Read LUK 3

LUK3knf_wbt

Naşibaţi ayil Yowan Nabatŧaar

¹Uwo ţi wal wi Tiber *Ŧeŧar awooŋ ţi uşubal uţënk ŋşubal iñeen na kañeen wi awooŋ naşih najeenkal, kë Ponŧ-*Pilat awo nanŧuŋa i uŧaak wi Yuda, kë *Herod awo nanŧuŋa i uŧaak wi *Galilay, Filip naweek Herod kë awo nanŧuŋa i ŋŧaak ŋi Iture na Trakonitid, kë Liŧaniyaŧ awo nanŧuŋa i uŧaak wi Abilen,²ţi wal wi Anaŧ na Kayif bawooŋ *baţeŋan baweek biki Naşibaţi. Ţi uşubal mënţ *Yowan abuk Ŧakariya awo du *pndiiş, kë Naşibaţi aşë ţiini na a, awula uţup wi nul.³Wi wi aşaaŋ ajun pñaay ţi uŧaak bŧi unñoguŋ bdëk bi Yordan, aji na bañaaŋ: « Nawutan pjuban, naţëlëş ŋbida, nado *batiŧmu, Naşibaţi aşë pënanan ipekadu. »⁴Kë hënk di uko wi *Iŧayi *Naţupar Naşibaţi apiiŧuŋ ţi Ulibra wi Naşibaţi udolaniiŋ, apiiŧ aji :Yowan Nabatŧaar du pndiiş« Pdiim ploŋ pahuuran du pndiiş aji :“Nabomaan bgah bi Ajugun akluŋ kaţëpna,nadolana ilël iŧool!⁵Injiir iluŋ kafukana,inkuŋ iweek na impoţi ifom kaliŋran na igah.Igah inŋotuŋ ikak iŧool.Igah inşëkrëtiiŋ ikak idaaŋ.⁶Hënk, bañaaŋ bŧi baluŋ kawin jibi Naşibaţi abuuranuŋ un.” »

Uko wi pdo, kawutna pjuban

⁷*Yowan aji ji na pnŧuk pweek pi bañaaŋ panjaaŋ pabi ţi a pyeenk *batiŧmu : « An, nawo pntuni pi ŋnfunan! In ahoopaţanaŋ aji naţi udeeb wi Naşibaţi unkmbiiŋ ba?⁸Nadolan keeri iko inkyuujuŋ kë nawut pjuban abot aţëlëş ŋbida ; nawutan kaşal kaji : “Ŋwo biki pşini pi Abraham!” Dţupan : Naşibaţi ahilan kakakan mnlaak mi babuk *Abraham.⁹Ptibi padobi bëkan bëkan ţi mnko uţeeh, bko banwooŋ baankbuk mnko mnuura bafal kafël du bdoo. »¹⁰Pnŧuk pi bañaaŋ pahepara aji : « Kë ŋbaa do do hum ba? »¹¹Kë aŧeem baka aji : « Ankaaŋ imişa itëb, apënan kaloŋ kaţen anwaaŋuŋ. Ankaaŋ uko ude, afaaşiir na anwaaŋuŋ ! »¹²*Bakobraar daaşa baloŋ babi kak pdolan batiŧmu, aşë hepara aji : « Najukan, we wi ŋwooŋ kado? »¹³Kë aji na baka : « Nakhepar kapelan wi baţu'anaŋ pyeenk. »¹⁴Bangoli bahepara kak, aji : « Kë un, we wi ŋwooŋ kado? » Kë aŧeem baka aji : « Nawutan kaŧeh nin ñaaŋ aloŋ itaka na uyoh, këme ţi ŋţilan, naliŋan ţi baluk bi nan. »

Yowan aţiiniyaan ñaaŋ ankluŋ kabi

¹⁵Jibi bañaaŋ bŧi bakyoonkuŋ uko unwooŋ wi pbi aşë şal aji : « Wom *Yowan awooŋ *Kriŧtu? »¹⁶Kë Yowan aşë ţiini na baka bŧi aji : « Nji, dji kabatŧaaran na meel. Kë, anşaaŋ aluŋ kabi aşë dëm apelën maakan, mëndoo ñoom ñoom kaŋup pfënëşa işapaat. Ul akluŋ kabatŧaaran na *Uhaaş wi Naşibaţi na bdoo.¹⁷Awo na kajeţ ţi iñen, aweey kapaţëş ptiij na plëfar. Aya katoor ptiij ţi pnkuŧi, kaşë kafël plëfar du bdoo banwooŋ baankjëmşa. »¹⁸Yowan akak ajukan pnŧuk pi bañaaŋ iko iŧum, ameeţanaan baka *Uţup Ulil Unuura.

Bawat Yowan Nabatŧaar ukalabuş

¹⁹*Herod nanŧuŋa ajej Herodiyana ñaaţ i naweekul akak ado iko iwuţaan iŧum iloŋ kak, ukaaŋ kë *Yowan aŋoman na a.²⁰Kë Herod, abaa beeh beeh ado kak buţaan bloŋ: Awat Yowan ukalabuş!

Batiŧmu bi Yeŧu

²¹Wi bañaaŋ bŧi bakdolanuŋ *batiŧmu, Yeŧu kak ado batiŧmu. Wi awooŋ ţi pñehan Naşibaţi, kë baţi başë haabëşa.²²Wi wi *Uhaaş wi Naşibaţi uşaaŋ awala ţi a, awo wo ji ubalab ufaaŧal. Kë pdiim ploŋ paşë pënna baţi, aji : « Iwi, iwooŋ Abuk naan, dŋalu maakan, dmaganu. »

Pşini pi Yeŧu

²³Yeŧu aka uko ji ŋşubal iñeen ŋwajanţ wi ajunuŋ pjukan bañaaŋ. Ţi uşal wi bañaaŋ bŧi, Yeŧu awo abuk Yoŧef, i Heli,²⁴i Matŧat, i Lewi, i Melki, i Yanayi, i Yoŧef,²⁵i Mataŧiya, i Amoŧ, i Nahum, i Heŧli, i Nagayi,²⁶i Maaŧ, i Mataŧiya, i Ŧemeyin, i Yoŧek, i Yoda,²⁷i Yowanan, i Reŧa, i Ŧerubabel, i Ŧalaŧiyel, i Neri,²⁸i Melki, i Adi, i Koŧam, i Elmadam, i Er,²⁹i Yeŧu, i Eliyeŧer, i Yorim, i Matŧat, i Lewi,³⁰i Ŧimeyoŋ, i Yuda, i Yoŧef, i Yonam, i Eliyakim,³¹i Meleya, i Mena, i Mataŧa, i Naŧan, i Dayiţ,³²i Yeŧe, i Yobed, i Booŧ, i Ŧala, i Naaŧon,³³i Aminadab, i Admin, i Arni, i Heŧrom, i Pereŧ, i Yuda,³⁴i Yakob, i Iŧaak, i Abraham, i Terah, i Nahor,³⁵i Ŧerug, i Ragawu, i Falek, i Eber, i Ŧala,³⁶i Kayinam, i Arfakŧad, i Ŧem, i Nowe, i Lamek,³⁷i Meŧuŧela, i Henok, i Yaret, i Malalalel, i Kayinam,³⁸i Enoŧ, i Ŧeŧ, i Adam, i Naşibaţi.