1Jisas ome ile wainlangaere o es totho a Jerusalem, ma o velpol a rem a Betpage a tete a Oliv. Ma Jisas i pake ile wainlanga or aini2ma i ria or paini ve, “Aro thomu paini o esa nge rem ako te totho nge lale. Naro thomu o es inga, na a ur e avele naro thomu paini o thepolo donki sengenga omole ako o pating i, na itun i mit tomo nge i. Aro thomu o tetrispot ir mo o ti ir a tho nge me.3Na aro ve toko e i oma riong e a thomu paini nge, aro thomu paini o ria i ve, ‘Toko Pomnga ile omaing i voth a or paini nge, naro i pake werer or paini viri viri me.’”4Na ur ake i velpol vene re ake mo i pavelpol nunganga ur ako Toko Pomnga ile riong elnga i ri nge ve,5“Panongpol riong ake a toko na seng Saion angare nge,‘Thepol, lomu nepes i es me.I paruru isivengana i men a donki ikime nge ome itun okimena i es me.’” Aisaia 62:116Ma ile wainlanga or aini aken o oma i ranga ve ako Jisas i ria or paini nge.7Ma o pasong donki aken tomo nge itun aponga me, ma or paini o ronga ole tekruk seltunnga a donki or aini aken okime. Lamako Jisas i mena ol a okime.8Ma toko na seng pulua ako o ela ole tekruk seltunnga ma o vlesu ir a sovengalo. Na pelie o soro won menini pothoingthoinga ma o paenu i a sovengalo.9Ma tokokoe areko o es a mukaling na areko o es a rumongaling o presa ve,“Te risea a Devit itevinga.”“Sapase toko aken ru i es menge a Toko Pomnga iion.” Buk Song 118:25-26“Aro te paaolonga a God iion roro.”10Ma nge a Jisas ile velpoling a Jerusalem toko na sengre o kukuk nge onngaing na leng lenging ako o paaolonga Jisas iion nge, ma o nin pel osivenga ve, “Toko ake ini anga?”11Ma tokokoe areko o es tomo nge a Jisas o olal ole riong ve, “Ake ini a Jisas, ako ini a God ile riong elnga ako i es a Nasaret ako a epee a Galili me.”
Jisas i wistetpot tokokoe areko o men thal ole lulu a Lotu Tepun a Vel a lok lemi.
12Ma Jisas i eso a Lotu Tepun a Vel a lok lemi ma i wistetpot tokokoe areko o men thal ol lulu na i eksingtunu areko ole ring ako o tepolal umtun relngange, na i wathprepa areko o pamen ole pothu olingare ole menonga.13Ma i ria or ve, “God ile erere i ri ve,‘Lek vel aro i voth ini nongonga a vel.’ Aisaia 56:7Ave thomu o oma ol i mo ini toko kemongare ole men kineonga.”14Jisas i voth a Lotu Tepun a Vel a lok lemi, na toko eve lilngare na theki prosngare o es a i nge me, ma i pasivenga werer or.15Ma pris kimangare na pamirealingare nge a Moses ile patorong o thepol omaing sivesivenga areko i oma i, na o nongpol mun wainlangare ako o presa a Lotu Tepun a Vel ve,“Te risea a Devit itevinga.”Mako oopo lemi i kerenga nge a Jisas.16Ma o nina i ve, “Ava wong nongpol avele nge riong ako ru o oma i, eneke aro ve ong nongpol i aro ong mit roal or.” Ma Jisas i olal ole riong ve, “Tho nongpol i. Na ava thomu o tital a God ile erere avele ako ve,‘God, ong ateal povothvothre na wainlangarenaro o paesa iom roro.’” Buk Song 8:217Mako Jisas lo lelpot oa na i espot ol e rem aolonga aken ma i voth a Betani nge pemliknga aken.
Jisas i vol ine won ako ini pupos makola i menea.
18Rulpoalal nge ile es wererong a rem aolonga aken la, ma mesipun rintet i.19Ma i thepol pupos ako i mit a sovengalo wo peti, ma i es totho nge, ave i thepola imonnga pelie avele nge, ini inga ithoingre. Mako i ria ol won aken ve, “Aro wong mon werer ol avele ol.” Na a ur e avele, nako pupos aken i menea.20Ma ile wainlangaere o thepol aken, ma o kukuk rintet, ma o ri ve, “I vava ake won ake i menea viri viri, e?”21Ma Jisas i olal ole riong ve, “Tho ri nunganga a thomu nge, aro ve lomu lemioong i omole inga na i mothong tova or aini, aro thomu o oma mun omaing ake ru tho oma i nge pupos ake lale. Naro thomu o oma inga ake avele, ave aro ve thomu o ria tete po ake ve, ‘Wong plosa mo ulu sivengom a thev lemi la,’ aro ur aken aro i velpol ranga ve ako thomu o ri nge.22Na aro ve lomu lemioong i omole inga na thomu o nong aken, ur alavusnga ako thomu o nong ve aro thomu o el i, aken aro thomu o el i.”
O nin a Jisas ve, anga i sungu engenging aken a i nge.
23Jisas i eso a Lotu Tepun a Vel a lok lemi ma i patoral toko na sengre nge. Ma pris kimangare na Judare oa pompomere o es a i nge me ma o nina i ve, “Anga i ria wong nge omaing aken omanga, e? Na anga i sungu engenging aken a wong nge?”24Ma Jisas i olal ole riong ve, “Tho mun aro tho nin thomu nge ninong e. Aro ve thomu o olal vengveng lek ninong ake, naro tho ria mun thomu nge anga ako i sungu engenging a tho nge, nge omaing ake omanga.25Na lek ninong i vene: Jon ako i paninu tokokoere na ile omaing aken i es a pen kathnga me? I es a Pen a Urvet me, eve i es inga ake a tokokoere nge me?” Ma osivenga o leng lengtun pel nge riong aken ve, “Aro ve te ri ve, ‘I es a Pen a Urvet me,’ aro i nina it ve, ‘Na i vava ako lomumuo nge i avele?’26Na aro ve te ri ve, ‘Ine ur ako i es a tokokoe inga re nge me,’ aro te ngeip nge tokokoere, eneke or alavusnga olemio nge a Jon ako ve, ini a God ile riong elnga e.”27Mako o olal ol inga Jisas ile riong ve, “Lemimem mire nge avele.” Ma Jisas i ria or ve, “Tho mun aro tho ria thomu avele nge anga ako i sungu engenging nge tho nge omaing areken omanga.”
Riong agelalnga nge wain tomonnga or aini na otema.
28Na Jisas i ria mun ve, “Na lomumu vava? Toko omole itun tomonnga or aini, ma i es a pomnga nge ma i ria i vene: ‘Tuk, wong es mo um a vain a ometa nge ponange ake.’29“Ma itun i ria i ve, ‘Nik plong,’ ave pan tie i eksing ilemi, mako i es e omaing la.30“Ma otema i es mun a itun posnga nge ma i oma mun re ako ini riong omole, ma itun i ria i ve, ‘Enala vovo,’ ave i es la ma i um vet avele.31“Na nge wainlanga or aini aken oa kathnga i panes otema ile riong?” Ma o olal ile riong ve, “Itun pomnga.” Ma Jisas i olal ole riong ve, “Tho ri nunganga a thomu nge. Takis elngare, na seng areko o aom toko, aro o es tel a God ile menong e nepes lemi nge thomu.32Eneke Jon i es a thomu nge ma i pathengal vothung vengvenga a thomu nge, na lomumuo a i nge avele, ave takis elngare tomo nge toko aomngare olemio a i nge. Na thomu o thepol ur aken lale, ave thomu o eksing lomu mimiong avele mo lomumuo a i nge avele.”
Riong agelalnga nge toko kerengare ako o theal vain a ometa.
33Jisas i ria mun or ve, “Aro thomu o nongpol riong agelalnga mun e. Toko e ako i oma vain a ometa, ma i av lok. Na a ometa lemi i tou vol mo ve o teplaso vain monnga mo vain ei i lelu nge la, na i pipera ring roro ako aro tokokoere o voth nge na o theal tetal ometa aken. Lamako i sungu ometa aken a tokokoe pelie nge, mo aro o pavelpol umtun nge naro o sungu vain monnga epee a i nge. Mako toko aken i es a rem gatnga la.34Lama nge vain le motuongi pake ile um polpolongare ve aro o el ia vain monnga epee ako ini ia.35“Ave tokokoe areko o um a vain a ometa aken, o mita ma o rereu or ma o siso omole na o so rin aininga na o molup omole ipunnga nge um.36Lama ometa tokoninga i pakepot mun ile umonga relnga pulua ol la, ave vain a umongareo oma mun inga ako ini vothung omole a or nge.37Lamako a rumongaling i pake ol itun a or nge, ma ilemi ve, ‘Aro o nongpol tuk ile riong.’38“Ave tokokoe areko o um a ometa aken o thepol itun ako i es me, ma o ria osivenga nge ve, ‘Ken thomu, toko ake ini ometa tokoninga itun ol ake. Ita, te so rin i mo te el ol ia ometa ake ini itema imeni po.’39Mako o rereu i ma o asespot i a ometa a lok kime la, mako o so rin i.40“Na lomumu vava? Panen aro vain a ometa tokoninga i es me, naro vothung le vanga aro i oma i nge toko umonga areken, e?”41Ma Judare oa pompome areken olal ile riong ve, “Aro i pun rin selele toko kerenga areken, naro i sungu ometa aken a toko relnga ol re nge mo aro ve nge vain po ol aro o sungu ol epee aken ini ia.”42Ma Jisas i ria or ve, “Ava thomu o tital riong epee ake a God ile erere nge ve,“‘Ine um ako vel aringare olemi ve,i kerenga ma o siv lelpot i,ake kene i velpol ini um a urvetako i paengeng velranga ve ini wovek sapatanga.Toko Pomnga ini ako i oma ima them thepol i nge thekimemma i sivenga rintet.’” Buk Song 118:22-2343Jisas i ri or ve, “Lamako tho ria thomu, God aro i eltetpot ile menong e nepes a Pen a Urvet a thomu nge naro i sungu i nge tokokoe areko aro o panes ile riong.44Na toko ako aro ve i mata a um aken nge aro i mout mout, na aro ve um aken i matu a i nge aro i mopipara.”45Ma pris kimangare na Parisire o nongpol a Jisas ile riong agelalnga aken ma olemi mire ako ve, i ri aken nge or.46Mako olemi ve aro o rere a Jisas, ave o ngeip nge tokokoere, eneke tokokoere olemi ve, Jisas ini a God ile riong elnga e.