1Mil Iesu asaaiti xan no tsi asasing taman totore puapua ngali asen sin di, ngali di na tigiri sausawit ma di na xap pelmet.2Ga paare, â Sin biexa inaman laba, iexa unininte, a xap muun mataatina Moroaa ma a xap titii no inaman bula.3Iexa aina nal, nan abia inaman laba, atigiri lo xaxaalame sangan ngali ningi, â U na tiltsomi iaa sin nugu ininte, ngali atutiki biaa mamaet labatina iaa mii nugu matenkorot.â4â A se xudu no leng, iwaa unininte ta palo ngali tiltsomi, o mil ga sebula adodo mula sin ia tsaa, â Asuk so, iaa xap mataatina Moroaa ma iaa xap manglen inaman,5oro ilawaa aina atigiri tali mamaet sin iaa, malen axaau ngali iaa ba xosaraa xan ininte, sin sa naba ta apelmeti iaa sin ta tigiri xaxaalame.â â â6Orong ga sebula paare, â Lolong sin aia unininte ta xap ininte tutiik ta papaare.7Gim atii we Moroaa naba tali ininte tutiik sin xan no inaman ta se intentsoli di, biaa di ta lo tengteng laa sangan sin no siaat ma no bing. O naba lo longlilii mu di?8Iaa asaaiti gim, naba isagaa mu ngali tali ininte sin di! Biaa Xan Tsi Taamat naba ta xaalame, u we naba tatanginai tsaa xaa untinaalnge lalon abala balan pula?â
Totore puapua ngali Paarasi ma unaalalet taakis
9Iesu a paare taman abala totore puapua, di ta we di tutiik ma di ga nen amagurusiki biexaa inaman xaatsap.10â Alua no taamat, delu laa lapalaa sangan Xan Anua Moroaa ngali laa sausawit. Iexa ina delulu Paarasi o iexa unaalalet taakis.11Iwaa Paarasi a til ma ga sawit asen ia tsaa, weaatalaa, â Moroaa, iaa putsangi axaau sin iu, we, iaa xap malen biexaa taamat, di no unpulapula ma di no untsaxa ma di xaa matul mii no aina xaatsap, ma iaa xap malen bula ilawaa unaalalet taakis.12Iaa xaa el sin no leng alua ina wik axuuk ma iaa ga xaa tali axuuk sangaul ina nugu no xuxute laa susum sin sawe iaa ta taana.â13â Oro iwaa unaalalet taakis a til palpalaa ma ga xap muun nanen laa balalangit tsaa, o ga pantsi bongbongon, ga we, â Moroaa, iaa untsaxa, u na ie biirbirum sin iaa.â14â Iaa asaaiti gim, ilawaa unaalalet taakis atsap untutiik lalon no matan Moroaa, o ilawaa Paarasi a xap. Amuina saa ia ta alet laangen iesan lapalaa, Moroaa naba laangen iesan lapula, O saa ia ta laangen iesan lapula, Moroaa naba alet laangen iesan lapalaa.â
No tsi dokdok mii Iesu
15No inaman di le tali xadi no tsi dokdok sin Iesu ngali naba taana di. O biaa no tsi asasing di ta lasi abala, di suk imii di.16Oro Iesu ga ilei no tsi dokdok xaalame sangan, ga we, â Gim papaalii no tsi dokdok di na xaalame sangaaga. Gim na xap tilbanti di amuina xan Maradaan Moroaa xadi abia di, di ta malen abala no tsi dokdok.17Iaa asaaiti gim so, saa ia ta xap adi xan Maradaan Moroaa malen xa tsi dokdok, naba xap pupua ngali tsiga lalon abia Maradaan.â
Taamat untang
18Iexa lalaamua atsuraa ia, â Unaasasing mamainaang! Iaa ba xosaraa samaarang ngali tapkina abia tino laaliu?â19Iesu a xisi, â Ngalisa u ta we iaa taamat mamainaang? A xap xa na mamainaang, Moroaa mu a mamainaang.20U se atii xan no lo Moroaa, â Nangaam matul mii aina ta xap num tubu, nangaam sas amantei xa, nangaam pulapula, nangaam ababaa, manglen num mom ma nagaa.â â â21Ga xisi, â Iaa se taxaawiti ma amusili abala no lo sin leng iaa tii xulaau ma le pupua atalaa.â22Biaa Iesu ta alongmen abala, ga paare sin ia, â U muun tsaa ngali was ta xuuk. U na sune taman num no mat maarang ma u na tali abia no xuxute sin no muunwas, ngali u ba iewas balalangit, ma xaalame u na amusili iaa.â23Biaa ta alongmen abala, asuk lolbiir buxa amuina ia untang.24Iesu a atsoxaa iwaa lalaamua, ga we, â Naba suk lelep ngali xa untang ngali tsiga laa lalon xan Maradaan Moroaa.25Aso, a suk malus mu ngali xa kemal na tsiga lalon mat ina nil samsamaap, ngen xa untang ngali tsiga lalon xan Maradaan Moroaa.â26Biaa di, di ta alongmen abala, di suk atsuraa, â O no saa so di ba pupua ngali adi abia atotoaa?â27Iesu a xisi di, â Samaarang no taamat di ta xap pupua ngali xosaraa, Moroaa mu a pupua ngali xosaraa.â28Pita ga asaaiti ia, â Lasi, giem se poroklii nagiem no maarang se araraa ngali amusili iu.â29Iesu a paare ngali di, â Iaa suk asaaiti gim taman so, saa ia ta poroklii tatan, o xan tubu, o xan no turamasen, o xan mom ma nagaa, o xan no tsi ngali tapkina xan Maradaan Moroaa,30naba adi no daan maarang sin abala tino, ma sin abia tino mil naba ta laa xaalame biaa tino laaliu.â
Iesu asaait leng taman xan minet
31Iesu agii axumuli no tsi asasing ta sangaul axuuk ma ga laa lua, ga asaaiti di, â Gita ba se laa lapalaa Jerusalem ma no maarang araraa no propet di tii se atalaa ngali Xan Tsi Taamat naba se taxaa puaa.32Di ba gii tali sin no Gentail. Di ba reret ngen, di ba amangieli di ba xamutsaa,33di ba ririiti o di na sas amantei ia. Sin nanaatuul ina leng naba sebula tapaas mula nan suu ina minet.â34No tsi asasing, di xap muun leng sin xan no totore. Muina ina abia no totore axuxii sin di ma di ga xap atixi sen maarang a papaare taman.
Iesu atoaa matababa
35Iesu a se es atataaen Jeriko o iexa matababa axalkale sin gelgel ina sal ma ga lo ningningi no inaman ngali xaa was.36Biaa ta alongmen malep ina inaman ta es liu, ga atsuraa, â Sawe abala ta tsap?â37Di ga asaaiti, â Iesu in Nasaret, a es liu.â38A suk ilei, â Iesu, xan tsi Dewit, u na ie biirbirum sin iaa!â39Biaa no inaman di ta es lalaamua, di imii, di ga asaaiti ngali na bong, oro asuk ilei lot, ga we, â Xan tsi Dewit, u na ie biirbirum sin iaa!â40Iesu a til wat ma ga asaaiti di, â Gii xaalamien sangaaga.â Biaa iwaa taamat ta xaalame atat, Iesu ga atsuraa ia,41â U saan ngali iaa ba xosaraa sa susum?â A xisi, â Orong, iaa saan ngali nanen.â42Iesu ga asaaiti ia, â Adi num nanen, num tinaalnge a se atoaa iu.â43Tiwaa tsaa, a suk nanen ma ga amusili Iesu, ma ga lo paipaʼii Moroaa. Biaa no inaman araraa di ta lasi, di suk paʼii bula Moroaa.