1No unsinaae biaa di ta xaal nan selina, di xaalame Jerusalem. (Met 2:1) Mil sin di ta se taana Iesu lalon inaman laba Betliem, lalon prowins Judaia, sin xan no leng King Erot, no unsinaae biaa di ta xaal nan selina, di xaalame Jerusalem,2ma di ga atsura, â Inaai aia tsi di ta taana, iwaa xadi king no Jiu? Giem tii lasi xan xadaxada ta tsila lapalaa nan selina ma giem ga xaalame ngali langaari laa sin.â3Biaa King Erot ta alongmen abala, ga suk lolbiir ma no inaman in Jerusalem bula.4Biaa ta se ilei axumuli xadi no lalaamua ina no unsausawit ma no unaasasing ina lo, ga tiiriki di, â Itaa di ba taana aia Karisito?â5Di xisi, â Tile Betliem, lalon prowins Judaia, amuina propet tii se atalaa,6â â â Oro iu, Betliem, lalon pula Judaia,u suk xap mangutngut mu labatina no lalaamua in Judaia,amuina xaal sin iu xariin lalaamua naba ta bet tsuul sin iu,iwaa naba tsap untilaamamil sin nugu no inaman Israel.â â7Mil Erot ga ilei axuina no unsinaae ngali atik axaautsi sen leng so xadaxada tii asemat.8Ga tulen di laa Betliem, ma ga we, â Gim laa ma gim na nanen axaau ngali aia madalak, nawe gim se tatanginai, gim na le asaait alengi iaa ngali iaa ba laa langaari bula sin.â9Mulina di ta se alongen King, di suk es laa ma iwaa xadaxada, di ta lasi nan selina, asuk laamuangen di pupua sin ta tilwat lapalaa papan abia xolot iwaa madalak ta manman lalon.10Biaa di tii lasi xadaxada, di suk taton buxa.11Di tsiga lalon anua, di ga lasi aia madalak mii xan nagaa Maria, ma di ga sage putput ma langaari laa sin. Di ga tsalali xadi no tinabel, biaa no iliil ina ta xaale lapalaa buxa, ma di ga tali no laa sin Iesu, goul, ma no maarang ta suk tso mamainaang (di ta putsangi parenkinsens ma mar).12Moroaa asaait alengi di lalon binalang ngali di na xap mula laa sangan Erot, di ga suk amusili sal xaatsap laa sin xadi inaman labalaba.
Detuu sol loxono Betliem laa Igip
13Biaa detuu se laa, xan angelo Orong asemat sin Josep lalon binalang. Ga paare weaatala, â Tapaas, giwaa madalak mii xan nagaa ma gutuu na sol laa Igip. Manman atia pupua sin iaa ba ta asaaiti iu. Sinsa Erot naba tsalei aila madalak ngali sas amantei.â14Josep a tapaas, giwaa madalak ma xan nagaa nan abia bing ma detuu ga tapaas laa Igip.15Detuu ga manman atia laa pupua sin xan minet Erot. Ma ga atsapngen senaara Orong ta paatinai sin propet ga we, â Iaa ilei atsuulngi nugu tsi xaal Igip.â16Biaa Erot ta se nanxilalaa malen no unsinaae di tii apanaai ia, a suk magaa buxa, ma ga tali papaare watwat ngali di na sas amantei no tsi taamat dokdok araraa in Betliem biaa xadi no miet ta lua o paina, ta apuaa laa sin abia leng no unsinaae di tii asaaiti.17Biaa xan sen totore propet Jeremaia, a se tsap so:18â Iexa ine biaa di ta alongmen Rama,tineng ma lolbiir,Rakel ta teng ngali xan no tsima ga palo ngali di na axorongi sin xan tineng,amuina xan no tsi di se met.â
Detuu mula laa Nasaret
19Mil sin Erot ta se met, iexa ina xan no angelo Orong asemat lalon binalang sin Josep tia Igip,20ma ga paare, â Tapaas giwaa tsi mii xan nagaa ma gim na laa lalon pula Israel, amuina biaa di, di ta xonon ngali sas amantei aia tsi di se met.â21Biaabi Josep ga tapaas, giwaa tsi mii xan nagaa ma di ga laa lalon pula Israel.22Oro biaa ta longmien malen Akelas a se tsap king tia Judaia, ta adi niaan xalkale sin xan mom, ilaa Erot, asuk mataa ngali laa atia. Moroaa tii se atewaai ia lalon binalang ngali es laa lalon prowins Galili,23ma ga man lalon inaman laba Nasaret. O ga se tsap so abia papaare no propet di tii paatinai ti tsaa, â Di ba putsangi ia Taan Nasaret.â