamulan para Yesu isa tine paiwe, yihu ndramat ara, ara huya nondriya kol namandran haiyan Yerusalem, pe huyarayah huya kili hu ndramat soyon.54Pe iro mwonen ndram mepo ihohin tahu ndram masangat, pe hu mepo huro memerani Yesu, ara hunime nunuw, pe hu melit masih kantayah, pwen hunoh turuwehu, pe hupa, â Ndrokonan masih, yiy Noru Ngindrai Kamai!â55Pe hu pihin soyon huro ariya, pe huro ndron mwanan hape pe huro nimnim. Hu pihin ara, huho ndruwa Yesu huro Kaliliyy pe husa, para hu kapwokere yiy.56Pe iro mwalinga hu pihin ara, ara Mariya para Maktala, pe Mariya tina Yamis hilu Yosep, pe tina NdraSepetiy malmou.
Huiki nombuwe Yesu iya ngat
57Pwen kol iro piyah, pe ndramat hamou menmenan soyon para kol Arimateya, ngalan Yosep, ara isa. Pe yiy kintayah ndramira Yesu hamou.58Pe iya kili Pailat, pe isok para kiwiri nombuwe Yesu, pwen Pailat ipwandrandrahaniy iya kili hu ndram para hu kaiki nombuwe Yesu kiya kili Yosep.59Pe Yosep iwiri nombuwe Yesu, pe isumwai iya koyau hamou howen,60pe iyaikiy iya nondriya ngat sou howen atan mbukenan mepo kinsoyei pwen iro. Pe itiriyani pat sih namandran iya, pe iwari pohomara ngat ara, iya aliy, pwen iyau.61Pe Mariya para Maktala iyasura Mariya hamou i, ara hilrompwan iyapwen haroh para ngat ara.
Hu ndram huro memerani ngat
62Pwen Lang Para Ponokule Sapat ihipwen, pe iya lang sih i, hu pris huhohin ta hu pris masih kene pe hu Parisiy, ara huya kili Pailat.63Pe hupwai iya kili yiy, hupa, â Namandran, yowu lohonganiy tehe ndramat para pwakeriu ara, ara mapu kinmat, yiy ipa, â Lang maroyoh kihipwen, andre kusatine paiwe.â64Pwen pe apwatisingiy para koro memerani ngat, kipoo kiya lang maroyoh. Matisan ndramiran hu, ara hu kasa, pe kapahanowe nombuwen, pe hu kapwai kiya kili hu ndramat tehe yiy kintine paiwe. Pwandrandraman aro, ara andre kiramwaitini pwandrandraman para mamu.â65Pe Pailat isomwi hu, ipa, â Akawiri hu ndram pe akaya mbusi sehe melit mepo wawu lahiy para kambusiy, para akoro memerani ngat kiya hiyan.â66Pwen pe huya singori ngat para tona ndramat ara, pe hurapairani kinima songot iro pat, pe huiki hu ndram para hu koro memeraniy.