Read Luke 1

Luke1kqc_wbt

¹Theophilus amiye tora, amiye tau tora yaku beika vegu una rofu Sei yaku moi ogau riyo, bi sena bura reyadi. Mina vegu vata ni baeyo rofu, mina nifeidena vene ini ouresi ini ne yaku mina vegu veyadi, ma ina vene ka bi mina ago di naivo vene. Kamini ini sina niodoro reyadi, resi nidedi mini, una rofu. Mina dada, Theophilus, nai mokena bi mina sina dudusa bura rei mona regida, resi moi feidegida ya rofu, adina mina vata niyo vegu bi, sena baku rei mona reyaka, ini vata ni baeyo gutuna.⁴Makai reyaka dada, yi adari ae mona regiya, ya rofu beika vegu ya oteimaradi bi, rama vata niyadi.

John Baptist di vata nina niogau reyo

⁵Herod yaku Judea gaganirikini niyori, Sei ma amiye utari naivo amiye yokoi roka Zechariah amegamo; ina bi Abijah di vene amiye yokoi. Ini rema di roka bi Elizabeth. Iniye ka, Sei ma amiye utari naivo amiye roka Aaron di tutubena rema.⁶Ina remanu bi Sei di nemokori mokena rorobo nufa, Sei di ago vava tau vakoi, ma Varika amiye di ago gira, ma mokena sina tau vakoi ka moi gira rigamadi.⁷Ina remanu bi mida de, adina Elizabeth bi natu, ma ini marukasa ka ugava iniye niyadi.⁸Yokaru, Zechariah bi Sei nivakena yavari, Sei di nemokori, Sei ma amiye utari naivo amiye di moimai regasa amedo, adina mina meda bi ini vene bedakai di moimai ari.⁹Kamini Sei ma amiye utari naivo vene di rededi kana, ina vene yaku laki isirari gutuna Zechariah moiyadi, ma bi Varika amiye nivakena yava ideri orina vata fafau sisika buni muramura origi.¹⁰Ma amiye tau tora iniye bi etofaro are regamadi, usa usa nigamadiri, bi sisika buni muramura oriyo.¹¹Mina medari, Zechariah yaku Varika amiye di naivo naivo vima yokoi veyo, sisika buni muramura ori sisika rena fore fata vana rama rofu are reyo.¹²Zechariah veyori, bi tururu resi ini uka ideri ori no iniye niyo.¹³Idu naivo naivo vima yaku niyo, “Zechariah ori ga re, Sei yaku yi usa nina neideyo. Yi rema Elizabeth yaku yi mida yokoi evata rego, ini roka nigiya bi John.¹⁴Ada no iniye nigedi, ma amiye tau gade ka ada regedi, John vata nigo dada!¹⁵Adina bi Varika amiye di nemokori bi amiye tora yokoi. Ina bi koru gira o waini de irigo; ina bi ini nono di ukari Vima kikifa ya sena vata baeyo.¹⁶Ina yaku Israel vene tau gade ini Varika amiye Sei rofu moi dairigo.¹⁷Ina bi Varika amiye di naivo naivo amiye, kaere bi ourei bobigo, Sei di ago nido amiye Elijah di vima ma vava nufa. Ina yaku baba vene di uka moi kero regori, bi ini midasa uka yokoi maka dudu amebigedi. Ina yaku vegu no vene moi kero regori, bi mokena rorobo vene di mokena amebigedi. Adina Varika amiye di vene moi egogo resi Varika amiye di dego meda nari rebigedi.”¹⁸Zechariah yaku mina naivo naivo vima rofu nikabai resi niyo, “Sina nisa bi gokai moi rama rego diba nigida? Na bi amiye ugava, ma nai rema ka ugava.”¹⁹Ma nikabai resi niyo, “Na bi Gabriel, na bi Sei di nemokori are reida. Ya rofu na nifeideyo, mina sina buni ya nigida.²⁰Idu ya bi nai sina buni rofu mokena vari gira de aeyo. Mina dada ya bi babo nisi ago de nigiya; nai niyaka kana ogau nigo mamo ago nigiya. Nai sina tau niyaka, bi ini meda iniyeri vata nigo.”²¹Zechariah bi Sei nivakena yava ideri amei doba regamo dada, amiye tau ina nari regasa mokena tau moigamadi.²²Etofaro yakuyori, bi amiye nikabai de reyo, dada mokeyadi ina bi Sei nivakena yava ideri rebe yokoi veyo. Ini vena babo niyo dudu maka, amiye oteimaro ina bi rama iniye rebe yokoi veyo. Ina babo nisi bi toga toga ina vene rofu rebe reyo.²³Zechariah ini moimai ari koina niyori, bi ini rautu rofu dairiyo.²⁴Mina ari koina niyori, bi ini rema Elizabeth rivo niyo. Mina rivo niyori, bi eyo 5 ini yavari maka amegamo. Elizabeth yaku makai niyo,²⁵“Gua Varika amiye yaku na rofu ada reyo. Ina yaku nai maena bi amiye di nemokori erufuyo!”

Iesu di vata nina niogau reyo

²⁶Elizabeth ini rivo niyo eyo 6 ri, bi Sei yaku naivo naivo vima roka Gabriel Galilee di taoni yokoi roka Nazareth rofu nifeideyo.²⁷Rema ofi yokoi bi amiye yokoisa varena kode mironari amegamo, iniye bi amiye roka Joseph nikake reyadi, bi megedi. Joseph bi kini David di tutubena amiye yokoi. Mina rema di roka bi Mary.²⁸Mina naivo naivo vima bi Mary rofu bosi niyo, “Rema mida,Sei ya rofu sena ada reyo, ma Varika amiye bi yasa amedo.”²⁹Ma mina sina neideyori, bi ori tora gade resi mokegamo mina ago di rama adina iniye bi beika.³⁰Naivo naivo vima yaku niyo, “Mary, ori ga re, adina Sei bi sena ya rofu uka ada reyo.³¹Ya bi rivo nisi rumana mida yokoi moi evata resi ini roka bi Iesu, vo nigiya.³²Ina bi amiye tora iniye nigo, ma ini roka Sei Odoro iniye di Mida vo nigedi. Varika amiye Sei yaku ini tutubena David di vava moi mago.³³Ma ina bi Jacob di tutubena fafau toga toga ourefeidebobigo. Ini ourefeidena amena sana bi koina de nigo!”³⁴Mary yaku nikaitesi niyo, “Na bi rumanasa varena kode. Mina bi gokai vata nigo?”³⁵Ma nikabai resi niyo, “Vima kikifa bi ya rofu dego, ma Sei Odoro iniye di vava ya fafau ameinu rego, mina dada mina mida kikifa bi Sei di Mida, vo nigedi.³⁶Ma va moke, yi davatu Elizabeth, ina bi ugava nufari, sena rivo niyo; amiye yaku nigamadi bi mida de moigo, vo niyadi, idu ini eyo 6 bi mini,³⁷adina bi vegu yokoi de Sei yaku moi rama de rigo.”³⁸Mary yaku niyo, “Na bi Varika amiye di naivo rema. Yi sina niyo kana, na rofu vata nigo bi buni.” Kamini mina naivo naivo vima ina feresi diyo.

Mary yaku Elizabeth rofu odi diyo

³⁹Mina medari, Mary dadisi evade omuna ikari taoni yokoi Judea gaganiri boi neyo.⁴⁰Zechariah di yava ideri dui resi Elizabeth rofu yuata niyo.⁴¹Elizabeth yaku Mary di yuata nina ago neideyori, bi ini mida ini rivo ideri kita reyo, ma Vima kikifa yaku Elizabeth di roaitari vata baeyo.⁴²Kamini dadisi goroka tora dudu niyo, “Rema tau di fogori bi ya maka bi buni tora gade! Ya yaku evata regiya mida ka buni tora iniye nigo!⁴³Nai buni bi beika dada, ma nai Varika amiye di nono bi na rofu odi baeyo mini?⁴⁴Adina bi yi yuata nina neideyakari, nai mida bi nai rivo ideri ada resi kita reyo.⁴⁵Varika amiye di ago ya rofu niyo, ma ya bi mina rofu mokena vari gira aeyo. Ina bi buni tora gade ya mago dada!”

Mary Sei di roka moi odoro risi nina di yauta

⁴⁶Kamini, Mary yaku niyo,“Nai vima yaku Varika amiye di roka moi odoro risi nido;⁴⁷Nai vima yaku ka Sei na moi vegu rido amiye rofu ada redo,⁴⁸Adina bi na, ini naivo rema, na mokeyo mini!Ma mina dada gua ameibobinari, amiye tau yaku nigedi, Sei bi buni tora gade na maro.⁴⁹Adina bi Vava iniye amiye yokoi maka yaku vegu tora iniye na fafau moi vata riyo,ini roka bi kikifa.⁵⁰Ini iriyeduka bi kaere ina rofu kikifa iniye rededi vene fafau amebigo.Mina vene kaere bi ini tutubena vene fafau ka amebigo.⁵¹Ini vana yaku ini yeiva bi sena moi ogau riyo,ma matuka vene ini mokenasa ina yaku meki reyo.⁵²Ina yaku ourefeidena vene di amena vava sanari eyarei vau reyo,resi matuka de vene, bi ina yaku moi odorori vau reyo.⁵³Rauna amededi vene, bi ina yaku buni ini ukari moi vata baeyo.Resi gugura tau amiye, bi ina yaku vana koina moi feidei diyo.⁵⁴Ini naivo vene Israel aedeyo,ini iriyeduka mokeyo dada.⁵⁵Ma uni tutubena vene toga toga ago niyo,Abraham ma ini tutubena rofu!”⁵⁶Kamini Mary bi Elizabeth sa eyo regodenu amesi ini rautu rofu dairiyo.

John Baptist vata niyo

⁵⁷Elizabeth di mida moina ari okiyori, rumana mida evata riyo.⁵⁸Kamini ina atafu amededi vene ma ini usika ourena yaku Varika amiye di iriyeduka tora ina rofu vata niyo sina neidegasa bi inasa ada no iniye iniye niyadi.⁵⁹Meda 8 ri, bi rumana mida di ini roaita nugagedi vonisi, egogo resi ini baba di roka Zechariah vo nigedi.⁶⁰Idu ini nono niyo, “Ide, ini roka bi John.”⁶¹Ina vene yaku niyadi, “Idu yi usika ourena bi mina roka bi koina!”⁶²Kamini ina vene yaku vana dudu ini baba nikaiteyadi, ini roka bi beika nisi mago.⁶³Zechariah yaku bura rena buka yokoi nikaitesi yomakai bura reyo, “Ini roka bi John.” Ina tau noibanu vakoi tururu reyadi!⁶⁴Mina medari, Zechariah dudusa ago niyo. Resi Sei rofu moi odoro rina ago buni niyo.⁶⁵Mina dada, ori yaku ini atafu ameyadi vene tau di uka vata baeyo, ma mina vegu di sina bi Judea omuna gagani tau rofu ni nega bogasa reyadi.⁶⁶Mina sina neideyadi vene tau yaku mokesi niyadi, “Mina mida yaku beika vegu moi ogau rigo?” Adina Varika amiye di vava bi mina mida fafau amedo mini.

Zechariah di ada reyo yauta Sei rofu

⁶⁷Vima kikifa yaku John di baba di uka vata baeyo dada, Sei di ago niyo:⁶⁸“Varika amiye ni moi odoro rinadi, kaere bi Israel di Sei!Adina bi una aedegi desi ini vene moi vegu riyo.⁶⁹Moi vegu rina amiye una maro.Ina bi ini naivo amiye David di tutubena gutuna deyo.⁷⁰Sei di ago niyadi vene kikifa yaku mina amiye fafau senagi senagi niyadi,⁷¹uni tuma vene rofu una moi vegu risiuna gubuyo rededi vene tau di vava gutuna una moi vegu rigo.⁷²Sei yaku ina rofu niyo bi uni tutubena vene rofu ini iriyeduka moi ogau risiini uka ago kikifa toto de nigo.⁷³Uni tutubena Abraham rofu nitore reyo,⁷⁴bi uni tuma vene rofu una moi vegu rigo.Ina rofu naivo renadi ma ori ga renadi ida riyo.⁷⁵Kikifa dudu, mokena rorobo dudu, ini nemokori dinadi,uni vegu ameibobina meda tauri.

⁷⁶Ma ya, nai mida, bi Sei Odoro iniye di ago nido amiye, vo nibigedi,adina ya bi Varika amiye ouresi dibigiya,resi ini ida dogo regiya.⁷⁷Ini vene oteimagiya ma Varika amiye yaku moi vegu rigo bi diba nigedi,ini vegu no koite makugo di.⁷⁸Adina Sei di iriyeduka una rofu bi ini ukari vata baeyo,ina yaku uriyaku meda vabara kana omari gutuna una rofu nifeidego.⁷⁹Mukuna ideri ma muyena tumusa vene rofu mina vabara mago,resi ina yaku uka amuta di ida dudu una ourefeidebogo.”⁸⁰Ma mina mida kamini tora nigamo, ma ini vima ka yeiva nigamo. Ina bi gagani autu sanari amegamo, bogo Israel vene rofu ini ogau nigo medari mamo.