Lucas9cuk_nvs

Jesús-sapingan, Bab-Dummad-e-negdakmaidgi sunmakapid

1Jesús na e-sapingan-ambe-gakabogwad-danar-oambikusgu (12), bela amarga igar-uksad, Bab-Dummad-ganguedba dulemargi niamar-oniegar, degine, dule-uellemalad-nudakegar.2Geb degi, Jesús e-sapingan-barmisad, adi, Bab-Dummad-e-negdakmaidgi sunmakegar, degi, dulemar-uellemalad nudakbaligar.3Jesús e-sapinganga weyob sogsad: “Mer igarba ibmar sedmalo, suar-gaapoled suli, sagu suli, masgunned suli, degine, mani surbar. Deginbali, unnila mor-yoigwabi be namaloed.4Ar doa-negse be dogdapoe, a-negginbi be megoed. Ar a-neggi-mai geb be baid-neggweburse namaloed.5”Ar bia be-abingassurmalar, a-neggweburgi be nodmaloed, geb be-naggi-olli-nanaid be nue eli-eli samaloed, adi, dulemar mag be-dakmalaga bemar ega Bab-Dummad-igargi sunmakapmala. Degisoggu, emargindo, ar Bab-Dummad-igar yapa abingamalar.”6Jesús-sapingan-ambe-gakabo-guedi (12) bela neggweburmar-burwiganase Bab-Dummad-Gayaburba-Nuedgi sunmakdii guarmalad, degi, dulemar-gegumalad-nudakdii gusmarbalid.

Diigi-dule-oged-Juan-burgwisad

7Dummadga Herodes-Antipas-maidi, Jesús-bela-ibmar-imakdiid-itoargu, geger nue-ito naded. Ar ade, abar sogmalad: “We-Jesús, Diigi-dule-oged-Juan-burgwisad gannar durgusye.”8Baigan sogmarbalid: “We-Jesús, epenne-Bab-Dummad-gayaburba-barsoged-Elíasʼye-nugad, gannar noniye.” Degine, baigandi sogmalad: “We-Jesús, epenne-Bab-Dummad-gayaburba-barsoged-wargwen-gudigusad gannar durgusye.”9Herodes-Antipasʼdi sogded: “An diigi-dule-oged-Juan-ibe dukar-egwachadde, degite, dulemar an egi-sunmake-itogedde, ¿wede doasunna?” Degisoggu, Herodes-Antipas Jesús-dakbiguarsunnad.

Jesús dulemar-miliatar (5,000) masgi-oguchad

10Jesús-e-sapingan-bur-dummagan-e-ambe-gakabo-gued (12), gannar Jesúsʼse nonimargu, bela ibmar-imaksamalad Jesúsʼga sognonimalad. Jesús amarbi bachikii, nega-dulesulidganba neggwebur-Betsaidaʼye-nugad-dikarba sesad.11Dulemar wisguargu, Jesús Betsaida-neggwebursik nadye, dulemar ase nadegusmarmogad. Jesúsʼse nonimargu, Jesús dulemar-abingasad. Geb degi, amarga Bab-Dummad-e-negdakmaidgi sunmaksigisad, degine, dulemar-nudakleged-abemalad nudaksabalid.12Ar neg-sedogusgu, e-sapingan-ambe-gakabogwad (12) Jesúsʼse nonimalad, ega sognonimalad: —Dulemar be barmid, adi, igarba negmar-bukwadse, degi, negmar-gwa-gwagwen igarba-bukwadgi sunna obunnomaloed, degi, agi masgunned sunna amimarbaloed. Ar wegindi, anmar nega-dulesulidgangi bukmalad.13Jesús e-sapingan-abin sogded: —Bemar ega masgunned ukmar. E-sapingan, abin-imakdemarmogad: —Anmar unnila madu gwaatar, degi, ua ukabo nikmalad. Ar degiir anmar we-dulemar-ichesulidga mas baknaergebed.14Ar ade, macherganbi miliatar (5,000) mergued. Geb degi, Jesús e-sapinganga sogded: —Danar-danar, e-dulabogakambe-dulabogakambe, (50-50) be urbemar.15E-sapingan deyob imaksamalad, bela deyob dulemar-urbismalad.16Geb degi, Jesús madu-gwaataled susgu, ua-ukabogwad susbargu, niba atakdegu, Bab-Dummadga dog-nuedye sogsad. A-sorba, madu bisge-bisge imaksad, degidbali ega merguded. Geb e-sapinganga ukded, adi, amar dulemarga ukmarmogagar.17Degine, bela-dulemar-gudidimalad nue-immeles mas guchamalad. Mas-guchad-sorba, Jesús-sapingan madu-obichadi, degi, ua-obichadi, garba-gwaambe-gakabo-mergu (12) wesmalad.

Pedro Jesúsʼga sogsad, be Bab-Dummad-Machi-sunnadye

18Ibagwengi, Jesús, Bab-Dummadse bachiki gorsigusgu, deun e-sapingan eba bukwa-gusmogad. Amarse Jesús egichialid: —¿Doaye dulemar an-annik sogmala?19E-sapingan, abin-sogdemalad: —Gwenna-gwenna Diigi-dule-oged-Juanʼye benik sogmalad. Baigandi sogmalad, be Bab-Dummad-gayaburba-barsoged-Elíasʼye. Agi baigan sogmarbalid, be Bab-Dummad-gayaburba-barsoged-wargwen-epenne-gudigusad, gannar durgusadye.20Jesús na e-sapinganga sogded: —Bemardina, ¿doaye an-annik sogmarmosunna? Geb degi, Pedro, Jesús-abin sogded: —Be Cristo, Bab-Dummad-dule-wargwen-barmidagoye-sogsad-dule.21Geb degi, Jesús e-sapinganga sabsur sogded, melle dulemar-baiganga bipisaar sogoye ede Cristoʼye, Bab-Dummad-dule-wargwen-barmidagoye-sogsad-dule-sunnadye.

Jesús e-burgoedgi sunmaksad

22Degi, Jesús sogdebar: —Ani Dule-Machi, nue-wilegergebed. Judíoʼmar-girmar-dummagan, dule-irwa-Bab-Dummadse-gormalad-e-dummagan, degine, Garda-Narmaked-Dulemar, amar gwen an-abingaosurmalad, an-oburgwemaloed. Geb degine, ibapaagi gannar an durgubaloed.23Degine, Jesús bela-dulemarga sogded: “Ar dule-wargwen an-sapinga gubiele, na dukin san iegergebed. Bato burgwenadapidyobi, bane-bane nakrus-semaiyob anba nanaergebed.24”Ar dule-wargwen anba-naid-ular burgwebisulir, e-san-burba ei yogguodo. Ar anba-naid-ular burgwenonikirdi, adi, na-e-san-burba yogguosurdo.25Ar dule-wargwen napneg-naid bela egadga imaksar, degi-inigwele, edi na bergusar, e-san-burbadi yoggusale, ega, ¿ibi-nuedga napneg-naid-egadga-imaksad gus be insae? Suli. Ega ibmar-nuedga gussuli.26”Ar dule-gwensak an-nuggi bingegusale, degi, an-gayaburbagi bingegusbalile, ani Dule-Machi, a-dulegi an bingegumogoed.An-gangued-yeerdaklegedgi an danikoedgi,degi, an-Bab-gangued-yeerddaklegedgi an danikoedgi,degine, baliwitur-yeerddaklegedgi an danikoedgi,a-dulegi an bingegumogoed.27”Ar napira an bemarga soged, gwenna-gwenna wegi-bemar-bukmalad burgosulid, amba dula-gudii, Bab-Dummad-e-negdakmaid bese noni be dakedsegad.”

Jesús-e-san-gwagsad

28Jesús ibabaabakgus-e-burgoedgi-sunmaksad-sorba (8), Jesús, Pedro, Juan, degi, Jacobo-sesagusad. Bab-Dummadse-golega yar-birse nakwided.29Jesús Bab-Dummadse gorsigusgu, e-san-dakleged gwagded, e-mor bela dagudik, dakar-dakar dakle naded.30Geb agi Jesús-sapingan-warbaagwadi dakarmalad, dulemar-epenne-dula-gudigusmalad, Moisés, degi, Elías, Jesúsʼmala sunmakgwichi.31Amar, gwallu-meegwad-abargi, Jesús-Jerusalénʼgi-burgoedgi-sunmakgwichi, degi, Jesús-we-napneggi-bangudoedgi-sunmakgwichi, dakarmalad.32Pedro, degi, baigan-eba-gudidimalad, gabed egi nue-obin itomar-inigwele, nue ataksamargu, Jesús-gangued-yeerdakleged daksamalad, degi, dule-warbo Jesúsʼba-gwichid daksamarbalid.33Degi, amar-warbogwad Jesúsʼgi bangudsokarmargu, Pedro, Jesúsʼga sogded: —Odurdaked-saila, we, anmar wegi gudiid nueddo. Anmar wegi neg-matargana-gwapaa sobmalodo: Gwagwen bega, baid Moisésʼgar, geb baid Elíasʼgarmo. Ar ade, Pedro itosulid, yogsaar gole-gole gwichid.34Ar weyob Pedro sunmakgwichi, mogir emar-birgi nagunonikid. Mogir emargi dognonigu, dobe itodmalad.35Degi, mogir-imbaba gayaburba gollalid, sogded: “We An-Machi-sabedi gued. We, be nue-itomar.”36Degi-sunmaked-bergusgu, Jesús-sapingan dakarmalad, unnila Jesúsʼbi wargwen gwichi. A-ibagangi, Jesús-sapingan dulemar-baiganga ibmar-daksamalad gwen sogsasurmalad, bela daksadi, odukusmalad.

Jesús machigwa-niaburba-nikad-nudaksad

37A-oibosadgine, Jesús na e-sapingan-warbaagwadmala yar-birgi-gudiidgi aidearmargu, dulemar-bukidar ese nonimalad.38Agi dule-wargwen, dulemar-bukidarad-abargi binnasur gote, sogded: —Odurdaked-saila, an-machi anga wis be dake, ar webi wargwen an wis nikad.39Dakargu, burba-isgana an-machigi nagunonikir, binnasur gotedaed, degine, binnasur wawanmakdedaed. Gayaba maku-maku guardaed, burba-isgana sabsur-imakdaed, degine, bar indakbisur guardaed.40Be-sapingangi an wilesanad, adi, ega burba-isgana onogegar. Be-sapingan gwen ega burba-isgana onossurmalad.41Jesús, abin-imakdegu, sogded: —Bemar, Bab-Dummadgi-bengumalad-dulemar. Bemar, Bab-Dummad-igar-oakaloged-dulemar. ¿Sanase bemar-abargi an gudiguosunna? ¿Sanase mag be itomaloe? Budar an bemar-daked danikid. ”Be-machigwa anse be sedage.”42Machigwa Jesúsʼse danikidgi, niaburba machigwa-balimeted, degi, binnasur owawanmakded. Geb degi, Jesús burba-isganase sabsur-uluded. Geb machigwa-onudaksasunnad. Geb a-sorba, e-babga machigwa-uksasunnad.

Jesús ilabogus e-burgoedgi sunmaksad

43Bela dulemar, Bab-Dummad-e-gangued geger dakedbimalad. Bela dulemar Jesús-ibmar-imakedi, geger-dakbukmaladgine, Jesús e-sapinganga sogded:44“We an-ibmar-sogoedi nue be itomalo, mer be iemalo. Ani Dule-Machi, an-oburgwemalaga dulemarse uklegoed.”45Weyob Jesús ega ibmar-sogedi e-sapingan aku itosmalad. Ar ade, emarga odukuar sunmaklesad, adi, aku-itomalagar. E-sapingan na dobedbali Jesúsʼse egichissurmalad, wede ibi ega nue-obarena.

¿Doa bur-dule-dummadi?

46Geb degi, Jesús-e-sapingan na muchub-muchub abin-abin imakarmalad, doa-bur-dummadga guoye.47Ar Jesús, e-sapingan-gwage-binsanaid mag daksagu, machi-bipi-wargwen-susad. Geb e-nagaba ogwichisad.48Agine, e-sapinganga sogded: “Ar dule, an-nuggine we-machi-bipi-abingaele, an-abinganaido. Degi, ar dule, an-abingaele, dule-an-barmialid abinganaido. Ar ade, bemar-imbagi doa-bur-bipigwadi, a, bur dule-dummadid.”

Jesús sogsad, anmargi-yoledisurmalad, anmarba naiye

49Juan, Jesús-abin imakdegu, sogded: —Odurdaked-saila, anmar dule-wargwen be-nuggi niamar-onodii daksado. A-dule, anmar-sordasursoggu, anmar ega sogsado, mer bar Jesús-nuggi niamar-onogoye.50Jesús, abin-sogded: —Mer a-dule-ibe igar-bisgo. Ar dule anmargi yoledisulile, a-dule, anmar-sordado.

Jesús, Jacoboʼga, degi, Juanʼga sabsur ibmar sogsad

51Jesús nibnegse-naed-e-ibagan warmaknonigu, Jesús, Jerusalénʼse nue-nae sokarsunnad.52Jesús igarba nadapgu, e-iduale dulemar-barmisad. Amar nadgu, Samaria-neggwebur-bipigwadse dogdapmalad, adi, agi guagwar idu neg-amimalagar.53Ar dulemar-aginmaladi Jesús-Jerusalénʼse-nadapid magar daksamarsoggu, gwen-abingassurmalad.54E-sapingan Jacobo, degi, Juan, deyob daksamargu, Jesúsʼga sogdemalad: —Dummad, igi epenne Elías nibneg-akar soo odesa, ¿deyob anmar nibneg-akar soo odedabi be abege? Adi, wemar bela-ogumakegar.55Geb degi, Jesús amarsik atakdegu, amarga sabsur sogded: —Ar bemar wissulid igid-burba be gumala.56Ar ani Dule-Machi, nonigua, dulemar-san-burba-obelogega an nonisulid. An nonikid, dulemar-san-burba-abonogegar. Geb degi, Jesús na e-sapinganmala neggwebur-baidse nadmarsunnad.

Jesúsʼba nabigusmalanad

57Jesús na e-sapinganmala nadgua, dule-wargwen igarba ega sokalid: —Dummad, ar bia be naoe, an beba naiguoed.58Jesús a-dulega sogded: —Ar usmardi na e-gubya nikad, sikwimar-gukudimaladi na e-uu nikamarmogad. Ar andi Dule-Machi, neg sated.59Jesús, dule-baidga sogded: —An-sapinga-guega, anba be dage. Dule abin-sogded: —Dummad, bina an-babse an nagwelo, an-bab-burgwedse geb beba an naoed.60Jesús ega sogded: —Ar dulemar-burbar-bato-burgwar-gudidimaladi, na e-burgwarmalad digoed. Ar bedi, nae, Bab-Dummad-e-negdakmaidgi dulemarga be sunmaknae.61Geb degi, dule-baid Jesúsʼga sogdemogad: —Dummad, an beba naoed, ar bina an-neg-yaginmaladga degimaloye an sognagwelo.62Jesús aga sogded: —Ar dule neg-imuddibe, gwen yarganba bar-ataksurdaed. Ar degisulile, dule yarganba atakele, e-napa-imunaid ega biir-biir imulego-itole.
expand_more
Search