1I moeq yàng, wop hì sabat Chuaq Jesus lam pagat trong ruàng qmau, mangai tiaq hŏc git hadròc qmau rai tuta hu kaq.2Ƀài mangai Pharisi bòch: Hagleq pì majah broq trong ùh troq ta hì Sabat?3Chuaq Jesus doe ka wì: “Pì ma qnhòq đŏc Đawit broq cleq jò haq xam mangai tiaq haq hadai pangot qmòh?4Haq mùt ta hnim Boc Plình, yŏc ƀênh ta aih qnoh acaq rai am dèh ka bua, ƀênh aih toq pajàu ma khòh acaq.5Haq doe hòm: Kon Mangai aih Chuaq hì Sabat”.
Mangai angwenh tì
6Hì sabat qnoeq hòm, Chuaq Jesus mùt hnài ta hnim tagop qyoh. Ta aih i moeq ngai angwenh tì pah qma.7Ƀài mangai hnài ranenh xam mangai Pharisi qnang ti chaq yiniq đòeq rùp Chuaq Jesus, wì ti ngan ta hì sabat haq i broq brêh ùh.8Mahaq Chuaq Jesus loq ka wì aih qnang hèm trong leq, haq doe ka mangai angwenh tì: “Yòng beq, yòng oe taqne kô.” Mangai aih hi yòng oe taqne wì ta aih.9Aih èh Chuaq Jesus hi doe: “Au bòch pì: Maleq ranenh ma am broq tahì sabat, khòh broq trong lem loq broq trong qmèq? jêh đac mangai loq dèch mangai?”10Haq ti ngan dudan dìq ka wì ta aih, khoe èh haq doe ka mangai angwenh tì: “Bahnhoh tì ìh qmat.” Mangai aih broq tiaq qmang bàu, tì haq hi jah brêh.11Mahaq mangai Pharisi xam mangai hnài ranenh wì nòeh pi cajaq, wì bòch dabau broq qmang leq ka Jesus kô èh.
Jesus ròeh moeq Jàt baiq ngai Tiaq cla
12Oe ta ƀài hì aih Chuaq Jesus tŏc ta wang waiq khàn, haq rìu qngah ka mang aih đòeq waiq khàn ka Boc Plình13Trùh qngah sroq èh, haq creo dèh mangai tiaq hŏc, haq ràih moeq jàt baiq ngai, đòeq broq mangai Tiaq cla:14Haq yiniq ka Simôn aih Phiero, Anrê oh Simôn, Jaco xam Jon, Philip xam Bathê-lemi,15Mathio xam Thôma, Jaco kon Aphê, Simôn wì ma creo Xêlot,16Juđe kon Jaco, xam Juđa Ica-riôt, mangai ma blòq Chuaq Jesus atìq kô èh.
Sôq ramot xam kan nanxa
17Khoe aih, Chuaq Jesus xam mangai tiaq hŏc loh enh wang, wì oe tanòe tamang, ta aih i bàc ngai tiaq hŏc xam bàc ngai trùh enh gùng Juđê, Jêrusalem, xam trong diac Tiro, Siđôn, trùh tamàng bàu haq hnài rai dôq haq broq wì jah brêh kan yinìq tôq.18Ƀài mangai kiac mùt ta chac hadai jah brêh dŏng.19Dìq dŏng ka mangai bàc ta aih ti àu bèq haq, majah qmang aih i kan itai loh enh chac haq, broq ka bàc ngai jah brêh.20Chuaq Jesus ngan dèh mangai tiaq hŏc, rai doe: “Xôq ramot am ka mangai pa, majah qmang aih diac Plình aih da pì.21Xôq ramot am ka mangai qnang pangot, majah qmang aih pì jah panàc, Xôq ramot ka qnang crò hmoe, majah qmang aih pì jah do lem bùi!22Xôq ramot am ka pì, jò wì git ka pì, hnan qnoh pì, hnap hnuq ka pì, cađac yiniq pì tìah kan amùa! Taiq pì tiaq au!23Hì aih, thê pì lem bùi, ti aplôh rai manè, majah qmang aih kan baha pì oe ta Plình èh kàn haraya: Majah qmang aih, kan cadraq wì haq calah nèh hadai khoe tabroq ka ƀài mangai pajàu qmang aih diq.24Mahaq haƀo ka pì mangai ma padrŏng, majah qmang aih pì khoe jah qmòe dèh kan alòng!25Haƀo ka pì, mangai qnang panàc, majah qmang aih pì jah pangot! Haƀo ka pì mangai qnang lem bùi, majah qmang aih pì jah hmoe ta-oeh ka kan cachìt.26Haƀo ka pì mangai qnang jah bàc ngai tapoch manè, majaq qmang aih kan cadraq wì haq calah nèh hadai broq ka ƀài pajàu patìah qmang aih diq.
Loq waq ka mangai tagit
27Mahaq au doe ka pì aih ƀài mangai qnang tamàng bàu au: Thê loq waq ka mangai tablêq ka pì, broq lem ka mangai git ka pì.28Waiq xôq ramot am ka mangai hanip pì, waiq khàn am ka mangai tapoch qmèq ka pì.29Cabô tep da pì tabŏc pah kô, hnhu hloe ka wì haq tabŏc pah tau, cabô hrùiq da pì eo enh gùng, dôq haq wì yŏc hloe da pì eo enh dalam.30Tàng cabô bòch cleq, drah am, tàng i cabô blah yŏc da pì cleq, apaq bòch yŏc hlài.31Pì enh wì broq ka rađeh qmang leq, pì ep broq ka wì qmang aih.32Tàng pì loq waq toq mangai ma loq waq ka pì, aih ma ep pòq dòeh cleq? Mangai i yiniq lui hadai loq waq ka mangai loq waq ka haq.33Tàng pì toq hanò ka magai loq hanò ka pì, aih ma i pòq dòeh cleq? Mangai broq yiniq lui hadai qmang aih diq.34Tàng pì am đò ka wì qnoeq cleq, mahaq toq ngèh ka wì am hlài, aih ma i pòq dòeh cleq? Mangai i yiniq lui hadai am ka mangai i yiniq lui ti lình, đòeq hu jah yŏc hlài xam xèm xam goe.35Mahaq thê pì loq waq ka mangai tablêq ka pì, loq hanò ka wì, loq am ka wì, apaq ngèh ka yŏc hlài cleq enh wì. Aih èh kan baha ka pì kàn joq qnàng, aih pì jah broq kon da Mangai dìq Jaq haqnhèq, majah qmang aih haq hanò ka mangai gôpla xam mangai broq dù.36Thê pì loq waq tìah ka Baq pì aih Mangai ma xan loq waq.37Apaq ti hadrah dèh cabô, èh pì ùh hìaq pòq kan hadrah, apaq taqmòq yiniq lui ka cabô, aih wì hadai ùh hìaq taqmòq yiniq lui ka pì. Thê cađac da wì qnoeq yiniq lui, aih wì hadai cađac da pì yiniq lui.38Am beq, aih èh wì hadai am hlài ka pì, èh wì yŏc cađap kàn, xàu dôq haq nhet, tŏng qmòe ka bình, tah tam ta eo pì, majah qmang aih pì dèch ka wì maneh leq, wì hadai dèch hlài maneh aih.39Haq hadai capoch alìah hu hnài wì rameh: “Mangai ùh xau qnung mangai ùh xau ajah? Ùh xài dìq baiq ka wa aih clìh ta ralùng qmòh?”40Mangai tiaq hŏc ùh yeo haqnhèq ka mangai hnài, mahaq mangai tiaq hŏc leq ma gêh geo, aih èh haq jah tìah dèh mangai hnài.41Gleq ìh hnoq criah ta mat oh daq ìh, mahaq ùh hnoq long ban ta mat cla?42Ìh doe dèh ka oh daq: Aleq dôq au doeh criah ta mat ìh, mahaq ùh hnoq dèh long ban ta mat cla! pì capoch dèh qmang leq majah? Wùih! ƀài mangai patìah toq enh gùng meh! doeh long ban loh enh mat cla qmat adroe, aih èh men xau hnoq hu doeh criah ta mat oh daq.43Long loh plì qmèq aih ùh xài long lem, long loh plì lem aih ùh xài long qmèq44majah qmang aih ngan plì ma canau ka long. Ùh i cabô git plì pŏc ta yila, ùh i cabô git plì nho ta brech.45Mangai ta manoh haq bình trong lem, hloh bàu rangot lem, mangai dù ta manoh bình trong dù, hloh bàu dù, majah qmang aih khoe bình ta manoh men hloh ajang bàu.46Hagleq pì creo ka au: Chuaq, Chuaq, mahaq ùh dùh ka broq tiaq bàu au?47Kô au patô ka pì loq mangai trùh ti au, tamàng bàu au, broq tiaq bàu au, aih èh haq tìah ka cabô.48Haq aih tìah ka mangai broq hnem, chìa jrang cajrùq, dèch hnem enh crŏng hmo talech: Diac tŏc, diac dêh glàm ta hnim aih, mahaq ùh dalàc, majah qmang aih broq khoe cajap.49Yàng mangai leq tàng bàu au mahaq ùh broq tiaq, haq aih tìah ka mangai broq hnim ta taneh ùh i ka xèm, diac dêh glàm ta hnim aih, moeq ayàc raq khoe ralàih, raliang dìq dŏng.