Read LUKE 4

LUKE4gvs_wbt

Yeisu ana vakakona tetelina

¹E kina go Yeisu Baloma Kimaasabaina goi ikayaoda, sákala Iyoridani ikalave go, Balomayana iivakede yoyowo sinaena.²Maliyalina poti (40) goi Totagíwaya Yeisu ivaakakone. Ago amo maliyalinayadi goi geya ikaiketa. Tuwo maliyalinayadi sikavava, Tauyana loga bogina ikámasa.³E Totagiwayayana idigo kana, ‘Kom moitamo Yaubada Natuna ae? Tauna gurewa ame kulovināe bego imalakawoinu.’⁴Go kina Yeisuyana idigo kana, ‘Geya! Gínina Kimaasabaina goi idigo kana,
“Awoinu kaka moe komi yawoimi unadi geya.”’ Atukeda 8:3

⁵Yeisu ibóbwara ikavava, Totagíwaya itáoya, Yeisu ikabi, itukoe go, geya mgoninamo aba lovina liliuna poyapoya goi ivatuluko.⁶Tuwo Totagiwayayana idigo kana, ‘Yau magu lovina tauna avatau neta latuwogu aba lovinayadi adi lovina madi esaesa avini, itoboinegu avini. Tauna bei avinim, e yoim bei gagaina.⁷Tauna neta kom kusakululu yau yaigu, madabokina kom im kaba lovina.’⁸Go kina Yeisuyana idigo kana, ‘Geya! Gínina Kimaasabaina idigo kana,
“Moe Yauwe ida Yaubada yaina tasaakulūlu be anetava yaina tataaimāmina.”’ Atukeda 6:13

⁹E Totagíwaya Yeisu ikabimnei itukoe inave Yerusalema goi go, Yaubada ina Vada Kimaasabaina goi imwerae, e Vadayana yatana toina goi iyato. Tuwo idigo kana, ‘Bego kom moitamo Yaubada Natuna ae? Tauna ameko goi kupēla kusōu go, geya kuvailaita.¹⁰Moe moitamo. Gínina Kimaasabaina idigo kana,
“Yaubada ina aneroseyao ilovinaedi bei simatakavatem.¹¹Nimadi goi bei siyoisim, govila bei gurewa goi aem isaiko.”’ Same 91:11-12

¹²Go kina Yeisu idigo kana, ‘Geya! Gínina Kimasabainayana idigo kana,
“Yauwe imi Yaubada taabu kovaakakōne.”’ Atukeda 6:16

¹³Totagiwayayana ina vakakona liliudi Yeisu yaina bogina ilukavavedi, ikalave go, inuwonúwana kana, ‘Nava tuta ana toboine baige akaluvila.’

Yeisu ina paisewa italavaite go,da Nasareta siikatae tetelina

¹⁴Yeisu manaa togaga Baloma Kimaasabaina goi ikaluvila ina Galili. Tuwo Tauyana valena inúnuwo ina asa liliudi amo dadavayana goi.¹⁵Galili goi ivanibiníbita go, Diyuu idi kaba tugúguna goi ivaatulúkwana, e tomota liliudi sinove, ina togaga ana káeyana sikamooitamoe.¹⁶Ivanibiníbita ima ina kasa toina Nasareta go, Sabati goi nakae ina sinapu, e ina Diyuu idi kaba tugúguna goi isiu itusobu. Niga itáoya, latuwona Gínina Kimaasabaina ikatuyaivi.¹⁷Tuwo Yaubada ina tokabivalavala Aiseya ina buki nuunumina sivini ikabi ikimalelei. Ikimalelei, Aiseya ina gínina tayamo ilusale, ibabane. Gininayana ikatuyaivi idigo kana,

¹⁸‘Yauwe Balomaina yaigu goi ikaaiyaka unana ikawoigu bei Vala Dedevina toosobudi yaidi goi atalavaite. Ietunegu bei kidi yoowonidiyaidi goi adi talígava be tokebo yaidi adi kidedevina atalavaitedi, bei tokaiyakomou ataligeidi,¹⁹bei Yauweyana ina yabobona ina sowóduwo ana tuta bogina ima atalavaite. Tauna ina kawoiyana pasina Balomaina yaigu goi ikaaiyaka.’ Aiseya 61:1-2

²⁰Bukiyana Yeisu ikatuyaivi ikavava, inunumimnei, buki ana tomatakavata ivini go, itusobu. Itusobu go, tomota madabokiidi aba tugugunayana goi sidumaakavate.²¹E Tauyana ilatuwokoidi idigo kana, ‘Moe Gínina Kimaasabaina konovenove ame tuta bogina imalatomota yau yaigu.’²²Tuwo tomota liliudi Yeisu sikamoitamoe bego Tauyana todedevina be nakae ina livala Yaubada ina kanuwóiya manuna, e pasidi sikainaopa kadi, ‘Go ame Iyosepa natuna ae?’²³Go kina Yeisu idigo kana, ‘Nakona livalakaibala ame bei kolatuwokoigu kami, “Kom tokidedevina, toinim kukidedevinēm. Kaga nakae kanove Kapaneumi goi bogina kuguuinuwe, ameko toinim im kasa goi nakae kuguinūwe.”’²⁴E aiyuwoina idigo kana, ‘Moe nakae bei kodige go, ame alatuuwokoimi konōve: Yaubada ina tokabivalavala toinina ina kasa goi tomota geya siuyaoneyeta.²⁵E ame alivalamoitamo yaimi konōve: Kóbuya badabadaidi Isileli sinaena boi Eliyau ana tuta goi sikaaiyaka. Tala aito be tukówana ainima tayamo goi Yaubada kúwana ikibode, tuwo loga gagaina asa liliudi goi isowóduwo.²⁶Ago Yaubada Eliyau geya ietuneyeta ina kobuyayadi yaidi goi geya, go sem ietune ina kóbuya Totuyoyowo tayamo Saidoni asaina tayamo yoina Sarepita goi bego ivaite.²⁷Aiyuwoina tolepero badabadaidi Isileli sinaena sikaaiyaka boi tokabivalavala Ilaisa ana tuta goi go, geya kada tayaamo kina Yaubada ikimavade geya, go sem Totuyoyowo tayamo yoina Nemani guma Siriya aneta ikimavade.’²⁸Boda liliudi aba tugúguna sinaena Yeisu ina livalayadi sinovedi, gamodi igoyo toina.²⁹Tuwo sitáoya Yeisu siyoisi sibiu asa moetala goi sikaiwoduwe sinave pasésala bego sivatupuwe isou ikámasa.³⁰E kina go Yeisu boda yaidi goi ikiwotawotaidi ina.

Yeisu koroto tayamo ikideedevine tetelina

³¹Yeisu mana tovatotowanayao sisou sina Kapaneumi, moe Galili asaina tayamo goi sisiu. Go Sabati tamo tamo goi tomota ivatuulukoidi.³²Go ina vatulukwanayana pasina boda sikainaopa, kadi, ‘Tauyana mana lovina ivaatulúkwana!’³³Ago da Kapaneumi idi kaba tugúguna goi koroto tayamo ikaaiyaka, dimoni ikiinagove. Tauyana niyana gagaina goi iduduwo idigo kana,³⁴‘Iyaa!Yeisu guma Nasareta, yau guna polava moe geya kom im polava. Manakae? Kuma bei kai kumtulima ae? Kom taum bogina ayagoim. Kom Totumasaba, Yaubada goi kuma.’³⁵Go kina Yeisuyana ilovinae idigo kana, ‘Tuwo! Kumaigāumo be koroto yaina goi kusowōduwo!’ Tuwo dimoniyana koroto ikinagove, tomota matadi goi ilave isou poyapoya go, korotoyana yaina goi isowóduwo ina. Go kina korotoyana geya ivailaita.³⁶Tomota madabokidi sikainaopa, taudiva sidigo kadi, ‘Iyaa! Ame kaga isowóduwo? Tauyana mana lovina be mana togaga dimoni iloviinaedi go, moitamo sisowóduwo!’³⁷Tuwo Tauyana valena inunúnuwo ina asa liliudi dadava amo goi.

Yeisu Pita yaona be tomotaikidedeevinedi tetelina

³⁸E Yeisu itáoya aba tugugunayana goi isowóduwo go, ina Saimoni ina vada goi isiu. Ego Saimoniyana yaona (moe monena sinana) ikatówana gagaina, tuwo tauyana manuna sikawanoi Yeisu yaina bego ikidedevine.³⁹Tuwo ibala ina vavinayana goi isakululu, e ina katówana ilovinae idigo kana, ‘Tauyana kwalāve.’ E mainao atowanayana ikalave. Ikavava, itáoya ina avadi ivaidede.⁴⁰E níyala bogina iisaliu, boda liliudi idi bodao madi vísiya o madi katówana simedi Yeisu yaina. E tamo tamo ibisikonedi, ikidedevinedi.⁴¹E dimoni nakae ilovinaedi, e tomota badabadaidi goi sisowóduwo go, madi podeda kadi, ‘Kom Yaubada Natuna.’ Bogina siyagoi Yeisu moe Guyau, tauna geya itagonedita sibóbwara.

Yeisu itoboine Vala Dedevinaitaalavaite asa liliudi goi tetelina