Read MATAIO 21

MATAIO21hmo_png

Ierusalema dekenai king bamona Iesu ia raka vareai

¹Idia raka lao, Ierusalema idia kahirakahira, Betepage dekenai idia ginidae, Olive Ororo badibadinai. Vadaeni Iesu ese iena diba tahua taudia rua ia siaia guna,²idia ia hamaoroa, ia gwau, “Iseda vairana dekenai hanua ta ia noho. Umui lao unuseni, doniki ta au ta dekenai idia kwatua, mai ena natuna danu, do umui davaria, vadaeni idia umui ruhaia, umui mailaia iniseni.³To bema tau ta do ia nanadaia umui dekenai, do umui gwau, ‘Inai doniki be Lohiabada ia ura.’ Vadaeni do ia siaidia.”⁴Inai gauna be ia vara vadaeni, peroveta tauna ena hereva hamomokania totona, ia gwau:

⁵“Siona ena natuna kekeni dekenai oi hamaoroa,‘Oi itaia, oiemu Lohiabada be oi dekenai ia mai noho,dagedage lasi tauna, doniki ena doruna dekenai ia helai,doniki natuna ena latanai ia helai.’ ”

⁶Idia ruaosi idia lao, Iesu ia hereva hegeregerena idia karaia.⁷Doniki mai ena natuna danu idia hakaua lao. Edia dabua doniki latanai idia atoa. Vadaeni, Iesu ia helai ia dekenai.⁸Vadaeni taunimanima momo herea ese edia dabua dala dekenai idia atoa, ma haida ese au rigidia idia utua, dala dekenai idia atoa.⁹Vadaeni taunimanima momo, Iesu vairanai idia raka taudia bona iena murinai idia raka taudia danu idia boiboi, idia gwau,
“Hosana, Davida ena natuna e!Lohiabada ena ladanai ia mai noho tauna ita hanamoa.Ataiai momokani ia noho Dirava dekenai, hosana!”

¹⁰Iesu be Ierusalema dekenai ia ginidae, vadaeni hanua taudia ibounai idia herevahereva momo, idia gwau, “Inai be daika?”¹¹Taunimanima idia haere, idia gwau, “Inai be Iesu, peroveta tauna, Nasareta Galilea dekena amo ia mai.”

Iesu ese hoihoi taudia ia luludia Dubu Helaga dekena amo

¹²Iesu ese Dubu Helaga ia raka vareai, vadaeni unuseni idia hoihoi taudia ibounai ia luludia murimuri dekenai. Moni idia senisia taudia edia pata, bona pune manu idia hoia taudia edia helai gaudia ia bubua.¹³Ia gwau henia idia dekenai, ia gwau, “Buka Helaga lalonai ia torea vadaeni, ‘Lauegu Ruma be guriguri Rumana do idia gwauraia.’ To umui ese henaoa taudia edia ruma dekenai umui halaoa.”¹⁴Vadaeni matakepulu taudia bona aena dika taudia Dubu Helaga dekenai idia lao, Iesu dekenai, vadaeni ia ese idia ia hanamoa.¹⁵Dubu biagudia bona taravatu hadibaia taudia ese Iesu ena hoa karadia idia itaia, memero bona kekeni danu edia hereva idia kamonai, Dubu Helaga lalonai idia boiboi, idia gwau, “Hosana, Davida ena natuna ita hanamoa!” Vadaeni idia be badu dikadika.¹⁶Idia nanadaia Iesu dekenai, idia gwau, “Inai maragidia edia hereva oi kamonai, a?” Iesu ia gwau, “Oibe. Umui be nega ta Buka Helaga umui duahia lasi, a? ‘Natudia maragidia, rata idia inua memero, edia uduna dekenai Dirava idia hanamoa namonamo.’ ”¹⁷Vadaeni Iesu ese idia ia rakatania, hanua badana dekena amo ia raka murimuri dekenai, Betania dekenai ia lao, unuseni ia noho unai hanuaboi lalonai.

Iesu ia hereva, vadaeni fig auna ia kakoro

¹⁸Dabai, Iesu be Ierusalema dekenai ma ia giroa lou mai hitolo danu.¹⁹Ia ese fig auna ta dala badinai ia itaia, vadaeni au dekenai ia lao, to huahua ta ia davaria lasi, ena rauna sibona. Vadaeni Iesu ia gwau henia, ia gwau, “Huahua do oi atoa lasi, harihari ia lao bona hanaihanai.” Vadaeni nega tamona fig auna ia kakoro momokani.²⁰Diba tahua taudia ese idia itaia, idia hoa dikadika, idia gwau, “Edena bamona inai fig auna be haraga momokani ia kakoro vadaeni?”²¹Iesu ia gwau, “Umui lau hamaoroa momokani, bema umui be mai abidadama, bona bema umui laloa daradara lasi, inai fig auna dekenai ia vara hegeregerena sibona do umui karaia lasi, to inai ororo danu bema umui hereva henia, bema umui gwau, ‘Do oi kokia. Davara dekenai do oi negea diho.’ Vadaeni unai bamona do ia karaia.²²Gau ibounai guriguri dekenai do umui noinoi, mai emui abidadama danu, vadaeni do umui abia.”

Iesu ena siahu be daika ese ia henia?

²³Iesu be Dubu Helaga dekenai ma ia raka vareai, taunimanima ia hadibadia. Vadaeni dubu biagudia bona hanua tau badadia ia dekenai idia lao, idia nanadaia, idia gwau, “Edena siahu dekenai inai kara oi karaia, bona inai siahu be daika ia henia oi dekenai, a?”²⁴Iesu ia haere idia dekenai ia gwau, “Lau danu lau nanadaia umui dekenai, do umui haere henia lau dekenai, vadaeni inai kara lau karaia ena siahu be do lau hamaoroa umui dekenai.²⁵Ioane ena bapatiso be edeseni dekena amo? Guba dekena amo, o taunimanima dekena amo?” Idia ese ta ta sibona dekenai idia hereva, idia gwau, “Bema ita gwau, ‘Guba dekena amo,’ do ia gwau, ‘To edena bamona umui kamonai lasi ia dekenai.’²⁶Bema ita gwau, ‘Taunimanima dekena amo,’ inai taunimanima momo dekenai do ita gari, badina be idia ibounai idia laloa Ioane be peroveta tauna?”²⁷Unai dainai, Iesu dekenai idia haere, idia gwau, “Ai diba lasi.” Vadaeni Iesu ia gwau, “Lau danu inai kara lau karaia ena siahu be do lau hamaoroa lasi umui dekenai.”

Tau ta mai ena natuna rua

²⁸“Dahaka umui laloa? Tau ta be mai ena natuna rua. Vadaeni ia ese iena vara guna natuna dekenai ia lao, ia gwau, ‘Egu natuna e, hari dina mani oi lao, lauegu vain uma gabu dekenai do oi gaukara.’²⁹Iena natuna ia haere, ia gwau, ‘Do lau lao lasi.’ To gabeai iena lalona ia giroa, vadaeni ia lao.³⁰Gabeai ia vara tauna danu dekenai ia lao, unai bamona ma ia hamaoroa. Vadaeni mero ia haere, ia gwau, ‘Lohia e, do lau lao.’ To ia lao lasi.³¹Idia ruaosi, daika be edia tamana ena ura ia karaia?” Idia gwau, “Guna ia vara natuna ese.” Vadaeni Iesu ese idia ia hamaoroa, ia gwau, “Umui lau hamaoroa momokani, takisi gogoa taudia bona sihari kava hahine ese umui idia gunalaia, Dirava ena Basileia do idia vareai guna.³²Badina be Ioane ia mai neganai dala maoromaoro ia hedinarai henia umui dekenai, to umui be umui kamonai lasi ia dekenai. To takisi gogoa taudia bona sihari kava hahine ese idia kamonai henia ia dekenai. Bona umui ese edia kamonai umui itaia, to, emui lalona umui giroa lasi, umui kamonai lasi Ioane dekenai.

Parabole: Uma gabu naria taudia dikadia

³³“Parabole ma ta mani umui kamonai: Uma biaguna ta ese vain uma gabu ia hadoa, ena magu ia karaia, vain huahuana moia totona guri ia geia, bona kohoro rumana ia haginia, gima taudia edia. Unai murinai biaguna ese iena uma gabu ia atoa vain bisinesi idia karaia taudia edia imana dekenai, vadaeni ia be hanua daudau dekenai ia lao.³⁴Vain uma ena huahua atoa nega ia kahirakahira neganai, biaguna ese iena hesiai taudia uma gabu naria taudia dekenai ia siaidia lao, vain ena anina abia totona.³⁵To uma gabu naria taudia ese iena hesiai taudia idia dogoatao, ta idia botaia, ma ta idia alaia mase, ma ta nadi dekenai idia hodoa.³⁶Ma idau hesiai taudia momo ia ese ia siaidia lao, to inai kara hegeregere sibona idia karaia idia dekenai.³⁷Gabeai uma biaguna ese iena natuna ia siaia lao idia dekenai. Biaguna ia gwau, ‘Lauegu natuna do idia kamonai henia.’³⁸To uma gabu naria taudia ese idia itaia, vadaeni idia sibona dekenai idia hereva, idia gwau, ‘Iena natuna korikori be inai, do ita alaia mase, vadaeni uma gabu be do ita abia iseda.’³⁹Vadaeni idia dogoatao, uma gabu murimuri dekenai idia veria lao, idia alaia mase.⁴⁰“To edena bamona? Unai uma gabu biaguna do ia mai neganai, uma gabu naria taudia dekenai be edena bamona do ia karaia?”⁴¹Idia haere, idia gwau, “Uma gabu naria taudia dikadia do ia alaia ore, uma gabu be idau taudia ma haida do ia henia, idia naria totona, vadaeni huahua atoa neganai, idia ese vain ena anina do idia henia ia dekenai.”⁴²Iesu ma ia gwau, “Inai Buka Helaga ena revareva umui duahia lasi, a?“ ‘Ruma haginia taudia ese idia ura henia lasi nadi be,ruma ena kona nadi ia halaoa vadaeni.Inai be Lohiabada ena kara.Ita itaia, ita hoa.’⁴³“Unai dainai umui lau hamaoroa, Dirava ena Basileia be Dirava ese umui dekena amo do ia abia siri, bona Basileia ena huahua do ia havaraia besena dekenai do ia henia.⁴⁴Unai nadi ena latanai do ia moru tauna, be do ia makohia maragimaragi. Bona unai nadi ese bema tau ta ena latanai do ia moru, unai tau be do ia patapata momokani, kahu bamona.”⁴⁵Dubu biagudia bona Farisea taudia ese Iesu ena parabole idia kamonaia, vadaeni idia diba iena hereva be idia edia kara ia ese ia hedinaraia.⁴⁶Vadaeni idia ura be idia dogoatao, to unai taunimanima momo dekenai idia gari, badina be taunimanima idia laloa Iesu be peroveta tauna ta.