Luka19rif_lti
Yasuɛ d Zakkayu
1Umi yudef Yasuɛ ɣar Ariḥa, icuq tendint nni,2tuɣa din ijj n weryaz qqaren as Zakkayu. Wanita tuɣa d bab n wagřa uřa d ameqqran n ayt n ḍḍariba.3Netta tuɣa yarezzu ad iẓar Yasuɛ d min iɛna, maca war izemmar s ssibbet n řɣaci, minzi tuɣa Zakkayu d aquḍaḍ n tiddi.4S uyenni izwar i Yasuɛ uca igeɛɛed x ijj n wartu n řexřa, ḥima ad t iẓar, minzi tuɣa Netta igga ad dd-yekk ssenni.5Umi dd-yusa Yasuɛ ɣar wemcan nni, ixzar ɣar ujenna, ibarq i-t. Inna as: “A Zakkayu, qeǧeq-dd, hwa-dd deɣya, minzi ass-a ittxeṣṣa ayi ad qqimeɣ di taddart nnec!”6Iqeǧeq-dd, ihwa-dd deɣya uca yareḥḥeb zzayes s řefraḥet.7Marra inni iẓrin man aya, bdan ttmeɛmiɛen xas, nnan: “Aqa yudef ɣar ijj n weryaz d amednub, ḥima ad ɣares iqqim!”8Ikkar Zakkayu, inna i Yasuɛ: “Xzar, Sidi, ad wceɣ azyen n wagřa inu i imezřaḍ u marra wenni zi kkseɣ ca n řḥajjet s řɣecc, ad as t arreɣ arebɛa n tseqqar!”9Inna as Yasuɛ: “Ass-a tiweḍ-dd Tudart i taddart-a, minzi uřa d wa d ijj n mmis n Ibrahim.10Minzi Mmis n bnadem yusa-dd ḥima ad yarzu u ad issenjem min iweddaren.”Amedya n ɛecra n řwuznat11Umi tuɣa ttesřan aya, yarni-dd ɛawed ijj n umedya, minzi ittɣiř asen, umi tuɣa dd-iqarreb ɣar Urcalim, aqa Tageldit n AREBBI ad dd-teḍhar deɣya.12Inna: “Ijj n bnadem zi řejwad iruḥ ɣar ict n temmurt tiggʷej, ḥima ad iṭṭef tagelda i yixef nnes, uca xenni ad dd-idweř awarni man aya.13Iřaɣa-dd i ɛecra n imsexxaren nnes uca iwca asen ɛecra n řminat uca inna asen: ‘Ggem ttijara ař dd ɣa ɛeqbeɣ’.14Maca imezdaɣ n tendint tuɣa carrhen t uca ssekken awarni as ireqqasen, nnan: ‘War nexs wanita ad yiři d ajeǧid xaneɣ!’15Umi dd-iɛqeb awarni řami d iksi tagelda, yumur maḥend ad řaɣan i imsexxaren nni umi iwca nnuqart, ḥima ad issen arbeḥ i dd-yiwi kuř ijjen di tsebbabt nnes.16Yusa-dd umezwar, inna: ‘A sidi, řmina nnec tiwi-dd ɛecra řminat’.17Inna as: ‘Mliḥ cek, a amsexxar aṣebḥan, minzi tuɣa cek d amtiqqi x drus, ad tiřid d azeǧif x ɛecra n tneddam.’18Yusa-dd wenni wiss tnayen, inna: ‘A sidi, řmina nnec tiwi-dd xemsa řminat.’19Inna i wanita ɛawed: ‘Uřa d cek ad tiřid d azeǧif x xemsa n tneddam!’20Xenni yusa-dd wenneɣni, inna: ‘A sidi, xzar řmina nnec i tuɣa xemmřeɣ deg ijj n zzif n řeqṭen.21Minzi ggʷedeɣ zzayek, minzi cek d ijj n bnadem tqesḥed. Cek tkessid min war tessrusid u tmejjared min war tzarɛed!’22Inna as: ‘S uqemmum nnec ad xak carrɛeɣ, a amsexxar aɛeffan! Tessned belli necc d bnadem iqseḥ, kessiɣ min war ssrusiɣ, mejjareɣ min war zarɛeɣ.23Mayemmi war tessarsed ttmenyat n nnuqart inu di řbanku? Xenni xmi dd ɣa yaseɣ, ad tent ksiɣ s lfayda.’24Inna i yinni din ibedden akides: ‘Ksim xas řmina nnes, wcem tt i wenni ɣar iǧa ɛecra n řminat.’”25Nnan as: ‘A Siditneɣ, aqa ɣares ɛecra n řminat ɛad?”26“Netta inna asen: ‘Ad awem iniɣ, belli marra wenni ɣar iǧa, ad as immewc, maca wenni war ɣar iǧi, ad as ittwakkes ɛad uřa d min ɣares.27Maca řɛedyan inu inni war ixsen ad xasen dewřeɣ d ajeǧid, awyem ten-dd danita uca ɣarṣem asen zzati.’”
Adaf n Yasuɛ ɣar Urcalim28Awarni řami inna Yasuɛ man aya, izwar asen uca igeɛɛed ɣar Urcalim.29Ařami dd-iqarreb ɣar Bayt-Faji d Bayt-Ɛanya ɣar uɣezdis n wedrar umi qqaren ‘Taddart n Zzitun’, issekk tnayen n imeḥḍaren nnes,30inna asen: “Ruḥem ɣar dcar i iǧan ɣar zzat nwem. Xzar, xmi din i ɣa tadfem, ad tafem ijj n wesnus iqqen, war xas inyi uřa d ijj n bnadem ɛad. Fesyem as uca awyem t-i-dd da.31Mařa isseqsa kenniw ca n ijjen: ‘Mayemmi d as tfesyem?’, ad as tinim ammu: ‘Aqa Siditneɣ iḥwaj i-t!’”32Inni dd-ittwassekken ruḥen uca ufin t am mammec d asen inna.33Ařami d fesyen i wesnus, sseqsan ten aytbab nnes: “Mayemmi tfessyem i wesnus?”34Nnan asen: “Aqa Siditneɣ iḥwaj i-t!”35Usin-dd zzayes ɣar Yasuɛ, nḍaren arruḍ nsen x wesnus, ssenyen Yasuɛ xas.36Am tuɣa iggur, ssun nitni abrid s warruḍ nsen.37Umi dd-iqarreb ɣar teysart n wedrar n ‘Taddart n Zzitun’, ibda řɣaci n imeḥḍaren marra ad farḥen, ttsebbaḥen AREBBI s ict n tmijja tejhed aṭṭas x ssibbet n lmuɛjizat timeqqranin nni tuɣa ẓrin.38Nitni nnan:
“Lbaraka i Ujeǧid i dd-yusin s Yisem n SIDI! Řehna deg ujenna d uɛuǧi di řuɛřa x řuɛřa qaɛ!”39Maca ca n Ifarisiyyen jar řɣaci nnan as: “A Amseřmad inu, webbex imeḥḍaren nnec!”40Inna asen: “Ad awem iniɣ, mařa sqaren ina, xenni ad řaɣan yeẓra.”41Ařami dd-iqarreb uca iẓra tandint, iru xas,42inna: “Mři tfehmed min d am dd ɣa yawyen řehna nnem, ɛad deg wass-a nnem! Maca řexxu aqa man aya inuffar x tiṭṭawin nnem.43Aqa ad ɣarem dd-asen wussan i d am dd ɣa quwwaren řɛedyan nnem u ad cem ḥṣaren zi marra iɣezdisen.44Ad cem areddǧen, cem d tarwa nnem akidem, war dayem ttejjin aẓru ibedd x weẓru nneɣni, minzi war teftined i řweqt n warzef n Arebbi ɣarem.”
Asizdeg n Zzawect Tameqqrant45Umi yudef ɣar Zzawect Tameqqrant, ibda issuffuɣ inni i tuɣa issaɣen u izznuzan dayes.46Inna asen: “Aqa tura: ‘Taddart inu d Taddart n tẓaǧit!’, maca kenniw tarrim tt d ijj n ifri n iceffaren!”47Tuɣa isseřmad marra ussan di Zzawect Tameqqrant, maca imeqqranen n ikehhanen d imseřmaden n idlisen d imɣaren n řgens tuɣa arezzun ḥima ad t nɣen.48Maca war ufin min xas ɣa ggen, minzi marra iwdan tuɣa řeṣqen dayes, ttesřan ɣares.