SAN LUCAS3cta_wbt

Nda Juan cui̱i̱ loꞌo nguꞌ neꞌ quixi̱ꞌ su ná ndiꞌi̱ ñati̱

1Cua ntsuꞌu tiꞌyu̱ yija̱ chaꞌ laca Tiberio emperador nu laca loo jiꞌi̱ ñati̱ tyucui ñaꞌa̱ chalyuu: Poncio Pilato laca loo nde loyuu su cuentya Judea cuentya jiꞌi̱ nu Tiberio biꞌ liꞌ; loꞌo juaꞌa̱ nu naa Herodes biꞌ ni, laca yu loo loyuu su cuentya Galilea tyempo biꞌ; loꞌo Felipe, tyaꞌa ngula Herodes biꞌ, laca yu loo loyuu su cuentya Iturea loꞌo juaꞌa̱ loyuu su cuentya Traconite la cuiꞌ tyempo biꞌ; loꞌo chaca nu naa Lisanias, laca yu loo loyuu su cuentya Abilinia liꞌ.2La cuiꞌ tyempo biꞌ laca Anás loꞌo Caifás xuꞌna sti joꞌó. Liꞌ nda ycuiꞌ Ndyosi chaꞌ loꞌo Juan sñiꞌ Zacarías ca su ndyaꞌa̱ yu neꞌ quixi̱ꞌ,3biꞌ chaꞌ nduꞌu Juan ndyaꞌa̱ yu nde nati̱ꞌ tyucui ñaꞌa̱ toꞌ staꞌa̱ Jordán biꞌ; nchcuiꞌ tsa Juan loꞌo lcaa ñati̱ nu ndyuꞌu tiꞌi̱ slo yu, chaꞌ ca tyujuꞌu tiꞌ nguꞌ jiꞌi̱ quiꞌya nu ntsuꞌu jiꞌi̱ nguꞌ, chaꞌ xtyanu nguꞌ lcaa chaꞌ cuxi biꞌ. Liꞌ ntyucuatya Juan jiꞌi̱ nguꞌ biꞌ. Juaꞌa̱ cuiꞌya ycuiꞌ Ndyosi chaꞌ clyu tiꞌ jiꞌi̱ nguꞌ biꞌ liꞌ, nacui̱ Juan.4Laca chaꞌ biꞌ, ñiꞌya̱ laca chaꞌ nu nguscua jyoꞌo cusuꞌ Isaías nu nda chaꞌ jiꞌi̱ ycuiꞌ Ndyosi loꞌo ñati̱ cua saꞌni la. Ndiꞌya̱ nchcuiꞌ quityi biꞌ:Cui̱i̱ ndañi nxiꞌya sca ñati̱ neꞌ quixi̱ꞌ:“Xaala clya ma̱ sca tyucui̱i̱ su ca̱a̱ ycuiꞌ nu Xuꞌna na”, nacui̱ nu nxiꞌya biꞌ.“Xquiñi tsoꞌo ma̱ tyucui̱i̱ su tyeje tacui ycuiꞌ.5Cuaꞌni chaꞌá̱ ma̱ lcaa laja cuaꞌa̱,juaꞌa̱ cuityi̱ ma̱ lcaa caꞌya, lcaa cuati̱ yuu;cuaꞌni liñi ma̱ lcaa su nxtyiꞌi̱ tyucui̱i̱,juaꞌa̱ cuaꞌni stuꞌba tsoꞌo ma̱ tyucui ñaꞌa̱ tyucui̱i̱”, nacui̱.6“Cua ngulala ti chaꞌ ñaꞌa̱ nguꞌ tyucui ñaꞌa̱ chalyuu, chaꞌ taca cuaꞌni lyaá ycuiꞌ Ndyosi jiꞌi̱ ñati̱.”Juaꞌa̱ nguscua jyoꞌo Isaías lo quityi biꞌ.7Quiñaꞌa̱ ñati̱ ndyalaa su ndu̱ Juan chaꞌ tyucuatya nguꞌ. Liꞌ nchcuiꞌ Juan loꞌo nguꞌ quiñaꞌa̱ biꞌ: ―Ñiꞌya̱ ntiꞌ cuaña tyaala, juaꞌa̱ ntiꞌ cuꞌma̱ ―nacui̱ Juan―. ¿Ha cua nchcutsi̱i̱ nguꞌ jiꞌi̱ ma̱ lacua? ¿Ha juani ndube tiꞌ ma̱ chaꞌ xcubeꞌ ycuiꞌ Ndyosi jiꞌi̱ ma̱ loꞌo tye chalyuu? ―nacui̱―.8Tsoꞌo lacua, culuꞌu ma̱ jiꞌi̱ ya si chañi chaꞌ cua ngulochu̱ꞌ ma̱ chaꞌ cuxi nu ntsuꞌu jiꞌi̱ ma̱; ná ñacui̱ ma̱ chaꞌ sñiꞌ ycuiꞌ Ndyosi laca ma̱, xquiꞌya chaꞌ ndyuꞌu ma̱ jiꞌi̱ jyoꞌo Abraham. Chaꞌ liñi ta naꞌ loꞌo ma̱ ―nacui̱ Juan―, chaꞌ taca jiꞌi̱ ycuiꞌ Ndyosi subi Ni jiꞌi̱ xaꞌ la ñati̱ nu caca sñiꞌ Abraham ñiꞌya̱ laca na juani, masi ntiꞌ ma̱ chaꞌ na ple ti nu xaꞌ la ñati̱ biꞌ, masi ntiꞌ ma̱ chaꞌ ñiꞌya̱ laca quee re, juaꞌa̱ ti laca nguꞌ ―nacui̱ Juan jiꞌi̱ nguꞌ―.9Ñiꞌya̱ ndu̱ sca ñati̱ loꞌo hacha jiꞌi̱ chaꞌ clyaja lo yaca siꞌyu jiꞌi̱ yu, juaꞌa̱ ntiꞌ ycuiꞌ Ndyosi. Siꞌyu yu biꞌ lcaa yaca nu ná nda siꞌyu tsoꞌo, chaꞌ tyaqui̱ yaca biꞌ lo quiiꞌ; juaꞌa̱ xcubeꞌ Ni jiꞌi̱ ñati̱ nu ná ntajaꞌa̱ xtyanu chaꞌ cuxi nu ntsuꞌu jiꞌi̱.10Loꞌo ndye ndyuna nguꞌ chaꞌ biꞌ, liꞌ ndachaꞌ nguꞌ jiꞌi̱ Juan biꞌ: ―¿Ni cña cuaꞌni ya lacua?11Liꞌ nguluꞌu Juan jiꞌi̱ nguꞌ: ―Nde laca cña nu cuaꞌni ma̱ ―nacui̱ Juan―. Si ntsuꞌu tucua tyaꞌa camxa jiꞌi̱ sca ma̱, ta ma̱ tsaca jiꞌi̱ sca ñati̱ tiꞌi nu ná ntsuꞌu jiꞌi̱ tsiyaꞌ ti; si ntsuꞌu na cacu ma̱, liꞌ saꞌbe ma̱ xi chaꞌ ta ma̱ xi cacu ñati̱ nu ná ntsuꞌu tsiyaꞌ ti jiꞌi̱ ―nacui̱ Juan jiꞌi̱ nguꞌ.12Loꞌo juaꞌa̱ ya̱a̱ xi nguꞌ cuxi nu nxñi cñi cña loo nguꞌ cuentya jiꞌi̱ nguꞌ xaꞌ tsuꞌ, ya̱a̱ nguꞌ chaꞌ tyucuatya Juan jiꞌi̱ nguꞌ. Liꞌ nchcuane nguꞌ biꞌ jiꞌi̱ Juan: ―¿Ñiꞌya̱ cña cuaꞌni ya, mstru? ―nacui̱ nguꞌ biꞌ jiꞌi̱ Juan.13―Ná tyeje tacui cuayáꞌ chaꞌ culo ma̱ cñi cña loo nguꞌ ―nacui̱ Juan jiꞌi̱ nguꞌ biꞌ.14Loꞌo xi nguꞌ sendaru ndyalaa chaꞌ cachaꞌ jiꞌi̱ Juan liꞌ: ―Juaꞌa̱ cuare, ¿ñiꞌya̱ cña cuaꞌni ya? ―nacui̱ sendaru biꞌ. ―Ngaꞌaa xlyaá ma̱ na nu ntsuꞌu jiꞌi̱ ñati̱, ni ngaꞌaa xcutsi̱i̱ ma̱ jiꞌi̱ nguꞌ; ngaꞌaa sta ma̱ quiꞌya laja ti jiꞌi̱ nguꞌ, chaꞌ caja chaꞌ biꞌ jiꞌi̱ ma̱. Loꞌo juaꞌa̱, ngaꞌaa ñacui̱ ma̱ chaꞌ xti ti cayaꞌ ndyiji jiꞌi̱ ma̱ ―nacui̱ Juan jiꞌi̱ nguꞌ sendaru biꞌ.15Nclyacua tsa tiꞌ nguꞌ su ndiꞌi̱ ti nguꞌ, chaꞌ ngua tiꞌ nguꞌ chaꞌ Juan laca nu Cristo nu cua ca̱a̱ ti chalyuu.16Liꞌ nchcuiꞌ Juan loꞌo lcaa nguꞌ nu ndiꞌi̱ biꞌ: ―Loꞌo hitya ti ntyucuatya naꞌ jiꞌi̱ ma̱ ―nacui̱ Juan―, pana cua ca̱a̱ ti chaca ñati̱ slo cuꞌma̱ nu nchca la jiꞌi̱ que naꞌ. Loꞌo naꞌ cuaꞌni tlyu naꞌ jiꞌi̱ ñati̱ biꞌ. Tsoꞌo tsa cña ngujui ꞌna ntiꞌ naꞌ, masi caña ntsuꞌu quiyaꞌ ñati̱ biꞌ sati̱ꞌ naꞌ juata. Loꞌo nu ñati̱ biꞌ ni, ná tyucuatya yu jiꞌi̱ nguꞌ loꞌo hitya ti, pana cuaꞌni yu chaꞌ tyanu Xtyiꞌi ycuiꞌ Ndyosi neꞌ cresiya jiꞌi̱ nguꞌ, nu loꞌo tyucuatya yu jiꞌi̱ nguꞌ. Loꞌo liꞌ cuaꞌni lubii Ni jiꞌi̱ nguꞌ biꞌ loꞌo xee jiꞌi̱ Ni, chaꞌ juaꞌa̱ caca tsoꞌo tyiquee nguꞌ ―nacui̱―.17Ñiꞌya̱ nduꞌni xuꞌna ltya, juaꞌa̱ cuaꞌni Ni; ñiꞌya̱ ndyuꞌu coꞌo yu jiꞌi̱ nscuaꞌ pana ndaqui̱ yu cualyaꞌ loꞌo nguti, juaꞌa̱ saꞌbe tyaꞌa Ni jiꞌi̱ ñati̱. Liꞌ suꞌba Ni jiꞌi̱ ñati̱ cuxi chaꞌ tyaqui̱ nguꞌ lo quiiꞌ nu ngaꞌaa ca tyubiꞌ.18Juaꞌa̱ quiñaꞌa̱ tsa cui̱i̱ nda Juan loꞌo ñati̱, nu loꞌo nchcuiꞌ yu loꞌo nguꞌ ñiꞌya̱ laca chaꞌ tsoꞌo nu caca jiꞌi̱ Jesús.19Loꞌo liꞌ ngusta Juan quiꞌya jiꞌi̱ gobernador Herodes chaꞌ nguaana ycuiꞌ nu cusuꞌ biꞌ jiꞌi̱ Herodías clyoꞌo tyaꞌa yu nu naa Felipe. Loꞌo juaꞌa̱ tya ntsuꞌu la xaꞌ chaꞌ cuxi nu nguaꞌni nu cusuꞌ Herodes biꞌ.20Pana ná ndaquiyaꞌ Herodes biꞌ jiꞌi̱ chaꞌ nu nchcuiꞌ Juan loꞌo, masi cuxi la nguaꞌni yu, chaꞌ ngusuꞌba yu jiꞌi̱ Juan neꞌ chcua̱.

Ntyucuatya Juan jiꞌi̱ Jesús

21Nu loꞌo tya lyiji tsaa Juan biꞌ neꞌ chcua̱, tya ndu̱ yu toꞌ staꞌa̱ ntyucuatya yu jiꞌi̱ quiñaꞌa̱ tsa ñati̱, liꞌ ndyalaa Jesús slo chaꞌ tyucuatya Juan jiꞌi̱. Laja loꞌo ntyucuatya yu jiꞌi̱ Jesús, liꞌ nchcuiꞌ Jesús loꞌo ycuiꞌ Ndyosi; ndyaala tyucui̱i̱ ca nde cua̱ liꞌ.22Nguaꞌya Xtyiꞌi ycuiꞌ Ndyosi su ndu̱ Jesús; ñiꞌya̱ nu ndyacui sca tyupeꞌ, juaꞌa̱ nguaꞌya Xtyiꞌi ycuiꞌ Ndyosi lo xlya hique Jesús. Liꞌ nguañi nchcuiꞌ ycuiꞌ Ndyosi nde cua̱: ―Sñiꞌ naꞌ, tsoꞌo tsa ntsuꞌu tyiquee naꞌ ñaꞌa̱ naꞌ jinuꞌu̱. Tyacaꞌa tsa nuꞌu̱ jnaꞌ ―nacui̱ ycuiꞌ Ndyosi jiꞌi̱ Jesús.

Jyoꞌo cusuꞌ jiꞌi̱ Jesucristo

23Calaa tyii yija̱ cua ntsuꞌu Jesús loꞌo nguxana ndyuꞌni yu cña jiꞌi̱ ycuiꞌ Ndyosi Sti yu. Ngua tiꞌ nguꞌ chaꞌ José ngua sti yu,loꞌo sti José biꞌ ngua jyoꞌo Elí;24loꞌo sti Elí biꞌ ngua jyoꞌo Matat;Leví ngua naa sti Matat biꞌ;Melqui ngua naa sti Leví biꞌ;Jana ngua naa sti Melqui biꞌ;loꞌo chaca José ngua sti Jana biꞌ;25Matatías ngua naa sti José biꞌ;Amós ngua naa sti Matatías biꞌ;Nahum ngua naa sti Amós biꞌ;Esli ngua naa sti Nahum biꞌ;Nagai ngua naa sti Esli biꞌ;26Maat ngua naa sti Nagai biꞌ;loꞌo chaca nu naa Matatías ngua sti Maat biꞌ;Semei ngua naa sti Matatías biꞌ;loꞌo chaca nu naa José ngua sti Semei biꞌ;sñiꞌ Judá ngua nu José biꞌ;27Joana ngua naa sti Judá biꞌ;Resa ngua naa sti Joana biꞌ;Zorobabel ngua naa sti Resa biꞌ;Salatiel ngua naa sti Zorobabel biꞌ;Neri ngua naa sti Salatiel biꞌ;28loꞌo chaca nu naa Melqui ngua sti Neri biꞌ;Adi ngua naa sti Melqui biꞌ;Cosam ngua naa sti Adi biꞌ;Elmodam ngua naa sti Cosam biꞌ;Er ngua naa sti Elmodam biꞌ;29Josué ngua naa sti Er biꞌ;Eliezer ngua naa sti Josué biꞌ;Jorim ngua naa sti Eliezer biꞌ;loꞌo chaca Matat ngua sti Jorim biꞌ;30loꞌo chaca nu naa Leví ngua sti Matat biꞌ;Simeón ngua naa sti Leví biꞌ;loꞌo chaca nu naa Judá ngua sti Simeón biꞌ;loꞌo chaca nu naa José ngua sti Judá biꞌ;Jonán ngua naa sti José biꞌ;Eliaquim ngua naa sti Jonán biꞌ;31Melea ngua naa sti Eliaquim biꞌ;Mainán ngua naa sti Melea biꞌ;Matata ngua naa sti Mainán biꞌ;Natán ngua naa sti Matata biꞌ;32David ngua naa sti Natán biꞌ;Isaí ngua naa sti David biꞌ;Obed ngua naa sti Isaí biꞌ;Booz ngua naa sti Obed biꞌ;Salmón ngua naa sti Booz biꞌ;Naasón ngua naa sti Salmón biꞌ;33Aminadab ngua naa sti Naasón biꞌ;Aram ngua naa sti Aminadab biꞌ;Esrom ngua naa sti Aram biꞌ;Fares ngua naa sti Esrom biꞌ;loꞌo chaca nu naa Judá ngua sti Fares biꞌ;34Jacob ngua naa sti Judá biꞌ;Isaac ngua naa sti Jacob biꞌ;Abraham ngua naa sti Isaac biꞌ;loꞌo nu naa Taré ngua sti Abraham biꞌ;Nacor ngua naa sti Taré biꞌ;35Serug ngua naa sti Nacor biꞌ;Ragau ngua naa sti Serug biꞌ;Peleg ngua naa sti Ragau biꞌ;Heber ngua naa sti Peleg biꞌ;Sala ngua naa sti Heber biꞌ;36Cainán ngua naa sti Sala biꞌ;Arfaxad ngua naa sti Cainán biꞌ;Sem ngua naa sti Arfaxad biꞌ;Noé ngua naa sti Sem biꞌ;Lamec ngua naa sti Noé biꞌ;37Matusalén ngua naa sti Lamec biꞌ;Enoc ngua naa sti Matusalén biꞌ;Jared ngua naa sti Enoc biꞌ;Mahalaleel ngua naa sti Jared biꞌ;loꞌo chaca nu naa Cainán ngua sti Mahalaleel biꞌ;38Enós ngua naa sti Cainán biꞌ;Set ngua naa sti Enós biꞌ;Adán ngua naa sti Set biꞌ;loꞌo liñi la ñacui̱ na chaꞌ ycuiꞌ Ndyosi laca sti jyoꞌo Adán biꞌ, chaꞌ ycuiꞌ Ni laca nu cua ngüiñá jiꞌi̱ nu Adán biꞌ.Lcaa nguꞌ nu nscua xtañi lo quityi re ni, ngua nguꞌ jyoꞌo cusuꞌ jiꞌi̱ Jesucristo nde chalyuu.
expand_more
Search