Read Ruuka 1

Ruuka1zak_wbt

¹Omuguungibhwa Teofiro, garya gaakorirwe gati weetu, abhaatu bhaaru bhakoriri omukya gwo okukaama iguru yaku.²Gakaamirwe bhwaheene amangʼana gano twabhuuriirwe na bhano bhaagaruuzi amangʼana gayo, kwa ameeso gaabhu, bhano bhakunyaragania engʼana ya Taatabhugya kurwa obhweemero.³Noosi nigiisuunziri no okugamenyeekererya bhwaheene, kyeego goosi gakorirwe kisi kweemera kubhutaangiro, nikarora ni kisi nikukaamire gayo ngʼorangʼora,⁴okubha obhe no obhuheene kugarya wegiibhwe.

Obhurooti bhwo okwiibhurwa kwa Yohana Omubatiizi

⁵Eriibhaga Herodeyaari omutemi wa Yudea, ahaabha ariho omuseengeriwumwe wa Taatabhugya, eriina ryaaye Zakaria, yaari musaango yo obhuseengeri bhwa Abiya. Na mukaaye Erizabeti, ewe yaari wa mukisyooko kyo omuseengeri Haruuni.⁶Abhabhiri bhayo, bhaari abhaheene embere wa Taatabhugya, ebho bhaari bhariigwa emigiro gyo Omukuru gyoosi, okutama kubha ni isoro.⁷Bhatahaabha no omwaana, kwo okubha Erizabeti yaari muguumba, neebho bhaari bhakuunguhiri bhukongʼu.⁸Orusiku rumwe, esaango ya Zakaria yaari erakora ruunga rwaaye rwo obhuseengeri embere wa Taatabhugya.⁹Kunyaangi yo obhuseengeri bhwaabhu, Zakaria akasorwa kwo okwiitoorwa obhwiitoori kubha, niwe araasikire ahahoreeru he eriiseengereroryo Omukuru, Taatabhugya, okubha amuguundirirye omuruumbaaso.¹⁰Kwiibhaga ryo okwookya omuruumbaaso, habhoori bhakiikumania abhaatu bhaaru kumusabha Taatabhugya.¹¹Niho, Zakaria akahwaarukirwa na maraikawo Omukuru. Maraika wuyo, akiimeerera orubhaara rwo obhuryo rwa ahagiro he ezahaabu ho okuguundirirya omuruumbaaso.¹²Hano Zakaria yamuruuzi, akiitakya no okwoobhoha bhukongʼu!¹³Nawe, maraika akamubhuurira, “Awe Zakaria, otoobhoha! Taatabhugya yiigwiiri amasabhi gaazo. Mukaazo Erizabeti, arakwiibhurira omwaana we ekisubhe, oramutoga eriina Yohana.¹⁴Omwaana wuyo, niwe araakore muzomererwe no okuriiryaata, na abhaatu bhaaru bharazomererwa kwo okwiibhurwa kwaaye.¹⁵Arabha omukuru embere wa Omukuru. Ataanywe amaanzi go omuzabibune ebhiindi bhyoosi bhino bhikugwaata. Arabha yiizuriibhwe Ekoro Muhoreerukurwa muunda ya nina.¹⁶Arakyoorya Abhiiziraeri bhaaru kwo Omukuru, Taatabhugya waabhu.¹⁷Aramukaangatira Omukuru okubha amubhanurire abhaatu okumusuungʼaana obhuuzi bhwaaye no okukaangatibhwa ne ekoro no obhunagya kya bhwa Eriya.Arabhagwaatania bhataata na abhaana bhaabhu, no okubhakora bhano bhatakumwiigwa Omukuru bhabhe na amangʼeeni ge eheene.”¹⁸Zakaria akamubhuurya maraika, “Ndora enye na mukaane tukuunguhiri! Niki kiraanierekye obhuheene bhwo okubhona omwaana?”¹⁹Maraika wuyo akabhuga, “Enye neenye Gaburieri, nikwiimeerera embere wa Taatabhugya. Ewe niwe anitumiri kubha, niize kukubhuurira amangʼana gano amazomu.²⁰Kwo okubha otiikiriirye gano nakubhuuriiri, kweema bhoono orabha imuumu, na otakunagya kugaamba tee, kuhikira gayo garaakorwe kwiibhaga ryaaye.”²¹Abhaatu bhaari bharaganya Zakaria ahuruke igutu, bhakaruguura kurora kyeego yakezeerimu.²²Hano yaahurukirimu, ataanagirye kweeki kukeerenia nabho, akageenderera kubha imuumu. Yaari areerekya kwa amabhoko, bhakamenya kubha aruuzi obhurori.²³Hano yamariri eziisiku zaaye zo okukora emirimo mwiiseengerero, akagya yiika.²⁴Kyaamwe, mukaaye Erizabeti akagega enda, akamara emyeeri etaano yaari akiibhisa,²⁵akabhuga, “Omukuru, niwe anikoreeri ego! Anduusiirye eziisoni embere wa abhaatu.”

Obhurooti bhwo okwiibhurwa kwa Yeesu

²⁶Hano enda ya Erizabeti yahikirye emyeeri esaasabha, Taatabhugya akatuma maraika Gaburieri mumugye gwa Nazareeti, mukyaaro kya Gariraaya.²⁷Akatumwa kumuukya wumwe, eriina ryaaye Mariamu, yaari ayuungiibhwe no omusubhe wumwe, eriina ryaaye Yusufu, we ekisyooko kyo omutemi Daudi.²⁸Hano maraika yagiiri ku Mariamu, akamubhuurira, “Ndakukeerya, awe omutweerwa we ebhite, Omukuru ari hamwe naawe.”²⁹Hano akiigwa amangʼana gayo, akanyaaka mukoro, akiibhuurya, “Nkeeryaki yino?”³⁰Maraika akamubhuurira, “Weyaa Mariamu, otoobhoha! Omutweerwa we ebhite wa Taatabhugya.³¹Rora! Oragega enda, na oriibhura omwaana we ekisubhe, oramutoga eriina ryaaye Yeesu.³²Arabha omukuru, arabhirikirwa Omwaana wa Taatabhugya Wuno Ari Iguru we Ebhigiro Bhyoosi. Omukuru, Taatabhugya arabhwiimeererya kweeki obhukaangati bhwo obhutemi bhwa Daudi isikuru waaye, no okumuha omwaana wuyo.³³Arabha omutemi wa abhaatu bhoosi bha Iziraeri kirakeego, no obhutemi bhwaaye, bhutakubha no obhuteero.”³⁴Mariamu akabhuurya, “Garabhabhwi, neenye nitakaruuzi omusubhe?”³⁵Akamukyoora, “Ekoro Muhoreeru arakwiikira, na amanaga ga Taatabhugya Wuno Ari Iguru we Ebhigiro Bhyoosi, garakukuundikiirya. Kweego, omwaana wuno akwiibhurwa, arabha omusorwa no okutogwa Omwaana wa Taatabhugya.³⁶Naabhe omuhiiri waazo Erizabeti, wuno abhaatu bhaari bhamumenyiri kubha ni muguumba, agegiri enda yo omwaana we ekisubhe mubhukikuru bhwaaye. Bhoono ariinda ya emyeeri esaasabha.³⁷Gayo gaatuukiri kwo okubha ku Taatabhugya, bhyoosi bhiraturikana.”³⁸Mariamu akabhuga, “Neenye omugya wo Omukuru, ebhe kweenye kyeego ogaambiri.” Kyaamwe akagya.

Mariamu aragya kukeerya Erizabeti

³⁹Mariamu akakora bhwaangu orugeendo, rwo okugya ku Erizabeti eziisiku ziyoziyo, mumugye gumwe gwe ebhiguru bhya Yudea.⁴⁰Hano yasikiiri wa Zakaria, akamukeerya Erizabeti.⁴¹Hano Erizabeti akiigwa akeeriibhwe na Mariamu, omwaana yaari muunda yaaye akatumatuma. Hayohayo Erizabeti akiizuribhwa ne Ekoro Muhoreeru,⁴²kyaamwe akagaamba kwiiraka ikuru, “Mubhakari bhoosi, awe naawe omutweerwa we ebhite! No oriibhura omwaana omutweerwa ebhite.⁴³Enye ni weewi, naabhe nina wo Omukuru waane yiize kunikeerya?⁴⁴Hano niigwiiri oranikeerya, omwaana akatumatuma muunda yaane kwo obhuzomererwa.⁴⁵Awe naawe omutweerwa ebhite, kwo okubha wiikiriirye gano Omukuru yakubhuuriiri gakorwe.”

Omweembo gwa Mariamu

⁴⁶Mariamu akabhuga,“Ekoro yaane, eramukumya Omukuru,⁴⁷erazomererwa niwe Taatabhugya Omutuurya waane,⁴⁸kwo okubha anihiitiri omugya waaye,yiingabha enye ni munyookobhu.Kurwa bhoono, abhaatu bhe eziinyiibhuro zyoosina zino zikuuza,bharabha bharanibhirikira kubha neenyeomutweerwa we ebhite,⁴⁹kwo okubha Taatabhugya wa amanaga,anikoreeri amangʼana ge ekiruguuro,ne eriina ryaaye ni ihoreeru, rirakira amariina goosi.⁵⁰Taatabhugya arageenderera kubharorera ebhigoongino okubhasakirya abhaatu bhe eziinyiibhuro zyoosi,bhano bhakumwiigwa.⁵¹Akoriri amangʼana amakuru kwa amanaga gookubhoko kwaaye,anyarageenie abharegenu bhoosi.⁵²Yiituumirye abhakaangati kurwa kubhituumbi bhyaabhu bhyo obhutemi,kimwe abhatiirirye abhanyookobhu.⁵³Bhe enzara, abhiigutirye bhwaheene,nawe abhaniibhi abhaheebhiri amabhoko bhusa.⁵⁴Abhahiitiri no okubhasakirya Abhiiziraeri,abhabhagati bhaaye,akabharorera ebhigoongi.⁵⁵Akakora kyeego yaragiri Aburahamu na bhazaazi bheetu,na abhaatu bhe ehamati yaaye kirakeego.”

⁵⁶Mariamu akamara emyeeri etatu ari we Erizabeti, niho yagarukiri yiika waaye.

Okwiibhurwa kwa Yohana Omubatiizi

⁵⁷Eziisiku zo okwiibhura kwe Erizabeti zikahika, akiibhura omwaana we ekisubhe.⁵⁸Hano abhanyaroobho na abhahiiri bhaaye bhakiigwa kyeego Omukuru yamuroreeri ebhigoongi bhyaaru, bhakazomererwa hamwe neewe.⁵⁹Omwaana wuyo, hano yahikirye orusiku rwa kanaane, bhakaaza kumusaara.Bhakeenda kumutoga eriina rya wiise Zakaria.⁶⁰Kyaamwe, nina akaanga, akabhuga, “Zeyi, atogwe Yohana.”⁶¹Bhakamukyoora, “Ndora eriina riyo ritari mubhahiiri bheenyu!”⁶²Niho, bhakabhuurya wiise, kwo okumweerekya na amabhoko, abhazweenie kyeego akweenda atoge omwaana waaye.⁶³Akasabha ekigiro kyo okukaamira, akakaama, “Eriina ryaaye niwe Yohana.” Bhoosi ego bhakaruguura!⁶⁴Kyaamwe, omunwa gwaaye gukiigurwa, kweeki akabha aragaamba, akumukumya Taatabhugya.⁶⁵Abhanyaroobho bhoosi, bhakahaha, engʼana yiyo ekanyaragana bhukongʼu mbaara zoosi ze ebhiguru bhya Yudea.⁶⁶Kwo okubha bhoosi bhakiigwa obhunagya bhwo Omukuru bhwaari hamwe neewe, bhakabha bhakiibhuurya, “Omwaana wuyo arabha muutuki?”

Omweembo gwa Zakaria

⁶⁷Zakaria, wiise wo omwaana wuyo, akiizuribhwa ne Ekoro Muhoreeru, akagaamba obhurooti,⁶⁸“Akumibhwe Omukuru, Taatabhugya wa Abhiiziraeri,kwo okubha yiiziri kututuurya etwe abhaatu bhaaye.⁶⁹Taatabhugya atureeteeri Omutuurya weetu wa amanaga,omwiibhurwa we ekisyooko kya Daudi, omuhokya waaye,⁷⁰kyeego yaragiri ekare hayo kubharooti bhaaye abhahoreeru.⁷¹Akaraga kututuurya kubhabhisa bheetu,na mumabhoko ga bhoosi bhano bhakutubhiihirirya.⁷²Akabhuga kubha, arabharorera ebhigoongi bhazaazi bheetuno okuhiita eriiragano rirya eriihoreeru.⁷³Eriiragano riyo niryo akakora na zaazi weetu Aburahamu.⁷⁴Tutuuriibhwe kurwa mumabhoko ga abhabhisa bheetu,okubha tumuseengere, kutama kubha ne ehaha,⁷⁵tubhe bhahoreeru na abhaheene embere waaye,kuziisiku zeetu zoosi.

⁷⁶Awe omwaana waane,orabhirikirwa omurooti wa Taatabhugya Wuno Ari Iguru we Ebhigiro Bhyoosi.Orakaangata embere wo Omukuru,abhone omweererye abhaatu kuziinzira zino araahitire.⁷⁷Obhabhuurire abhaatu bhaaye kubha,bharatuuribhwa kwo okwaabhirwa kwe ebhibhi bhyaabhu,⁷⁸kwe ebhigoongi bhyaaru no obhunyoohu bhwa Taatabhugya weetu.No obhutuuribhwa bhuyo bhuratuhwaarukira kyo obhweero kurwa iguru.⁷⁹Na bhukabhabharira bhoosi bha mukiirimana bhano bhakwoobhoha enyaako yo oruku runorwaari kuuza.Bhuratukaangata tee,tubhe turahita munzira yo omureembe.”⁸⁰Yohana akakiina, akabha na amanaga mukoro yaaye, akagya kwiikara mwiitirigo tee, hano eriibhaga ryahikiri akarweera mu Bhiiziraeri.