Read LUKE 22

LUKE22gvs_wbt

Yeisu ana nuwotulu ana losinapu tetelina

¹E Beredi Pokaka Aikanina bogina ana kebukebu. Aikayana youyuwoina moe Basitáwana Aikanina.²Tonúwala Gagaidi be Yaubada ina Katukeda ana tovatulukwanayao enao siilusala manakaedi bei Yeisu sikaugau. Bogina koyagoi. Boda simatooitedi. Idi nuwonúwana kadi, ‘Neta boda siyagoi, bei gamodi igoyo, e kaga nakona bei sivekoida?’³E Kaleya ina Yudasa guma Keriota yaina goi isiu. Tauyana Yeisu ina tovatotówana tayamo yawou aiyuwo yaidi go, tuwo yaina Kaleyayana isiu.⁴Yudasayana itáoya, Yeisu mana tovatotowanayao ikalavedi go, ina ilosinapu Tonúwala Gagaidi be Vada Kimaasabaina ana polisi adi tovakumgoyao taiyao manakaena itoboine bei Yeisu inuwotuluye tauyadi yaidi.⁵Yudasa ina livala sinove, ina tagona manuna siuyáwana be nakae sitagona ina nuwotuluyana siemaisi.⁶Tauyana ana maisa ikamoitamoe, tuwo sivini. Sivini ikavava, itáoya ina tuta ana toboine iilusale bei Yeisu inuwotuluye tauyadi yaidi go, geya boda matadi goi geya.

Basitáwana Aikanina be Yeisu ana nuwotulu tetelidi

⁷E Beredi Pokaka Aikanina ana maliyalina bogina ima. Ame maliyalinayana goi Basitáwana Aikanina ana lami itoboinedi sikaumatedi sikasaledi Yaubada yaina.⁸Tuwo Yeisu ina tovatotowanayao adi taiyuwo Pita be Iyoni ilatuwokoidi idigo kana, ‘Ami taiyuwo kōna go, ida Basitáwana Aikanina kokatubayāsi bego takáika.’⁹‘Go nako goi latuwom kakatubayasi?’ tauyadi kaedi.¹⁰‘Konōve! Kōna Yerusalema goi kosīu go, koroto tayamo aba tega maa bwaena iikavale bei ima ivalobodemi.Ava vada goi kogite isiusiu, komi kosabokulīye kosīu,¹¹e toni vada kolatuwōko kami, “Ima tovatulúkwana idigo kana, ‘Im vada sinaena ava dadava kutagone bei magu tovatotowanayao taiyao itoboinema Basitáwana Aikanina kakáika?’”¹²Nakae kolatuwōko go, vada diligaemaina vabodaupa tayamo gagaina dadavina katubaayasina bei ivatulukoimi. Moeko goi ida Basitáwana Aikanina kokatubayāsi’, Tauyana kaena. Ilatuwokoidi ikavava, ietunedi sina.¹³E adi taiyuwokova sitáoya sina go, kaga Yeisu bogina ilatuuwokoidi nakae sibabanedi. Tuwo amoko goi adi Basitáwana Aikanina sikatubayasi. Sikatubayasi ikavava, sikaluvila sima Tauyana yaina goi.¹⁴Tutayana áika ana tuta isowóduwo, Yeisu ina vamoleyanayao yawou aiyuwo taiyao bogina sina situgúguna sikáika.¹⁵Sikakáika go, Yeisu idigo kana, ‘Namliyeta bei guna gedageda ababane go, latuwogu toina Basitáwana Aikanina ame taiyao takaika vata.¹⁶Ame moitamo go, ame alatuuwokoimi konōve: Ame aikayana geya tuwaina bei akakáika ana kadókana ana yagoina toina Yaubada ina kalibúbuna goi imalatomota dókana.’¹⁷Ibóbwara ikavava, oine ma keigaina ikabi, manuna ikauyagu Yaubada yaina. Ikavava, ilatuwokoidi idigo kana, ‘Keiga ame kokābi be komi tamo tamo konīm.¹⁸Moitamo ame tuta konīm go, ame alatuuwokoimi konōve: Tuta ame mlina oineyana geya animnim ana kadókana Yaubada ina kalibúbuna bogina ima.’¹⁹Sinim ikavava, beredi ikabi, manuna ikauyagu Yaubada yaina. Ikavava, ikivisi, ina tovatotowanayao ivinidi idigo kana, ‘Moe wowogu nakae aakasale komi manumi. Moe tuta liliuna kokakāika bei konuwokaavategu.’²⁰Sikáika ikavava, oine ma keigaina nakae ikabi, manuna ikauyagu Yaubada yaina. Ikavava, keigayana ina tovatotowanayao ivinidi sinim go, idigo kana, ‘Moe oine ma keigainayana konimnim moe ikaikaigu nakae bei idaudau komi manumi. Ikaikayana goi Yaubada ina kanasiuna vau iguinuwe yaimi.²¹Go konovēgu. Guna tonuwotulu teboro ame goi ikaaiyaka mada kabivekoveko ikakáika yau taiyao.²²Moitamo. Tomalatomota inonoina nakae Yaubada ina nuwonúwana go, ana tonuwotuluyana ana toovalugo!’²³Tuwo ina tovatotowanayaoyadi sivatowo aditava silumadádana kadi, ‘Avatau nakona goyo ame bei iguinuwe?’²⁴E ina tovatotowanayaoyadi taudiva nakae sikaumakimaki bego avatau yaidi goi toolagaina.²⁵E Yeisu kana, ‘Totuyoyowo adi tolovinayao siilovina yaidi goi. Tauyadi maadi lovina Totuyoyowo yaidi goi toinidi siduduwedi tokaiguyau.²⁶E komi geya moe nakae geya, go sem avatauwa yaimi goi bego toolagaidi, tauyadi itoboinedi simalagómana. Nakae avatauwa komi yaimi bego imi tolovinayao, tauyadi itoboinedi komi ami tovaitayao nakae silovina.²⁷Guna nuwonúwana ataligei. Avatau toolagaina, tauyana tokáika gea tokaikayana ana tovaita ivaaideda? Tauyana tokáika ae? Go yau yaimi goi akaaiyaka ami tovaita tayamo nakae.²⁸E komi guna kaloyao guna mouyadi goi bogina kotáoya yau taiyao.²⁹Tuwo Tamagu bogina ivayokoigu yau Tokalibúbuna, e yau nakae avayokoimi komi tokalibúbuna yau taiyao.³⁰Moe bego guna kalibúbuna ana teboro goi kokáika be konim. Go kébana esaaesaidi goi kotulagalaga Isileli tubunao adi dala yawou aiyuwo bei kokalibubudi.’³¹Yeisu Pita ilatuwoko idigo kana, ‘Saimoni, Saimoni, kunōve. Kaleya bogina ikawanoi Yaubada yaina goi bego ivakakonemi nakae tobágula neta ina witi bego ikausapisapi. Kaleyayana latuwona igite avatauwa yaimi nukotomi iyoi yau manugu. E Kaleyayana kina Yaubada bogina itagone.³²Go yau bogina akawanoi kom manum bego im numisa goi geya kukapusita. Ago tutayana kwaluvilamna kuma yau yaigu, e semowo kukitogagēdi.’³³‘Tomoya, bogina apásima neta deri goi sivaisium, yau taiyao o neta sikaumatem, yau taiyao’, Pita kaena.³⁴‘Pita ame alatuuwokoim kunōve: Ame bei kamkam geya itaiyeta ana kadókana sivato bei kulawoiwoiyekoigu bego geya kuyagoiguta’, Yeisu kaena.³⁵Go madabokidi ilatuwokoidi idigo kana, ‘Boi tutayana nima kaka aetunemi, komi mani saisairina geya, wasare geya, sendoro aiyuwoina geya go, geya tayaamo kaga kokiseyeseye ae?’ ‘Geya tayaamo kaga’, tauyadi kaedi.³⁶Tauyana idigo kana, ‘Go ame tuta alatuwokoimi avatauwa komi neta mami mani saisairina, kokabīdi konavēdi. Avatauwa komi neta mami wasare, nakae. Ago avatauwa komi neta geya imi sisimo, ami kwama kokaigimonēdi go, maisana kokābi imi sisi kogimonēdi unana tomota bei sivakaleyeda.³⁷Moitamo. Ame alatuuwokoimi konōve: Gínina Kimaasabaina nakae italavaite Tomalatomota manuna kana,
“Tauyana sikatuyaivi lovina ana tokapipilova taiyao.” Aiseya 53:12
Ame livalayadi bei simalatomota yau yaigu. Ame moitamo. Kaga kaga boi manugu siiginidi, e nakae bei simalatomota yau yaigu.’³⁸‘Tomoya, kunōve. Sisi aiyuwo goamedi’, tauyadi kaedi. ‘Moe tuwo!’ kina kaena.

Yeisu ina kawanoiOrebi Koyaina goi be ana yóita tetelidi

³⁹Niga Yeisu mana tovatotowanayao sisowóduwo sina go, ina sinapu nakae sinonoina Oribe Koyaina goi.⁴⁰E sisowóduwo amoko goi, Yeisu idigo kana, ‘Ameko kokawanōi Yaubada yaina bei ivaitemi aba vakakona goi geya kokapusita.’⁴¹Ibóbwara ikavava, ibala ina itumasaba aena ivatugúyala ikawanoi⁴²idigo kana, ‘Tamagu, neta nuwom nakae, gedageda keigaina ame kukābi kunāve. Go yau geya guna nuwonúwana geya, go sem kom im nuwonúwana kuguinūwe.’ [⁴³E anerose yábana goi isowóduwo ima, Yeisuyana ikitogage.]⁴⁴Tauyana atena igeda gagaina, tauna ikawanoi makimaki. Ina kawanoiyana goi ina mosali ikaika nakae itakapusi isou poyapoya goi.⁴⁵Ikawanoi ikavava, itáoya ikaluvila ima ina tovatotowanayaoyadi ibabanedi idi nuwomou pasina sikanaamatáiya.⁴⁶Tuwo, iwoinidi idigo kana, ‘Manakae kokanaamatáiya? Kotāoya be kokawanōi Yaubada yaina bei ivaitemi aba vakakona goi geya kokapusita.’⁴⁷Tauyana nava ibobóbwara go, boda sima. Koroto yoina Yudasa, tauyana tovatotówana tayamo yawou aiyuwo yaidi goi, bodayadi ivakededi. Sima go, kina Yudasayana ibala ima bego Yeisu iyowoi.⁴⁸E kina go Yeisuyana idigo kana, ‘Yudasa, manakae? Bego im yowóina goi Tomalatomota kunuwotuluye ae?’⁴⁹E ina tovatotowanayaoyadi sigite kaga bei isowóduwo, tuwo sidigo kadi, ‘Tomoya, manakae? Sisi goi katalaidi gea tuwo?’⁵⁰Ago Yeisu ina tovatotówana tayamo ibala ina Tonúwala Toolagaina ina pákwana taiyana kakataina ivakanáupe.⁵¹Go kina Yeisuyana idigo kana, ‘Tuwo! Koyāto!’ Ibisibala pakoninayana taiyana ibisikone, ikidedevine.⁵²E Tonúwala Gagaidi be Vada Kimaasabaina ana polisi adi tovakumgo be Diyuu ina tomoyamoya nakae sima Yeisu siiyoisi go, ilatuwokoidi idigo kana, ‘Manakae? Yau bego tokapipilova tayamo, tauna komi mami sisi be mami kepati koma koyoisigu?⁵³Maliyalina tamo tamo Vada Kimaasabaina goi akaaiyaka yaimi goi go, geya koyoisiguta unana moe geya imi tuta geya, go sem ame komi imi tuta, tutayana mamaníwana ina togaga iilovina.’⁵⁴E bodayadi Yeisu siyoisi, sinave Tonúwala Toolagaina ina vada goi.

Pita ina lawoiwoi tetelina

⁵⁴E kina go Pitayana tupwana masigava goi Yeisu isabookuliye.⁵⁵E tomota maniyedi Tonúwala Tolagainayana ina vada ana kali sinaena goi yeu sidimili. Ikavava, taiyao siitusobu go, Pita isiu tomotayadi yaidi goi iitusobu.⁵⁶E Tonúwala Tolagainayana ina pákwana woiyaina tayamo yeu ana mavada goi iitusobu Pita ipotepote, idigo kana, ‘Ame tauyana nakae Yeisu ina tosabokuli tayamo.’⁵⁷‘Vavina, amo Tauyana geya ayagoiyeta!’ Pita mana lawoiwoi kaena.⁵⁸Tuta giyaina koroto tayamo Pita igite idigo kana, ‘Kom nakae Yeisu ina boda tayamo.’ ‘Naveya, yau geya!’ Pita kaena.⁵⁹Awa tayamo nakae mlina ituli ta koroto ikaugeogéona idigo kana, ‘Ame tauyana woi Yeisu ina tosabokuli tayamo. Moitamo. Tauyana nakae guma Galili.’⁶⁰Go kina Pitayana idigo kana, ‘Naveya, kaga kudigedige geya ayagoiyeta.’ Go nava ibobóbwara go, mainao kamkam itáiya.⁶¹Tuwo Tomoya itugavila Pita ipote go, kina Pitayana inuwopeye boi Tomoyayana ina livala idigo kana, ‘Namliyeta bei kamkam itáiya, e kom bogina bei sivato kulawoiwoiyekoigu.’⁶²Tuwo vadayana ina kali goi isowóduwo ina moetala goi itáiya gagaina toina.

Yeisu ana kaiwoteta tetelina

⁶³Kidi go Vada Kimaasabaina ana polisi Yeisu siyause go, sikaiwotete ame nakae:⁶⁴Matana sisikobode namliyeta siláui go, silumadade kadi, ‘Kom bego Yaubada ina tokabivalavala, tuwo kulatuwokōima avatau ilauim!’⁶⁵Ago idi bóbwara goyogoyoidi badabadaidi goi Yeisu sitaagiwoi.

Yeisu ana kotu Diyuuidi tomoyamoya matadi goi tetelina

⁶⁶Tutayana vanuwo itomo, Diyuu idi tomoyamoya, moe Tonúwala Gagaidi be nakae Yaubada ina Katukeda ana tovatulukwanayao siitugúguna go, Yeisu sime idi kotu goi silumadade⁶⁷sidigo kadi, ‘Neta kom moitamo Guyau, kulatuwokōima!’ Go Yeisu idigo kana, ‘Neta alatuwokoimi, bei geya konumiseguta.⁶⁸Neta alumadademi bego yau Guyau, bei geya kokatumapuguta.⁶⁹E tuta imamaima Tomalatomota bei mana lovina wowoina basekoina Yaubada Tokalika kakataina goi iitusobu.’⁷⁰E madabokidi sidigo kadi, ‘Tauna kom moitamo Yaubada Natuna?’ ‘Komi bogina kodigoyabe’, Tauyana kaena.⁷¹‘Kaga ana dedevina totalavaita tuwaina taalusale? Geya! Moitamo. Ina digopopóita toinina sopana goi bogina tanove’, tauyadi kaedi.