Read Lujia Chonjisan Gouxioxi 1

Lujia Chonjisan Gouxioxi1sce_rsp

Shuni Melieduku Kielien

¹Qiafeilo noyen! Olon kun bijienni dunda fashen giesan shiqinyi huaizho.²Huaisanlashi Hudai kieliende wilie giechen kunla zui melieshidase nudundene qinsi uzhedene bijiende chonjisan mutun wo.³Ene shiqinlani bi melieshida xianxide chaizhi daowo. Ingiese biye chade nienieji huaizhi⁴chi surusanlai man zhenni bikui mejieghane giezho.

Xili Gieghasan Yaheiyai Olukui Melie Kieliezho

⁵HherodeYudayani honshan danlakude nie buwa wo, niereini Sajialiya giene. Yabiyani duide wo. Hheni biereishi Hharuneni houdei wo, niereini Ilishabai giene.⁶Hhe ghualashi Hudai melie gou kun wo. Hudai minlin, guijinni zunjizhi man giezho, yama kieliekui uwo.⁷Hhelade zinie kewosi uwo. Ilishabai kewosi olu dane, ede hhe ghuala oqioluwo.⁸Niefade Sajialiyani nie duide buwani wilie gieku linjizhi kuzhese hhe Hudai melie wilie giekude⁹buwani xigonghala gangan chouidene Ezhanni giede oro xian jienjiwo.¹⁰Xian jienjikude bexinla man ghadane onxian giezho.¹¹Menzhali Ezhanni qienxien xianlu shireni borun miende beizhi Sajialiyade chanlaghawo.¹²Sajialiya chanladene jinda hende ayizho.¹³Qienxien hhende kieliewo, "Sajialiya, bu ayi! Chini onxianni Huda chenliewo. Chini bierei Ilishabai chade nie kewon olune. Chi hhende Yaheiya giezhi niere ogi.¹⁴Chi hende bayasune. Hhei oluse olon kunlaye bayasune.¹⁵Hhe Ezhanni melie fugie kun gholune. Putoujiu, yama jiu ulie ochine, anane kielise Shenlinghala duruzho.¹⁶Hhe olon Isilie kunlai Ezhan Hudai miende khareizhi ireghane.¹⁷Hhe irese xienzhi Iliyani jinshen, nenli winezhi Ezhanni melie zhunbei giene. Adalai kesilarene goudaghane, kielien ulie chenliechen kunlai gouni sumulakude khareighane. Ingiezhi kunlai Ezhanni melie zhunbei gieghane."¹⁸Sajialiya qienxiende kieliewo, "Bi pin yanzhe eneni mejiene? Bi oqioluwo, biereimiye oqioluwo."¹⁹Qienxien kieliewo, "Bishi Hudai melie beisan Zhebereiye wo. Mini peizhi chade ene gouxioxini kielieghale irewo.²⁰Uzhe, hhe shihou kuzhese mini kieliende kurunema, ene shiqin kuzhetula chi yaba gholune. Chi mini kielienni xianxin ese giewo."²¹Ingiekude Sajialiya Ezhanni giese dou ese khizhese sagheisan kunla ghudurezho.²²Sajialiya khizhese hhelade kielien kielie dane, yaba gholudene khaghalane kieliese hhela hhe Ezhanni giede yama chanlawo giezho.²³Hhe wilie giezhi ududei kuruse giedene echiwo.²⁴Enense khuinashi hheni bierei Ilishabai kewosi laidene tawun sara kiemade ese chujiegheghazho.²⁵Hhe kieliewo, "Ezhanni nenjien fugie no wo. Mini zhaogu giekude ingiezhi giedene kunlai dundase mini shizhekuni widaghawo."

Ersani Olukuni Kieliezho

²⁶Ilishabai zhighon sara laikude Huda Zhebereiye qienxienni peizhi Jialilini Nasale giesan chenshii nie oqinde echighawo.²⁷Hhe oqinni niereini Mereiyen giene, Dawude honshanni houdei Yusufude boluzho.²⁸Qienxien orodene hhende kieliewo, "Chi gou onu? Hudai nenjien chade fugie no wo. Huda chighala hhantu wo."²⁹Mereiyen chenliedene jindazhi eneshi yan isi wo giezhi sumulazho.³⁰Qienxien Mereiyende kieliewo, "Bu ayi! Huda chade nenjien ogiwo.³¹Uzhe, chi laizhi nie kewon olune. Hhende Ersa giezhi niere ogi.³²Hhe fugie kun gholuzhi kunla jianlai hhei Zui Undu Ezhanni Kewon giezhi urune. Ezhan Huda hhende xienren Dawudeni wizini ogine.³³Hhe Yagebuni giede chan honshan danlane. Hhe chanqi gonjizhi qienli ulie widane."³⁴Mereiyen qienxiende kieliewo, "Mii dou ese dafalazho. Matugie imutu shiqin wine?"³⁵Qienxien kieliewo, "Shenlin chini jiere irene. Zui Undu Hudai nenli chii jiere irezhi huine. Ingiese oluku zhiguitu kewonni Hudai Kewon giezhi urune.³⁶Uzhe, chii qingu Ilishabai oqioludene nie kewon laiwo. Kunla kieliese hheshi nie ulie oluchen kun wo giezho, ede laizhi zhighon sara oluwo.³⁷Hudade nengou wituni uwo."³⁸Ingiese Mereiyen kieliewo, "Bishi Ezhanni hoji wo. Chi kieliesan mutun made gholu gie." Ingiedene qienxien likai giewo.

Mereiyen Ilishabaii Uzhele Echizho

³⁹Oloncha ese oluse Mereiyen zhunbei gie jindazhi ulatu Yuda oronni chenshide echiwo.⁴⁰Sajialiyani giede orodene Ilishabaide salan giewo.⁴¹IlishabaiMereiyenni salanni jienliekude kieliini kewosi jiulizho. Ingie Ilishabai Shenlinghala durudene⁴²fugiede doulazhi kieliewo, "Biereila dunda chade fuqi zui fugie wo. Chi oluku kewondeye fuqi fugie wo.⁴³Mii Ezhanni ana enende irese matui olune?⁴⁴Uzhe, chii shenqini chenliekude mii kielini kewosi bayasuzhi jiulizho.⁴⁵Ezhan kieliesan shiqin chenjikui xianxin giesan chade fuqi wine."

Mereiyen Ezhanni Doulazho

⁴⁶Mereiyen kieliewo.
"Zhughemi Ezhan fugie wo giezho.⁴⁷Ruhhermi mii jiuichen Hudade oluzhi bayasuzho.⁴⁸Hhe imutu meila hojii zhaogu giewo.Uzhe, enedu khuinase soyuji kunla made fuqi wine giezhi kieliene.⁴⁹Nenlitu Huda made fugie shiqin giewo,hhei niere zhigui wo.⁵⁰Hhei zunjisan kunlade zuzubeibeide ubali xiine.⁵¹Hhe beghelieghalane lilianni uzheghawo.Sudorone hu sumulazhi goyane fugiede huichen kunlai sanda widaghawo.⁵²Qienli bitu kunlai boghonidaghawo.Qienli witu kunlai undudaghawo.⁵³Oliesuchen kunlade gouni ogizhi chudughawo.Bayan kunlai khosun kha echighawo.⁵⁴Hhe Isilie hojidene banman giewo.⁵⁵Yenjisan kielien mutunIburaheimuji houdeiladeni chanqi ubali xiikui ese matazho."

⁵⁶MereiyenIlishabaighala hhantu chabudu ghuran sara soudene giedene echiwo.

Xili Gieghasan Yaheiyani Oluzho

⁵⁷Ilishabai oluku shihouni kurudene nie kewon oluwo.⁵⁸Giebeilane, jiawulani Ezhan Ilishabaide fugie nenjien ogisei mejiedene hhantu man bayasuzho.⁵⁹Neimudu kurudene kunla kewonni hetoune giele irewo. Adaini niere mutun hhende Sajialiya giezhi niere ogine giezho.⁶⁰Ingiese anani kieliewo, "Ulie olune, hhei niereni Yaheiya gie."⁶¹Kunla hhende kieliewo, "Chii jiawude imutu niere uwo."⁶²Ingie adadei khaghala uzheghazhi, "Kewosii niereini yan giene?" giezhi asawo.⁶³Adani nie banba keredene, "Hhei nierei Yaheiya giene." giezhi huaiwo. Ingiese kunla man ghanirawo.⁶⁴Hhe xienzide Sajialiyani amanni keidene kielienni goudasenu Hudade doulazho.⁶⁵Zhouwide sousan kunla man ayizho. Ene shiqinni ulatu Yudaya oronde man chonji kurughawo.⁶⁶Ene shiqinyi chenliesan kunla man zhughedene sumulazhi ene kewon jianlai matui gholuse giezho. Ingiekushi Ezhanni nenli hheghala hhantu wo.

Sajialiya Hudani Kielienni Kieliezho

⁶⁷Hhei ada Sajialiyade Shenlin durudene Hudai kielienyi deilazhi kieliewo.

⁶⁸"Ezhan Isilieni Hudade doulakuni wo.Hhe bexinlane zhaogu giezhi shuiwo.⁶⁹Matande oluzhi goya hoji Dawudenihoudeise fugie nenlitu jiuichen khizheghawo.⁷⁰Eneshi melieshida Huda zhiguitu xienzhilai tungo giezhi kieliesanghala niekielien wo,⁷¹'Huda bijienyi henjisan kunlai,duitoulani khase jiuiwo.⁷²Matanni xienrenlade ubali xiizhiyenjisan zhiguitu kielienne uye matazho.⁷³Eneshi hhe matanyi xienren Iburaheimude yenjisan wo.⁷⁴Mai duitoulai khase jiuisenu Hudai melie beighadeneulie ayizhi zhigui, gundande ibeizi shunjighane.⁷⁶Kewon, chii Zui Undu Hudai xienzhi giezhi urune.Chi Ezhanni melie yozhi moni zhunbei giene,⁷⁷Ezhanni bexinlai zuini mienliezhijiuiku nenjienni mejieghane.⁷⁸Matai Huda ubali xiizhi zhugheni zholien wo.Hhe eqiemaghaku naranyi asiman jierese matai jiere ireghazhi⁷⁹Khara oron, fuguku xiojiededu sousan kunlai giegheraghadeneuduruzhi pinnan mode yoghane.'"

⁸⁰Hhe kewonyi beye fugiedazhi zhanjin wo. Isilieni kunlai melie khizhezhi wilie gietula hontande souzho.

Lujia Chonjisan Gouxioxi 1 / sce_rsp