Read LUKE 1

LUKE1mpx_png

¹Ateu owa Tiyopilo. Valila gamagalau hi gewi bugul bolo hi masal gamameya wasana iyaka hi leli,²hi golugoluwa bolo hi kiteya mataliyaa wali wasa elana. Heliya hi kiteya mataliyaa i telipunaa ana abatelipuna elana, ge heliya hi ola Yehoba wana baaba ana totuwalali inoke wasa o hi baunan eliyama.³He nau bugul bolo ona o ya asimuli-an bubun, ya telipunaa ana abatelipuna elana, inoke ya nuwatu te wasaliya na vatal bubun ge na leli lowan owa gamagal bwabwatana Tiyopilo kaiwem.⁴Inoke nu atena te toto hi panpankiti-an eliyam i tunahot.

Anelose I Pamasal Sakalaiya elana Abwe Elisabet Diyon Tobabitaiso Ni Ab

⁵Helodi Yudiya wali kin wana sauga logugui, he topowon etegana iyoho alana Sakalaiya, iya Abaidiya wana boda ana gamagal etega. Lagona alana Elisabet, iya al topowon houhouwena Eloni tubutubunina etega.⁶Ali toto eluwa wali minamina i waisi Yehoba matanaa, he Yehoba wana logugui ge wana baaba gegewena hi henapuan bubun.⁷Nige natuliya i gagan, kaiwena Elisabet i kobwas. He alona ge lagona Sakalaiya iyaka hi liki.⁸Sauga etegana Sakalaiya wana boda wali sauga tuwalali, he Sakalaiya iya iyoho topowon wali tuwalali i awaawaginol Yehoba matanaa.⁹Yaka pat hi galavenu-an i ola topowon ali logugui, ge gamagal etega nihi hile ni ulutuk Yehoba wana Limi Bwabwalena gamwanaa ge bugul bwalena waiwaisana ni ton ana abatonton pwatanaa. Hi pwawa Sakalaiya te ni ginol, inoke i ulutuk Limi Bwabwalena gamwanaa.¹⁰He bugul bwalena waiwaisana ana sauga tonton elana, gamagalau boda bwabwatana heliya iyoho tola hi awaawanun.¹¹Inoke Babala wana anelose etega i masal Sakalaiya elana i talmilila abatonton labena awonaa.¹²Sauga Sakalaiya anelose i kite, inoke atena i you ge i lovakun.¹³Yaa anelose i baek elana i ba, “Sakalaiya, bahi lovakun! Wam awanun iyaka Yehoba i hago. He lagom Elisabet natum melutauina ni ab, inoke alana nu tun Diyon.¹⁴Iya nuwam ni pwawaisi ge ni payaliyaya-agiwa, ge gamagalau nihi gewi nihi yaliyaya wana masal kaiwena,¹⁵kaiwena iya alana ni bwata Babala matanaa. Bahi oine ge wewel gasigasisena ni iim. He sauga hinana abwe ni ab ya te Yayaluwa Bwabwalena ni kalaopopwi.¹⁶Iya boda Isileli nihi gewi ni ahel pasikalil nihi nem Babala eliyana, heliya wali Yabowaine.¹⁷Wana pagan ge wana gasisi ni ola palopita Ilaitiya, ge iya ni nohouwa Babala awonaa. Iya tamataman aloliyau ge natuliyau ni ahel maniniliya ni abubun, ge bolo Yehoba hi awatautau-an ni ahel pasikalil nuwatu waiwaisana nihi ahe ni ola bolo tosasapol wali nuwatu. He gamagalau ni lovivina-agil Babala wana nem kaiwena.”¹⁸Inoke Sakalaiya i baek anelose elana i ba, “Ga na ola ge na atena wam baaba i tunahot? Kaiwena nau iyaka ya liki, ge lagou al iyaka i liki.”¹⁹Anelose Sakalaiya anana i lahe i ba, “Nau Gabeliyel, sauga gegewena ya talmilila Yehoba manininaa, iya i patunau ya nem na liwaliwan eliyam ge wasa waiwaisana ya na wasaan eliyam.²⁰He nige no baaba u aabulilek-an, inoke nu talpwakum ge nige bosowaina nu baaba ana siga bugul bolo ya nihi masal. He sauga toto Yehoba i hile eliyana te no baaba ni tunahot.”²¹Sauga o elana gamagalau heliya iyoho hi matamatan Sakalaiya kaiwena, ge hi nuwa gewagewa ga i ola ge i minabi Limi Bwabwalena gamwanaa.²²Sauga i tagil nige bosowaina ni baaba elal, nimana ya te i papatuwalali, inoke gamagalau hi atena te pankite etega i masal elana Limi Bwabwalena gamwanaa.²³Sakalaiya wana sauga tuwalali i mowasi, inoke abwe i sikal i na wana panuwaa.²⁴Wana sikal enaa, inoke lagona Elisabet i liyan. He weikena nimala panuna nige i nonomasamasal, i miminaa ya te limiya.²⁵Inoke Elisabet i ba, “Babala i atilomwan-agau, yaka bugul ya i ginol kaiweu ge o puluwawi i ahek yoho gamagalau mataliyaa.”

Anelose I Pamasal Meli elana Iya Yeisu Ni Ab

²⁶Elisabet wana liyan ana weikena sikis-ina gamwanaa, Yehoba anelose Gabeliyel i patuna i na labi Galili panuwana alana Nasaleta,²⁷gamaina matabubuwa etega elana. Iya alona ge tau etega alana Yosepa, iya Deibid tubutubunina, hi kawakawalolu. Gamaina matabubuwa o alana Meli.²⁸Anelose i na elana ge i ba, “Ateu owa Meli. Babala i minaa eliyam ge iyaka i muloluagiwa.”²⁹Meli anelose wana baaba o i hago, yaka atena i bwanabwana nabi inoke i nuwatu loyaloya ge i ba, “Ba mulolu ya ana sapu ga i ola?”³⁰Yaa anelose i baek elana i ba, “Meli, bahi lovakun. Yehoba iyaka i muloluagiwa.³¹He abwe nu liyan ge wawaya melutauina nu ab, yaka alana nu tun Yeisu.³²Iya ni tobwabwatana gamagalau mataliyaa, ge nihi awa Tomihahaina Hot Natuna-an. Tubuna Deibid wana abalogugui Yehoba Yabowaine ni pek elana,³³ge iya ni tabwa Yakobo tubutubunau wali kin mihomihotina. Wana abalogugui nige ni momowasi.”³⁴Inoke Meli i nel anelose elana i ba, “Ga ni masal ola? Kaiwena nau nigeya ga sauga etega alou tau etega ha kekenu.”³⁵Anana anelose i lahe i ba, “Yayaluwa Bwabwalena ni lau eliyam, ge Tomihahaina Hot wana gasisi ni yabomwiwa. Inoke wawaya toto abwe nu ab ni bwabwalena ge nihi awa Yehoba Natuna-an.³⁶U kite, tutum Elisabet valila gamagalau hi awa kobwakobwasi ge bwagana iyaka i liki, he iyaka i liyan ge wana weikena sikis-ina te.³⁷Nige bugul etega i pupulowan tage Yehoba nige bosowaina ni ginol.”³⁸Yaka Meli anelose anana i lahe i ba, “Nau Babala wana totuwalali loloyowanina. He ni masal eliyau ni ola toto u baunan.” Inoke anelose Meli i eguluwan.

Meli I Na Elisabet I Kite

³⁹Sauga toto o elana, Meli i lut ge etimwawa i egon, i na Yudiya awanina etega, iyoho labi oyana gaganina elana.⁴⁰Sauga i vin, yaka i na i ulutuk Sakalaiya wana limiya ge i pata ateu owa Elisabet elana.⁴¹Sauga Meli wana pata ateu owa Elisabet i hago, inoke wawaya i lamwalamwaniu tinenaa. Elisabet Yayaluwa Bwabwalena i kalaopopwi,⁴²inoke i baaba anana i bwata i ba, “Yehoba iyaka i muloluagiwa, am mulolu yowau gegewel ali mulolu i bwata lake. Ge wawaya toto abwe nu ab Yehoba i muloluan al.⁴³Ga i ola ge owa no Babala hinana o awatauwan bwabwatana u ginol ge u nem u kiteyau?⁴⁴Sauga wam pata ateu owa ya hago i tuk tanawa, inoke wawaya i yaliyaya ge i lamwalamwaniu tinewa.⁴⁵Yehoba i muloluagiwa, kaiwena u abulilek te Babala ni ginol ni ola wana baaba eliyam.”

Meli Yehoba I Tobalan

⁴⁶Inoke Meli i ba:Atewa Babala ya tobalan,⁴⁷ge yayaluwau i yaliyaya Yehoba no Topwamwal elana.⁴⁸Ya tobalan kaiwena bwagana nau wana totuwalali nige no waisi i gagan, iya i atilomwan-agau.He sauga ya ge sauga i nenem heyan ge heyan nihi baaba kaiweu nihi ba, “Yehoba i muloluan.”⁴⁹Ya tobalan kaiwena Yehoba Togasisi bugul bwabwatal i ginolil kaiweu.He iya i bwabwalena.⁵⁰Heyan ge heyan elal, bolo hi awatauwan wana atilomwan i gangan elal.⁵¹Nimana elana ginol bwabwatal i ginolil,ge bolo totoliya hi teli heyagil ge hi nuwatu tage alaliya i bwata, wali boda i tagalekaleka-an.⁵²Tologugui bwabwatal i ahek yohil abaliyaa ge i teli lowagil,inoke bolo nige alaliya i gagan i teli heyagil.⁵³Bugul waiwaisal i guyauan togalebu elal hi kalaopopwi,yaa togogomwau i patuna yohil nimaliya enoenovana ya.⁵⁴Wana totuwalali boda Isileli i label,ge nige i nunuluwan te ni atilomwan-agil,⁵⁵ni ola wana bateli tubulau elal,ni ola wana bateli Abalahama ge tubutubunau heyan ge heyan elal.⁵⁶He Meli i miminaa ga to Elisabet eliyana sauga ana yapu i ola weikena eton, yaka abwe i sikal i na wana awana.

Diyon Tobabitaiso wana Masal Wasana

⁵⁷Elisabet wana ab ana sauga i pwawa, inoke i ab natuna melutauina.⁵⁸Wana heliyamwau ge tutunau wasa hi hago te Babala Elisabet i muloluan nabiyan, inoke avaliya hi yaliyaya toyawa.⁵⁹Wawaya wana lan eiti pwawa inoke hi nowanik ge ana gotomwa yoho paganina nihi ginol. Tage tamana Sakalaiya alana nihi tun pwatanek elana,⁶⁰yaa hinana i ba, “Bahiwa! Alana nuku tun Diyon.”⁶¹Yaka hi baek elana hi ba, “Tutumiyau gamwaliyaa, nige etega alana i oola to.”⁶²Inoke nimaliya hi patuwalali ge eliyana tamana hi neli nuwana hauna alan ni tun wawaya elana.⁶³Sakalaiya abaleleli etega i awanuni elal, inoke i leli i ba, “Iya alana Diyon.” Inoke gegewel ateliya i you.⁶⁴Sauga o elana Sakalaiya awana i mwapwela ge bosowaina ni baaba, yaka i telipuna i baaba ge Yehoba i tobatobal-an.⁶⁵He wali heliyamwau gegewel bugul o hi kite inoke hi lovakun nabi. Yaka bugul ya gegewel wasaliya i lelu i na panuwa gegewel elal bolo hi minaa Yudiya labi oya gaganina elana.⁶⁶Gamagalau gegewel bolo wasana hi hago hi nuwanuwatu-an ge hi nel hi ba, “Wawaya ya bwaliga ni tabwa hauna kaba gamagal?” Kaiwena hi atena te Babala i matahikan ge i labe.

Sakalaiya Yehoba I Tobalan

⁶⁷Diyon tamana Sakalaiya Yayaluwa Bwabwalena i kalaopopwi inoke i palopisai Yehoba wana baaba i baunan i ba:⁶⁸Babala ta tobalan, iya Isileli wala Yabowaine,iya i nem kila wana gamagalau ni labela ge ni sokalila.⁶⁹Wana totuwalali Deibid tubutubunau gamwaliyaa,Topwamwal gasigasisena etega i pamilil kaiwela,⁷⁰i ola houhouwena wana bateli palopitau bwabwalel hi baunan.⁷¹Topwamwal o iya ni pwamwalila ala topihigelgel ge bolo nige hi nunuwana-agila elal.⁷²Inoke tubulau i atilomwan-agil,ge wana bateli toto iya totona i ginol i nuwahikan.⁷³He iya i ba papasila tubula Abalahama elana,⁷⁴i bateli te ni pwamwalila ala topihigelgel nimaliyaa,yaka nige ta lolovakun, yaa yawalila miminana ta tapwatapwalolo eliyana,ge wala pagan ni sapu ge ni waisi matanaa.

⁷⁶He owa natu, abwe gamagalau nihi ba owa Tomihahaina Hot wana palopita etega,kaiwena nu nohouwa Babala awonaa ge kamwasa nu lovivina-an iya kaiwena.⁷⁷He nasi wana gamagalau nu pankitelwala Yabowaine atilomwan i kalaopopwi ge wana pagan i meimei,inoke nuwana wali gegi ni nuwayoho ge pwamwal nihi pwawa.Iya sabwelu mwananalina ni patunem labulabumwa,⁷⁹inoke bolo hi minaa gogouwa ge yaomal ligumwina elana ni yanel,ge ni nulila mibubun ana kamwasa elana ta nanawa.⁸⁰Wawaya i bwabwata nawa ge yayaluwana al i mamatuwa nawa. Inoke i na i miminek uleya labi kekevana elana ana siga lan toto wana tuwalali i telipuna-an boda Isileli mataliyaa.