Read Luk 17

Luk17myw_png

Katsilakay silma̱nin sinap kalbaleb

¹Wankuyeim mo idibakes navamuls, ilana, “Mounid gamag mwasanin biyakwanes sisiyas bikatsilakes silma̱nin asisinap kalbaleb, tage tasiyas takatsilakays mo bilivatus kalbaleb.²“Kadiloka dakul avakaein biyawanis takatsilakay wakayon bilaves bein wabwanit; mata ge bikatsilek gwad kakit ma̱wana gwad towen, va̱gan kid beivag ansinap kalbaleb.

Kuwid bwadam ansinap kalbaleb

³“Kuvna̱seimiy. Kukin bwadam biyagageim, kwamtilek ansinap kalbaleb bikakin. Kukin bikanavin nanon, mo kuwid ansinap, kunumlev.⁴“Kukin katanok yam waseg siva̱nim sivay biyagageim mo siva̱nim sivay bigilagel, bilana, ‘Kuwid agusinap towen’; e, kadiloka kuwid.”

Simounid

⁵Gamag tasiyas takaweins anilivan mo idibakes siguyaw, ilansa, “Kulabem va̱gan bakasimounid beibwein.”⁶Iw to Yeisuw, ilana, “Kukin bukusimounids ma̱wan tipoul kaytul-nen, mo bukudibakes kay makaywen bukulansa, ‘Kugut gidawa̱lim, mo kunoun kun kutow wabwanit,’ e, mo bikanaway agamiy.

Bo misinak nilivan nitavag, bo deis

⁷“Takinew mutouwat biwaway wa̱bag, o takinew bimtakavet mansiyas aleim wanawoud, ikous mo beiyum beim waven, adok nag bukulana, ‘Nuwanaw kum, kukwam.’ Nag. Peinan adok bukulana, ‘Kupa̱yiw kukwaliveinun kag, kusekeig; ba̱kam ba̱moum, ikous; mo kukwam, kumoum wankuyeim.’⁹“Mutouwat towen bikanaway aygam, adok nag bukulana, ‘Kalin nuwag avakaein ya̱koum.’ Nag.¹⁰“Yakamiy ma̱wan, bukuyakousis Yowbad nawotet nilivan, mo bukulansa, ‘Ya̱kids nag natouwats bwein ya̱kids. Bo misinak nilivan nitivag, bo deis.’”

Toulepel sinawatan

¹¹Inounas, bineis kid Yelusalem, inoyes ked makadewen Samaliy palatan, Galiliy palatan.¹²Isap ven kweitan waseg, iwekey toulepel sinawatan, itowas, iwaks, ilansa, “Tamwey, Yeisuw, tabta binok nuwam yakamey?”¹⁴Yeisuw ikines, ilana, “Kunounas kuneis; siyas tanuwgwes lun bikineimiy.” Inounas binekes kid tanuwgwes lun, inounas wa̱ked mo ibweins.¹⁵Teitan ikin kaleivin bo ibwein, itouvin, aygan avakaein iya̱kawn Yowbad waseg, iyum inek Yeisuw, ikalivatouw kantukov wamatan, ilana, “Kalin nuwag ya̱koum avakaein.” Mtowen gum-Samaliy.¹⁷Iw to Yeisuw ilana, “Adok sinawatan yakamiy nukubweins, avanuy tasiyas teinim teivas? Tabta beiyum bimeis bikavasis Yowbad, peinan ibweins? o misinaka tobwag ven gimgeilin towen?”¹⁹Mo idibek mtowen ilana, “Kutamanaw, kunoun. Nukusimounid waseg yey, mapuna bo kubwein.”

Yowbad nakaleiwag asinavin bisap

²⁰Palisiy mwasanin inekes, ikatiga̱nes, ilansa, “Asinavin Yowbad nakaleiwag bisilamaw?” Iwa̱ge Yeisuw, ilana, “Nag bitakin kweitan mulin naman Yowbad mo bitakakin nakaleiwag isilamaw, nag. O gamag nag bilivans, bilansa, ‘Kukines a̱ne’ o ‘Towen-one’; nag. Peinan Yowbad nakaleiwag wanuwamiy nises.”²²Mo idibakes navamul, ilana, “Igaw tut wanakoug, beivag sivinamiy bukukines Gimgilitoun yey gunakaleiwag kweitan yam waseg, tage nag bukukines.²³“Gamag mwasanin bidibakeimiy, bilansa, ‘Kukin-one’ o ‘A̱ne.’ Tage awoum kuneis kukines; awoum kukikuns tasiyas; awoum.²⁴“Peinan yam towen ba̱yum bam bukukineigs ma̱wana kavikawn bimteil liba̱lab palatadadan palatadadan.²⁵“Youd towen wanakougwaw, tage wanamug a̱bag bigeg o peinan tut towen gimgilis bo bipiyaveigs.²⁶“Gimgilitoun yey. Igaw ba̱yum bam mo gamag mwasanin bilivatus kalbaleb, ma̱wan kweiboug, inatut Now waseg, Gimgilitoun yey gunatut bo ma̱wan.²⁷“Peinan Now inatut waseg ikamkwams, imwamoums, iveivays, ita̱mes nitsiyas silma̱nin beivays. Ma̱wana ee... kweitan yam mo Now isiw in wanawag wanuwan, mo ikweis avakaein, imukul ven, iwgweles gamag ikous.²⁸“Lot-vak inatut ma̱wan, ikamkwams, imwamoums, iyyamayis siwliyoug, isipusops sibag, iwlulays sibunatum. Tage yam towen Lot ilisow Sodom mo kov son dikuda̱kul muyamuy ikalka̱louw ma̱wana kweis, ikatimates gamag babaw iyakous.³⁰“Bo ma̱wan yam wanakoug waseg Gimgilitoun yey basap vayuwein ven watinow.³¹“Kukin kal biyeiwas wanpwa̱siw awoum beisiw vayuwein wanbunatum va̱gan bikow nawliyoug; awoum. O towen-vak wa̱bag awoum beiyum bein waven.³²“Kuninuways Lot inakwav.³³“Kukin sivinamiy bukwatinabweimiy mo mwamovamiy biyamkwaneimiy tage kukin biyamkwaneimiy mwamovamiy mo bukuba̱nes.³⁴“Adibakeimiy kukin ba̱yum bam boug waseg, asteiy tawaw bimasis keb katanok waseg, teitan bakow; tayuwein bisiw.³⁵“Vinay nay biwotets wit bikanimimayes, na̱tan bakow; nayuwein bisiw.”³⁶(-)³⁷Iweis tasiyas, ilansa, “Tamwey, avanuy?” Yeisuw idibakes, ilana, “Am-palawen takanig immasis mo bikatuyouns bimeis mansiyas bunibwan.”