Read LUKA 1

LUKA1sby_twf

¹Teofilo Walemekwa, bantu bangi balelekesha kwambeti balembe sha makani abintu ibyo byalenshika pakati petu,²balalemba mbuli ncobalambilwa kuli bakamboni balabona bintu ibyo mpobyalatatikila kwinshika. abo ebalikukambauka Mulumbe uwo.³Pabintu byonse ibi ndalepushisha mwabuya, kufuma pacindi ncobyalatatika kwinshika, neco ndayeye kwambeti ndimulembele mbuli mobyakonkanilana.⁴Ndenshici kwambeti mwinshibe cakubinga pali byonse mbyobalamwambila.

Mungelo lambanga sha kusemwa kwa Yohane mubatishi

⁵Pacindi mwami Helode mpwalikuba muleli wacishi ca Yudeya kwalikuba shimilumbo walikukwiweti Sakaliya, wamukalikoto ka beshimilumbo ka Abija. Mukashendi Sakaliya walikuba Lisabeti wa mumukowa wa Aloni.⁶Bonse babili balikuba bantu beshikunyumfwila Lesa, kayi bali kukonkela Milawo ne byonse Lesa mbyalikuyandeti babinse.⁷Nomba nkabalikukutepo mwana, pakwinga Lisabeti walikuba cumba kayi balikuba balacekulu.⁸Busuba nabumbi, Sakaliya walikusebensa ncito yakendi yabushimilumbo mu Ng'anda ya Lesa. Pakwinga bwalikuba busuba bwalikoto lyakendi.⁹Lino kwelana ne cinga ca beshimilumbo, balasala Sakaliya kwambeti ayenga mu Ng'anda ya Lesa kuya kutenta lubani.¹⁰Pacindi Sakaliya mpwalikutenta lubani, likoto lya bantu balikuba pansa kabapaila.¹¹Lino mwakutayeyela Sakaliya walabona mungelo wa Mwami, kali wemana kulubasu lwalulyo lwanteme pali kutentelwa lubani.¹²Sakaliya walakankamana nekutina.¹³Nsombi mungelo uyo walamwambileti, “Kotatina Sakaliya, Lesa lanyumfu kupaila kwakobe, neco mukashobe lisabeti nakakusemene mwana mutuloba ukamutumbe lineti Yohane.¹⁴Nakakukondweleshe ne kukusangalasha cikamba, kayi bantu bangi naboyo nibakakondwe pacebo cakusemwa kwakendi.¹⁵Pakwinga mwana uyo nakabe mukulene pamenso a Lesa, kayi nteshi akanwenga waini nambi byeshikukola. Nakakutenga ngofu sha Mushimu Uswepa nkacili mulibunda.¹⁶Uyu muntu nakenshisheti ba Isilayeli bangi bakabwele kuli Mwami Lesa wabo.¹⁷Yohane nakabe kuntangu kwa Mwami, kayi nakabe ne Mushimu nengofu mbuli shali kuba ne mushinshimi Eliya. Nakalete lunyufwano pakati pabana neba meshabo.”“Nakasandule bantu batanyumfwili Lesakwambeti bakabe ne miyeyo ya bantu balulama.Nakabambe bantu ba Mwami kwambeti babenga balibambila.”¹⁸Sakaliya walepusha mungelo uyo, “Nomba nganjishibaconi kwambeti ncolambanga nicikenshike? Pakwinga ame ndacekulu neye mukashame lacekulu.”¹⁹Mungelo usa walakumbuleti, ame njame Gabiliyeli. Nkute kwimana pamenso a Lesa cindi conse. Nendi elantumu kwambeti nkwambile bintu ibi.²⁰Nomba pakwinga uliya kushoma mulumbe uyu ngondamba weti ukenshike pacindi celela, nube cibulu nteti ucikonshenga kwamba, mpaka ibi bintu bikenshike.²¹Pacindi ico bantu balikupembelela Sakaliya balakankamana nkabepushanyeti nicani lamanta cindi citali mu Ng'anda ya Lesa?²²Lino mpwalapula pansa nkalikucikonsha kwamba nabo. Nomba nabo balenshiba kwambeti labono cimboni mboni, popelapo walatatika kwamba ne makasa mbuli cibulu, neco walapitilisha kuba cibulu.²³Mpwalapwa masuba akusebensa mu Ng'anda ya Lesa, Sakaliya walaya kucomwabo.²⁴Panyuma pakendi Lisabeti walemita, lino nkalikupulapula mu ng'anda kwamyenshi isanu nkambeti,²⁵“Lesa lino lanyumfwili inkumbo pakunyinshileci lafunyu insoni shakame pamenso abantu.”

Mungelo Gabiliyeli lambanga sha kusemwa kwa Yesu

²⁶Mumwenshi wacisanu ne umo kufuma mpwalemita Lisabeti, Lesa walatuma mungelo Gabiliyeli ku munshi naumbi waku Galileya, walikukwiweti Nasaleti.²⁷Walaya ku mulindu walikukwiweti Maliya. Maliya walikuba wamamikilwa kumutuloba lina lyakendi ni Yosefe wa mumukowa wa Dafeti.²⁸Mungelo mpwalashika kuli Maliya walambeti, mitende obe walelekwa ne Lesa. Lesa uli ne njobe.²⁹Maliya mpwalanyumfwa maswi a mungelo walatilimuka walipusha mumoyo wakendi eti, “Nikupa mitende kwamushobo cini uku?”³⁰Popelapo mungelo walamwambileti, “Kotatina, Maliya; Pakwinga Lesa lakunyumfwili inkumbo.³¹Bona nukemite ne kusema mwana mutuloba ukamutumbeti Yesu.³²“Nakabe mukulenekayi nakakwiweti mwanendi Lesa wakwilu wapitapo.Mwami Lesa nakamupe cipuna cabwami ca Dafeti.³³
Nakabe Mwami wa ba Islaeli kucindi conse ne bwendeleshi bwakendi nteshi bukapwepo!”³⁴Lino, Maliya walamwipusha Mungelo eti, “Nomba ici ngacinshika econi ame nkana nkumanapo ne mutuloba?”³⁵Mungelo walakumbuleti,Mushimu Uswepa nukese palinjobe nengofu sha Lesa wapita byonse nishikakufwekelele. Neco mwana eshi akasemwe nakakwiweti waswepa,Mwanendi Lesa.³⁶
“Bona mukwenu Lisabeti usa walikwambweti nkaseme, lino lapembelenga kuya kuba ne mwana mutuloba mubucembele bwakendi. Pakwinga ukute myenshi isanu ne umo kakute libunda.³⁷
Pakwinga paliya ceshi cikamwalile Lesa.”³⁸
Maliya walakumbuleti, “Kacinshika mbuli momulambili, pakwinga ame ndemusha wa Mwami.” Lino mungelo usa walamushiya.

Maliya lafwakashilinga Lisabeti

³⁹Mpopalapita masuba ang'ana, Maliya walanyamuka bulwendo bwakufwambana kuya kumusena wa milundu, kumunshi wa Yudeya.⁴⁰Walengila mung'anda ya Sakaliya nekumupa mutende Lisabeti.⁴¹Pacindi Lisabeti mpwalanyumfwa mutende wa Maliya, mwana walatatika kunyanyala mwakukondwa mulibunda mwakendi. Lisabeti walesushiwa ne ngofu sha Mushimu Uswepa,⁴²kayi walolobesha ne kwambeti, “Ukute colwe pakati pa batukashi bonse, kayi mwanobe weshi akasemwe walelekwa.⁴³Anu njame bani kwambeti mfwakashilwe ne banyina Mwami wakame?⁴⁴Pakwinga mpondalanyumfowa mutende wenu, mwana walatatika kunyanyala mwakukondwa mulibunda mwakame.⁴⁵Ukute colwe pakwinga walashoma kwambeti makani Lesa ayo ngowalambilwa nakubinga nakenshike.”

Lwimbo lwa Maliya lwa kulumbaisha

⁴⁶Popelapo Maliya walalumbaisha nekwambeti,“Ndalumbu Mwami mumoyo mwakame,⁴⁷Kayi mushimu wakame wakondwa muli LesaMupulushi wakame.⁴⁸Pakwinga labono kulicepesha kwakame ndemusha wakendikufuma lelo,bantu bonse pacishi ca panshi nibakankuweti walelekwa.⁴⁹Pakwinga nendi Lesa wangofu shonse lanjinshili bintu binene,lina lyakendi lyaswepa.⁵⁰Kayi inkumbo shakendi shili pali bonse bantu abo bakute kumulemeka kufuma kumusemanokushika kumusemano naumbi.⁵¹Likasa lyakendi lilenshi bintu binene byangofu byeshi kukankamanisha,lamwaya bantu bakute miyeyo ya kulisumpula.⁵²Lafunyu Bami bangofu shinene pabipuna byabo,nekusumpula abo beshi kulicepesha.⁵³Lapa bantu bakute nsala bintu bingi kwambeti bekute,Lababweshe babile kwakubula kubapapo kantu kalikonse.⁵⁴Lanyamfwa Islaeli musebenshi wakendikayi uliya kuluba kumwinshila inkumbo⁵⁵mbuli ncalalaya bamashali betu bakulukulu,Abulahamu ne bashikulu bakendi mpaka muyayaya.”⁵⁶Maliya walekala ne Lisabeti myenshi yanda kukwana itatu, panyuma pakendi walabwelela kucomwabo.

Kusemwa kwa Yohane Mubatishi

⁵⁷Lino cindi cakwambeti Lisabeti atumbuke calakwana, walasema mwana mutuloba.⁵⁸Beshikamukowa ne banendi mpobalanyufwa mbuli Mwami ncalamubela inkumbo Lisabeti balakondwa pamo bonse ne ndiye.⁵⁹Mwana usa mpwalakwanisha nsondo ne busuba bumo balesa kwambeti bamwelule, kayi bamutumbe lina lyabaishi ba Sakaliya,⁶⁰nsombi banyina balakana kwambeti, “Welela kukwiweti Yohane.”⁶¹Balo bantu balamukumbuleti, “Nomba kuliyawa ukute lina lyamushoboyo kubeshi kamukowa.”⁶²Lino balambila baishi ne makasa, ne kubepusheti, “Mulandanga tumutumbe lina cini?”⁶³Popelapo Sakaliya walasebensesha makasa pakusenga cakulembelapo, ne kulembeti, “Lina lyakendi ni Yohane.” Bantu bonse balakankamana.⁶⁴Mpwalapwishowa kulemba Sakaliya walatatika kwamba, nekutatika kulumbaisha Lesa.⁶⁵Bantu bonse balatina abo balikuba bekala pepi nendiye. Neco lulumbi ulo lwalamwaika mucishi conse ca tulundu twa mu Yudeya.⁶⁶Bonse abo balanyufwa mulumbe uyo bali kabayeya mumyoyo yabo kayi ne kulipusheti, “Uyu mwana nakabe wamushobo cini?” Pakwinga cilabonekelenga limo kwambeti ngofu sha Lesa shili pali endiye.

Sakaliya lalumbaishinga Mwami

⁶⁷Lino Sakaliya baishi Yohane, walesushiwa ne ngofu sha Mushimu Uswepa nekutatika kwambeti,⁶⁸“Alumbaishiwe Mwami Lesa wa ba Islaeli,Pakwinga Lesa lanyamfwa bantu bakendi ne kubapulusha.⁶⁹Latupa mupulushi ukute ngofu,walafuma mulibunda lya Dafeti musebenshi wa Lesa.⁷⁰Ibi walabyambila limokupitila mubashinshimi bakendi baswepa bakeendi,⁷¹Kwambeti nakatupulushe kufuma mumakasa abalwani betu,ne kuli abo bonse batupata.⁷²Walambeti, nakanyumfwile inkumbo bamashali betu bakeendi,kayi nteshi akalubeko cipangano cakendi caswepa.⁷³Ncalalumbila kumushali wetu Abulahamu ne kumushomesheti,⁷⁴nakatupulushe mumakasa abalwani betu,kwambeti tukamusebensele mwakubula buyowa,⁷⁵Kayi tube baswepa nekuba balulama pamenso akendi,masuba onse abuyumi bwetu.⁷⁶Lino mwana obe,nukakwiweti mushinshimi wa Lesa wa wangofu shonse,Pakwinga obe nukabe pantangu pa Mwami,akumubambila nshila.⁷⁷Nukenshibishe bantu bakendi kwambeti,nibakapulushiwe kayi nekulekelelwa bwipishi bwabo.⁷⁸Mwami Lesa wetu ukute nkumbo nakatupemumuni wa kwilu ulyetikutubuluka kwa kumaca.⁷⁹nukabe mumuni weti ukamunikile bantu bonsebekala mu mushinshe wa lufu,nekututangunina mulumuno.”⁸⁰Usa mwana Yohani walakula nekushimpa mumushimu. Walekala mucinyika kushikila busuba mpwalabonekela patuba kubantu mu Isilaeli.