Read LUKA 1

LUKA1kij_png

Igini paila Tiopilo

¹E, mwa! Tiopilo:Tommoya matausina, tapwaroru kala togisabogwa deli kala towotetilabogwa, isakaidasi uvagila tapwaroru.²E bidubadu bogwa ivigikonaisi leiginisi livalela vavagi makwaisina avaka bogwa leikaloubusisi oluwalaidasi.³Yeigu tuvaila anagi makawala, paila bogwa lanevi kala duwosisia vavagi komwaidona metoya okasi vitouula. E Tomoya, magigu bagini duwosisia paila yoku,⁴kidamwa bukunikoli kala kamokwita paila vavagi makwaisina avaka leivitulokaimsi.

Anelosi ivitububoti la kaloubusi Yoni Tobapitaisi

⁵Ola tuta Erodi,Yudia kala kini, isisu taitala tolula yagala Sekaraia. E matauna iwotetila olumoulela mabudona Abia la boda. Sekaraia la kwava yagala Ilisabeta, minana dalela Eroni.⁶Kasitaiyu si bubunela duwosisia omatala Yaubada; ikabikaulasi Guyau la karaiwaga komwaidona, vavagi kwevakaveka deli kwekikekita, e gala kwaitala kasi pakula.⁷Kwaitala vavagi, gala litusia paila Ilisabeta nakaliga, e kasitaiyu wala eitomoya tau einumoya vivila.⁸Kwaitala yam Sekaraia iuwotetila lula kala paisewa omatala Yaubada, la boda ola tuta.⁹E makawala kasi gulogula tolula eikowobobutasi ikibuboti kala naga bisuvi ola Bwala Kwebumaboma Guyau bigabu maiina simasimina okabogwabu lula.¹⁰E kala tuta gubugwabu maiina simasimina tomota tobobawa ininigadasi okoukweda.¹¹E la anelosi Guyau iyoumatila baisa matauna. Itotu okakata kala kabolula maiina simasimina.¹²E tutala Sekaraia igisi matauna, iyowa lopola, e saina ikokola.¹³Mitaga anelosi iluki matauna, kawala, “Sekaraia, taga kukokola, paila Yaubada bogwa leilagi m nigada; e m kwava Ilisabeta bivilulu latum tau, e bukudoki yagala Yoni.¹⁴E bukumwasawa e bimwamwasila nanom, e bidubadu bimwasawasi paila la kaloubusi.¹⁵Paila matauna bitoveka omatala Guyau. Bomala bimom waini kaina sopi kaipeula. E metoya ola tuta kaloubusi Baloma Tobumaboma bivakasau matauna goli.¹⁶Matauna bimai bidubadu mina Isireli bikaimilavausi baisa Guyau si Yaubada.¹⁷Bilobogwa omatala Guyau. Matauna goli Yaubada la touwata, saina topeuligaga makawala Ilaitia.Bikivili ninasi tomota bimwasilasi deli litusia, e bikivili ninasi tokapidakala bininanamsasi makawala tomitukwaibwaila; bikatunagi Guyau la tomota goli.”¹⁸E Sekaraia iluki anelosi, kawala, “Ammakawala banikoli baisa? Paila bogwa latomoya, e ulo kwava bogwa leinumoya.”¹⁹E anelosi ivitakauloki matauna, kawala, “Yeigu Geberiela, atotu omatala Yaubada; e iwitalaigu kidamwa balivala baisa yoku e bamiakaim bulogala bwaina makwaina.²⁰Mitaga yoku gala lokudubumi ulo biga, e baisa gala goli bisala. Paila bikaloubusi okala tuta goli. Gala kudubumi e mapaila bukukutabu, e gala gagabila bukulivala avaka igau yam makwaiwena vavagi makwaina bikaloubusi.”²¹E tomota itutulaisi Sekaraia, itutu uwosi paila isisu tuta kaduwonaku olumoulela Bwala Kwebumaboma.²²E tutala isunapula gala gagabila bilivala baisa matausina; mapaila ikatetasi kidamwa bogwa leigisi kilisala wa Bwala Kwebumaboma; oyamala ililivala baisa matausina mitaga gala avaka bibigatona.²³E tutala leiwokuva la wotetila,ikaimilavau ola bwala.²⁴E oluvi Ilisabeta Sekaraia la kwava isuma, ikikiwoli titoulela nalima tubukona, kawala,²⁵“Lagaila goli Guyau bogwa leipilasaigu, makawala mwada biligaiwa agu mmosilaomitasi tomota.”

Anelosi ivitububoti la kaloubusi Yesu

²⁶E minana Ilisabeta kala tubukona nalima natana, Yaubada iwitali anelosi Geberiela ila kwaitala valu mapilana Galili,yagala Nasaredi.²⁷Ilokaia natana vilakapugula yagala Meri. Minana leipakusi sola taitala tau yagala Yosepa, dalela Debida.²⁸E anelosi imakaia minana, iluki, kawala, “Vakota baisa yoku!E bukumwasawa, paila Guyau leibodaim.”²⁹E iyowa lopola paila la biga, e ininanamsa avaka uula leilivala makawala.³⁰E anelosi iluki minana, kawala, “Meri, taga kukokola, paila Yaubada leimitukwaiyaim.³¹E ka, bukusuma, bukuvilulu latum tau, e bukudoki yagala Yesu.³²Bogwa bitoveka matauna, e bidokaisi matauna Yaubada Towalakaiwa Sainela Latula. E Guyau Yaubada bivigaki matauna guyau makawala tabula Debida,³³e bikaraiwogi dalela Yekobe yumyambwata, e la karaiwaga bikanigaga.”³⁴E Meri iluki anelosi, kawala, “Ki, ammakawala baisa bikaloubusi? Paila gala navavaigila yeigu e gala akakapugula.”³⁵Anelosi ivitakauloki minana, kawala, “Baloma Tobumaboma bikubolaim, e la peula Towalakaiwa Sainela bivakanunuvaim; mapaila magudina tobumaboma bukuvilulubidokaisi Yaubada Latula.³⁶E ka, inam tuwala Ilisabeta eidokaisi nakaliga; mitaga leisuma igau bivilulu latula tau; e baisa tuta kala tubukona nalima natana, e minawena eivinumoya goli!³⁷Paila vavagi komwaidona gagabila wala baisa Yaubada.”³⁸Meri ikaibiga, kawala, “Ka, yeigu la nawotetila Guyau; ibodi bikaloubusi baisa yeigu makawala m biga.” E anelosi isilavi minana.

Meri ibodi Ilisabeta

³⁹Igau oluvi Meri itokaia, inanakwa ilokaia wa koya ovalu kwaitala mapilana Yuda;⁴⁰isuvi ola bwala Sekaraia e ibodi Ilisabeta.⁴¹Tutala Ilisabeta ilagi Meri la biga, gwadi ivilavala olopola; e Ilisabeta ivakasau Baloma Tobumaboma⁴²e kaigaveka ikaibiga, kawala, “Yaubada eimitukwaiyaim, e yoku bukukwalisau vivila komwaidosi uula kam mitakwai. Yaubada bimitukwai gwadi igau bukuvilulu!⁴³Ammakawagu, paila yoku inala ulo Guyau lokubodaigu?⁴⁴Paila ka, tutala alagi m nokagutoki, gwadi olopogu ikanuvivila paila la mwasawa.⁴⁵E yoku bukumwasawa paila lokudubumi kidamwa avaka Guyau leikatotila baisa yoku gala bisala.”⁴⁶E Meri ikaibiga, kawala,“Yeigu aiyakawoli Guyau,⁴⁷e bilomagu imwasawa baisa Yaubada agu Tokwatumova,⁴⁸paila leigisaigu yeigu la nawotetila saina watanawa.Paila ka, metoya wa tuta baisa golitubwa komwaidona bidokaisi Yaubada leimitukwaiyaigu.⁴⁹Paila matauna Topeuligaga bogwa leivagi vavagi kwaiveka paila yeigu,e matauna yagala bumaboma.⁵⁰Inokapisi baisa matausina availa availa itemmalaisi matauna,metoyasi baisa avai tubwa avai tubwa.⁵¹Bogwa leivitukoli yamala kwayapeula,bogwa leiyobutu todubakasala deli ninasi kwevakaveka.⁵²Bogwa leivabu gweguya metoya osi takaikaia,e tokai leilupi walakaiwa.⁵³Bogwa leivakoma tokwamolu itubwa luposi metoya wa kaula bwaina,e matausina si guguwa bidubadu leiyabi deli kasi molu.⁵⁴Bogwa ivagi makawala eikatotila baisa tubudoiasi.Bogwa leipilasi la towotetila Isireli.⁵⁵Eiluluwai binokapisi Eberaam,deli goli dalela, yumyambwata.”⁵⁶E Meri isisu deli minawena kaina biboda tubukona natolu, e ikaimilavau ola valu.

Ilisabeta ivilulu Yoni Tobapitaisi

⁵⁷Ilisabeta tuta matutona bitapoi yamala; e ivilulu latula tau.⁵⁸E sala deli veyala ilagaisi kidamwa Guyau ivituloki la mitakwai kwaiveka baisa minawena; e imwasawasi deli minawena.⁵⁹Yam kwailima kwaitolula imaisi kidamwa bibobwaisigwadi; e mwada bidokaisi yagala Sekaraia makawala yagala tamala,⁶⁰e inala ivitakaula, kawala, “Gala makawala; mitaga bitadokaisi yagala Yoni.”⁶¹Ilukwaisi minana, kawasi, “Gala taitala vaiyom ivabwaisi yagala makawala baisa.”⁶²E oyumasi ikikavasakisi ikikatupoiyaisi tamala mwada avai yegila bidoki magudina.⁶³E inigada pilatala kaboginigini, e igini makawala, “Yagala Yoni.” E komwaidosi itutu uwosi.⁶⁴E nanakwa Yaubada itaneku wodola Sekaraia deli mayela kala sipu, e ilivala iyakawoli Yaubada.⁶⁵E sesia ikokolasi. E wa koya mapilana Yudia komwaidona ililivalaisi vavagi makwaisina komwaidona.⁶⁶E komwaidosi matausina ilagaisi mabigasina, itakwaisi oninasi, e ikaibigasi, kawasi, “Avaka bivagi magudiwena gwadi?” Paila Guyau la peula isikaili matauna.

Sekaraia ivitoubobuta

⁶⁷E tamala Sekaraia ivakasau Baloma Tobumaboma, ivitoubobuta, ikaibiga, kawala,⁶⁸“Bitayakawoli Guyau, Isireli la Yaubada,paila bogwa imakaia la tomota, e itaneku matausina.⁶⁹E bogwa ilupi Tokwatumova topeuligaga paila yakidasi,matauwena dalela la touwata Debida.⁷⁰Makawala ilivala omitibogwa metoya oudosi la tovitoubobuta mina bumaboma,⁷¹ikatotila bikolaidasi metoya kada tilaulasi,e metoya oyumasi komwaidosi availa availa ikoulovaidasi.⁷²Ikatotila tuvaila bivituloki la nokapisi baisa tubudoiasi.E biluluwai la kabutu bumaboma,⁷³kabutu makwaina ikatotila baisa tabudasi Eberaam.⁷⁴Bitagwala bikolaidasi metoya osi peula kada tilaulasi,e bitagwala bitawotitalaisi matauna gala kada kokolasi,⁷⁵deli bubunela bumaboma toyo mitukwaibwaila,oda tutasi komwaidona baisa ovalu watanawa.

⁷⁶“E yoku latugu bidokaimsi la tovitoubobuta Yaubada Towalakaiwa Sainela.Paila bukukugwaiwa omatala Guyaubukukwatubiasi la keda paila matauna.⁷⁷Bukuluki la tomota kidamwa Yaubada biligaiwa si mitugaga e bikatumovi matausina.⁷⁸Paila da Yaubadasi tonokapisi deli tomanum,bivigaki katumova biyuwoula makawala kalasiae bivisigilaidasi metoya walakaiwa.⁷⁹E bivisigili matausina isikailisi odudubila toyo kaliga Okaikonigulela,e bivakadaidasi bitalosi okedala vakota.”⁸⁰E gwadi ikatusaili itowonaku e nanola ipeula; isisu oviloupakala,igau yam makwaina biyoulapula baisa mina Isireli.