Luka17rif_lti
X uɣekkwi ɣar ddenb u x smaḥet
1Inna Yasuɛ i imeḥḍaren nnes: “War tɛeddeř ila ad iřint tɛenkrifin, maca uct x wenni zi i dd ɣa yasent!2Iḥřa as ad xas tᵉttwagg ict n teṣḍart n tsirt tedqeř ɣar yiri nnes uca ad immenḍar di řebḥar x minni ɣa issenqarḍ ijjen zeg imeẓyanen-a.3Ḥḍam ixef nwem. Mařa ixḍa umac, webbex i-t, u mařa itub, samḥ as.4Mařa ixḍa akidek sebɛa n twařawin deg ijj n wass uca idweř-dd ɣarek sebɛa n twařawin, iqqar: ‘Aqa tubeɣ!’, ittxeṣṣa ad as tsamḥed.”Amedya n tḥebbuct n zzariɛet n uxerdel5Nnan rrusul: “A Siditneɣ, arni aneɣ l’iman nneɣ!”6Netta inna asen: “Mři tuɣa daywem l’iman am yict n tḥebbuct n zzariɛet n uxerdel uca ad tinim i tcejjart-a n tut: ‘Twaqřeɛ zeg iẓewran nnem, twaẓẓu di řebḥar!’, xenni ad awem tᵉṭṭaɛ.”
Amedya n bab d umsexxar nnes7Man wen zzaywem i ɣar iǧa umsexxar icarrez niɣ yarekkwes uǧi, ad as yini deɣya mařa iɛqeb-dd zeg iyyar uca yudef ɣar taddart: ‘Qarreb-dd, teqqimed ɣar ṭṭabřa’?8Ma war d as iqqar: ‘Sewjed min ɣa mmunesweɣ, tbeysed, tsexxared xafi ař ɣa cceɣ, sweɣ. Awarni man aya ad tecced, ad teswed uřa d cek’?9Ma ad iksi umsexxar nni aqadi, minzi netta igga min d as ittwannan ad t yegg? Ittɣiř ayi, lla!10Ammu uřa d kenniw, xmi teggim marra min d awem yumuren, ittxeṣṣa ad tinim: ‘Aqa neccin d imsexxaren war ineffɛen, minzi negga min tuɣa xaneɣ’.”
Asgenfi n ɛecra i di iǧa řbarṣ11Rami iruḥ Yasuɛ ɣar Urcalim icuq di řwesṭ n temmurt n Isamariyyen, tenni iǧan zzat n Ljalil.12Ařami tuɣa ittadef ɣar ijj n dcar, řqan t ɛecra n yeryazen daysen řbarṣ, qqimen bedden ɣar řaggʷaj.13Ssgeɛɛden tmijja nsen, nnan: “A Amseřmad nneɣ, Yasuɛ, arḥem aneɣ!’”14Umi daysen ixzar, inna asen: “Ruḥem, secnem ixef nwem i ikehhanen!” Xenni imsar, am gguren nitni, aqa ttwassizedgen.15Ijjen zzaysen iɛqeb, umi iẓra belli iggenfa, uca issemɣara di AREBBI s tmijja tejhed.16Iwḍa x uɣembub nnes ɣar iḍaren n Yasuɛ, iqada t. Wa tuɣa d ijj n weryaz Asamiri.17Iṭṭef Yasuɛ deg wawař, inna: “Ma war ttwassizedgen marra s ɛecra? Mani qqimen tesɛa?18Mayemmi jjin nitni ad dd-asen ḥima ad ssɛuǧen AREBBI, mɣir wanita waha, wenni iǧan zeg ijj n řgens d abarrani?”19Xenni inna as: “Kkar, truḥed, aqa l’iman nnec issenjem i cek!”
Tawasit n Tgeldit n Arebbi20Umi Ifarisiyyen sseqsan Yasuɛ: “Meřmi i dd ɣa tas Tgeldit n AREBBI?”, yarra-dd xasen, inna: “War dd-tᵉttis Tgeldit n AREBBI s yijj n wudem ittwasscanen.21War qqaren: ‘Aqa-tt da!’, niɣ: ‘Aqa-tt diha!’, minzi Tageldit n AREBBI aqa-tt di ca zzaywem.”22Inna i imeḥḍaren nnes: “Ad dd-awḍen wussan i di i ɣa texsem ad tẓarem ijj n wass waha zeg wussan n Mmis n bnadem, maca kenniw war t tẓarrem.23Mařa nnan awem: ‘Aqa-t da!’ niɣ: ‘Aqa-t diha!’, war din ttriḥem.24Minzi am mammec iccat wassam zi ṭṭarf sadu ujenna ɣar ṭṭarf nneɣni sadu ujenna, ammu ɛawed ad yiři Mmis n bnadem deg wass nnes.25Maca ittxeṣṣa as amezwaru ad iweddeb aṭṭas uca ad ittwammenḍar zi jjiř-a!26Am mammec tuɣa deg wussan n Nuḥ, ammu i ɣa yiři ɛawed deg wussan n Mmis n bnadem.27Tuɣa ttᵉtten, sessen, ttawyen timɣarin, smeǧacen timɣarin i yeryazen ař ass i di yudef Nuḥ ɣar uɣarrabu uca yusa-dd ṭṭufan, isshellek i-ten marra.28Ammu tuɣa imsar ɛawed deg wussan n Lut. Tuɣa ttᵉtten, sessen, ssaɣen, zznuzan, tteẓẓun, bennan.29Maca deg wass i di dd-iffeɣ Lut zi Sadum, ijja SIDI ad dd-tewḍa tmessi d řecbareyyet zeg ujenna, iteḥḥa ten marra.30Ammu i ɣa yiři deg wass i di i ɣa ittwassargeb Mmis n bnadem.31Wenni iǧan x tzeqqa deg wass nni u řqecc nnes aqa-t di taddart, war dd-ihekkwi ca maḥend ad t iksi. Ammu uřa d wenni iǧan deg iyyar, war dd-ittɛiqib ca.32Ɛeqřem x temɣart n Lut!33Wenni yarezzun ad issenjem tudart nnes, ad tt ixsar, u wenni tt i ɣa ixsaren, ad tt issenjem.34Ad awem iniɣ, aqa di ǧiřet nni ad din iřin tnayen x ict n tassut: ijjen ad ittwaksi, wenneɣni ad ittwajj.35Ad din iřint tnayen n temɣarin ḥarryent jmiɛ, ict ad tᵉttwaksi, tenneɣni ad tᵉttwajj.36Ad din iřin tnayen deg iyyar: ijjen ad ittwaksi, wenneɣni ad ittwajj.”37Arrin-d, nnan as: “Mani, a Siditneɣ?” Netta inna asen: “Mani teǧa arrimet din ittmunan ɛawed igidaren.”