Read Luku 22

Luku22bqc_sim

Lɛkpaaĩa Yesuzi

¹Kàaso dikpɛ pↄ́ wì mɛ Gɛ̃amusukà kãi.²Sa'onkiaↄ ń Mↄizi ikoyãdanɛdeↄ lɛ́ wɛɛlɛ lá aa kɛ aa Yesu bↄlia asii guu, asa aalɛ vĩakɛ gbɛ̃́ↄnɛɛ.³Ɔ̃ Setãu dì Yudasi pↄ́ wì mɛ Isaliↄti miwa. Yesu ìwa gbɛ̃ↄn kuɛplaↄ doɛ.⁴Ɔ̃ Yudasipi gɛ̀ lɛkpàaĩ ń sa'onkiaↄ ń Lua ua dↄ̃̀anaↄ gbɛ̃zↄ̃ↄↄ, lá á kɛ à Yesu kpámá.⁵An pↄ kɛ̀na, ↄ̃ aa lɛdoũkɛ̀ wà ↄ̃a kpawà.⁶À zɛ̀ò, ↄ̃ àlɛ zɛwɛɛlɛ à Yesu kpámá gbɛ̃́ↄ saɛ.

Gɛ̃amusu blɛblea

⁷Kàaso dikpɛgↄↄ kà, gↄↄ pↄ́ wì Gɛ̃amusu sã kòlokpa.⁸Ɔ̃ Yesu Piɛɛ ń Zãao gbàɛ à mɛ̀: À gɛ́ Gɛ̃amusu blɛ sↄukɛiwɛ̃ɛ.⁹Ɔ̃ aa aà là aa mɛ̀: Ń ye wà kɛ má ni?¹⁰Ɔ̃ a wèmá à mɛ̀: Tó a gɛ̃ wɛ̃́lɛdau, á kpaaũ ń gↄ̃ɛo í sɛa lo guu. Àↄ tɛaàzi e ua pↄ́ a gɛ̃u,¹¹í o uabeleɛ, Mɛtulu lɛ́ gu pↄ́ a Gɛ̃amusu blɛ bleu ń a ìwaↄ gbɛa.¹²A kpɛdiakↄ̃a kpɛa zↄ̃ↄ pↄ́ wa kɛ̀kɛ ↄlↄɛ́, í pↄblea yã́ kɛkɛ we.¹³Kɛ́ aa gɛ̀, aa è lá Yesu ònɛ́wa, ↄ̃ aa Gɛ̃amusu blɛ sↄukɛ̀ we.¹⁴Kɛ́ a gↄↄ kà, Yesu mↄ̀ zↄ̃̀lɛ we ń a zĩnaↄ sãnu.¹⁵Ɔ̃ a ònɛ́: Gɛ̃amusu blɛɛ bee bleaánↄ ni ma dɛ maamaa e màↄ gɛ́ taasikɛi,¹⁶asa málɛ oɛ́, má ble lↄo e kpala pↄ́ bↄ̀ Lua kĩ́i gɛ bↄò gupuau, dikpɛ sĩana i mↄ́.¹⁷Kɛ́ à imibↄ sɛ̀, à sáaukpà, ↄ̃ à mɛ̀: À si dↄdↄkↄ̃ɛ,¹⁸asa málɛ oɛ́, za tia má vɛ̃ɛbɛ'i mi lↄo e kpala pↄ́ bↄ̀ Lua kĩ́i gɛ bↄò gupuau.¹⁹Kɛ́ à kàa sɛ̀, ↄ̃ à sáaukpà a ɛ kpàmá à mɛ̀: Kɛ́ beeá ma mɛ pↄ́ málɛ kpá á yã́iɛ. Àliↄ bee kɛ ma yã́ dↄaágu yã́i.²⁰Kɛ́ aa pↄblè aa làa, à imibↄpi sɛ̀ màa lↄ à mɛ̀: Íɛ beeá ma au pↄ́ lɛ́ bↄlɛɛ́ɛ. Lua bàa kua ń gbɛ̃́ↄ tia auɛ.²¹Ma ↄ ku ta doũ ń ma bↄnkpɛdeoɛ,²²asa Gbɛ̃nazĩn Nɛ́ a kpagui lá Lua dìlɛɛwaɛ. Waiyoo gbɛ̃́ pↄ́ a aà kpámápi.²³Ɔ̃ aa nà kↄ̃ lalaawa aa mɛ̀: Wá démɛ a yã́ bee kɛi?

Yesu lɛdaa a ìwaↄwa

²⁴Ɔ̃ lɛkpaa fɛ̀lɛ ń guu, kɛ́ aa ye dↄ̃ ń gbɛ̃́ pↄ́ dɛńla.²⁵Ɔ̃ Yesu ònɛ́: Bùsu kíaↄ ì ikokɛmá mɛ́ gbãadeↄ ì ńzĩa tↄbↄ,²⁶ãma ásu kɛ màao. À kũ̀ á gbɛ̃zↄ̃ↄ aàↄ dɛ gbɛ̃́ pↄ́ kɛ̃́sãaázi ũɛ. À kũ̀ á dↄaana aàↄ dɛ á zĩkɛna ũɛ.²⁷Blɛblena ń blɛzĩkɛnao, an démɛ zↄ̃ↄi? Blɛblena nolo? Mapi sↄ̃ má kú á guu lán gbɛ̃́ pↄ́ lɛ́ zĩkɛɛ́wa.²⁸Gbɛ̃́ pↄ́ zɛ̀manↄ ma taasikɛa guuↄn á ũ.²⁹Lá ma Mae ma kpa kpalau, má á kpá kpalau màa sↄ̃,³⁰í blɛblemanↄ ma kpalau, íↄ zↄ̃lɛzↄ̃lɛa báawa àↄ yã́kpalɛkɛ ń Isaili bui kuɛplaↄ.³¹Simↄↄ, Simↄↄ, ma. Setãu gbɛ̀a à á ká íu lá wì pↄ́wɛna ká íu wà gwawa.³²Ɔ̃ ma wabikɛ̀nɛ, kɛ́ ma náai pↄ́ ń vĩ su kɛ̃́sãmao. Tó n ɛa n sua, ǹ n gbɛ̃́ↄ gba gbãa.³³Piɛɛ òɛ̀: Dii, má sì wà ma dakpɛunnↄ, mí gannↄ.³⁴Yesu mɛ̀: Piɛɛ, málɛ onɛ, e ko àↄ gɛ́ lɛzui gbã, ńyↄ̃ lelekpa ma dↄ̃ai gɛ̃n àaↄ̃.³⁵Ɔ̃ à ń lá à mɛ̀: Kɛ́ ma á zĩ́ mↄkpɛ ń babalabↄↄo ń kyaleↄ sai,pↄe kɛ̃̀sãwáe? Ɔ̃ aa mɛ̀: Aawo.³⁶Ɔ̃ a ònɛ́: Tiasa gbɛ̃́ pↄ́ mↄkpɛ vĩ, aà sɛ́. Màaɛ lↄ ń babalabↄↄo. Gbɛ̃́ pↄ́ fɛ̃nda vĩ sↄ̃o, aà a ula yía, i lú.³⁷Málɛ oɛ́, sema yã́ pↄ́ kɛ̃a Luayãtaalau ma musu papa wà mɛ̀: Wà aà dìlɛ doũ ń dàakɛnaↄ.Asa yã́ pↄ́ wa kɛ̃̀ ma yã́ musu mɛ́ lɛ́ papa sa.³⁸Aa mɛ̀: Dii, fɛ̃nda mɛ̀n pla kɛ. Ɔ̃ a ònɛ́: Bee mↄ̀.

Yesu kũa

³⁹Yesu bↄ̀ gɛ̀ Kùkpɛ sĩ̀sĩpↄlɛu lá ì kɛwa. Aà ìwaↄ tɛaàzi.⁴⁰Kɛ́ à kà gu pↄ́ àlɛ gɛ́u, a ònɛ́: À wabikɛ kɛ́ ásu fu yↄ̃awao yã́i.⁴¹Ɔ̃ à kɛ̃̀má à kà lán gbɛzu lɛ́lɛa taawa. Ɔ̃ à kùlɛ we, àlɛ wabikɛ⁴²à mɛ̀: Baa, tó ń yei, to taasi kɛɛonaɛ bee zãkũmanↄ, ãma asu kɛ ma pↄeã ũo, sema n pↄ́.⁴³Ɔ̃ malaika bↄ̀ luabɛ à mↄ̀wà à aà gbà gbãa.⁴⁴Kua wɛ́tɛ̃a guu àlɛ wabikɛ ń ãiao. Ɔ̃ aà isima lɛ́ tↄ̃́ tↄↄlɛ lán autonawa.⁴⁵Kɛ́ à wabikɛ̀, à fɛ̀lɛ gɛ̀ a ìwaↄ kĩ́i, à ń lé, aalɛ i'o ń pↄsiao.⁴⁶Ɔ̃ a ònɛ́: Àkɛa álɛ i'oi? À fɛlɛ wabikɛ, kɛ́ ásu fu yↄ̃awao yã́i.⁴⁷Kɛ́ àlɛ yã'o, ↄ̃ wà kà dasidasi. Gbɛ̃́ pↄ́ wì mɛ Yudasi, aà ìwa gbɛ̃ↄn kuɛplaↄ do mɛ́ dↄaaanɛ́. Kɛ́ à sↄ̃̀aàzi lɛ́pɛiwà,⁴⁸ↄ̃ Yesu òɛ̀: Yudasi, lɛ́pɛaa guu ↄ̃ ńyↄ̃ Gbɛ̃nazĩn Nɛ́ kpaomáa?⁴⁹Kɛ́ gbɛ̃́ pↄ́ aa kú ń Yesuoↄ yã́ pↄ́ lɛ́ mↄ́ è, aa mɛ̀: Dii, wà ń gbɛ̃gbɛ̃ ń fɛ̃ndao yã̀?⁵⁰Ɔ̃ an gbɛ̃do sa'onkia zĩkɛna lɛ̀ à aà ↄplaa swã́ gò.⁵¹Ɔ̃ Yesu mɛ̀: À bee tó. À ↄkã̀ aà swã́wa à aà gbã̀gbã.⁵²Ɔ̃ a ò sa'onkiaↄ ń Lua ua dↄ̃̀anaↄ ń gbɛ̃zↄ̃ↄ pↄ́ aa mↄ̀waↄnɛ: A mↄa ń fɛ̃ndaↄ ń goↄ lán kpã́iwɛliwɛn ma ũwaa?⁵³Lá gu lɛ́ dↄ miↄ kúánↄ Lua ua,mɛ́ i ↄkãao. Ãma gↄↄɛ bee dɛ á pↄ́ ũɛ, gusia kiblegↄↄɛ.

Piɛɛ lelekpaa Yesuzi

⁵⁴Kɛ́ aa Yesu kũ̀ sùò, aa gɛ̀aànↄ sa'onkia bɛ. Piɛɛ bɛ zã̀zã.⁵⁵Kɛ́ wà tɛkà ua guo, wà kàlɛ lìai, ↄ̃ Piɛɛ mↄ̀ sↄ̀lↄ ń guu.⁵⁶Nↄɛ zĩkɛnae aà è, ↄ̃ à wɛbìiwà à mɛ̀: Gbɛ̃́ɛ bee kuaànↄ sↄ̃ɛ.⁵⁷Ɔ̃ à lelekpà à mɛ̀: Nↄɛ, má aà dↄ̃o.⁵⁸Yↄↄnnↄ gↄ̃̀ↄ ↄ̃ gbɛ̃pãle aà è, ↄ̃ à mɛ̀: Mpi sↄ̃ ń dɛ an gbɛ̃do ũɛ. Ɔ̃ Piɛɛ ò gↄ̃ɛpiɛ: Mámɛo.⁵⁹Kɛ́ lɛɛlu do taa gɛ̃̀, gbɛ̃pãle giiyèwà à mɛ̀: Sĩana guu gbɛ̃́ɛ bee kuaànↄɛ, asa Galile gbɛ̃́ɛ.⁶⁰Ɔ̃ Piɛɛ mɛ̀: Mi dↄ̃ lá ńlɛ oo. Wegↄ̃ↄ kɛ́ àlɛ yã'o, ↄ̃ ko lɛzù.⁶¹Kɛ́ Dii lìli wɛpɛ̀ Piɛɛwa, ↄ̃ yã́ pↄ́ a ò dↄ̀ Piɛɛgu, kɛ́ à mɛ̀ e ko àↄ gɛ́ lɛzui gbã, a lelekpaazi gɛ̃n àaↄ̃.⁶²Ɔ̃ Piɛɛ bↄ̀ bàasi, à ↄ́ↄlↄ̀ à kɛ̀ wɛ̃na.⁶³Gbɛ̃́ pↄ́ aalɛ Yesu dↄ̃́aↄ aà kɛ̀ pↄ́ↄpↄↄ aa aà gbɛ̃̀.⁶⁴Aa pↄ́ yèɛ̀ a wɛ́wa, ↄ̃ aalɛ aà lala aa mɛ̀: Ãnabikɛkɛ ǹ o, démɛ n lɛi?⁶⁵Dↄ́ɛaaànↄ guu aa yã́ dasi pãleↄ òɛ̀ lↄ.⁶⁶Kɛ́ gu dↄ̀, Yuda gbɛ̃zↄ̃ↄↄ kↄ̃ kã̀aa, sa'onkiaↄ ń Mↄizi ikoyãdanɛdeↄ píi. Ɔ̃ aa Yesu sɛ̀ gɛ̀ò ń yã́kpalɛkɛkĩi.⁶⁷Ɔ̃ aa aà là aa mɛ̀: Mɛsiin n ũa? Owɛ̃ɛ. A wèmá à mɛ̀: Tó má òɛ́, á sio.⁶⁸Tó ma yãe làwá sↄ̃, á weo.⁶⁹Za tia Gbɛ̃nazĩn Nɛ́ aↄ zↄ̃lɛa Lua gbãade ↄplaai.⁷⁰Ɔ̃ gbɛ̃́pii mɛ̀: Asi Lua Nɛ́n n ũa? Ɔ̃ a wèmá à mɛ̀: Lá a dↄ á lɛ́uwa, mámɛ má aà ũ.⁷¹Ɔ̃ aa mɛ̀: Wá bàa ũma ń seeladeo lↄi? Wá mà aà lɛ́u kↄ̀.

Luku 22 / bqc_sim

Lɛkpaaĩa Yesuzi

Gɛ̃amusu blɛblea

Yesu lɛdaa a ìwaↄwa

Yesu kũa

Piɛɛ lelekpaa Yesuzi

Luku22bqc_sim