Read Luka 1

Luka1mpa_twf

¹Unkolongwa Teofile: Bhandu bhamaheli bhakatumbwi kulemba ngati mobhawezi panani ja mambu ghaghatendakiki pa chilanda jitu.²Bhakalembiki ngati ghabhakatupwaghili na bhandu bhabhakaghaweni mambu ghanighala kutumbu pakutumbula na bhandu bhalabhala bhabhatangizi ubholu ghonighola.³Wenga Unkolongwa, nenga nanatu panakalingalaki wichu kutumbu paghatumbulaje, nakaamwi kukulembela malobhi ghanihagha kwa kulongana.⁴Nihenga bhenibhela nahuli na wehapa uweza kumanya uchakaka wokapi wa mambu ghabhakakubholiki.

Kubhelakeka kwaka Yohana Mbatizaji kulotakeka

⁵Chikahi Helode paakabhi nkolongwa wa ku Yudea, kukabhi na mpenganyambiku jumu lihina laki Zakalia, akahumi mu lukolu lwa kibheleku chaka Abiya. Nhwanu waki alowakika Elizabeti, najombi akahumiki mu lukolu lwaka mpenganyambiku Aroni.⁶Zakalia na nhwanu waki Elizabeti bhakabhi bhandu bhambone palongi jaka Chapanga, koni bhakakamulakya wichu amuli na malaghalakilu ghokapi ghaka Bambo.⁷Nambu bhombi bhakabhi panga na bhana, maghambu Elizabeti akabhi ngulumba, na bhokapi bhakabhi bhaseja nakanopi.⁸Lichobha limu, Zakalia jakabhi zamu jaki ja kuhenga lihengu la upenganyambiku mu Nyumba jaka Chapanga,⁹Zakalia akahaghuliki kwa gudugudu ngati mowabheli ntetu wa upenganyambiku. Henu akajingi mu Nyumba jaka Bambo nahuli kuhuwa ubane.¹⁰Chikahi cha kuhuwa ubane pachaheghalili, bhandu bhokapi bhakabhi kunja bhakundobha Chapanga.¹¹Bhela mtumika wa kunani waka Bambo akumpitalili, akabya ajemi upambala wa kumalelelu wa meza ja kuhuwi ubane.¹²Zakalia paakambweni mtumika wa kunani waka Chapanga jola, akakangichi namaa na akatwelili choghohi.¹³Nambu, mtumika wa kunani akumpwaghili, “Zakalia, ngawijoghopa! Chapanga ajowini kulobha kwaku. Elizabeti nhwanu waku anaakubhelakya mwana wa chikambaku, na wenga wandoha lihina laki Yohana.¹⁴Wenga anauhekalya nakanopi na kululuta, na bhandu bhamaheli anabhahekalya kwa kubhelakeka kwaki.¹⁵Maghambu Yohana anaabya mtumika nkolongwa palongi jaka Bambo. Ngaikunywi divai wala uwembi. Na jombi anaatwelakika Roho Mhuhu hata mangane ja kubhelakeka kwaki.¹⁶Jombi anabhakelabhua bhandu bhamaheli bha ku Izilaeli bhakelabhuka kwaka Bambo Chapanga wabhu.¹⁷Anaalongulya palongi jaka Bambo, anaakubha na makili na roho ngati jaka mlota Eliya. Anabhakelabhua akatati bhajongana na bhana bhabhu, anabhakelabhua bhandu bhangakutii bhabya bhandu bhabhuntii Chapanga, na kubhabheka bhandu bhaliandiya kunjopale Bambo.”¹⁸Zakalia akundaluki mtumika wa kunani kwaka Chapanga, “Bho, anamanya bhole ngati chindu hechi anachibya bhenibhela? Nepani nuncheya, na nhwanu wangu bhelabhela akongapile.”¹⁹Mtumika wa kunani kwaka Chapanga jola akayangiki, “Nepani nde Gabilieli. Nenyema palongi jaka Chapanga, ndumakiki nongila na wehapa na nukupwaghila malobhi manyahi ghani.²⁰Jowanya, anaubya umpuli maghambu ngacheuhobhali malobhi ghangu ghaghihengakika kwa chikahi chaki, ngawiwezi kulongela mbaka ghangani ghanukupwaghili paghipitilaje chakaka.”²¹Chikahi hechi bhandu bhakabhi bhundendale Zakalia kunja koni bhakakangacha kwa kukabhakila kwaki mu Nyumba jaka Chapanga mola.²²Panihapa papitiki kunja, ngacheaweziki kulonge nabhu, bhela bhombi bhakamanyi kubha aweni mabhono mu Nyumba jaka Chapanga mola. Akajendali kulonge nabhu kwa nginyulila ya mabhoku ghaki, maghambu akabhi mpuli.²³Machobha ghaki gha kuhenga lihengu mu Nyumba jaka Chapanga paghajomwiki, Zakalia akabujiki kunyumba jake.²⁴Paghapetiki machobha machokope nhwanu wake Elizabeti akapatiki chitumbu. Akalihiiki munyumba kwa chikahi cha myehi nhwanu.²⁵Elizabeti akapwaghike, “Lendenu nde leandendi Bambo, aningalili na kumokela hiyoni pamihu ja bhandu!”

Kubhelakeka kwaka Yesu kulotakeka

²⁶Pamwehi wa sita Chapanga akantumiki mtumika waki Gabilieli kujenda mbaka ku muchi wa Nazaleti, ku inchi ja Galilaya.²⁷Akuntumiki kwaka mwali jumu bikila joalowakika Malia, joakabhowakiki hweku na nkambaku joalowakika Yusufu, joakahumi mu lukolu lwaka Nkolongwa Daude.²⁸Mtumika wa kunani kwaka Chapanga akunhiki mwali jola na kumpwaghila, “Monile! Bambo abhi papamu na wehapa, najombi atehi kukupengalela!”²⁹Malia paakajowini malobhi ghanighala, akaholali nakanopi muntima waki, panihapa akakangichi, akapwaghaje, “Ulamukilu hoghu ndandi jaki kike?”³⁰Mtumika wa kunani kwaka Chapanga jola akumpwaghile, “Malia, ngawijoghopa! Maghambu upatiki chihomu palongi jaka Chapanga.³¹Lingalyaje, anaupata chitumbu na anaumbelaka mwana nkambaku, na wandoha lihina laki Yesu.³²Jombi anaabya nkolongwa analowakika Mwana waka Chapanga Nkolongwa joabhi Kunani Nakanopi. Na Bambo Chapanga anaampekya chiteu cha ukolongwa chaka hokolu waki Daude.³³Jombi anaabya nkolongwa wa lubheleku lwaka Yakobo mileli, na ukolongwa waki ngawijomoke!”³⁴Malia akamuyangiki mtumika waka Chapanga jola, “Nepani nde mwali bikila. Henu, bho, lijambu heli analiwezikana bhole?”³⁵Mtumika waka Chapanga akamuyangiki, “Roho Mhuhu anaakuhelalya panani jaku, na makili ghaka Chapanga anaghakuyekaje. Henu mwana Mhuhu anaabhelakikaje, analowakika Mwana waka Chapanga.³⁶Ukombuka kabheti ndongu waku Elizabeti, apatiki chitumbu koni akabya ncheya, na sajenu abhi na chitumbu cha myehi sita, jombi joalowakika ngulumba.³⁷Maghambu nga chindu chechilepa kuhengakeka kwaka Chapanga.”³⁸Malia akapwaghike, “Nepani mtumika waka Bambo, ibya kwangu ngati moupwaghile.” Panihapa mtumika wa kunani jola akabhokike.

Malia anjende Elizabeti

³⁹Machobha gha palongi, Malia akajombatiki kujenda ku muchi ghumu ghoukabhi ku inchi ja itombi ja ku Yudea.⁴⁰Konihoku akajingi mu nyumba jaka Zakalia na kundamuki Elizabeti.⁴¹Elizabeti paajowana Malia andamukila, mwana joakabhi mulutumbu jaki akatehi kuhomba. Elizabeti akatwelakiki Roho Mhuhu,⁴²akajamalili kwa kupwagha, “Upengaliki wehapa pachilanda ja akambomba, na mwana jowambelakaje apengalike!⁴³Bho, maghambu kiki lijambu likolongwa heli limbitali nepane, mbaka mabhu waka Bambo wangu anihiki nepane?⁴⁴Panyowana ulamukilu waku, mwana joabhi mulutumbu lwangu akahombiki kwa chiheku.⁴⁵Upengaliki wehapa maghambu uhobhalili kubha analipitalya lijambu leakupwaghi Bambo!”

Nyembu jaka Malia

⁴⁶Malia akapwaghike,“Mtima wangu undumbali Bambo,⁴⁷roho jangu junhekalela Chapanga Mkengalela wangu,⁴⁸maghambu angombwiki nepani nuntumika waki nenilihelea!Kutumbu sajenu na kujendalela ibheleku yokapi anabhanoa mpengaleka.⁴⁹Maghambu Chapanga Mweni Makili andendi mambu makolongwa.Na lihina laki nde lihuhu.⁵⁰Chiha chaki chabhajendela bhandu bhabhunjojabhela,kutumbu chibheleku mbaka chibheleku chenge.⁵¹Atendiki mambu makolongu kwa chiwoku chaki.Abhalekanishi bhandu bhabhabhi na ing'omu, mu maholalelu gha mintima jabhu.⁵²Abhaheli bhakolongwa kuhuma pa hiteu yabhu ya ukolongwa,abhakwehiki akakahochu.⁵³Abhatupalishi bhabhabhi na injala kwa hindu yambone,na bhanamali abhatopwi mabhoku matopu.⁵⁴Anjangati mtumika waki Izilaeli,na ngacheajewiki kundangi chiha chaki.⁵⁵Ngati mobhalaghali akatati bhitu,Ibulahimu na lubheleku lwaki, mbaka mileli!”⁵⁶Malia akatemi na Elizabeti kwa chikahi cha myehi jitatu, na akakelawiki kunyumba jake.

Kubhelakeka kwaka Yohana Mbatizaji

⁵⁷Chikahi cha kulibhopola kwaki Elizabeti ukahikiki, akalibhopwi mwana wa chikambaku.⁵⁸Bhandu bha pambipi jaki na bhalongu bhaki bhakajowini Bambo amboni chiha nakanopi, bhokapi bhakahekali papamu naku.⁵⁹Mwana paahiki machobha nane bhakahiki kunheketa jando. Bhakapaliki kumpeke lihina Zakalia, lihina la atati waki.⁶⁰Nambu mabhu waki akapwaghiki, “Ngabhela! Lihina laki analowakika Yohana.”⁶¹Bhandu bhakumpwaghile, “Bho, mbona njeta mundu jokapi mu lukolu lwaki joabhi na lihina lenihele?”⁶²Bhela bhakalongi naku kwa nginyulila ya mabhoku atati waki nahuli bhapata kumanya apalika mwana waki andoha lihina bhole.⁶³Zakalia akalobhiki chibau cha kulembela, akalembiki ana, “Lihina laki Yohana.” Bhandu bhokapi bhakakangiche!⁶⁴Palapala Zakalia akaweziki kulonge kabhete, akatumbwili kulonge kabete, na kundumbalila Chapanga.⁶⁵Bhandu bha pambipi jaki bhakajowipi, na malobhi hagha ghakajaghani ku inchi jokapi ja hitombi ja ku Yudea.⁶⁶Kila mundu joakajowini malobhi hagha akaholalili na kulilalukila, “Bho, mwana jonjo anaabya wa ntundu bhole?” Maghambu makili ghaka Bambo ghabhi papamu naku.

Ulota waka Zakalia

⁶⁷Zakalia, atati waka Yohana akatwelakiki Roho Mhuhu, na kupwagha ulota agho,⁶⁸“Leka tundumbalya Bambo, Chapanga wa Izilaeli!Maghambu abhahikili bhandu bhaki na kubhakombola.⁶⁹Atupeki tepani Mkengalela mwana makile,nchokolu waka mtumika waki Daude.⁷⁰Ngati moakalongali kutumbu pamwandi kupete bhalota bhaki bhahuhu,⁷¹kubha anaatukengalya kuhuma mu mabhoku gha maadui bhitu,na kuhuma mu makili gha bhokapi bhabhatuhakalila.⁷²Akapwaghiki anaabhonila chiha bhazee bhitu,na kulukomboka Lulaghilu lwaki luhuhu.⁷³Akundapi Ibulahimu atati witu,⁷⁴kubha anaatukengalyaje kuhuma kwa maadui bhitu.Na kunjojabhe Chapanga panga choghohi,⁷⁵henu tupalika tubya twabhahuhu na tubya bhandu tetujetakalewa palongi jaki,machobha ghokapi gha womi witu.”

⁷⁶“Wenga wa mwanangu, anaulowakika mlota waka Chapanga joabhi Kunani Nakanope.Anaundongulya Bambokundenganakela indela jaki,⁷⁷kubhatangazi bhandu bhaki anabhakengaliwajekwa kulekakewa mahoku ghabhu.⁷⁸Chapanga witu abhi na chiha na mtima wambone.Anaatumulakya unang'anu kuhuma kunani,⁷⁹nahuli kubhamulakila bhokapi bhabhabhi mu lubhendu na mu chihilu cha kupotela,na kutulongo magholu ghitu mwindela ja lukwale.”⁸⁰Mwana akakoliki na kujonjukeka makili mu roho, akatami kuchingwenji mbaka lichobha lela paalilangia palanga kwa bhandu bha Izilaeli.