Read LUKASI 1

LUKASI1nww_twf

¹Ghanja Tofili. Bhandu bha mahele bhakilitumba kutyeka handa bhaatyekite luhumu lula lubwitukilite mutwenga.²Bhatyeka handa mutughombilitwe na bhaabhonite kwa meho ghabhe kuhuma ku ulongohi ghwa lihengo lya Yesu abho ndo andumitumi bhaayilandamihite mihalu ayo.³Mbole ya kughulolekeha maha nlando ghula kuhuma ku ulongohi ghwake, mmona ibhegha maha nighutyekele kwa nningo, ghwenga nnongo Tofili,⁴ngati na ghwenga ghupate kumanya yila hoto ya ghala gha ghuhunditwe.

Kubhelekwa kwa Yohane Yunakubatisa kungulandamihwa

⁵Pala Helode pakabheghite mutwa ghwa nnima ghwa Yudea, pakibhegha ndundame yumu lihina lyake Sakalia, mwene kakihuma mu kimati kya mandundame ghwa Abiya. Elisabeti nhumbu ghwake nayo kakibha ghwa ubheleko ghwa ndundame Aluni.⁶Sakalia na nhumbu ghwake Elisabeti bhoha abhili bhakitama kwa kughatughila ghakaghapala Chapanga paakighayitikila malaghilo na ngwiliho ya Bambo kyanga libhaya,⁷peni bhakibha na mwana ng'obhe, kiyaha Elisabeti kakibha ng'obhe na makakala gha kulela na abha abhili bhakibha aghohi muno.⁸Linjubha limu payibheghite samu yake ya kutendekeha lihengo lya undundame mu Kitutubhi kya Chapanga,⁹bhakinhaghula kwa njunga handa yibheghite hitohe hya andundame, na kakiyingila mu Kitutubhi kya Chapanga, ngati kakantutumihe luhumba Bambo.¹⁰Pakabheghite mu lihengo lya kututumiha luhumba, lumati lwa bhandu lukibha lukinnyupa Chapanga panji.¹¹Hinu lihoka ghwa Chapanga kakinbwitukila Sakalia, kakiyima ku nnilo ghwa likuta lya kuntutumiha luhumba Bambo.¹²Sakalia pakammonite kakiyituka na kakiyingilwa na lyogha,¹³peni yula lihoka lya Chapanga liking'ombela, “Ghukotoke kuyoghopa Sakalia nyupo hyako yiyihwanika, na nhumbu ghwako Elisabeti katapapa mwana nnume, na lihina lyake ankema Yohane.¹⁴Ghwenga ghwabhegha na chekwa na bhandu atangalo bhatayelelwa kwakya kubhelekwa kwa mwene.¹⁵Kiyaha katabhegha nkulu paulongohi ghwa Bambo, katanywegha ng'obhe difwai ebu ughimbi peni katamemekwa na Nhuki ghwa Chapanga kuhumila mulutumbo lwa ma ghwake.¹⁶Na ywombe katabhabhuyiha bhandu atangalo bha Aisilaeli kwa Bambo Chapanga ghwabhe.¹⁷Mwene katalongolela paulongolo ghwa Bambo munhuki na likalama lya Eliya, na katayitenda myoyo ya abhele yibhatendele bhana bhabhe gha maha, nabhanga kuyitika bhabhe na mahala gha kughatughila ghakaghapala Chapanga na katabhabhika kala bhandu kwakya Bambo.”¹⁸Sakalia kakilighombela lila lihoka lya Chapanga, “Ndamanya bhuli kukita nnando aghwo ndo hoto? Kiyaha nenga na nhumbu ghwangu tubhegha twa aghohi.”¹⁹Yula lihoka lya Chapanga likinnyanga, “Nenga ndo Gabilieli, nndumitumi ghwa Chapanga, naghilwa kwa ghwenga ngati nighughombele mihalo ya maha ayi.²⁰Hinu kiyaha, ghunguhyubhalila ng'obhe mihalu ayi yiipala kutulukila mung'ebhu yake, habhu ghwaabhegha ghwanga kulongela mbaka paghatulukila.”²¹Peniapwo bhandu bhakibha bhangunnindila Sakalia panji, kunu paakangacha kya kukabhalila kuhuma mu kitutubhi kya Chapanga.²²Pakahumite panji kakihotola ng'obhe kuyobhela nabho, kakiapegha naho kwa mabhoko, bhene bhakimanya kukita kabhona mabhono mu kitutubhi kya Chapanga.²³Hinu manjubha gha kutumikila mahengo gha undundame ghakipela na kakibhuya ukaya kwake.²⁴Mbole ya manjubha ghala nndala ghwake Elisabeti kakiyima ndumbo, naywo kakibhuka ng'obhe ukaya kwake kwa myehi nhano.²⁵Kakilongela “Ali ndo lyakandendilite Bambo, kannola na kayibhuha honi ya nenga ya kulepelwa kupapa kwa bhandu.”

Kubhelekwa kwa Yesu kungulondolwa

²⁶Mwehi ghwa sita mbole ya kuyima ndumbo Elisabeti, lihoka lya Chapanga lihina lyake Gabilieli likilaghilwa na Chapanga kaghende ku kitami kya Nasaleti mu nnima ghwa Galilaya²⁷kwa nhinja kamwali yumu ywakaluhitwe na mundu yumo lihina lyake Yosefu ghwa lukolo lwa Daudi. Lihina lya ayo nhinja likibhegha Malia.²⁸Na yula ndumitumi ghwa kunani ghwa Chapanga kakinhikila Malia na kakinng'ombela, “Mwika ghwenga ghunonelitwe na Bambo kabhegha papamu na ghwenga!”²⁹Malia kakibhughanika muno kwa kya nhalo ghula na kakilikonyekeha mwene mu mwoyo ghwake, “Jambuho ayi fwambulo yake niki?”³⁰Ndo lihoka lya Chapanga likinnyanga, “Malia ghukotoke kuyoghopa, Kiyaha Chapanga kakupegha ghumaha ghwake.³¹Nnole, ghwayima ndumbo, na ghutalela mwana nnume na ghwankema lihina lyake Yesu.³²Mwene katabhegha ywa kuhyubhalilwa na bhaankema Mwana ghwa Chapanga ywakabhegha unani mwa hyoha, Bambo Chapanga katantenda kabhe Mutwa kwa kummbegha kiteho kya ghubhutwa kya tate ghwake Daudi.³³Katakitabhala kibheleko kya Yakobu mumanjubha ghoha na Ghubhutwa ghwake ghwabhegha ghwa nga kupela.”³⁴Malia kakilikonyekeha lila lihoka lya Chapanga, “Yaabhegha bhuli mihalu ayi, kiyaha nenga ngali nhinja kamwali?”³⁵Lihoka lya Chapanga likinnyanga, “Nhuki ghwa Chapanga kataghuhikila, na likalama lya Chapanga ywakabhegha unani mwa hyoha lyaakugubika, hinu ywaapala kubhelekwa katabhegha Ywakabhaghulitwe kwakya Chapanga, Mwana ghwa Chapanga.³⁶Ghumanye naha, nnongo ghwako Elisabeti kabha na ndumbo mu ughohi ghwake na hinu ndo mwehi ghwa sita kwa yula ywakamanyikwa kukita ywa nga kulela,³⁷kiyaha kahone lilagho lyanga kuhotolwa kwa Chapanga.”³⁸Malia kakilongela, “Nnole! Nenga ndo nbhandwa ghwa Bambo, ndendelwe tela na lilagho lyako.” Ndo lihoka ghwa Chapanga kakibhuka na kunneka.

Malia kangughenda kunnjambuha Elisabeti

³⁹Mbole ya manjubha gha mandina, Malia kakibha mumwanja na kakiyumbatika mbaka pa kitami kimo kuhitumbi hya Yudea.⁴⁰Kakiyingila mu kitutubhi kya Sakalia na kunnjambua Elisabeti.⁴¹Elisabeti pakayihwite lilobhe lya Malia, mwana ywakabheghite mu lutumbo lwake kakilighalambula, ndo makakala gha Nhuki ghwa Chapanga ghakinhikila Malia.⁴²Kakilongela kwa lilobhe likulu, “Ghunonelwa ghwenga kupitingana kwa adala bhoha naywo yughupala kumpapa kanonelwa!⁴³Nenga ndo ghani, mbaka ma ghwa Bambo ghwangu kanhikile?⁴⁴Kamu panyihwite lilobhe lyako lya kunnjambuha nonono ghwa mu lutumbo lwangu kakiyelelwa na kulighalambula.⁴⁵Ghunonelwa ghwenga ghuhyubhalilite lila lyakaghombite Bambo kukita lyahotoleghwa.”

Nhambo ghwa kutika ghwa Malia

⁴⁶Malia kakilongela,“Mwoyo ghwangu ghunguntika Bambo,⁴⁷Na nhuki ghwangu ghubhegha na chekwa kwa Chapanga ywakannopolite nenga,⁴⁸Kiyaha kangulungwa nenga nbhandwa ghwake nndokwa,Hinu kutandila hinu bhandu bhoha bhanngema yunakunonelwa⁴⁹Kiyaha Chapanga yunamakakala kanndendela mihalu mikulu,Lihina libhaghulitwe kwakya Chapanga ndo lihina lyanga kulihwana na mahina ghangi.⁵⁰Lipyanda lyako ghunguatendela bha aghutundamila,Kuhuma ubheleko mbaka ubheleko.⁵¹Kiyaha katenda mihalo ya mihabho kwa kibhoko kyake,Kabhapwilinganiha bhanaluhimba mumahala gha myoyo yabhe.⁵²Kabhahuluha atabhala muhiteho hya ghubhutwa ghwabhe,peni kabhayinula bhala adokwa.⁵³Kabhayukutiha bhaabheghite na njala kilibhi kya maha,na bhana utopelo kaabhuha kyanga kilibhi kwa mabhoko gha yaghi.⁵⁴Kantangatila nndumitumi ghwake Isilaeli,pakikulungwa kuapegha lipyanda lyake,⁵⁵kakulungwa kuabhoneha lipyanda kwa Abulahamu na ubheleko ghwakeghoha mbaka manjubha ghoha.”⁵⁶Malia kakitama na Elisabeti mu myehi mindatu, mbole kakibhuya ukaya kwake.

Kubhelekwa kwa Yohane Yunakubatisa

⁵⁷Manjubha gha kupapa kwake Elisabeti ghakihika na kakipapa mwana nnume.⁵⁸Paayihwite agheghela na aghanja bhake kukita Bambo kanntendela lipyanda likulu, bhakiyelelwa papamu naywo.⁵⁹Ndo linjubha lya nhano na ndatu bhakihika kudumula unyagho yula mwana, na bhakipala kunkema Sakalia, lihina lya tate ghwake.⁶⁰Peni ma ghwake kakilema, na kakilongela, “Ng'obhe, Lihina lyake kaakemwa Yohane.”⁶¹Bhene bhakinnyanga, “Kahone mundu yumo mu lukolo lwako yuna lihina alyo!”⁶²Ndo bhakinntendela naho Sakalia tate ghwa yula mwana ngati bhamanye mwene katapala kunkema mwana lihina lyoki.⁶³Mwene kakiyupa lihamba lya kutyekela na kakityeka naha, “Lihina lyake Yohane.” Bhandu bhoha bhakikangacha.⁶⁴Pindulu kakiyanda kukambuka kangi na kakinnonela Chapanga.⁶⁵Andamani bhake bhoha bhakiyingilwa na lyogha, na lilagho alyo ghukikwila munnima ghwoha ghwa hitumbi hya Yudea.⁶⁶Ywoheli yula ywakayihwite mihalo ayi kakihwachila mu mwoyo ghwake na kakikonyekeha “Hinu mwana aywo katabhegha mundu ghwa kya bhuli?” Kiyaha makakala gha Bambo ghabhegha papamu naywo.

Ulondohi ghwa Sakalia

⁶⁷Sakalia tate ghwake yula mwana, kakiyingililwa na makakala gha Nhuki ghwa Chapanga na kakilondola naha,⁶⁸“Tunnonele Bambo, Chapanga ghwa Akaisilaeli,Kiyaha kabhahika kuatangatila bhandu bhake na kuakombola.⁶⁹Mwene kakitupegha nlopohi yuna makakalakuhuma mu ubheleko ghwa nndumitumi ghwake Daudi,⁷⁰kakilongela kwa ngulu ya ambuye bhakabhaghulitwe kwakya Chapanga kutandila makachu,⁷¹kukita katatulopoha kwa amyanja bhetuna kutuhumiha mu makakala gha bhala bhoha bhaatulema.⁷²Kakilongela kataabhonela lipyanda atate bhetu,na kaalikulungwa ninganilo liibhaghulitwe na Chapanga.⁷³Kilapo kyakanlapilite Abulahamu hukulu ghwetu,⁷⁴kutulopoha kuhuma mu makakala gha amyanja bhetungati tuntumikile kyanga lyogha,⁷⁵Ngati tubheghe bhakabhaghulitwe na Chapanga na ayitikila bha malaghilo ghake,mumanjubha ghoha gha ubhumi ghwetu.

⁷⁶Ghwenga mwana ghwangu, ghwakemwa mbuye ghwa Chapanga ywakabhegha unani ghwa hyohakiyaha ghwabhegha pa ulongohi gwa Bambona kutendekeha njila kwa kya Bambo.⁷⁷Kubhalandamiha bhandu kukita bhatalopolehwa,kwa kulekekehwa ulemwa ghwabhe.⁷⁸Upalo ghwa Chapanga na lipyanda lyake lyatutenda tubheghe bhakabhaghulitwe na Chapanga,handa nkenge palutuyakila unani mwetu.⁷⁹Kwa twenga tuutama mu kihwili kya lubhindu kya kiho, bhwelo alo lutubhutukilana kutulongoha mu ubhumi ghwa uhihimilo.”⁸⁰Yula mwana kakikula na kuyonjokeheka makakala munhuki. Kakitama ku kibhala mbaka linjubha lila pakabwitukilite kwa Akaaisilaeli.