1Pwen lang manonoh ihipwen, pe Yesu iwiri Pita, Yamis, pe Yohanes nali Yamis, pe iluwani hu huya ngondron sih paingan, pe yihu kopu, huya huro aliy.2Pe huya huro ara, pe nombuwe Yesu ipiy iro mbulmarahu. Pe kombuyen, ara ngannganan iya tehe mwandrai, pe koiwen ara nganan pallen tehe ngana lang.3Pwen iro mwonen ara, Mose pe Eliyah hilsarayah hilsa mbulmarahu, pe hilro wong iyasura Yesu.4Pe Pita ipwai iya kili Yesu, ipa, â Yapan, hiyan para yowu koro iye. Kapa welem kiso, andre kupuli yopai matiwumâ hawum atam, hawum ata Mose, pe hawum ata Eliyah.â5Pe iro wong manau pe kokom hasai nganan iya, ara isa pe iramburuhi hu. Pe yoholai sahin iyau kokom, ipa, â Iye ara Noru mepo ndriyo imbuluhi yiy; pe yo upwes iyatan namandran iya. Akahilingi yiy!â6Pe iro mwonen ndramiran hu huhilingi nongan aro, ara hunoh turuwehu pe huyos te mbulmarahu iya pwan.7Hapeko Yesu isa, pe niman iyahatek iya kili hu, pe ipa, â Akatine; wawu mbuna akanoh.â8Pwen mara hu itandras, pe yihu kannime hamou pwi; Yesu ko iro.9Pe hurolai ngondron huropo husa pwan, pe Yesu ipwatisingiy iya kili hu, ipa, â Wawu mbuna akatiyani sehe melit mepo wawu kannimei kiya kili hamou, kipoo Noru Ndramat kitine kimat.â10Pe ndramiran hu husok yiy, hupa, â Paratapeh pe hu ndramat para hinuwani nongan para pwahanou ngara hu kapwai, tehe Eliyah andre kisa kimu?â11Pe Yesu isomwi hu, ipa, â Ndrokonan para aliy, ara Eliyah kisa pe andre kiramwaniyani hu melit masih kene.12Hapeko upwai isa kili wawu tehe, Eliyah, ara kinsa pwen, hapeko yihu kanyirowe yiy pwi. Pe humbusi melit masih mepo hulohonganiy para kambusiy kiya kili yiy. Pwen tehen tora ko, andre hu kaiki Noru Ndramat kiya nondriya ngandran.â13Pwen ndramiran hu, ara lohongahu isa leu tehe yiy iro wong iya kili hu, ara iyata Yohanes Ndramat para Paptais.
Yesu isopwoyani wihou hamou payit iro ndritan
14Pwen iro mwonen yihu sarayah husa kili hu ndramat soyon, pe ndramat hamou isa pe itukuruhu iro mbulmara Yesu.15Pe ipa, â Yapan, koyum kisikirani noru kamai. Yiy ngara kilohori yiy, pe ngara kiya nondriya ngandran namandran iya. Pe lang hitun ngara kiyos kiya nondriya mwan ndre kiya nondriya ndran.16Pe uwiri yiy iya kili ndramiram hu, hapeko yihu kanlahiy para kasopwoyani yiy pwi.â17Pe Yesu isomwi hu, ipa, â O wawu hasap para mahapo, ara wawu kanpwotisingi lohonga wawu pwi, pe lohonga wawu imwakaikai. Mwalaiheh pe andre kuro sura wawu ko? Pe maporosahayeh andre kuro kuni nopwaran tawawu ko yeh? Wawu kawiri mbunah kamai ara, kisa kili yo iye.â18Pe Yesu ipomate payit ara, pe payit itali mbunah ara; pe iro mwonen payit itali yiy o, ingoh.19Pwen pe hu ndramira Yesu husa kili yiy nokule ko, pe husok yiy, hupa, â Paratapeh pe yowu kanlahiy para karasses payit ara, kiyau pwi?â20Pe ipwai iya kili hu, ipa, â Paratesah, wawu pwotisingi lohonga wawu, ara hape ko. Yo upwai ndrokonan isa kili wawu, kapa lohongai ndrisiyon tawawu ara mendreheh tehe peke mbuwa mastet sih, pwen wawu lahiy para akapwai kiya kili ngondron iye, akapa, â Atali iye pe aya yoroâ pwen andre kises. Pe melit masih, ara andre wawu kawenei para akambusiy.â22Pwen Yesu iyasura ndramiran hu husa wule husa kol namandran hape Kaliliyy. Pe ipwai iya kili hu, ipa, â Andre hu karatuni Noru Ndramat, pe hu kaiki yiy kiya nima hu ndramat.23Pe andre hu katingundrun kimat, pe kiro mwonen lang toyoh andre kitine paiwe.â Pe ndramiran hu huhilingiy pe ndriyahu iporu.
Takis para yumwa totohun namandran
24Pe iyamulan Yesu iyapolo ndramiran hu huyarayah huya kol Kapernawum, pe hu ndramat para poya takis mepo ngara hu kapo takis para kisopwat yumwa totohun namandran, ara husa kili Pita pe husok, hupa, â Ndramat para hinonou ta wawu, ngara kiyki takis para yumwa totohun namandran, ndre pwi?â25Pe Pita isomwi yiy, ipa, â Ehe, ngara kimbusiy.â Pe iro mwonen Pita isong isa nondriya seu, Yesu iwong imu, ipa, â Simon, wou alohonganiy tapeh? Yihu king para kol pwan, ara yihu ngara kapo takis kiyau kili hu noruhu mbukenahu, ndre kiyau kili hu ndramat hayah i?â26Pe Pita isomwi Yesu, ipa, â Andre hu kapo takis kiyau kili hu ndramat hayah.â Pe Yesu ipwai iya kili yiy, ipa, â Pwen, hu noruhu, ara andre hu kanyuk takis pwi.27Hapeko matisan tukambusi hu, pe welehu kaya mai; pwen pe aya ndran makaiye pe aya piye kou. Pwen ni mepo akowiy imu ara, awiriy pe atipe pohon, pe andre anime sombule pat para takis, ilahiy ndramat malmou. Awiriy pe ayaikiy kiya kili hu ndramat para poya takis, para sowa takis atatalu.â