Read LUKASI 1

LUKASI1ndj_twf

¹Mkomi Teofili, Vandu vatangalili vayesha fivaweshili kuyandika findu yifibwitukili pagati ya yufwi.²Yivayandikili vatuwombilili na vafitovilela findu afi kukandila pafikandilili na vandumindumi va Chilongu cha Nyanyi.³Topi, mkomi Teofili, kwanongwa nembesha findu afi kwa chiganu kukandila pafikandili, ng'ona nyanyi nguyandikili kwa fisingu findu afi yifibwitukili.⁴Ili muweshi kumanya nakaka kwilata findu fila fimuwuliwili.

Kutunga kuwoneka kwa Yohani Mbatisha

⁵Majuva vala Helodi paghaveyi mutwa wa Uyawudi, kwaveli na mtambika yumoyu, litawa lyaki Sakaliya, wa chipinga cha vatambika cha Abiya. Mdamundu afumili mulukolu lwa Haluni, litawa lyaki Elisabeti.⁶Vosi vavili vaveli vanyanyi na vagolili findu fimunowishili Chapanga kwa kukamula Malawu vosi va Bambu.⁷Vaveli na mwana ha, kwanongwa Elisabeti aveli muwumba. Vosi vavili vaveli vagogolu munu.⁸Lijuva limu, Sakaliya aveli akugola chichuku chaki cha kutambika munyumba ya Chapanga, kucha chishovi chaki chipindi cha kuyanga chichuku chaki.⁹Kucha pachiveli chishovi cha vatambika, do yamponikilili Sakaliya kuyenda munyumba ya Bambu kututumisha ubani, topi kayingila.¹⁰Chipindi patutumisheyi ubani, vandu vosi vaveli panji pavamdadavili Chapanga.¹¹Makungu wa Bambu kamubwitukila, kawoloka mwambu wa mlilu wa pala pa fyalu vya kututumishila ubani.¹²Sakaliya pamwonili makungu kasisima, chipwembu chimwingila.¹³Lakini makungu kamuwombela, “Kotoo kutila Sakaliya! Chapanga kapikanila kudadava kwaku. Mdawaku Elisabeti dakuleleli mwana mlumi na yuwi dawumukemi litawa lyaki Yohani mbatisha.¹⁴Na yuwi dawuvi na seku nendu na dausekeleli na vandu vatangalili davavi na seku kwa kuwoneka kwaki!¹⁵Kwa hoshu sha Bambu daghavi mundu mkomi. Dalandi ha difwayi wala chindu chochosi cha kulovela. Mfuki Mng'alili damumemi kufuma munda ya mamundu.¹⁶Mweni davajoveshi vandu vatangalili va Isilaeli na Bambu wawu Chapanga.¹⁷Damuwombeli Bambu, kandi daghavi na mfuki na liwovi kucha Eliya mbuyi wa Chapanga. Davajoveshi pamu kandi vatati na vana, davawuyishi vandu vaveli na lukilu vavi na hoshu sha nyanyi kucha vandu vampikanisha Chapanga, davagoli vandu vayitandili kumuyanga Bambu.”¹⁸Sakaliya amudashili makungu, “Dandivi na chiganu liki kwa afi? Nenga gogola nahau na mdala wangu kagogola.”¹⁹Makungu kayangula, “Nenga Gabulieli ndumindumi wa Chapanga, ndi yandumili nyisi kavawombela achi chilongu cha nyanyi.²⁰Kujumila ng'odu filongu fyangu, ponopa dawuvi ngadeta, mbaka lijuva lila afi dafigoleki na dafibwituki kwa chipindi chaki.”²¹Na vandu vala vamvetileyi Sakaliya vakayikang'anikeyi, “Mbona kayikala nendu mula munyumba ya Chapanga?”²²Pafumili panji kalemwa kudeta nawu vandu vala, akalangusheyi kwa mawoku hela na vandu vakacheyi Chapanga kamlangusha chindu paghaveyi munyumba ya Chapanga.²³Chipindi cha kuyanga kugola chichuku cha kunyumba ya Chapanga payipelili, kawuya kayaki.²⁴Pambeli Elisabeti mdala wa Sakaliya kapata yinda ayikalili pakaya myesi muhanu, kayidetela,²⁵“Ponopa Bambu kang'onela lusungu, kang'ushila soni shangu kwa vandu.”

Kuwoneka kwa Yesu kulanduliwa

²⁶Mwesi wa sita wa yinda ya Elisabeti, Chapanga kamulayisha Gabulieli makungu ayendi Nasaleti mumbwani ya Galilaya.²⁷Avelili na filongu fya kumuwombela mdadala muyenji litawa lyaki Maliya, nondi ya Yosefu, wa lukolu lwa Mutwa Dawudi.²⁸Makungu kamuyendela na kumujambusha, “Hawije! Bambu kava na yuwi, kakugayila usangi!”²⁹Maliya papikanishili filongu fya makungu kasisima munu kayihola, “Filongu afi fina mana liki?”³⁰Makungu kamuwombela, “Kotoo kutila Maliya, Chapanga kakugayila usangi.³¹Daumleli mwana mlulumi na yuwi dawumkemi litawa lyaki Yesu.³²Mweni daghavi mkomi na dakemiwi mwana wa Chapanga Mkomi, Bambu Chapanga damugoli ghavi Mutwa kucha Dawudi mbuyi mundu.³³Daghavi mutwa wa lukolu lwa Yakobi jola na wutwa waki daupeli ng'odu!”³⁴Maliya amdashili makungu, “Milandu ayi dayivi wuliwuli, kunu nenga ngalihela kutang'ana na mlumi?”³⁵Makungu kamuyangula, “Mfuki Mng'alili dakusunukili na liwovi lya Chapanga mkomi dalikugubiki kucha lisisi, ponopa mwana ang'alili dawoneki dakemiwi, mwana wa Chapanga.³⁶Loli, hata Elisabeti mlongu waku vandu vadetili aweshi ha kulela, ponopa kana yinda ya myesi sita na mweni mgogolu nawula.³⁷Kwa hela chindu Chapanga chalemwa.”³⁸Maliya kayangula, “Nenga ndumindumi wa Bambu, chigoleki kwa nenga nga wudetili.” Pambeli yula makungu kawuka.

Maliya akumtyangila Elisabeti

³⁹Majuva vavala vala, Maliya kawopa mwanja kalopokesha mbaka luvagha lumolu luvelili kufidunda fya Yudeya,⁴⁰aku ayingilili munyumba ya Sakaliya na kumujambusha Elisabeti.⁴¹Elisabeti papikanishili jambushilu ya Maliya, mwana chali ajumbili mumunda yaki. Elisabeti amemili Mfuki Mng'alili.⁴²Elisabeti kadeta kwa lishu likomi, kunemeliwa kupita vadala vosi na mwana dawumleli kanemiliwa.⁴³Nengapa ghani mbaka mawu waki Bambu wangu kayisa kundyangila kayangu?⁴⁴Ngukuwombela, pambikanishili paudeta, mwana chali mumunda yangu kalilimuka kwa seku.⁴⁵Nakaka kunemeliwa kwanongwa kujumila fila Bambu fyakuwombilili dafigoleki.

Lumbombu lwa Maliya

⁴⁶Maliya kadeta,“Ndima yangu yikumjuma Chapanga,⁴⁷mundima yangu mukusekelela kwanongwa ya Chapanga mlowola wa nenga.⁴⁸Kang'onela lusungu nenga ndumindumi waki mshisha moyu,kufumila ponopa, vandu vosi davangemi muna seku.⁴⁹Kwa nongwa Chapanga muna liwovi kagolela milandu mikomi,litawa lyaki ling'alili.⁵⁰Akuvalangushila vandu lusungu kufuma lukolu mbaka lukolu,kwa vandu yivamtila Chapanga.⁵¹Kagola milandu mikomi kwa liwoku lyaki.Kavavinga vaveli na lukilu pamu na hoshu shawu.⁵²Kavasunusha vatwa vaveli na liwovi mufigoda fyawukavakwelesha vayidedikili.⁵³Vaveli na njala kavakutisha findu finofu,valundamali kavawusha mawoku hela.⁵⁴Kamtanga Isilaeli ndumindumi waki, payihola lusungu lwaki,payihola lusungu lwaki,⁵⁵Ngimu wavawombilili vavaha vetu Ibulahimuna fileli fyaki jola!”⁵⁶Maliya ayikalili na Elisabeti kwa myesi mitatu, pambeli kawuya kaya yaki.

Kuwoneka kwa Yohani Mbatisha

⁵⁷Chipindi cha kulela Elisabeti chafikili, kamlela mwana mlumi.⁵⁸Vajofi na valongu mundu pavapikanishili kucha Chapanga kamulangusha lusungu lwaki lukomi, wosi vasekelela pamu na mweni.⁵⁹Mwana paghaveyi na lijuma limu, vayisa kumudumula jandu. Vakadayileyi kumkema Sakaliya, litawa lya tati mundu.⁶⁰Kumbi mamundu adetili, “Ng'odu, litawa lyaki datumkemi Yohani mbatisha.”⁶¹Vala vamuwombela, “Mbona kwahela mundu mulukolu lwenu yavelili na litawa ali?”⁶²Topi vamkupisha tati mundu, ili vamdashi akadayileyi mwana waki vamkemi litawa liki.⁶³Mweni kavaluva chibawu ayandiki, kayandika naha, “Litawa lyaki Yohani mbatisha.” Vosi vayikanganika.⁶⁴Bahala pala, mlomu na lulimi lwaki Sakaliya fifuwuka, kakanda kuywanga pamjuma Chapanga.⁶⁵Lyogha livayingila vandu vosi va pabehi yaki milandu ayi yikwila kosi kula kufidunda fya Yudeya.⁶⁶Vapikanishili milandu ayi, vayihola mundima shawu, pavadeta, “Mwana ayu daghavi mundu wa wuliwuli?” Kucha nakaka liwovi lya Bambu Chapanga naliva pamu na mweni.

Lumbombu lwa Sakaliya

⁶⁷Sakaliya tati mundu Yohani kamema Mfuki Mng'alili, kadeta umbuyi awu kufuma kwa Chapanga.⁶⁸Tumujumi Bambu, Chapanga wa Isilaeliloli kavayisila na kuvakombola vandu vaki.⁶⁹Katugayila wakutugombola yagangamalili,mulukolu lwa Dawudi ndumindumi waki.⁷⁰Ajangili kukandila dahili kwa deha ya vambuyi vaki vang'alili.⁷¹Kucha akutugombola mumawoko va vachimdwama vetuna kufuma mumawoku va vosi yivavelili na maya na yufwi.⁷²Adetili davavawoneli lusungu vagogolu vetuna kulikumbuka lilaghanu lyaki ling'alili.⁷³kwilapa kwayilapili kamwilapila Ibulahimu mbuyi wetu.⁷⁴Kadeta, datugomboli mumawoku va vachimdwama vetu,tupati kumtundamila ngajila kuva na lyova.⁷⁵Tuvi vang'alili na vandu golekimajuva vosi va kuyikala mumlima.

⁷⁶“Yuwi mwana wa nenga davakukemi,mbuyi wa Chapanga mkomi,dawumulonguleli Bambu Chapanga kumvendela deha yaki.⁷⁷Dawuvawombeli vandu kucha davagombolewikwa kuvawushila sambi shawu.⁷⁸Chapanga wetu mshishamoyu na muna lusungudatumulikili na limbamba kufuma kumbindi kwa Chapanga,⁷⁹Davang'alikili vosi vayikala mulwisa totolu,ayongeshi mawulu vetu tuyifikili deha ya kusika.”⁸⁰Mwana akulili, mvili na ndima. Ayikalili kuchivala mbaka lijuva payilangushili lipala kwa vandu va Isilaeli.