Ma꞉t1knv_png

Ya꞉sukono Mabu Epono Mailono Tanalo

1Ya꞉su Kelisoko ebe Da꞉ibidikono walone gudula, ega꞉walo Da꞉ibidiko ebe A꞉ibalayamakono walone dawala, ebene me ebe Ya꞉sukono mabu epono mailono tanalola.
2A꞉ibalayamako tetene wagilimite Da꞉ibidiko teta꞉mo pemaiga, Ya꞉sukono mabu epono tanalo ma kunula — A꞉ibalayamakono gudu Aisa꞉ketela. Aisa꞉kekono gudu Ya꞉ikobotela. Ya꞉ikobokono gudu Yudatela, wiyasiya Yudako kapiya kosiyodiliya꞉, ebeno nani ega꞉walo ekaki epetapi eba꞉go nilukulinamiya.3Yudakono gudi netewa Peleseko ega꞉walo Silako, ibino menoko Ta꞉imatela. Pelesekono gudu Esalonatela. Esalonakono gudu Lamatela.4Lamakono gudu Aminadabatela. Aminadabakono gudu Nasonatela. Nasonakono gudu Samonotela.5Samonokono gudu Bowasetela, ebe guduno menoko La꞉iya꞉batela. Bowasekono gudu Obedatela, ebe guduno menoko Lutitela. Obedakono gudu Yesitela.6Yesikono gudu Da꞉ibiditela, ebete Isalaela opono Kawo Elawodubuma꞉ eda꞉nami.
Ebene Da꞉ibidiko tetene wagilimite Yekonayako teta꞉mo pemaiga, Ya꞉sukono mabu epo me ebe Yu epo Kawokawo Elawodubula, ibino mailono tanalo ma kunula — Da꞉ibidikono gudu Solomonotela, ebe guduno menokote dopamo Ulayakono kamiyalema꞉ eda꞉nami.7Solomonokono gudu Liyobaumatela. Liyobaumakono gudu Abayatela. Abayakono gudu A꞉isatela.8A꞉isakono gudu Yosapatatela. Yosapatakono gudu Yolamatela. Yolamakono gudu Usayatela.9Usayakono gudu Yautamatela. Yautamakono gudu A꞉iyasatela. A꞉iyasakono gudu Esekayatela.10Esekayakono gudu Ma꞉na꞉satela. Ma꞉na꞉sakono gudu A꞉monatela. A꞉monakono gudu Yausayatela.11Yausayakono gudu Yekonayatela, wiyasiya ebe kapiya kosiyodiliya꞉, ebeno ekaki epetapi eba꞉go nilukulinamiya. Yekonayako tetelo Ba꞉baloni gowelaopiate pelamete Isalaela opo epo elawamo puwatete ibino Ba꞉baloni oponomamo ebo magataliya.
12Ebene gowelaopiate ibi Ba꞉baloni opamo demagataliya, ebe tetene wagilimite Yausepeko teta꞉mo pemaiga, Ya꞉sukono mabu epono tanalo ma kunula — Yekonayakono gudu Siyatiyelatela. Siyatiyelakono gudu Selababelatela.13Selababelakono gudu Abiyudatela. Abiyudakono gudu Elayakimitela. Elayakimikono gudu A꞉isotela.14A꞉isokono gudu Sa꞉idokatela. Sa꞉idokakono gudu A꞉ikimitela. A꞉ikimikono gudu Eliyudatela.15Eliyudakono gudu Eliyesatela. Eliyesakono gudu Ma꞉ta꞉natela. Ma꞉ta꞉nakono gudu Ya꞉ikobotela.16Ya꞉ikobokono gudu Yausepetela. Yausepeko ebe Ma꞉likono awila ega꞉walo Ma꞉lite Ya꞉suko alaimiya, ebe gudu epate Godokono Alibodawa Kelisoma꞉ ka꞉minaka.17Ebema꞉ Ya꞉sukono mabu epono tanalo ma kunula. A꞉ibalayamakono tetene wagilimite Da꞉ibidikono teta꞉mo pemaiga 14 epola, ega꞉walo Da꞉ibidikono tetene wagilimite gowelaopiate epo Ba꞉baloni opamo demagataliya ebe teta꞉mo pemaiga 14 epola, ega꞉walo Ba꞉baloni tetene wagilimite Kelisokono teta꞉mo pemaiga 14 epola.

Ya꞉su Kelisokono Awokala Tanalo

18Ebene Ya꞉su Kelisote keba kunu kawokaliyale, me ebe tanalola. Ebeno menoko Ma꞉liko Yausepetamo natamiya, ebene iba꞉te kapiyama꞉ eda꞉no, Ma꞉lite dopamo iyatawiya ebete Godokono Uliyanamo lamituma꞉ eda꞉te gudu kalaimimene.19Ebeno awi Yausepeko ebe wade tuputupudawanomola. Ebema꞉ ebete Ma꞉liago kapiyama꞉ eda꞉no ebete ebeno lamituma꞉ eda꞉ tanalo diyatawiya, ebe tetelo ebe ubila Ma꞉liko gelebadiago alibutima꞉, mabu ebe ubia꞉nola epono ololo apulo ebetamo ilipo ikaema꞉.20Wiyasiya ebete me tanalo eba malagidilolo Kawodawa Godokono nopodawate iyo gabodo ebetamo maiganate negeni, “Da꞉ibidikono a꞉la꞉mu Yausepe, a꞉ma꞉le Ma꞉liko a꞉imano kamiyalema꞉ eda꞉ma꞉ akotoletola꞉la꞉, mabu ebeno tepo magumulo da꞉luta ebe gudu Godokono Wade-talena Uliyanate ebetamo ikami.21Iyo, ebete dubu gudu kalaimimene ebene a꞉ma꞉ ebeno mailo Ya꞉suma꞉ neka꞉miye, mabu ebete ebeno epo ibino iyaiya kuba osiyodilole magumune uwatete ibino igilo ka꞉mula꞉lelaemene.”22Ebene me tanalo bilibilinomate emaimiya, Kawodawa Godote ebeno woki awokalimidawado degiya ebe tabote nanitaboma꞉ keda꞉ma꞉, iyo, iyalo tetelo ebete tabo ma kunu giya,
23“Buwelete lamituma꞉ eda꞉te dubu gudu kalaimimene,ebene iba꞉te ebeno mailo Ima꞉nuwelama꞉ keka꞉ima꞉na꞉.”Buka ka꞉la꞉mioledawa, modobola a꞉ma꞉ niyatawa me Ima꞉nuwela mailono magumu nitana ‘Godote ago nokolina.’
24Ebema꞉ Yausepete u wata baine maiganate Godokono nopodawate ebe beda꞉ tabo kananiyale, ebete ebe tabamo tuduwatate Ma꞉liko ebeno kamiyalema꞉ ebo lawiya.25Wiyasiya Ma꞉lite gudu Ya꞉suko alaimia꞉no Yausepete dopamo eba꞉go kapiyama꞉ kediya꞉, ebene Ma꞉lite Godokono gudu dalaimiya ebe tetelo Yausepete ebe Ya꞉suma꞉ ebo ka꞉miya.
expand_more
Search